تخيل بقى لو قلتلك ان حسب الموثق في علم التاريخ وعلم الأثار، بناءً على الدراسات اللي اتعملت في الكتب والمراجع، الرواية المتعارف عليها هي ان بناة المسلات دي استخدموا أدوات نحت وقطع مصنوعة من النحاس والبرونز.. اللي هما الاتنين أصلًا لا يقتربوا حتى من مدى قوة وصلادة الكوارتز اللي بيتكون منه الجرانيت الأحمر.. فالسؤال بقى هو ازاي؟!

ازاي الناس دول قدروا يقطعوا صخور بالقوة دي، بأدوات مصنوعة من المعادن دي، اللي هي من شبه المستحيل علميًا انها تقطعها من الأساس، ف ما بالك بقى انها تتقطع بالدقة والأبعاد والزوايا المذهلة دي؟! المادة الوحيدة اللي تقدر توصل لمستوى القوة والصلادة الكافية لقطع الجرانيت الأحمر بالسهولة المطلوبة هي الكربون المضغوط، اللي هو الماس يعني.. بس بردو مفيش أي أدوات ماسية تم العثور عليها خالص في مواقع بناء المسلات دي أو عمومًا!

والمبهر أكتر بقى، هو ان المسلات دي بما انها مصنوعة من الجرانيت الأحمر اللي فيه مادة الكوارتز دي، فهي ممكن بردو لما تتعرض لضغط تتولد فيها كهربا! بالظبط زي ما قلنا انه ممكن يحصل في الهرم الأكبر في الجزء الأول اللي فات! وهنا بقى ده بياخدنا تاني للجملة اللي كانت مكتوبة على مسلة رمسيس التالت.. " قمتها من الذهب و أضاءت بجمالها واست".

هل ممكن ان المسلات دي تكون كانت أقرب لأعمدة الإنارة في الحقبة المفقودة من مصر القديمة دي؟! تخيل أنت.. الناس تبقى ماشية في الشارع بأزياءهم القديمة وسط المسلات، وهي قممها منورة بتيار كهربي من مصدر غامض!

والأغرب بقى من كل ده، هو واحد من أكبر الألغاز اللي بتواجه علم المصريات لحد دلوقتي.. لغز توابيت السرابيوم!

***

⚫️ بص يا صديقي.. في مكانٍ ما من صحراء سقارة المصرية، موجود موقع أثري اسمه معبد السرابيوم. وده اكتشفه عالم المصريات أوجست مارييت سنة 1848، وتاريخه المسجل والمذكور في المراجع بيرجع لعهد الملك أمنحتب الثالث من الأسرة الـ 18، اللي عاش فى القرن الـ 13 قبل الميلاد.. بس مش كل ده بقى هو المبهر..

المبهر هو ان معبد السرابيوم ده موجود جواه حوالي 26 تابوت منحوتين من أحجار قوية جدًا وتقيلة بشكل لا يستوعب، زي الجرانيت الأحمر والجرانيت الأسود والبازلت والشست والكوارتز.. لدرجة ان وزن التابوت الواحد من دول ممكن يوصل لحوالي 100 طن تقريبًا! ولو مش فاهم مقدار الوزن ده، فخليني أقولك انه التابوت الواحد بس من دول هيحتاج حوالي 500 راجل قوي عشان يحركه بس من مكانه! ف ازاي بقى التوابيت دي دخلت للمرات الضيقة اللي جوه المعبد؟!

والمبهر أكتر بقى هو ان كل التوابيت دي مش مقطوعة من الأحجار، بل هي منحوتة! يعني جابوا كتلة صخرية ونحتوها! وبردوه رجع تاني وأقولك ان كل الصخور دي من المستحيل علميًا انها تتنحت أو تتقطع باستعمال الأدوات اللي كانت متوفرة في العصر ده، ده غير ان أصلًا زوايا ودقة النحت مذهلة لدرجة انها صعب ننفذها في عصرنا الحالي ده حتى باستعمال الليزر!

ومش بس كده.. لسه الحكاية هتصبح أغرب.. السردايب بتاعت المعبد نفسه طولها حوالي 400 متر، وهي محفورة في قلب صخر هضبة سقارة نفسها، ومش معمولة وسط رمل الصحرا، والأنفاق موجودة تحت الأرض، بتنزلها بسلم مدرج.. ولو بصيت على خريطة الأنفاق اللي تحت، هتلاقي تفريعات كتير موجودة في النفق الرئيسي، والتفريعات دي فيها تجاويف هي اللي محطوط فيها التوابيت! ازاي دخلوها هناك أصلًا، وزقوها كل المسافة دي في الممر الضيق ده؟! لاحظ اني بقولك محتاجين 500 شخص عشان يزقوا التابوت بس! ف ياترى كل دول كانوا واقفين فين؟!

ده غير ان الممر الرئيسي محفور على استقامة واحدة ومباشرة.. وبالتالي السؤال هو ازاي حفروه بالشكل ده، ولمسافة 400 متر جوه الجبل نفسه، من غير أي مصدر ضوء؟! أصل ازاي الشمس هتدخل في نفق طوله 400 متر جوه الجبل؟! ازاي حفروا كل المسافة دي وطلعوا كل الردم ده، من غير ما يبقوا شايفين أساسًا؟! ولو هنقول مصدر الضوء كان المشاعل، فخليني أقولك ان مفيش أي آثار لمشاعل على جدران النفق.. وكمان لو كانوا بيستعملوا المشاعل على العمق ده، كانوا هيتخنقوا أصلًا من الحرارة والدخان ونقص الهوا!

ده غير ان أصلًا حفر نفق زي ده في عصرنا الحالي صعب باستعمال المعدات الحديثة وآلات الحفر التقيلة المخصصة لتفتيت الصخور.. ف ازاي هما حفروه من أكتر من 3000 سنة كاملين؛ بالإيد؟!

وعارف بقى الأغرب من كل ده، واللي ممكن يرعبك فعلًا لو فكرت أيه هو أيه؟! ان في قلب واحد من من الممرات اللي موجودة جوه النفق ده، واحد من التجاويف اللي المفروض يكون فيها تابوت فاضية مفيهاش حاجة! والتابوت ده محطوط بره في الممر الرئيسي.. كإن اللي كانوا بيبنوا المكان حصلهم حاجة بشكل مفاجيء خلتهم يسيبوا كل حاجة كانوا بيعملوها، ويختفوا تمامًا كإنهم مكانوش موجودين من الأساس!

والناس دول ممكن فعليًا يطلع في الواقع انهم كانوا جزء من حضارة متطورة كانت عايشة على أرض مصر من آلاف السنين، قبل حتى التاريخ المسجل والمعروف للحضارة المصرية القديمة.. وللأسف ملحقوش يسجلوا علمهم وحضارتهم وينقلوها للأجيال اللي بعدهم بسبب إن في حدث كارثي مفاجيء حصل ومحاهم هما وكل علومهم ومعرفتهم من على وجه الأرض!

ف يا ترى تفتكر أنت أيه طبيعة الحدث الكارثي المفاجيء اللي ممكن يكون اتسبب في حدث زي ده، لو كان الافتراض ده صحيح فعلًا؟! أيه في الدنيا ممكن يتسبب في اختفاء فصل كامل من فصول الحضارات اللي مرت على الأرض بالشكل ده؟!

ده موضوع مهم والإجابة عليه ممكن تكون مذهلة ومخيفة فعلًا.. وعشان كده هنتكلم عنه في الأجزاء الجاية من السلسلة دي، واللي هتعرف فيها حاجات أغرب من كل اللي فات بما لا يقاس..

وفي النهاية لو المقال عجبك متنساش تعمل شير ومنشن لصحابك المهتمين بالموضوعات الغريبة دي، واعمل فولو وحطني في ال Favorites، وخش بص بصة على باقي المقالات والمحتوى على الصفحة.. لو بتحب الغموض العلمي والحقائق الأغرب من الخيال، مش هتندم ❤️

(يتبع.....)

#علام

‏تراجعوا عن الكذب الحب ليس مزحة .

علمونا أهلنا أن نقفل الباب خلف
الضيف على مهل حتى لا نضايقه و يظن
إنه كان ثقيل ، فما بالك بقلوب الناس ؟

لقد ولدت لأرتكب الأخطاء وليس لأزوّر الكمال.

اشعر بالمشاعر واتركها تذهب.

لا حصاد بدون زرع.

لا نصر بدون كفاح.

“ان الفشل في ذاته قد ينطوي على نوع من التجربة.” 

العظيم لا ينتهز الفرصة بل يوجدها.

إذا كان لا يمكنك تغيير الوضع، فغير نظرتك له" -

ليس المهم أن تكون جيدًا في كل شيء، الأهم أن تكون مبدعًا في شيء واحد على الأقل"

"لا تنتظر فرصة للتغيير، إبدأ بصنع التغيير بنفسك."

"النجاح هو قياس لمدى استعدادك للتعلم من الفشل."

يصبح الإنسان عجوزًا حين تحل الأعذار محل الأمل.

ليس المهم ما يحدث لك، بل المهم ما الذي ستفعله بما يحدث لك.

‏ابتسم وقابل أحلامك وافرح وتمنّى المزيد فالمستقبل يخبئ لنا الأفضل 🤎🎓.