🎀ውድ እህቴ ሆይ! ይህ ጥያቄሽ የብዙ እህቶች እንባ ያለበት፣ የብዙ ቤቶች መፍረስ መነሻ የሆነ እና እጅግ በጣም ጥንቃቄ የሚፈልግ ጉዳይ ነው። ልብ ብለሽ አድምጪኝ።

1ኛ―«ሚስቴ አትረዳኝም» የሚለው የሰይጣን ማጥመጃ ነው። አንድ ወንድ ላንቺ ብሎ የልጆቹን እናት፣ የቤቱን ንግስት፣ የአምስትና አስር አመት የትዳር አጋሩን እያማ እና እያብጠለጠለ ወደ አንቺ ከመጣ፣ እመኚኝ እሱ ታማኝ ሰው አይደለም። የቤቱን ሚስጥር ላንቺ ያወጣ ወንድ፣ ነገ ደግሞ ያንቺን ሚስጥር ለሌላ ሴት እንደሚያወጣ ጥርጥር የለውም።―ሌላን ሴት እያማ ወደ አንቺ የመጣ ወንድ፣ አንቺን ለማግባት ሳይሆን አንቺን ለመጠቀም እየሞከረ ነው።አንድ አላህን የሚፈራ  ወንድ ችግር እንኳን ቢኖርበት፣ የቤቱን ነውር ሸፍኖ እንጂ አጋልጦ ለሌላ ሴት አሳልፎ አይሰጥም።

2ኛ―በሌላ ሰው እንባ ላይ ደስታ አይገነባም!
በሸሪዓችን ሁለተኛ ማግባት መስፈርትን ከማሟላት ጋር የተፈቀደ ሀላል ነው። ነገር ግን ይህ የሚሆነው በሀላል መንገድ፣ በወንድነት እና በኃላፊነት ሲመጣ እንጂ፣ በድብቅ ግንኙነት፣ በሚስት ላይ ሴራ በመሸረብ እና ሌላኛዋን ሴት በማንኳሰስ አይደለም። ሁለተኛ አቅም ካላችሁ አግቡ ግን ስለ መጀመሪያዋ ሚስታችሁ መጥፎን አታውሩ።

ደሞ እህቴ…አንቺ ምናልባት «ትዳር ማፍረስ አልፈልግም» ትያለሽ፤ ነገር ግን ከእሱ ጋር የምታደርጊው ስሜታዊ ወሬ፣ እሱ ለሚስቱ የሚሰጠውን ፍቅር፣ ጊዜ እና ትኩረት እየሰረቀ ነው። ይህ በራሱ የሌላን ቤት ማፍረስ ነው። በሌላ ሴት እንባ እና ህመም ላይ የሚገነባ ትዳር በረካ የለውም።

3ኛ―«ወደፊት አገባሻለሁ»የሚለው ቃል የብዙ ወንዶች ማደንዘዣ ነው።ውድ ነገር የሚገኘው በውድ ዋጋ ነው። እውነት እሱ አንቺን የሚፈልግሽ ከሆነ እና ብቁ ወንድ ከሆነ፣ በጓሮ ሳይሆን በበራፍ ይመጣል።«ሚስቴ አትመቸኝም» እያለ ማለቅለቅ ሳይሆን፣ እንደ ወንድ «እፈልግሻለሁ፣ ወይም ሁለተኛ ማግባት አቅሙ አለኝ፣ ቤተሰብሽን ላናግር» ብሎ ይመጣል።

ለማንኛውም ቆም ብለሽ እሰቢ። ስሜታዊ አትሁኚ። አሁን የምታይው የእሱን ጣፋጭ ምላስ እና እሞትልሻለሁ የሚለውን ማሽቃበጥ ብቻ ነው። ነገ አብራችሁ መኖር ስትጀምሩ ግን ዛሬ ሚስቱን ያማት አፍ፣ ነገ አንቺንም ሊወቅስበት ይችላል። ስሜት ያልፋል፤ ጸጸት ግን ይቀራል።

የሰው ባል የሰው ነው። በሰው እጅ ላይ ያለን ወርቅ ከመመኘት፣ በራስሽ እጅ ያለውን መዳብ ማጽዳት ይሻላል። እሱ እውነት ወንድ ከሆነና ሁለተኛም ማግባት አቅም ካለው በሸሪዓው መንገድ ይምጣ። አላህ የተሻለውን ይተካለሻል!

ይቅርታ ወንድሜ ተቆጣሁ መሰለኝ¡ እንድህ ያለ ልፍስ'ፍስ ወንድና ስለ ሚስቱ መጥፎነት የሚያወራ እስስት ባል ስለማልወድ ነው¡¡
t.me/Sle_qelbachn1
t.me/Sle_qelbachn1