فقدت السيطرة
وبالگوة جاي اصبر
وأول مره احس بنفسي
ضگت المُر
صفنت النفسي !
هذا التعب يخلص وين
وشوكت احس هذا التعب مثمر !

اسافر !
بين ظن وظن والشوارع تايهة
بروحي ورسايل خوفنه انشگن
خذيتو هواي من عمري الگظن
والمارضن يگضن .

گاعد بصفي
ويعدللي اليحبهم
وانا ساكت هسة أكول
يصيح إسمي
الفشلة ماحاسبني منهم .

وليش
المايحبك گاودت چفه
الما كاتب على عيونك
صرت ولفه ؟
أجيت وعندي ملگه ينافس
الچيلات ، بـَس ردك البارد
موت اللهفه .

أخر يوم اليه وياك
واول يوم مَن دونك
طلعت من الحرُب خسران
راحة بالي وعيوَنك
أخاف الگاك كُلش زين
ماريد أعرف شلونك .

گتلك سنيني اتطشرن لمهن
وغيضك وخره ونوب عاندت
ورحت طشرت حتى العشرة
واني ادري باجر لو طحت
تمشي وبعد متريدني هوَ أنـي
الما فادوني اهل أنتَ الغريب تفيدني !

بديت أسَتوعب
الروحه البدون أسباب
وطبعة الجاف والبارد
تره العايفني هم معيوف
الكسَر من واحد لواحد .

بيهَ واهس طير حُر
أرد افر الدنيا فرّ
وين مـا عد الله گاع
آنه أستقر
أرد اسافر
أرد اهاجر
أرد اعاشر ناس
ماتكسرلي خاطر .

چم زلة منك بينت !
ماجيت أعاتب مره
ومن عشرتك گلي ششفت
غير الألم والحسرة
أنـي ادري يهواك الگلب
بُعدك يعذب حالي
وأدري اليحب ليله صعب
هايم اضل للتالي .

انا متعود ابچي يلا أرتاح
ومن انجرح مـن ناس اضحكلها
مـن هذا السواد البيه لتخاف
التجارب تخلق بنادم مثلها
ترا أصعب خسارة مـن الخسارات
التنسيك الخسارات القبلها .

بارد وياية شعجب ؟
عايش اللهفة چنت
ويا شخص قبلي
شو انه حيل اختلف
تخيل رساله تجي
تگومني مـن أهلي !

گُمت اشوفك وانتَ ماكو
وألمس طيوفك سراب
وگاموا يگولون واضح
هذا من عيونه حاب .

خلي أعتذارك إلك
وهذا الحچي الجبَته إلي
مشي عَلىٰ الغشمَة
لَك انتَ جارحلَك بشر
مَن كُثر مابَي تعب
حتىٰ الهوىٰ يلچمة .

خاف عبالك برودك يستفزني !
لاا قوييت هاي اول مره
عينك ماتهزني ، وحتى مـن
گتلك أريدك أنـي چنت مجاملك
هاي سابع ليلة مامشتاگلك .

مو گُتلي
أنَه أختلَف عَن اليحبونَك
مَو گتلي هذَا الهوىٰ
ما أشِمه من دونك
شو واصِل لمرحلَة
تستنكف من الحچَي
تأشرلي بعيونَك .

أنه ذاك السئل ع لون التحبه
وگالوا ابيض علمودك شيبت
أنه ذاك الشاف بـَس مو زين
منه ، وماحچيت اتحملت
لـيش ذبيت التهايم كلها بية
وانه ماسويت شي بـَس عاتبت
لـيش اول ماخفت بيها عليك
اتحسست؟

معقوله هذا أنـي !
لو گتلي باجر نلتقي انسى
صلاتي جنت واكويها قمصاني
عنودي يم ربعي وهلي ووياك
حيل فقير ، ومن مايعجبك بية
شي مـن دون ماتحجي جنت
تلكاني الك مغير .

ولگيتك ضاملي الشينة
ويم غيري تذب هناك كُل زينك
شبعد ويغزر بعينك !

كُل مره ترجعلَي بعذر
تَوجعني منه صفاحَي
مامقتنع بي وأبتسَم
يمَك عشت دور الثمل
بَس أنـه كُلش صاحي .

ومن گتلك
اموت بدون ماشوفك
چنت چذاب
لا خلف الله ع چيله
التحطلي صواب
منا وانتهت والباب
يوسع باب .