III ယုတ်မာတိုင်းသာ စစ်တပ်က နိုင်ခဲ့မယ်ဆိုရင်

အခုရက်ထဲ တွေ့ရတဲ့ သတင်းအချို့နဲ့ မြင်မိတဲ့ အမြင်တချို့ရှိပါတယ်။ ပထမ တခုက ချောက်မြို့နယ် တိုက်ပွဲအတွင်း တော်လှန်ရေး ရဲဘော် အယောက် ၂၀ ထဲက ၁၇ ဦးကို အာဏာသိမ်းစစ်တပ်က လက်ရဖမ်းဆီးပြီးမှ တောင်သာ (တောင်) ကျေးရွာ စာသင်ကျောင်းထဲ နှိပ်စက် သ- တ်ဖြတ်ခဲ့တာပါ။

ဇူလိုင်လ ၁၀ ရက်နေ့ က ချောက်မြို့နယ်၊ တောင်သာ (တောင်) ကျေးရွာနဲ့ စမ်းကန်ကျေးရွာအနီး မကွေးခရိုင် အမှတ် (၃) တပ်ရင်းမှ စုဖွဲ့မှု ပြုလုပ်ရာနေရာကို Helmet နဲ့ Equipment ဝတ်ဆင်ပြီး၊ အရပ်ဝတ်နဲ့ အာဏာသိမ်းစစ်တပ် စစ်ကြောင်း ရောက်ရှိလာရာ တော်လှန်ရေးရဲဘော်တွေမှ မိမိတို့ လူတွေအထင်နှင့်နှုတ်ဆက်ခဲ့တယ်လို့ ထုတ်ပြန်ချက်မှာပါရှိပါတယ်။

အဲ့ဒီ့လိုနှုတ်ဆက်ချိန်မှာပဲ အာဏာသိမ်းစစ်တပ်ဖက်က အနီးကပ်၀င်လာပြီး စီးနင်းခဲ့ရာ တော်လှန်ရေးရဲဘော် (၃) ဦး နေရာတင် ကျဆုံးပြီး (၁၇) ဦး အရှင် ဖမ်းဆီးခံခဲ့ရပြီး (၂) ဦးသာ လွတ်မြောက်ခဲ့တယ်လို့ဆိုပါတယ်။

အာဏာသိမ်း စစ်တပ်ဖက်က အရှင်ဖမ်းဆီးရမိခဲ့တဲ့တော်လှန်ရေးရဲဘော် ၁၇ ဦးကို ချောက်မြို့နယ်၊ တောင်သာ (တောင်) ကျေးရွာ စာသင်ကျောင်းအတွင်းနှိပ်စက်သ- တ်ဖြတ်ခဲ့ပြီး ၊ နေ့လည် ပိုင်းမှာတော့ ရဲဘော် (၂၀) ဦး ရဲ့ အလောင်းပုံတွေ သိမ်းဆည်းရမိ လက်နက်၊ ခဲ၊ ယမ်းတွေနဲ့ သတင်းထုတ်ပြန်လာခဲ့တာသာဖြစ်တယ်လို့ သိရပါတယ်။

ကျဆုံးသွားတဲ့ရဲဘော်တွေဟာ မကွေးခရိုင် အမှတ် (၃) တပ်ရင်းမှ (၁၃) ဦး၊ မကွေးခရိုင် အမှတ် (၁) တပ်ရင်းမှ (၁) ဦး၊ မကွေးခရိုင် ပကဖ မှ (၆) ဦးဖြစ်တယ်လို့ သတင်းတွေအရ သိရပါတယ်။

စစ်ဖြစ်ရင် သူတင်ကိုယ်တင်ပစ်ကြတာ သဘာဝပါ။ ဒါပေမယ့်၊ လက်ထဲကို အရှင်ရောက်လာတဲ့ ၁၇ ယောက်သော အသက်တွေကို ရက်ရက်စက်စက် လုပ်သွားတာကျ ယုတ်မာတယ်လို့ ခေါ်ပါတယ်။ တနည်းအားဖြင့် စစ်ရာဇဝတ်မှုပါ။

ဒုတိယသတင်းက ရခိုင်မှာ အခုရက်ထဲ ရေကြီးနေတာပါ။သတင်းတွေအရ ရေကြီးရေလျှံမှုအတွင်း ရခိုင်ပြည်၊ မင်းပြားမြို့နယ်၊ ပန်းမြောင်းကြီးချောင်းဒေသက ကျေးရွာပေါင်း ၂၀ ခန့်မှာ ရေလွှမ်းမိုးဒဏ်ခံခဲ့ရပြီး၊ ဒေသခံတွေ ဘေးလွတ်ရာရွှေ့ပြောင်းခဲ့ကြရပါတယ်။

ရေကြီးမှုဒဏ်ကြောင့် စပါးကျီနဲ့ သီးနှံစိုက်ခင်းများအပါအဝင် ကြက်၊ ဝက်၊ နွား စတဲ့ မွေးမြူရေးတိရစ္ဆာန် ဆုံးရှုံးမှုလည်း ရှိနေပါတယ်။ ဒီသတင်းတွေရဲ့အောက်မှာ အဓိက မြင်ရတာက စစ်အုပ်စုအောက်ဆွဲ အပေါင်းအပါတွေရဲ့ အောက်တန်းကျတဲ့ အပြုအမူအချို့ပါ။

ဒါကတော့ ရခိုင်-ဗမာ သွေးခွဲမှု၊ ရခိုင်တွေက ကျေးဇူးကန်းတာတို့၊ ရခိုင်က စစ်သင်္ဘာပေါ်က စစ်သားနဲ့ မှီခို ၉၀၀ ကျော်ကို သ- တ် ဖြတ်တာတို့ စတဲ့ AA ကိုစစ်နိုင်အောင် မတိုက်နိုင်တဲ့ စခဘောမတွေရဲ့ ပူလောင်နေတဲ့ အငုံစိတ်ဓာတ်ကို မြင်တွေ့ခဲ့ရတယ်။

ဒီသတင်း ၂ ခုက ဆက်စပ်မှုတော့ မရှိပေမယ့် စစ်အုပ်စုရဲ့ လူသားမဆန်မှု၊ အောက်တန်းကျမှုတွေကတော့ အတိုင်းသား မြင်တွေ့ခဲ့ရတယ်။ အာဏာသိမ်းစကတည်းကနေစလို့ ခုချိန်ထိ ယုတ်မာမှုတွေ ထိုင်ပြောရင် ကုန်နိုင်မယ်တော့မထင်ပါ။

ဒါ့ကြောင့် လက်ရှိ နိုင်ငံတွင်းက စစ်ပွဲတွေမှာ ပြည်သူ့အခွန်တွေဖင်ခုထိုင်၊ လက်နက်အပြည့်အစုံ တပ်ရင်းပေါင်းများစွာရှိနေတာတောင်၊ တော်လှန်ရေးတပ်တွေကိုခုထိ အနိုင်မယူနိုင်သေးတာဖြစ်တယ်။ ဒီချိန်မှာ မြင်မိတဲ့ အမြင်တခုကတော့ စစ်တပ်အနေနဲ့ ယုတ်မာတိုင်းသာ အနိုင်ရခဲ့ရင် တော်လှန်ရေးဆိုတာ ခုချိန်ထိ ရှိလာမှာ မဟုတ်ဘူး ဆိုတာပါပဲ။ ဒီလူတွေယုတ်မာလေလေ လူထုရဲ့ တော်လှန်ရေးက အားကောင်းလာလေပါပဲ။

သိသာတဲ့ ဥပမာ တခု ထပ်ဖြည့်ရရင် စစ်တပ်အာဏာသိမ်း ခါစ စစ်ကိုင်းတိုင်းမှာ စစ်အာဏာရှင်ကို မကြိုက်လို့ ပြည်သူတွေ ဆန္ဒပြကြတယ်။ စစ်တပ်က အကြမ်းဖက်တော့ လက်နက်ကိုင် တော်လှန်ကြတယ်။ စစ်တပ်က တဆင့်တက်ပြီး၊ PDF တွေလက်ခံထားတဲ့ ရွာတွေဆိုပြီး၊ ရွာသားတွေကိုပါ လူသ- တ်/မီးရှို့လုပ်လာတယ်။

ဒီတော့ အရင်က တော်လှန်ရေးမလုပ်တဲ့ ရွာသားတွေပါ မိသားစု၊ ပိုင်ဆိုင်မှု ဆုံးရှုံးလာတဲ့နောက်မှာ အကုန်လုံးတော်လှန်ရေးလုပ်လာကြတာပါပဲ။ ဆိုလိုရင်းက စစ်အုပ်စုက အ ကြမ်း ဖက် ယုတ်မာလေလေ တိုင်းရင်းသားအားလုံးရဲ့ တော်လှန်ရေးက ပိုအရှိန်မြင့်လေ ဆိုတာပါပဲ။

#wiper