Namni Dhimma Siviliitiin Himatame Deebii Barreeffamaa Keessatti "Qabeenyicha Yeroo Dheeraadhaaf Waanan Qabadheef Gadi Lakkisuu Hin Qabu" Jechuun Falmii Ijoo Waliin Walitti Makee Barreessuun Yoo Dhiyeesse, Akka Mormii Sadarkaa Duraa Darbiinsa Yerootiin Walqabatu Kaaseetti Fudhatamuu Qabaa? Gama Kanaan, Dhaddachi Ijibbaataa MMWF fi Manni Maree Federeeshinii Maal Jedhan?

Gareewwan falmii tokko tokko "qabeenyicha yeroo dheeraadhaaf waanan qabadheef gadi lakkisuu hin qabu" jechuun falmii ijoo waliin walitti makanii deebii barreeffamaa isaaniitiin wayita dhiyeessan qabatamaan ni mul'ata. Falmiin kun darbiinsa yerootimoo falmii biroodha kan jedhu ifa miti. Kanaan walqabatee, Dhaddachi Ijibbaataa MMWF murtii, iyyataa:-Badreddiin Abdulwuhab fi waamamaa:-Qamaraa Ahmad gidduutti ilaalee kenne keessatti; iyyataan kan jechaa jiru, mana kiyya waamamaan yeroodhaaf akka keessa jiraatuuf kenneefii gadi naaf lakkisi gaafan jedhuun gadi naaf lakkisuu waan hin dandeenyeef manicha gadi lakkisee akka na harkaan gahu jechuun himannaa dhiyeesseera.

Waamamaan deebii isaatiin; iyyataan mana isaa naaf kennee waggaa 47f kanan keessa jiraadhe waan ta'eefi umriin iyyataa waggaa 105 waan ta'eef himannicha ofii isaatiin sammuu fayyaadhaan beekaa kan dhiyeessan ta'uu isaatiif manni murtii dhiyeessisee yoo naaf mirkaneesse manicha gadin lakkisa jechuun falmeera.

Dhimma kana irratti manneen murtii Ijibbaataa gadi jiran hundi iyyataa dhaddachatti dhiyeessisanii, himannicha ofumaan kan dhiyeessan ta'uu mirkaneeffatanii waamamaan manicha gadi lakkisee iyyataa harkaan akka gahu jechuun murteessaniiru.

Dhimmi kun dhaddacha Ijibbaataa MMWF gahee, dhaddachichis hiikkoo seeraa dirqisiisaa galmee lakk.14047 (Jildii 1ffaa) ta'e irratti kenneen; falmii himatamaan waggaa 47f qabadheera jechuun kaasu akka mormii darbiinsa yeroo kaaseetti tilmaamni kan udhatamu ta'a. Iyyataan manicha kennaadhaan waamamaadhaaf kan kenne waan ta'eef, kunis bu'uura SHH kwt 2441(1)tiin darbiinsa yeroo waggaa lamaas ta'e, kan SHH kwt 1845 jalatti ibsame darbiinsi yeroo waggaa 10s darbeera waan ta'eef, waamamaan manicha iyyataa (himataa jalaa) harkaan gahuu hin qabu jedheera.

Dhimmi kun hiikkoo Heeraatiif Mana Maree Federeeshiniitti dhiyaatee, Manni Marichaas  Yaa'ii gaafa 2/10/2011, bara paarlaamaa 4ffaa, waggaa 4ffaa gaggeessee, murtii lakk.Ga.68/11 ta'e irratti kenneen; seera deemsa falmii sivilii kwt 245(2) irratti Manni murtii ofii isaatiin mormii darbiinsa yeroo kaasuu akka hin dandeenye tumamee osoo jiruu Dhaddachi Ijibbaataa ofumaaf kaasee murteessuun isaa tumaa Heera Mootummaa kwt 79(3), kan abbootiin seeraa hojii isaanii seeraan qofa hojjetu jedhu, kan faallessudha. Mirga dinagdee namootaa Heera Mootummaa kwt 41(5)n kabajames kan faallessuufi bu'uura Heera Mootummaa kwt 40(1)(2)tinis mirga qabeenya horachuu lammilee kan sarbe ta'uurrayyuu mirgoota manguddoowwan umriin isaanii waggaa 100 ol ta'ees kan miidhu waan ta'eef murtii Heera faallessudha jechuudhaan diigeera.
(Yaadni kun Kitaaba Kaasee Malkaam, mata duree "Mormiiwwan Sadarkaa Duraa" jedhuun Afaan Amaaraatiin barreeffame irraa kan fudhatamedha. Kan hiike anadha).

           Desalegn B.

Dhimmi Falmii Hariiroo Hawaasaa Tokko Bakka Hin Jirretti (Ex parte) Akka Itti Fufu Mana Murtiitiin Ajajamuun, Adeemsota Falmii Itti Aanan Keessatti Himatamaan Akka Hin Hirmaanne Ni Taasisaa?

Dhaddachi Ijibbaataa MMWF, hiikkoo seeraa dirqisiisaa dhaddacha gaafa 25/05/2014 ooleen Lakk.Ga.206006 (kan hin maxxanfamne) ta'e irratti kenne keessatti:

"በተያዘው ጉዳይ አመልካች መጥሪያ ደርሶት መልስ አቅርቦ ፤ ባቀረበው የመጀመሪያ ደረጃ መቃወሚያ ላይ ብይን ተሰጥቶ በፍሬ ነገሩ ላይ ክስ ለመስማት መዝገቡ በተቀጠረበት ዕለት ባለመቅረቡ ያቀረበው ምክንያት በቂ ሊባል የማይችል በመሆኑ ክርክሩ በሌለበት እንዲታይ ብይን የተሰጠ መሆኑን ከመዝገቡ መረዳት ተችሏል፡፡ አመልካች ክርክሩ በሌለበት እንዲታይ ብይን የተሰጠው የፍ/ሥ/ሕ ቁ 70(ሀ) መሰረት አድርጎ በመሆኑ ፤ በፍ/ሥ/ሥ/ሕ/ቁ 72 መሰረት ያቀረበው ምክያንት ተቀባይነት ማጣቱ የመከላከያ ክርክር የማቅረብ መብቱን ከማሳጣት አልፎ በቀሪዎቹ የክርክር ሂደቶች ከመሳተፍ የማያግደው ሆኖ እያለ ፤ የሥር ፍርድ ቤት አመልካችን ሙሉ በሙሉ ከክርክሩ ሂደት ውጭ ማድረጉ መሰረታዊ የሕግ ስህተት ሲሆን ጉዳዩ በይግባኝ እና በሰበር የቀረበላቸው ፍርድ ቤቶችም ስህተቱን አለማረማቸው መሰረታዊ የሕግ ስህተት ነው" jedheera.

✍️Dhaddachichi, hiikkoo seeraa dirqisiisaa kana keessatti, murtii kanaan dura lakk.Ga.15835 ta'e irratti kennee tures (falmiin bakka hin jirretti (ex parte) akka itti fufu ajajamuun himatamaa falmicha keessaa waan baasisu fakkeessee kennee ture) fayyadameera.
✍️Kanaan walqabatee, barreessaan M P JAIN jedhamu, kan seera deemsa falmii Hariiroo Hawaasaa biyya Hindii irratti yeroo adda addaatti Kitaaba maxxansiisee qabu:

"Ex parte merely means in the absence of the other party. In ex parte proceedings the necessity of plaintiff proving his case is not lost. In a case which has proceeded ex parte, the trial Court would scrutinize the available proceedings and documents, consider the evidence adduced. It would do well to frame the 'points for determination' and proceed to construct the ex parte judgment dealing with the points at issue one by one. Merely because the defendant is absent the Court shall not admit evidence, the admissibility of which is excluded by law. It should also not permit its decision being influenced by irrelevant or inadmissible evidence. The proviso merely authorizes the Court to do that which it could not have done without this authority namely to proceed in the absence of one of the parties" jechuun ibseera.

👁️Kunis kan agarsiisu, jechi 'ex parte' jedhu "bakka gareen biroo hin jirretti" yaada jedhu qofa akka ibsu, 'ex parte' jedhamuun dirqama mirkaneessuu himataa kan hin hambisne ta'uu, bakka hin jirretti kan jedhame ta'us manni murtii tokkoon tokkoon ijoo dubbii ragaalee hunda waliin wal bira qabee madaaluu kan qabu ta'uu, Manni murtii sababuma himatamaan hin jirreef ragaa fudhatamummaa hin qabne (akka seeraatti) fudhachuu kan hin qabne ta'uufi tumaan sun (Akka sdfs keenyatti kwt 70(a)n ilaali), guyyaa dhagaha duraa himatamaan yoo hafe tarkaanfii akkamiin fudha kan jedhu ilaalchisee akka gaaffiin itti hin uumamneef "yoo himatamaan dhiyaachuu baates itti fufi" jedhee kan aangesseen ta'uudha.

         Desalegn B