لە دینی دڵبەری مندا وەفا قاتە جەفا باوە
پڕی دەعوان بەجووت شمشیری ئەو دوو ئەبرۆ ڕاکشاوە
لە لای کام ساحیری سەححار مەقامی ڕوخسەتی گرتۆ
وەها فێری شکاری عاشقانی سینە برژاوە؟
لە گەڵ من هەر دەمەو جۆرێ دەنوێنێ فەننی دڵکێشی!
چەلێ چاوی وەکوو بازن،دەمێ زولفی هەموو داوە
دەس وخامەی بەشەر ئەو نەخشە ناکێشێ عەیانە لێم
سەریان سووڕ ماوە بیرمەندان کە چۆن ئەو نەخشە کێشراوە؟!
خوداوەندا بکەی ڕەحمێ بە حاڵی عاشقی شەیدای
کە دوێکە بای شەماڵ زولفی ترازکان حاڵی گۆڕاوە
سەری زولفی دەبێ چەوگان بێ وا من بۆتە گۆ کەللەم
هەمۆ دوێ شەو هەتا ڕۆژ بۆوە من هەر کەللەم دەخولاوە
لە گەڵ تارو کتێب و مەی دەبم فیکری لە گیانم دا
لە حەوشەی دەچمە کۆڵانێ لەوێ ئەو شۆخە وێستاوە
بڕۆ حاتەم کە خۆت بوویە شکاری چاوی چاو بازێ
گەلێکم پێکوتی شاعیر لە خەتی سوورە لات داوە.

حاتەم مەرزەنگ
20 موردادی 1402

نیوەشەو ڕۆیو سەحەر هاتو دڵم هەر ناسرەوێ
دیدەکانم مەنگی خەو بوو ون خەیاڵ داناکەوێ

سواری شاباڵی خەیاڵم دوند بە دوند و کۆ بە کۆ
شار بە شارو گوند بە گوند دەمبا دەمێکی نانەوێ

سەیلی ئەسرم ئاژنی دەشتی دڵ ومەزرای ڕوحە
هەوری غەم گرتوویە کێوی سەر، دەمێکی ناڕەوێ

داری عەشقت وای لەدڵما ڕیشە داداوە گوڵم
باڕەشی جەورت هەزار جاری تر لێیدا ناکەوێ

ڕۆژ کە بۆوە هەر دەبێ چاوم لە کۆڵان بێ گوڵم
ئاخۆ کەی شەو دێتەوە مانگی نەوی من دەرکەوێ
خۆت دەزانی چیت لە حاتەم کردۆ بەو ڕەفتارەوە
ئەی ستارەی سوبحدەم دەی بیخەبۆلام پەرتەوێ.
حاتەم سەراوی
، 21 ی گەلاوێژی 1402
@Hatam_marzang

گوندێکی دڵکەش و هەراو
لە ژێر ناوی بەرزی سەراو
لە باوەشی تەپکەو کێودا
زاڵ بەسەر دەشتی خۆشنێودا
قەڕاوڵخانەی قەڵایە
سەرچاوەی لە ناو دڵایە
کۆخابازە پیلی ڕاستی
ڕۆستەم زەلیلە لە ئاستی
پیلی چەپی کۆت وشاڵوار
چەقەڵ لێی دەکەونە هاوار
داخم جوانی زووی تێدا چوو
دەگرین پێکەوە دوو بە دوو
من دەگریم بۆ مەرگی جوانی
ئەو دەگری لە بێ ویژدانی
من دەگریم لە دەس قیڕەی قەل
ئەو دەگری بۆ بێدەنگی مەل
من دەگریم کەر ناڵی زێڕە
ئەویش دەگری بۆو چەند دێڕە
من دەگریم لە دەس زەڕەی کەر
ئەو لە دەس چەقەڵی بەدفەڕ.
حاتەم 22ی گەلاوێژی 1402

@Hatam_marzang

نایەتە کۆڵان نازێ کۆڵان چۆڵو بەیتوونە
هەوری کەزێی لانادا خۆ وەختی مانگ دەرچوونە
گوند تاریکی دایدەگرێ یار مانگی ڕووی نەنوێنێ
یار نەبێ گوند وێرانە کوندە بوو لێی ناخوێنێ
بە قەت کۆڵان ماڵی دڵ دڵتەنگی پێوە دیارە
نازێ تۆ بی جوانێکەت بێرە کۆڵان ئێوارە.

حاتەم سەراوی
22ی گەلاوێژی 1402
@Hatam_marzang

لە هەنگوێن وشەکەر چیمە کە هەمبێ لێوی شیرینت
بە سەودا یەکسەرە جەننەت کەمە بۆ ڕووی نیگارینت
منم ئەوڕۆکە وەک بەندی لە ژێر پێتا مەلوول و مات
وەهات بادا لە ئەستۆ و دەست وپام ئەو زولفی چین چینت
گوڵم ڕەنگێ لە چین ڕا دێن لە کۆێ لایق بە پەنجەی تۆن
وەرە خوێنی جگەر بڕژێنە بیدە پەنجەی ڕەنگینت
کراسی یوسفە بۆ چاوی ڕوحم خوا ئەگەر بیکا
نەسیم عەتری کەزێت بێنێ لە گەڵ بۆنی عەرەق چینت
ئەگەر ڕەندانی عاشقی چەشنی من بڕواننە باڵات
دەزانن حەقە سووتاوم لە سۆی ئەو قەسری پۆشینت
لە وەندە بێ وەفایی شۆڕە ژن فەردا پەشیمانی
دەزانم دێیە سەر مەیتی گراوی شێت و مسکینت
لە لای خۆی خەسرەوێ بووم ڕۆژێ لەو سەر دەوڵەتی ئیشقە
ڕەبی ماڵی خرا بێ تێکی دا شۆفاری بێ دینت.

23ی گەلاوێژی ساڵی 1402ی هەتاوی
حاتەم مەرزەنگ
@Hatam_marzang

سێ ڕۆژ لە مانگی ڕەشەممەی ساڵی 1359 تێپەڕیوە،سەهۆڵی پتەو وئەستووری جستانێ هەر پێداگرەو خۆی بە سینگی عەرزەکەوە مەڵاس کردۆ،ئاوایی سەراو لە بەرزایی و بە باوەشی کێوەکانی ئاندووزاوی و قەڕاوڵخانەو کۆخاهەباسە هەڵکەوتۆ،جستانانی ساردو باگرو هاوینانیشی فێنکە.
کۆڵانەکانی ئاوایی بە گشتی سەهۆڵبەندان و لە بن دیوارەکانیش بەفر ماوە.
دوکەڵی تەندووری ماڵان لە کولاوەکەی سەبانانەوە بەڕەو بەرزایی ئاسمان لوولە بوونوو هەڵدەکشێن.
قاوەڵتوونە،تاو وەبانان کەوتۆ،بەربەڕۆچکان تاو ئەنگاوتوونی و لێر و لەوێ خەڵکی ڕاوەستاون و خۆیان وەبەر تیشکی کزو لاوازی خۆر داوە.
تفاق لە کەمی داوەو و ماڵات کزو بێ هێزن.کادێن فراوان بوونەتەوە، کەندۆ ئارد بە تاڵ بوو ون.
جستانێکی سارد ودرێژ بەسەر داهاتۆ،مانگێک پایزی مابوو بەفر حوکماتی خۆی دەست پێکردەوە.
ئاوی سەرچاوەی سەراو جستانان گەرمەو نایبەستێ،ئەگەر بە ڕووتی بچێ نێوی سەرمات نابێ.
باجی تووران،لە گەڵ تەندوورەکەی نێو ماڵەکەی حەوشەی خوارێ،تەندووری دیوەکەی نەنە زێنەبیشی داخستۆ،دووکەڵ وئاگری بە گوڕ تەواو بوو ون.
حاتەم
درێژەی هەیە

نەنە زێنەب
زێنەبە ڕەش.
کەسایەتی دیاری کتێبی بیرەوەرێکانی سەراو.
ڕوحی شاد بێ.
لە تەمەنی شەش ساڵانەوە وەبیرم دێ زێنەبە ڕەش خۆشەویستی هەموو گەڕەک بوو،ماڵەکەی جێی حەسانەوە بوو.نەنە زێنەب ئازاری زۆری ژیانی چێشتبوو مەرگی تاقانەکەی بە جەوانی دیتبوو،کاتێ من شەش ساڵان بووم ئەو لە تەمەنی پەنجا بۆ شێست دابوو.
حاتەم

من گەلێ لەو وێنەیەم غەمبار ترم
دەردو ئازاری گەلێکم گرتە کۆڵ
من لەبووکی ئازادی گەل دەگەڕێم
شاربەشاروگوندبەگوندودۆڵ بەدۆڵ
بۆیدەخوێنم دەرسووانەی مەدرەسە
دەچمەشاروئاوەدانی ودەشتی چۆڵ
تا دەمارم خوێنی تێدا بێ و وەزە
سوورمەی چاون لەم وڵاتەخاکوخۆڵ
ناحەقم نێ گەر پەنا بۆ مەی دەبەم
بۆتە شێر لەو نێوەدا ڕێوی گەڕۆڵ.

حاتەم مەرزەنگ،جستانی 1400

هەوای گریان

هەوری چاوم ئەوشۆ دیسان مەیلی گریانی هەیە
مەدرەسەی ئیحساسم وانەو مەشقی بریانی هەیە
شەو زرینگاوەتەوە تەزووم پشتی ئەنگاوتووم
شەوە، شەوبا مەیلی هاوپەیمانی زریانی هەیە
من بە دووربینی خەیاڵ ئەمشۆ لەدوور دەڕوانم
ڕۆستەی دڵ ئەمشۆ مەیلی فەتحی حەوخانی هەیە
کۆتری خەم ئەوشۆ نیشتۆتەوە سەر داری دڵم
غەمی دووری دڵبەرە، دڵ، بەڵێ میوانی هەیە
هێندە دەگریم لە غەمی هیجرو جەفای ئەو شۆخە
وەک بڵێی دڵ ڕۆستەمە، کەڵ کەڵەی مەیدانی هەیە
لە فیراقت دا گریان و غەم بە چۆک داهێنان
قارەمانە دڵی من ڕۆستەمی داستانی هەیە
تا کوو تۆ دێیەوە کۆڵان و بزەت دێتەوە لێو
ئاسمانی چاوی من هەر هەوری گریانی هەیە.

29ی خەرمانانی 1402
حاتەم مەرزەنگ
https://t.me/httpshatammarzang

https://t.me/httpshatammarzang

چارشێوی شەو

با لەگەڵ غەم بچمە نێو چارشێوی قورسی شەوەوە
بەڵکوو خەو بمباتەوە دیسان بە فکری ئەوەوە
پڕ لە یادی ئەو بێ با نوێنی شەوی پڕ فیکرم
دڵ لە یادت دا ونە بە چاوی شەیدای خەوەوە
وەرە کۆڵانێ گوڵم ماوەیەکە نەمدیوی
ئاوری تێبەردە فکری کۆن، بە فکری نەوەوە
وەرە هەنگاوت هەڵێنە بەسەر جۆگەی چاودا
دەستم ناتگاتێ گوڵم تۆ لەوبەر من لەوبەرەوە
خۆ دەزانم هەموو ڕۆژ دەرگای حەسار ئاواڵەن
کەچی نابینم دەرزێ لە گۆشێکی پەنجەرەوە
بۆتە جەننەت گوڵەکەم کۆڵان سەرێ تا خوارێی
هەر دەڵێی باغی گوڵە کە تۆ دێی بە مەنزەرەوە
مەلی ئاشق سڵی قەت نابێ لە ڕێ ژوانی گوڵ
ئەنجن ئەجن بێ هەموو گیانی بە دەم خەنجەرەوە.

1شهریور 1402
حاتەم مەرزەنگhttps://t.me/httpshatammarzang

https://t.me/httpshatammarzang

سروە گیان

چاوەکانت ئاسمان، دڵ کۆتری تەقڵە سروە گیان
ئەو دڵە هەر ماڵی تۆیە، بۆ تۆ شەقڵە سروە گیان
من لە مێژە چاوەڕوانم بێیە کۆڵان سروە گیان
لێگەڕێ لەو داستان و باس و نەقڵە سروە گیان
سروە گیان تۆ هێزی گیانی سروە گیان
تا بەکەی نا مێهرەبانی سروە گیان؟؟؟

سینگی تۆ دەشتێکی پڕ شەهدو گەڵاوگوڵ سروە گیان
دڵی من هەنگێکی مەست و شەیدا و کامڵ سروەگیان
عادەت و زیکرو عیبادەت بۆ تۆ باتڵ سروە گیان
تا بە کەی ئێوارێی کۆڵان شاعیر ماتڵ سروە گیان
سروە گیان سۆمایی چاوی سروە گیان
خۆشە جارێ دڵنەوایی سروە گیان

سروە گیان باوەڕ مەکە بێ تۆ دڵی من بسرەوێ
چاو دەنوون شەو سوێند بە چاوت دڵ دەمێکیش ناخەوێ
سروە گیان کۆتری دڵم پەروازی ئاسمانی دەوێ
لێگەرێ هەنگی دڵیش ساتێ لە باغت داکەوێ
سروە گیان بێ تۆ ژیانم ژارە ژار
سروە گیان ئاوڕێ وە من دە جارو بار.
3ی گەلاوێژی ساڵی 1402ی هەتاوی
3ی گەلاوێژی 2723ی کوردی
حاتەم مەرزەنگ

https://t.me/httpshatammarzang


https://t.me/httpshatammarzang

وەرە کۆڵانێ ئازیزم هەموو ئێوارێێ جارێ
بەڵا دووربێ لەباڵات دوژمنت دەک بەردی لێبارێ
لە بەر تۆیە لە گوند گیرم لە نێو ئەو خەڵکەدا ماوم
دەنا وەڵاهی مانم لێرە بۆ من عەینی بێگارێ
لە گەڵ هاومەسلەک وهاوبیرو هاوفیکرت نەبی وەڵا
لە هەر کوێ بی ژیانت ژانە،شیرنی ژەهرە،ساتت ناچارێ
لەبەر عەتری کەزێ و نیگای نەرم و شیرینت لێرەم
دەنا عومرم لەگەڵ ئەوخەڵکە وەک مۆم داتکێ خوارێ
ئەوەندە دڵ ڕەش و بێ هەست و بێ سبفەت وئەخلاقن
ئەوەندە لاتن،لاتن،دوور کەون لێت،وەک سەگە هارێ
پەلامارت دەدەن و دەتگەزن ئێسکیشت دەکرۆژن
بەڵێ قوربانت بم، قوربان ژیانم لێرە ناچارێ
دڵێکم بوو ئەویشم دا بە تۆ هێستا بە دەست تۆیە
دەوای کەی یا شەفای کەی بیکوژی یان،دەردی یەکجارێ
لە حاتەم گەر بپرسن حاڵەتی چۆنە بە دەس تۆ وە
دەڵێم قوربان وجوودم پەستی دەردی بێ پەرەستارێ.

4ی گەلاوێژی 1402
حاتەم مەرزەنگ
https://t.me/httpshatammarzang