قەڕاوڵخانەی سەرفەراز
کانگای ئەوین،قامووسی ڕاز
شکۆ وهەیبەت،سام وبەسام
ژوانگەی من و شیعری بەتام
ڕووسوور،سەربڵیند بەشکۆ
یاری بێ غەش بۆ گوفتوگۆ
قەڵای خۆڕاگری سەراو
لە هێرشی دژو سێڵاو
ئەوینت لە دەمارمدا
نێوت وێردە لەزارمدا
بە تۆوەیە بوونم،مانم
ئەی گڵت سوورمەی چاوانم
حەیفە بێ هەڵۆو تەوار بی
شوێن چەقەڵ وگورگی هاربی
حاتەم تا دوا پشووی ژینی
تۆی قیبلەیە بۆ ئائینی.

حاتەم جۆزەردانی
1403
https://t.me/Hatam_marzang

بۆ کۆڕی دۆستانی سەراوی لە چۆمی کانی کووزەڵە(جەغەتوو)


لە ڕۆژانی ڕابردوو دا ڕێک کەوت بە هەڵکەوت
ڕێم لە نێو کۆڕی ڕەفیقانی سەراوی کۆن کەوت
بە چخۆش و دڵگوشا بوو کۆڕو گوفتی دۆستان
تۆ تەماشاکەن لە بەختی من ئەو ڕۆژەم چۆن کەوت
هەرچی دەردو داخی کۆن و تازە هەمبوون یەکسەرە
ئەو سەعات و دوانە لایانبووم بە یەکجاری خەوت
هێستێ دانیشتوومو هەینێ و یادی یارانم دەکەم
دڵ وەکوڵ هاتوو زنەی چاویش تکەی هات نەسرەوت
ئەی خودا چەن خۆشە نێو کۆڕی ڕەفیقی با وەفا
ئەو کەسەی نەیبوو وەفا لەو ژینەدا چی دەس کەوت
یادی یارانم بەڕێزو حورمەتیان هەر زۆرە لام
شیوەنێکم کرد بە تەنیا جا دڵی شێت داکەوت
ئەی ڕەفیقان کۆڕەکانتان گەرمو گوڕترکەن هەتا
بۆ شەوەی مەرگ و نەمان ئێمەش نەبووینە دەس کەوت.

25ی جۆزەردانی 1403 سەراو
حاتەم

https://t.me/Hatam_marzang

لە نێو دەردو غەمو ئازاری ڕۆژگاردا بە جێ ماوم
لە دەس جەورو جەفای ئەو دڵبەرە نازدارە شێواوم
کە ئێواران لە من دادێ چەق و چۆ دەمگرێ پەی پەی
دەلەرزم، دادەچۆڕێم ڕاست بەچەشنی شەپڵە لێداوم
سەرم سووڕماوە ڕۆژێ مایلە ڕۆژێکی تر تۆراو
تەمام بوو ڕاوی کەم ئەمما دەبینم هێستێ خۆم ڕاوم
ئەرێ ئەی شۆخەکەی لادێ هەتا کەی حاڵەتت وابێ
لە بەر کەس دامنەخستۆ سەر،لە حاند تۆ چەندە داماوم
ئەوەندەی چاو دەگێڕم قەت لە تۆ جوانتر بەدی ناکەم
وەرە ئامێزی پڕ ئەشقم وەرە پێڵاوت سەر چاوم
بە چاوی شەرمنت سوێند بێ کە دیمی دوێنێ ئێوارێ
لە من وایە بروسکە داوێ لێم پێم سەیرە وا ماوم
کوتم حاتەم لە بەر نێزەی موژەی ئەو شۆخە خۆ ناگری
کوتی نا کاکە من کوردم سومێریم، مادیم، خاراوم.

بۆکان،،،26ی جۆزەردانی 1403
حاتەم مەرزەنگ

https://t.me/Hatam_marzang

بەرگێکی تر لە یادەکانی سەراو.

چەکمە سوورەکانم.

نازانم تەمەنم چوار یا پێنج ساڵان بوو یان کەمتر
باوکم کە پێمان دەگوت مامە جووتێ چەکمەی سووری جیری بۆ کڕیبووم.
ئەوێ سەردەم لە حەوشەدا پێنج تا حەوت نێوماڵ و وەتاغ و عەمبارو ئەوانەمان بوو ئەوکات لە نێو ماڵاندا لەجیاتی کومۆدی دیواری ئەم تڕوتەوێڵانە تاقەی ڕێک وپێک وڕەفعەی جوانیان لە دیواری ژوورەکاندا دادەبڕی کە بەڕاستی جوانیش بوون.
تاقە و ڕەفعەجێی کەل و پەلی بەقیمەت و چرا گڕسۆزو دەنمرە و لامپا و چراتۆر بوون.
بەڕاستی ئەو تاقەو ڕەفعانە هەمیشە لە بەر چاومن و بزر نابن،هەزارو هەزار خۆزگەم بەوێ سەردەم.
من لە خۆشی چەکمەسوورەکانم پێم بە عەرزەوە نەدەنووسا،کەوشە دڕاوەکانم لە پێ دەکردن و چەکمەی سوور لەباوەش سەردانی گەڕەکە ماڵێکم دەکرد، ماڵی کاکەریم و دادەنازەنینی خێزانی(کەریم قورمیشی) ماڵی خاڵە ئەحمەدی یاری،ماڵی نازداری ژنی مەنافی ڕەحمان شامە،ماڵی مێرزاکەریم،ماڵی پوورە روقیام و........
لاقم لەوانەبوو سەرما بیبا دڵم نەدەهات لە پێیان کەم.
نەخێر ئەو هەتیوە عیلاجی نایە ئەو چەکمانە لە پێ ناکا،چار چێ؟
بە تووڕە بوونو پاڕانەوە عیلاجم نەدەهات.نا عیلاج مامم جووتێک چەکمەی ڕەشی بۆ کڕیم،سوورەکانم کەوتنەوەی ساڵی داهاتوو.
جا یەکێک لە تاقەکانی وەتاغی میوان و تەریکم تەرخان کردبوو بۆ چەکمە سوورەکانم.ئەمن منداڵێکی گرینۆک،ترسەنۆک و زۆر وابەستەی دایکم بووم،لە ماڵێشدا بەڕاستی زۆر نازدارو خۆشەویست بووم ئەلانیش هەرگرینۆک و دڵناسکم کەمتر وا هەیە شیعربهۆنمەوەو دەگەڵی شینێکی پڕ لە فرمێسک و هەنیسک نەگێڕم،کەم واهەیە گۆێ بدەمە مۆسیقا و نەگریم ئەوەندەی بزانم شاعیران زۆریان وان.ئەوەم لێ ڕوونە مامۆستا هێمن لەگەڵ شیعرەکانی دەگریا و مامۆستا ئاسۆش ئەو دەردەی لەگەڵە.
جا بەتایبەت لە گەڵ نووسینەوەی بیرەوەرێکانی سەراو گریان دەمگرێ ئەمان گریان خودا بە نەسیبی دوژمنتی کا.


سەراو،،حاتەم سەراوی

https://t.me/Hatam_marzang

ئەم وێنەیە بەهاری ساڵی1356ی هەتاوی لە باغەکانی محانەی سەراو گیراوە نازانم کامێرەوان کێ بۆ.
بە پێوە ڕاوەستاوەکان لە ڕاستەوە:

1.:محتەڕەم مەرزەنگ2 :کۆچکردوو توبای خانم ڕەحمەتی خێزانی کاک عەلی دەرۆشی.3:حەنیف مەرزەنگ.
دانیشتۆکان

1:منداڵەکە شەهێن دەرۆشی کچی عەبەڕەشی سەراو2 :
سنۆبەر مەرزەنگ.
لە گەڵ پۆلێ شەپۆلی پڕ هەنیسک و شیوەن وئەسرین
من و شیعرو قەڵەم بۆ عومرەکەی زوو هاتو چوو دەگرین
دەڵێی فیلمێکە ڕابردوو،دەڵێی خەونێکە هاتوو چوو
بەچاوی پڕ لە ئەسرو حەسرەتا تێکەڵ خەیاڵ دەفڕین.
حاتەم سەروی

لە گەڵ پۆلێ شەپۆلی پڕ هەنیسک وشیوەن و ئەسرین
من و شیعرو قەڵەم بۆ عومرەکەی زوو هاتوو چوو دەگرین
دەڵێی فیلمێکە ڕابردوو،دەڵێی خەونێکە هاتوو چوو
بە چاوی پڕ لە ئەسرو حەسرەتا تێکەڵ خەیاڵ دەفڕین
لە سەر لوتکەی هەزار پلەی تەمەن سەر سام و کاس و وڕ
لە گریەو پێکەنینا غەرق دەبین و چەشنی شەم دەگڕین
بە نێو کۆڵانی پڕ پێچ و خەمی ڕابردوو دا دەخزێین
لە سینەمدا لە سەر ئەو سینەمایە پەردە هەڵدەدڕین
هەزار داڵانی توودەرتووی تەمەن دێین و دەچین دیسان
لەگەڵ ئەو کۆترەی تەبعم خەفەت نامەی ئەسەف دەچرین
دەڵێم ئەی عومری ڕابردوو،دەڵێم ئەی چەرخی ناهەموار
چ نەفعێکی بە تۆ داوە لە ئازیزان کە داببڕین
تەمەن زۆر کورتە،ڕابردوو بە چاو قوچاندنێک ڕۆیی
دەڵێم: حاتەم بە یارانت بڵێ با قەدری یەک بگرین.

27ی جۆزەردانی ساڵی 1403ی هەتاوی
سەراو حاتەم سەراوی

https://t.me/Hatam_marzang

خۆشەویستیت



ڕۆمانێکە،

ساڵانێکە،

خەریکی نووسینەوەیم

کۆتای نایە،بێ کۆتایە

نووسەرەکەی ئەم کتێبە

لە بێگەردی کتێبەکەی

دڵنیایە

دڵنیایە.

حاتەم

بۆکان 30 ی جۆزەردانی 1403

https://t.me/Hatam_marzang

کۆڵانی قەدیم جێی دڵداری بوون
جێی گلەوگازەوشیرین کاری بوون
پاش نوێژی عەسر دەمو ئێواران
پێیدا دەهاتن پۆل پۆل دڵداران
بۆنی مێخەکی کێژانی ڕوو گەش
عەقڵی لاوانیان دەکرد پەرت وپەخش
پیران دەهاتن کاتێ بۆ کۆڵان
دەیاندی بزەی بازنە لە قۆڵان
دەکەوتنە یادی سەردەمی لاوی
سەردەمی پاکی وبێگەردی وخاوی
وەک ئاوی ناو جۆ تەمەن تێپەڕی
گەڵای سەرچڵی لاوی هەڵوەری
هێستا غەرقاوی ناویادەکانم
هاتۆتە سەرکوڵ مەنجەڵی گیانم
ئەسرین دەبارێن لە دیدەی جوان خواز
هەواری غەمە دڵی مەکۆی ڕاز

1ی خەرمانانی 1403 سەراو
ئێوارێی هەینی حاتەم
https://t.me/Hatam_marzang

گۆڵەخەزاڵی بێ وێنە
لە ڕاودا نێچیر تاسێنە
مەحاڵە نێچیر دەرباز بێ
لە دەشتان یا لەهەوراز بێ
گوێی گوێ لاران دەپەڕێنێ
ماڵێکی وەسەر گەڕێنێ
پەلاماری تەماڵ نادا
خۆ لەڕاوی مناڵ نادا
سایەقەیە،باشۆ،بازە
هەڵۆی تیژ باڵی پڕ ڕازە
دۆستێکی زۆر باوەفایە
هاواڵێکی بێ هەوایە
پڕ بەدڵم خۆشم دەوێ
شۆرباو دەخوا هەمووشەوێ
لەگەڵ مانیسا هاوڕێیە
چیرۆکی خۆشیانم پێیە.
حاتەم سەراوی