کلامی زنجانی

باشندا قاره ـ اورکده یاره
گیدن مزاره ـ رقیه لای لای
منی آتوبسان ـ نه خوش یاتوبسان
ایدیم نه چاره ـ رقیه لای لای


گولوم سارالدون ـ نه حاله قالدون
او قانلی باشی ـ قوجاقه آلدون
حالون پوزولدی ـ قولون یورولدی
منی غمونده ـ بلایه سالدن
رمق قوتولدی ـ سسون دوتولدی
قناری تک پر ـ قفسده چالدون
بلورسن ایندی ـ غمون چتیندی
بو بیقراره ـ رقیه لای لای


گوزل نگاریم ـ اوچ ياشلى یاریم
خزانه دؤندی ـ منیم بهاریم
ئوزون بلورسن ـ که بیکسم من
نه وار معینیم ـ نه غمگساریم
حجازه گیتسم ـ دوباره گلّم
فراقهه دوزمز ـ بو قلب زاریم
دور ایله افغان ـ گنه یات ای جان
دیوم دوباره ـ رقیه لای لای


واریم نه قارداش ـ نه یارو یولداش
کمکسیز عمّه ن ـ ئولیدی ایکاش
دمِ نواده ـ شب عزاده
گتوردی قاصد ـ طبقده بیر باش
گوزیوی سیلدون ـ باخاندا بُلدون
دگوب جداده ـ او باشه بیر داش
مراده یتدون ـ نوازش ایتدون
او تاجداره ـ رقیه لای لای


آچلسا یولّار ـ بو باغلی قولّار
گیدر مزارِ ـ حسینه زوّار
سوروشسا اکبر ـ نجولدی خواهر
گوزوم قان آغلار ـ اؤرک سیزیلدار
رقیّه جانی ـ بو کاروانی
آپارسام اولّام ـ ئوزوم علمدار
سن اولماسان گر ـ بو قلب مضطر
یانار شراره ـ رقیه لای لای


باجون سکینه ـ گلِ مدینه
ورار عزیزیم ـ غمونده سینه
سن اول گهرسن ـ که معتبرسن
خرابه اولدی ـ سنه خزینه
حرملر آغلار ـ جهانی داغلار
گیدنده سنسیز ـ بیز اربعینه
دیر بو دسته ـ مزارون اوسته
گوزل هزاره ـ رقیه لای لای


نه فرصتیم وار ـ نه طاقتیم وار
اؤرکده داغ ـ مصیبتیم وار
حجازه گیتسم ـ بقیعه یتسم
آنام بتوله ـ شکایتیم وار
سوروشسا صغرا ـ نئدیم دریغا
گوزونده اشک - خجالتیم وار
دور ای یگانه ـ بو باغریقانه
ایله نظاره ـ رقیه لای لای


سینم مدالی ـ حرم غزالی
ئوز ائللرندن ـ دوشن آرالی
فرشته سیما ـ سه ساله زهرا
اؤرک نوالی ـ باشی بلالی
وروبلا سیلی ـ یوز اولدی نیلی
گوزون جداده ـ ئوزین یارالی
نگاری گوردون ـ ئوزون یتوردوم
وصال یاره ـ رقیه لای لای....
◦