ينحط بقفص وگبال بستان
ويردم بالقفص ويطيح ويلوب
ويضل ينعهَ نواعي الغاضريات
أذِا ينعن يهدن حيل الگلوب
ويمر وجه اليحبه شراع والريح
تدفعه ومايشوفه بروج محجوب
لو ماصورته بألبوم الاحلام
مـا چان انطبع بالروح محبوب .

الگبُل أتِمنى
طيفة يزورني يبات
وأسولفله إعلىٰ
عُمري وعلى الخسارات
الچنت ما أنِدم
على الثانية ويا
هضِيمة يصير
مِن ضَمن الحرّامات .

مَا غوتنِي عيون غيرك
وأنتَ تدرِي
عيونك ولاية الغُربتي
وَلا گلِت لأحَد يروحي
أنتَ روحي .

رجعت أتذكر العشرة
واعضهُم بالسَرة العشَرة
أجَت منك رسَالة
وگلت خل أقرة
الكلام شوية
بَس چان الحچي شكُبره .

ليّش تذبَل
ليّش حِزن الناس موسِم
وأنتَ حِزنك ماله تالي
ليّش طيفَك فاهي گلبه
وطيفهُم عَرس الليالِي
هوايَّ ليّش
وما حضيت بچلمَة تشفِي
خلّصت عُمرك مناطر
يمتى تچفِي !

بعد كل ماحدث
وبعد حرگ الصور
ابد منطاني گلبي
هناك اخليها
رجعت اركض
واطلع صورته من النار
ابوس شمحترگ بيها
رجعت مدنگ
بكل درب بي ماشين
يمكن حلم ضاع هنا
مثل ثلاجة الموتى
ادوره وما اريد الگاه .

اخر رسالة اكتبها الك
مابيها كلمة تفرحك
بين الصراع المُستمر
مابين صحتي وجرحك
وهذا اني گدامك عدل
وعيونك اكتب واضحك
كلشي انتهى حتى الفرص
و ؏ رجعه ابد ما انصحك .

نِزلت بعِين نَفسي
لخاطُر مِراضاك
دليتَك عَليَ
وبيهَ گمت تذِل
تسَوي الـ مَا احبهن
واضحك وماگول
تغَازل غيري يَمي
وانهَ متحَمل .

مافكرت احب
بـعَد الخساير ذيچ
احس روحي صرت واعي
گمت اهتم بروحي
وقللت بالناس
وبديت مـن المهم
للمالهم داعي .

اتعب واطيح وانقهر
بـَس مستحيل أنه انكسر
خليها هاي ببالك
حليان اصلاً وابتهج
كلما يزيد اهمالك
المثلي خايب ينخسر
عمي أنتَ مَدري شمالك !

ليّش ما مليت مِنهُم !
وليش ما مات الحنين
شعاجبك باقي بدربهُم
عاچبك هذا الونين
عيش يا گلبي مِثلهُم
هُم طِين وأنتَ طِين .

ومَدري شگد ذكرتك
وانتَ ناسيني
وكت خلاك صاير
وينك و ويني
انا الحافظ اسرارك
وانتً يم الناس
مو بـَس تنطي بية
يجوز تنطيني !

تفتهم هالنقطه اريدك
وراح اكمل عُـمري هذا
مثل مَ خططته بيدك
وكلشي خططناه سويه
أنـي يعنيلي جوابك
شنو رأيك هـسهَ بية
والألوان الي تحبهن
طلعن يخبلن علية
والنجاح الراح اعيشه
الك لتظن بـَس الية .

المُطر والغيم
والحبيته
والموت
المَرض
والشوك ذاك المو بگديّ
النَسمة الباردة
التتعدّة بالصيف
الشيب الگبل وَكته بكيفه يبديّ
مَزاجيات فجأة الگاهن ويايّ
ومن يعجبهن يتركنّي وَحديّ .

مَن شفتك تغير موعد النوم
بَديت أسهَر واحِن واشتاگ
وأبرد واغار وتُرجف ايدي
وابچي وأحتار واشوفَك
وأرتبَك وابنيك وانهَد
مُجرد حُب كسَر كل القوانين
وخرج عَن سيطرة گلبي وتِمرد
علىٰ حكُم المَذاهب والتقاليَد
أحبك يالَعيونك ما الهِن حَد .

نظرتچ !
والرصَاص الجَاسني بتشرين
سِلبن نومي وسنيني
يعميني المُسيل
ومِنه أظَل ما أشوف
أذا ما ألگه جفچ يمسَح بعيني
وترهَ من صوبوني ما خفت لا أموت
خفت لا أنتِ تنسيني
أحبچ يلعيونچ من أباوعها
ترِدني لأخر الثَورة ولأولهَا توَديني .

عزة نفسي أهم مـن گلبي بهواي
وكسرت خاطري تسواك كلك
اطخلك راس؟
انا النخل حدري
يا حُب يا غزل
يا عشگ عذري
مـن دوس گلبي اغفرلك يجوز
بـَس يم الكرامه اچفه شري .

لَتخليني وحدي
منيَن أعرف الناس
لا أكدَر أعاشِر
لا خلگ عِندي
أحِب شلون غيرَك من
أريد شلون
وأني وياك كِلش
خَلص وِدي
بكَد حُبَك لنَفسك چِنت
أناني وياك
ومنو المِثلي يحِبك
محد بگدي .

أذا سرك تحفظة تحير الناس
وأذا ناسك تعرفة بوحدك تحير
فرق بين اليسرك والتسر بي
وحذاري من اليكلك سرك أبير
وأذا مايك تلاطم فوك الجروف
أكيد العلة بجفوف النواعير
طبيعي اليمشي يعثر تغدر الگاع
ولكن مو طبيعي اليزحف يطير
زمانك مركب وصير أنتَ الشراع
وأذا رأيك تضبطة بكيفك تدير
على متون الصبر قيس المسافات
لأن بس بالصبر تگضي المشاوير .

‏چنت محتاج أشوفك
‏من جنت ماشوف
‏وردتك عون إليه بوكت عازة
‏گزازة أنت وأضمك بين العيون
‏ويا عين التغمض على الگزازة .

بچفوفك شكد شعر
اسرار ما تنحجي
ثوره وقصيده وعشك
طاحن بتالي العُمر
ومسودن اني من احب
لو أموت لو أنتصر .