قناة للْمࢪأة السلفية 𐙚

አላገባሽም!
~
ቃል መግባት ማለት ተራ የቃላት ድርድር አይደለም፤ ቃል መግባት የነፍስን ውል መፈረም ማለት ነው። በተለይም ትዳርን የመሰለ የተባረከ ስምምነትን አስመልክቶ ቃል ገብቶ፣ የሴት ልጅን ተስፋ ሰቅሎ፣ ለወራትና ለዓመታት በአጉል ተስፋ አደንዝዞ፣ በመጨረሻም ያለምንም በቂ ምክንያት «አልፈልግሽም» ብሎ መተው በሰውም በአላህም ፊት የሚያስጠይቅ ታላቅ በደል ነው።

አንተ ቃልህን አጥፈህ ጀርባህን ስታዞር፣ የሰረቅኸው የጥቂት ሰዓታት ወሬ ሳይሆን ውድ የህይወት ዘመኗን እንደሆነ ታውቃለህ? ላንተ ስትል ስንት የመጣላትን፣ ስንት የመከሩላትን፣ ስንት የፈለጓትን ትዳሮች «ሰው አለኝ፣ ቃል ገብቶልኛል» በሚል እምነት በሯን ዘግታ ስትጠብቅህ ኖራለች። አንተ ዛሬ «አልሆነም» ስትል እሷ ግን ያመለጧትን እድሎችና የባከነውን ወጣትነቷን የት ታገኘዋለች?

በነገርህ ላይ...የሴት ልጅ እንባ መሬት ላይ አይፈስም፤ በአላህ ፊት ትልቅ ዋጋ አለው። አንተ ዛሬ በምክንያት ብዛት ራስህን ልታታልል ትችላለህ፣ ነገር ግን ልቧን የሰበርከው ያቺ ምስኪን ሴት ሌሊት ላይ አላህ ፊት ቆማ ስታለቅስ በአንተና በእሷ ዱዓ መካከል ምንም መጋረጃ የለም። አላህ «ተበዳይን እረዳለሁ» ብሎ ቃል ገብቷል።የተበዳይ እንባ የሰማይና የምድርን ዙፋን ያናውጣል፤ የዛሬው ቀልድህ የነገው የህይወትህ ጨለማ እንዳይሆን ፍራ!

አላህ ፊት ስትቆም የምትጠየቀው ስለ ሰገድከው ብቻ አይደለም፤ ስለሰበርከው ልብ፣ ስለበላኸው ጊዜ፣ በውሸት ተስፋ ስላቆሰልከው ስሜት ጭምር ነው። በቂ ምክንያት ሳይኖርህ ቃልህን ማፍረስህ "ሙናፊቅነት" እንደሆነ ታውቃለህ? የሙናፊቅ አንዱ ምልክት "ቃል ገብቶ ማፍረስ" ነውና።

ዛሬ አታለልኳት ብለህ ትስቅ ይሆናል፤ ነገር ግን በደል ተራ ላይ ተቀምጣ የምትጠብቅ ዕዳ ናት። በዘራኸው ልክ ታጭዳለህ። ዛሬ በአንተ ምክንያት የወጣው የሴት ልጅ እንባ፣ ነገ በአንተ ህይወት፣ በስራህ፣ ወይም በምትወዳቸው ሰዎች ላይ መቅሰፍት ሆኖ ሊመጣ እንደሚችል አትዘንጋ። የአላህ ሂሳብ ዘገምተኛ ቢመስልም ጥብቅ ነው።

አሁንም ጊዜ አለህ! የሴት ልጅን ህይወት በማበላሸትህ አላህ ፊት ከመቆምህ በፊት፣ ያቺን ምስኪን ይቅርታ ጠይቃት፤ ካልሆነም የበደልከውን በደል ካስ። የሰው እንባ ይዞ መኖር መጨረሻው ጥፋት ነው። ቃል ማፍረስ "ክህደት" ነው፤ ክህደት ደግሞ የጀግና ሳይሆን የፈሪና የባንዳ ስራ ነው።

ልብ በል! ያቺ ዛሬ የምታለቅሰው ሴት፣ ነገ በአላህ ፊት ከሳሽህ ሆና ስትቆም ምንም አይነት የምክንያት ድርድር አይሰራልህም።
~
t.me/Sle_qelbachn1
t.me/Sle_qelbachn1

259 views06:05