ከሚዲያ ጀርባ‼
~
• በማህበራዊ ሚዲያ መድረኮች ላይ የጣፈጡ ቃላት ይነገራሉ፣ የተሰሉ ዳዕዋዎች ይደመጣሉ፣ የእንባ ዘለላዎች ሳይቀሩ ለሚዲያ ይቀርባሉ። በዚህ ግርግር ውስጥ፣ በርካታ ንፁህ ልቦች፣ በተለይ የሱና እህቶቻችን፣ የመድረኩን ትወና ከእውነተኛው ህይወት ጋር እያደባለቁ፣ ለማይሽር ጠባሳ እየተዳረጉ ነው።

ልቧ በአላህ ፍቅር የነደደ፣ የነብዩን ሱና ለመከተል የቆረጠች አንዲት እህትን አስቡ። የትዳር አጋሯም እንደሷው፣ መንገዱን በጽናት የተከተለ፣ ከጌታው ጋር የቀረበ እንዲሆን ትመኛለች። እናም በሚዲያ ላይ «ኡስታዜ፣ አስተማሪዬ ፣ጠንካራ ሰለፍይ…»የምትለውን አንድ ወንድም ትመለከታለች። ቃላቶቹ የሰሉ ናቸው፣ ስለ ዲን ያለው እውቀት ጥልቅ ይመስላል፣ ገጽታው የሱናውን መንገድ እንደተከተለ ይመሰክራል። ልቧ በፍቅርና በክብር ይሞላል። «አልሐምዱ ሊላህ አላህ የዲን ሰው ወፈቀኝ!» ብላ ጌታዋን ታመሰግናለች።

የትዳር ጥያቄው ሲመጣ፣ ብዙ ማመንታት አይታይባትም።ሁለተኛም፣ሶስተኛም ቢጠይቃት ያለምንም ማቅማማት መርሓባ ብላ ትቀበላለች። ምክንያቱም እርሷ ባል አገኘሁ ብላ ያሰበችው በሚዲያ ላይ ያየችውን፣ የሰማችውን እና ያደነቀችውን ያንን የሚዲያና የቻናል ሰው ነው።
ነገር ግን የጋብቻው በር ተከፍቶ፣ የመድረኩ መጋረጃ ሲዘጋ፣ ከሚዲያ ጀርባ ያለው እውነተኛው ማንነት ቀስ በቀስ መታየት ይጀምራል። ያ የቃላት ጥፍጥና፣ ያ ስለ አላህ ፍራቻ ሲነገር የነበረው ልስላሴ፣ በቤቱ ግድግዳዎች ውስጥ ወደ ቁጣና ንቀት ይለወጣል። ጀለብያውና ፂሙ እንዳለ ሆኖ፣ ለቤተሰብ የሚገባው ርህራሄ፣ ለሚስት የሚሰጠው ክብርና እንክብካቤ ግን የለም። ሱናው በአፉ እንጂ በልቡ እንዳልነበረ፣ በተግባሩ ሳይሆን በንግግሩ ብቻ የተገደበ እንደነበር ስትረዳ፣ ሚስኪኗ እህቴ የገነባችው የህልም ግንብ ይፈራርሳል።

ያን ጊዜ ልቧ በሀዘን ይደማል። ስብራቱ የትዳሯ ብቻ አይሆንም። «ሰለፍይ ሰው ብዬ ያመንኩት ይህን ከሆነ፣ ታዲያ ማንን ልመን?» የሚል አደገኛ ጥያቄ በአዕምሮዋ ይመላለሳል። በትዳሯ ላይ ብቻ ሳይሆን በራሱ በዲኑ ላይ ያላት እይታ ሁሉ ይናጋል። ዛሬ በየቤቱ፣ በዝምታ የሚያነቡ፣ ልባቸው በሰለፍይ ተብዮች ወንድሞች የተሰበረ ስንት እህቶች አሉ??
إلى الله المشتكى
📎እህቴ ሆይ!
አንድ ወንድም ጀለብያ ስለለበሰና ፂሙን ስላሳደገ አልያም የቴሌ ግራም ቻናል ከፍቶ ስላስተማረ ብቻ የነብዩን ፈለግ ተከትሏል ማለት አይደለም። እውነተኛው ተከታይ፣ የነብዩን ስነ-ምግባር በቤቱ ውስጥ የሚተገብር ነው። ነብያችን «ከእናንተ ውስጥ በላጫችሁ ለቤተሰቡ በላጭ የሆነው ነው» እንዳሉት።ስለዚህ የህይወት አጋርሽን ስትመርጪ፣ በሚታየው ገጽታ፣ በሚነገረው ቃል ብቻ አትወሰኚ። ከሚዲያ ወርዶ፣ ከላይቭ  ርቆ ሲኖር ማንነቱ ምን ይመስላል??

▶️ስለ ማንነቱ መርምሪ፦ ከቴሌ ግራም ቻናል ጀርባ ሳይሆን፣ በዕለት ተዕለት ህይወቱ የሚያውቁትን፣ በስራ ቦታ፣ በጉርብትና የሚመሰክሩለትን ሰዎች ጠይቂ።
▶️ሥነ-ምግባሩን አስተውዪ፦ ከእናትና ከአባቱ፣ ከእህቶቹ ጋር ያለው ግንኙነት ምን ይመስላል? ለቤተሰቡ ሩህሩህ ያልሆነ፣ ላንቺም ሩህሩህ ሊሆን አይችልም።
▶️ከአላህ ጋር ያለውን ግንኙነት ተመልከቺ፦ ከቁርኣን ጋር ያለው ትስስር፣ በድብቅ የሚያደርጋቸው ኢባዳዎች ምን ያህል ናቸው? ምክንያቱም ከአላህ ጋር ያለውን ቃል የማያከብር፣ ከአንቺ ጋር ያለውን ቃልም ሊያፈርስ ይችላል።

• አላህ ልባቸው ለተሰበረ እህቶቻችን መፅናናትን ይስጣቸው። ሁላችንንም ከሚታየው ገጽታ ጀርባ ያለውን እውነት የምናስተውልበት ልቦና ይስጠን።  አላህ እሱን በድብቅም በግልፅም የምንፈራ ያድርገን! ንግግራችንን እና ተግባራችንን አንድ ያድርግልን!
|•|t.me/AbuSufiyan_Albenan
🖋𝐀𝐛𝐮 𝐒𝐮𝐟𝐲𝐚𝐧