ငွေစက္ကူထုတ် ဝါဇီစက်ရုံ အပါအဝင် စစ်တပ်ဂိတ်စခန်းများကို ရှော့တိုက်ဒုံး၊ ဒရုန်း၊ လက်နက် ကြီးများဖြင့် တိုက်ခိုက်မှု စက်ရုံလိုင်းခန်းအဆောက်အအုံများ ထိခိုက်ပျက်စီး
★★★★★★★★★

ဇန်နဝါရီလ ၁၉ ရက်နေ့ နံနက် ၆ နာရီ ၁၅ မိနစ်ကစတင်ပြီး နိုင်ငံ့ငွေတန်ဖိုး ကျဆင်းစေမှုတွင် အဓိက အခန်းကဏ္ဍမှ ပါ၀င်၍ အကြမ်းဖက်စစ်ကောင်စီ ခိုင်းသမျှ ငွေစက္ကူ ထုတ်လုပ်ပေးနေသော ဆိပ်ဖြူ မြို့နယ်အတွင်းရှိ ဝါဇီ စက်ရုံ (လ.န.စ) နှင့် ၎င်း စက်ရုံ အနီးရှိ အကြမ်းဖက်စစ်တပ်ဂိတ်စခန်းများဖြစ် သော ဆိပ်ဖြူမြို့နယ်၊ ချောင်းမကြီးကျေးရွာ စခန်း ၊ပခုက္ကူမြို့နယ်၊ လယ်ကျင်းကျေးရွာ အနီး ဇီးပင် ဂိတ်၊ တောခေါင်းဂိတ်၊ ချိုက်ကျေးရွာရှိ စခန်း၊ မြင်းစကောကျေးရွာရှိ စခန်းတို့ကို မကွေးတိုင်း ပကဖ နှင့် ပူးပေါင်းတပ်များက ရော့ကတ်၊ ဒရုန်း၊ လက်နက်ကြီးများဖြင့် ပစ်ခတ်တိုက်ခိုက်ခဲ့ကြောင်း သိရပါသည်။

အဆိုပါ တိုက်ခိုက်မှုအား မကွေးတိုင်း ပကဖ၏ ဒရုန်းတပ်ဖွဲ့ တစ်ခုဖြစ်သော သိန်းငှက်နက် ဆိပ်ဖြူတော်လှန်ရေးတပ်ဦးမှ ထုတ်လုပ်ထားသည့် Short Range Missile ၁၇ လုံးဖြင့် ပစ်ခတ်တိုက်ခိုက်ခဲ့ခြင်းဖြစ်ပြီး စက်ရုံအတွင်းရှိ လိုင်းခန်းများ ထိခိုက်ပျက်စီးမှုရှိကာ စစ်သားများလည်း ထိခိုက်သေဆုံးမှုရှိကြောင်း သိရပါသည်။