جاهز تصلي عالنبي وتذكر غيرك 🫵🏻
اللهم صلِّ وسلم وبارك على سيدنا محمد وعلى آله وصحبه اجمعين 🌹♥

-
سؤال مجتمعي خطير..
هو أحنا بنعمل خطوبة لي؟!
لأ والله لي بجد،علشان نحتفل وكدة أننا لاقينا بعض وهنتجوز قريب يعني ولا علشان اي؟!

كل مظاهر الاحتفال في الحياة بأي مناسبة مفهومة بالنسبالي إلا احتفالات الخطوبة..شئ غير منطقي رغم انتشاره واستساغته بين الناس..

أصل كون أن التعارف دا لسة من كام يوم أو اسبوع أو حتى شهر فقعدنا واتعرفنا ولقينا القبول وحسينا بأن في فرصة لتتويج العلاقة دي بمسمى الخطوبة..
فدا كله مفهوم لكن دا أحنا لسة ملحقناش نعرف بعض ونتأكد من اختيارنا لبعض علشان نحتفل..!!
فأحنا كدة بنحتفل بأيه؟!
بأننا قعدنا مرتين او تلات مرات مع بعض!!
بنحتفل بأن حصل قبول يعني؟!
ولا بنحتفل بأيه والله حد يفهمني؟!

الإحتفال مظهر من مظاهر الفرح بحدوث شئ صح؟!
صح
طيب اي الشئ اللي حصل هنا يستدعي الأحتفال؟!

لي البنت أو الشاب لسة ملحقوش يتأكدوا من مدى صحة التقارب دا وهل هما مناسبين لبعض ولا لا،وهل التجربة دي هينتج عنها زواج فعلاً..
يعني في شكوك كتير ومليون سؤال لسة قيد البحث عن إجابة..
فنحتفل لي ونهيص ونصهلل وأحنا اصلا في طور تجربة نسبة فشلها أكبر من نجاحها..

الاحتفال يجيي بعد تجربة،صبر،انتصار،يقين،راحة..
حاجات كتير لو حصلت جوا العلاقة دي نقول يلا بينا نحتفل

فنبدأ نحتفل بجد في كتب الكتاب والفرح لأن خلاص بنسبة كبيييرة اتأكدنا من اختيارنا واطمنا ووصلنا لنقطة فيها نسبة كبيرة من الثقة في الطرف الأخر بأنه فعلا يستاهل نحتفل بوجوده في حياتنا..

لكن يعني اي لسة عرفاك من ١٥ يوم متكلمناش ومتقابلناش فيهم غير اربع خمس مرات ونقف نصهلل بأغاني حب كأننا عارفين بعض من ١٥ سنة!!

دا غير أنها كمان مظاهر مخالفة للدين لعدم وجود ضوابط خطبة..
لكن بجد جبتوا روح الجدعنة في الأحتفال دي منين؟!

مليون خطوبة تتفشكل بعد كمية مبالغة ومصاريف وديكوريشن وفساتين وقاعات وعربيات وتصوير وزفة ومعازيم وهييصة كبيرة عالفاضي..
وطارة وصينية الدهب وأشياء كثيرة هتروح فين الحاجات دي لو اتفركشت الحدوتة..
تفضل موجودة شاهدة على تسرع غير مبرر!!
دا غير كابشن الخطوبة اللي بينزل عالفيس!!
وتتحسب خطوبة على البنت لأن الموضوع كان علني بشكل أوفر..
في حين لو الموضوع اقتصر على تلبيس الدهب بين الأسرتين بشكل بسيط كان هيكون أنسب لكل الأطراف..
حتى ميبقاش فيه ضغط مادي على العريس اللي لسة جايب دهب برقم وقدره!!
وميبقاش شئ محسوب على البنت لو لقدر الله فركشت بعدين..
عدد لا نهائي من القصص دي شوفت أصحابها بيقولوا ياريتنا ما عملنا كدة..
طب أنا جيالك من المستقبل وبقدملك تجربة لناس بيقولولك بلاش!!

احتفال بعد عقد قرأن هيبقى لية فرحة تانية خالص لأنها احتفال بعد اطمئنان وروح استقرت وعرفت مكانها..
أنما ازاي نحتفل واحنا لسة قلقانين وداخلين على حوار كبير أوي مش عارفين هيرسى بينا فين!!
فين المتعة في كدة!!
دا أحنا لسة بنقول علاقة تحت الإنشاء..ياتكمل ياتتهدد فوق راسنا لو كانت مبالغة من الأول..

لو رجعنا وفكرنا في حديث رسول الله صلى الله عليه وسلم "أسروا الخطبة وأعلنوا النكاح"
أينعم الحديث ضعيف لكن لو بصينا على جوانب النفع من ورا إسرار الخطبة هنلاقيها كتيييرة أوي أنفع من اعلانها..

محتاجين نعمل ريستارت لبعض عادات وتقاليد المجتمع اللي فقدت سياقها الحقيقي بسبب التباهي والشكليات أكتر من التركيز على الجوهر والهدف الأساسي..

طول عمرها الخطوبة كانت فترة للتمهيد لكن في السنوات الأخيرة تحولت لمناسبة للتفخيم دون اليقين الكامل من استمرار العلاقة دي!!

نرجع بقى لمقاصد الخطوبة في الدين والعرف علشان الخطوات البسيطة بتجلب البركة والاستمرارية بأسس قوية..

متستعجلوش على الاحتفال خصوصًا لو كان فيه مخالفة شرعية تبقى أسوء..
خدوا وقتكم في التعارف والتأني والتفكير بدون تشتيت وكدة كدة الاحتفال وقته جاي بعد ما يكون اتمسح الخوف والدار أصبح أمان فعلاً..

ربنا يرزقنا البصيرة في الخطوات والقرارات والنظر لها بعين الحكمة والنضج بدل التسرع بسبب التقاليد والضغط المجتمعي..🤍

_غادة المغربي

سلامًا على من قرأ "يُدبِّرُ الأمر" ؛ فتركَ الأمرَ لصاحب الأمر.

وسلامًا على من قرأ "إنَّ مع العسر يسرا"؛ فأيقنَ أن اليسر آتٍ لا محالة.

وسلامًا على من قرأ "ألا بذكر الله تطمئن القلوب"
؛ فهدَّأ قلبه بسبحان الله والحمد لله.

وسلامًا على من قرأ "فما ظنكم برب العالمين"؛
فقال ما ظننت بك إلا خيرًا يا رب .🤲🏻🤍

كل ما ربنا يمنع عنك حاجة كان نفسك فيها
افتكر الآيتين دول:

"فخشينا أن يُرهقهما"

"فأردنا أن يبدلهما ربهما خيرًا منه"

واعلم دائمًا أن المنع إذا كان من عند الله فهو عين العطاء :))

من الحاجات القريبة جدًا لقلبي وبحسها فعلًا من طِباع النفس البشرية.. لما سيدنا عبدالله بن عباس قال: أربعة لا أقدر على مكافأتهم..

١- رجل بدأني بالسلام..
"كل حد بيضحك أول ما بيشوفني وهو بيقول اسمي، أو ألاقيه خدني بالحضن، أو اتحرك ناحيتي وبادرني بالسلام"

٢- ورجل وسّع لي في المجلس..
"تعالى اقعد جنبي، وسّع لُه يقعد معانا، اقعد انت أنا هقوم أشد كرسي تاني"

٣- ورجل اغبرّت قدماه في المشي في حاجتي
"خلاص أنا هتصرف، هسألّك حد وأرد عليك، متشليش هم"

وبعدين يقول ابن عباس عن أكتر حاجة بحبها..

٤- فأما الرابع فما يكافئه عني إلا الله عز وجل، قيل: ومن هو؟
قال رضي الله عنه: رجل نزل به أمر فبات ليلته يفكر فيمن يقصده.. ثم رآني أهلًا لحاجته فأنزلها بي..

يا رب ربّينا وعلّمنا الأدب ♡︎

‏"يتنافَس الصّالحون فى كثرة الصَلاة عَلى النَّبى ﷺ."

‏- فكُن منهم. 🕌
{واذكر ربك إذا نسيت}.
♥️✨
لا إله إلا الله
وسلاماً علي من مر صدفه ف صلى على النبي فأهداني الله عشرا و زاده عشرا ﷺ♥️🦋
..🕊وفي ليلة الجمعة ..
اللهم استجب لنا ما نعجز عن قوله ، وما يصعب علينا صياغته وأنت تعلمه ، اللهـم وتقبل كل دعوة ساكنة في صدورنا ولا نعلم كيف نرفعها إليك .🤍🤲🏻
ليلة جمعة مباركة .
عطر فمك بالصلاة على النبي ﷺ

‏إذا أجري الله على لسانك الصلاة على النبيﷺ فقد جُبِرت ونُصِرت وأتتك أُمنيّآتك وهي راغِمة

عطِّر فمك بالصلاة على النبيﷺ❤️

عصر آخر جمعة في العام الهجري

كل عام وأنتم بخير..

إن شاء الله زي الأيام دي السنة الجاية نكون عايشين واقع الدعوات اللي دعيناها طول أيام رمضان الجميلة وليالي ذي الحجة ويوم القرّ واللي بندعيها على طول ونكون مستنيين استجابة أمنيات جديدة وحياتنا مليانة فرح، مجبورين، مُطمئنين، مرتاحين البال، ومتهنيين.

سبحان الله، الإنسان هو هو، نفسيته المطمئنة تتيح له إنجاز مليارات الأشياء، ونفسيته القلقة تصيبه بالشلل!

اللهم لا تكلنا إلى أنفسنا طرفة عين :))

بعد كتب كتابي بكام يوم لون بشرتي بدأ يتغير للون الأصفر والألم في بطني كان يكاد يكون مُميت ولا يُطاق.

فروحت للدكتورة مع والدتي وكشفت وهنا كانت أكبر صدمة صُعقت منها في حياتي الدكتورة قالتلي كدا بالنص:
" الرّحم عندك يكاد يكون مشقوق نصين ومستحيل تخلفي! "

خرجت من المستشفى وكل اللي في بالي هقول لزوجي إيه؟
وقتها ماما كانت منهارة بس بتحاول تتماسك، بقيت أقول في بالي " ياترى هيسيبني؟ لا مستحيل ده بيحبني جدًا "
حارب عشاني كتير وحتى بعد ما بابا رفضه فضل متمسك بيا فمش معقولة هيتخلى عنِّي، طلعت موبايلي ورنيت عليه فرد عليا بعد تاني مرة، ولما حكيتله اتردد وسكت فلاقيت ريقي وقف وحسيته اتحجر في زوري، فهمت موقفه من عدم رده عليا ولساني انقعد وحتى كلمات الـحب اللـي كـنت بقولهاله حسيتها هتبقى ماسخة جدًا لو طلعت مني للشخص ده تاني واستغربت الدنيا جدًا حقيقي، إمبارح أقرب شخص ليا أصبح أغرب شخص، فكرت إنه هيشاركني كل حاجة، هيطلب صورة ليا بالفستان ويختارلي الأجمل.

مقدرتش أقف على رجلي وأغمى عليا، صحيت على صوت ماما غي البيت وهي بتقولي " الخيبة لما بتيجي بدري يانور بنقدر نعالجها بسرعة، هو بص لأسباب الطب ومبصش لأسباب الرب "

- طب هو كان في حاجة لازم أعملها ياماما؟
لا ياقلب ماما " قُلْ إِنَّ الْأَمْرَ كُلَّهُ لِلَّهِ "
- بس أنا كنت بحبه!
ربنا بياخد منك الأنسب بالنسبالك عشان يرزقك الأصلح ♥.

بعد أيام مش بعيدة أتقدم ليا شاب على خُلق ودين، فرفضتهُ وخوفت يسيبني هو كمان، بس هو أتقدم تاني وتالت فبابا قالي " اقعدي معاه وقوليله الحقيقة بينك وبينه "
أول ما قعدت معاه سألني على سبب رفضتي!
فقولتله " أنا مش هخلف ".
فرد بصدمة وقال " فين الضرر لو توكّلنا على الله الذي يَمنح ويَمنع! "
- فقولتله " وليه متتجوزش غيري وتخلف؟ " فسكت ومردش!
وبعد شوية قال " إزاي واحد عاقل يبص للبشر ويغض الطرفَ عَن المُسبِّب؟ والذي أعطى زكريا سيُعطيني! "
وافقت عليه، وتمَّت الخطوبة والفرح، وبعد ٣ سنين حملت!
فرحتي كانت لا توصف، ولكن الحمل هيكتمل إزاي؟ لكني سيبتها على ربنا وكنت بروح أشتري لبس للطفلة وبشارك زوجي وأقوله " دي أجمل ولا دي! " ياترى هيبق ولد؟
ولا بنت؟ شبهي ولا شبهك!

والصدمة جات زي ما توقعت، الحمل مكتملش بصيت لجوزي وقولتل " مش قولتلك ؟ "
فابتسم وقال " وَلَئِن صَبَرْتُمْ لَهُوَ خَيْرٌ لِّلصَّابِرِينَ".
- هتسيبني؟
ايوه بس لما أموت.

عدت سنة وحملت مرة كمان، زوجي بقى هو اللي يخدمني وكنت بنام في السرير على طول، وبرضو سقطت تاني!
دخلت في حالة نفسيَّة فلاقيت زوجي دخل عليا وحضني وقال " وَأَيُّوبَ إِذْ نَادَىٰ رَبَّهُ أَنِّي مَسَّنِيَ الضُّرُّ وَأَنتَ أَرْحَمُ الرَّاحِمِينَ "

" وَزَكَرِيَّا إِذْ نَادَىٰ رَبَّهُ رَبِّ لَا تَذَرْنِي فَرْدًا وَأَنتَ خَيْرُ الْوَارِثِينَ.
فَاسْتَجَبْنَا لَهُ ".

مع الوقت لاقيت جسم زوجي بيضعف، تحت عينه بقى أسود فروحتله الصالون ونمت على كتفه وقولتله" مالك؟ "
رد وقال " عُكّازي اتكسر ".
- أي عُكاز ؟
انتي عُكّازي في الدُّنيا يانور ♥.

- بس أنا مش قادرة اسندك!
عارفة يانور لو صبرتي بجد كان ربنا مّن عليكي.
- أنا صابرة
إزاي صابرة وصبرك مُقترنٌّ بسوءِ ظنّ؟
- يعني أعمل إيه؟
أُصبري بيقين وبثقة وادعي دُعاء المُضطر
- معقولة هيجبرني؟
ثقي في رحمته فقط ♥.

وفعلاً بعد سنتين من الدعاء والمناجاه حملت، بس المرة دي مكنتش خايفة، حتى معملتش سونار ولا مرة وكنت سايبة كل أموري على الله، ولما جه يوم الولادة ماما وزوجي وبابا كانوا جنبي، هو كان بيطمني ويطبطب عليا كل شوية وبيحاول يذكرني إن ربنا رب الخير ♥..

وبعد الولادة زوجي دخل لقى في حضني تؤام وبعيط!

فوقف متنح شوية وبعد قال بفرحة ويقين " مفكرة معيّة اللّٰه عز وجل هتهجُرنا بعد ما جبر قلوبنا وجمعنا ببعض؟ "

فبصيت لماما فقالت الجملة دي للمرة التانية:

" بياخد الأنسب من وجهة نظرك عشان يرزقك الأصلح " ♥.

واقعية سُردت بواسطتي.

لـ/ عزة العمروسي

في ناس بتصلي…
بس مش حاسين بحاجة.

الركوع تقيل…
والسجود مفيهوش روح…
والدعاء في الآخر بيبقى مجرد كلمتين بيتقالوا بسرعة وخلاص.

مش لأنهم كُفار،
ولا لأن قلبهم ميت،
بس عشان جواهم حاجة مطفية…
وهم بيحاولوا يرجعوها كل يوم، ومش راضية ترجع.

وبرغم كده…
لسه بيصلّوا.
كل يوم.

يمكن تكونوا شايفين ده ضعف أو فتور،
لكن عايز أقول: والله ده أصدق التعلّق…

لأن اللي بيكمّل من غير ما يحس،
هو أكتر واحد خايف يضيع.

اللهم اجعل قرة أعيننا في الصلاة
ولا تحرمنا لذة الخشوع بين يديك!

كُل عامٍ ونحنُ نشهدُ أن لا إله إلاّ اللّٰه ، وأنَّ مُحمدًا رسول اللّٰه 🤍🌿
صَلوا على مَن مّر على هِجرته ١٤٤٧ عامٍ 🕊️

من مغرب اليوم تبدأ أول ليالي شهر الله المحرم وبداية العام الهجري الجديد ..

يقول الله عز وجل في كتابه الكريم:
{ إِنَّ عِدَّةَ الشُّهُورِ عِنْدَ اللَّهِ اثْنَا عَشَرَ شَهْرًا فِي كِتَابِ اللَّهِ يَوْمَ خَلَقَ السَّمَاوَاتِ وَالْأَرْضَ مِنْهَا أَرْبَعَةٌ حُرُمٌ ذَلِكَ الدِّينُ الْقَيِّمُ فَلَا تَظْلِمُوا فِيهِنَّ أَنْفُسَكُمْ }

- شهر الله المحرم من الأشهر الحرم!
وقت مناسب جداً لبداية جديدة لفتح باب أمل جديد لمُتابعة ما بدأناه وفترنا عنه.
بـدايـة نعيش بيها معني الهجرة!
نهجر المعصية
نهجر الكسل
نهجر كل هوي وذنب مقيمين عليه .

وقت نزود فيه طاعتنا ونتقرب فيه إلي الله بعد انتهاء مواسم الطاعات ، صدقة ، ذكر ، قيام ليل ، بر والدين ، الدعاء وخاصة الصيام ..
حيث ورد عَنْ أَبِي هُرَيْرَةَ رَضِيَ اللَّهُ عَنْهُ قَالَ :
قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( أَفْضَلُ الصِّيَامِ بَعْدَ رَمَضَانَ شَهْرُ اللَّهِ الْمُحَرَّمُ وَأَفْضَلُ الصَّلَاةِ بَعْدَ الْفَرِيضَةِ صَلَاةُ اللَّيْلِ )

اللهم اجعله عامٌ نلجأ ونتوب فيهِ اليك، واجعله عاماً مليء بالرحمةِ والمغفرةِ والنصرِ لإخواننا المستضعفين والأمة الإسلامية جميعها :")) .

فيه معلومة عِرفتها وهي إن أصحاب الرسول صلى الله عليه وسلّم كانوا بيقولوا دُعاء عن رسول الله صلى الله عليه وسلّم عند بداية الشهر وعند بداية السنة "عند رؤية الهلال"،
وإحنا أهو بنبدأ السنة الهجرية الجديدة فنتعلم الدُعاء ده،
عن عبدُ الله بن هشام قال:

كَانَ أَصْحَابُ النَّبِيِّ صَلَّى اللهُ عَلَيْهِ وَسَلَّمَ، يَتَعَلَّمُونَ هَذَا الدُّعَاءَ إِذَا دَخَلْتِ السَّنَةُ أَوِ الشَّهْرُ:
"اللَّهُمَّ أَدْخِلْهُ عَلَيْنَا بِالْأَمْنِ، وَالْإِيمَانِ، وَالسَّلَامَةِ، وَالْإِسْلَامِ، وَرِضْوَانٍ مِنَ الرَّحْمَنِ، وَجَوَازٍ مِنَ الشَّيْطَانِ"،

كل عام والأمة الإسلامية بخير.♥️

"وإذَا لَيـلُ الخَمِيسِ طَارِفُهُ بَدَا
زِد بالصَلاةِ على الحَبِيبِ مُحَمّدَا ﷺ.".
..♡🪐

ربنا سبحانه وتعالى قال في سورة الصافات آية عظيمة جدًا على هيئة سؤال، وهي قوله تعالى"فما ظنُّكم بِرَبِّ العالمين."؟

السؤال ده كل ما تضيق عليك الدنيا وتحس انها ضلّمت في وشّك اسأله لنفسك، قول لنفسك ما ظنّك برب العالمين؟

سيدنا عبد الله بن مسعود كان يقول : "قسمًا بالله ما ظَنَّ أحد بالله ظنًّا إلا أعطاه ما يظن، وذلك لأن الفضل كله بيد الله."

ساعتها والله هتحس كأن باب كبير يوشك أن يُفتح، ونور عظيم باين قدام في آخر الطريق، إحساس بيقولك إنها هتفرج من وسع فاتطمِّن بجد ولا تحزن.

اللهم إنا نظن بك غفرانًا، وعفوًا، وعافيةً، وسترًا، وتوبة، وهداية، وسعادة، وثباتًا، ورزقًا، وتوفيقًا، وفرجًا قريبًا، وحُسن خاتمة.

﴿ رَبِّ إِنِّي لِمَا أَنزَلْتَ إِلَيَّ مِنْ خَيْرٍ فَقِيرٌ﴾
[ القصص: 24]⁠

عندما قالها موسى عليه السلام ، أوجَد الله له العمل، ثم يسّر له الزواج، ثم أكرمه بالنبوة.
الإفتقار لله، غِنى!

اللهم أنت الغني ونحن الفقراء إليك ، فاغننا بفضلك عمن سواك ..🤲🏻♥️

قال ابن رجب في لطائف المعارف:
" أفضل شهر الله المحرم عشره الأول" .

يُستحب الإكثار من الأعمال الصالحة في هذا الشهر المبارك ، مثل الصيام فيُستحب صيام يومي تاسوعاء وعاشوراء. ، والصدقة، وقيام الليل، وذكر الله، وصلة الرحم ، وبر الوالدين.

اللهم أعنا على ذكرك وشكرك وحسن عبادتك..🤲🏻♥️

يقول الله تعالى في سورة الحجر :

{وَلَقَدۡ نَعۡلَمُ أَنَّكَ يَضِيقُ صَدۡرُكَ بِمَا يَقُولُونَ (97) فَسَبِّحۡ بِحَمۡدِ رَبِّكَ وَكُن مِّنَ ٱلسَّٰجِدِينَ (98)}

إذا ضاق صدرك بالأحزان، وامتلأ قلبك بالهموم، انشغل بالذكر والاستغفار والتسبيح والصلاة، فإن ذلك كله خير دواء.🤍

كنت في جنازة النهاردة، ومشهد بصراحة وجعني
الجامع كان مليان والنعش دخل والناس بدأت تدخل تصلي لكن اللي صدمني فعلاً إن في ناس وقفت على الباب اللي واقف بيتكلم واللي واقف ماسك موبايله الغريب أنهم واقفين ادام الجامع ومدخلوش يصلوا على الجنازة وبصراحه الأمر يخوف دا مش أمر عادي انك تروح للمسجد عشان تحضر جنازة وتروح تقعد ادام المسجد ومتدخلش وعشان كده سألت نفسي سؤال بصراحة خوّفني
هو إيه اللي يمنعك تدخل تصلي؟
ليه الخير قدامك وتبعد؟
ليه الدعاء مفتوح وانت ساكت؟
معقول تبقى قدّام لحظة مغفرة وربنا ما يرزقكش الدخول ليها؟
وخطر في بالي إن ممكن يكون دا غضب من ربنا؟!
آه هو انا مشفتهاش غير كده
ممكن يكون إن قلبك اتقفل أو إنك اتحرمت من الخير علشان ذنب علشان غفلة علشان تقصير؟!
دي مش مبالغة...
في ناس ربنا بيصرفهم عن مواطن الرحمة مش صدفة لكن لأنهم صرفوا قلبهم زمان عنها
وبعدين شوف النبي ﷺ قال من صلى على جنازة فله قيراط... والقيراط مثل جبل أُحد."
يعني مغفرة كبيرة دعوة ممكن تترفع ليك قبل ما تترفع للميت وبرضه في ناس واقفة تتفرج وكأنهم مش معنيين بشيء أنا دخلت صليت ودعيت وقلبي بيترجف مش بس علشان اللي مات علشان اللحظة دي بتفكرني بنفسي إن الدور جاي وإن اللي أنا عملته النهاردة هو اللي هتردلي زيه.
✋ لو حسّيت إنك ما كنتش تستاهل تدخل ارجع لربنا لو لقيت نفسك بعيد عن مواطن الخير خاف يمكن تكون دي إشارة
وما تنساش
زي ما بتعمل النهاردة هيتعمل فيك بكرة
رزقنا الله وإياكم حسن الختام 🤲🤍🌹