စစ်ကောင်စီရဲ့ကာကွယ်ရေး၊ ပြည်ထဲရေး၊ လုံခြုံရေးနဲ့ နယ်စပ်ရေးရာဝန်ကြီးဌာန ဝန်ကြီးတွေလည်း တက်ရောက်ခဲ့ပါတယ်။
၂ဝဝ၈ ဖွဲ့စည်းပုံအခြေခံဥပဒေ ပုဒ်မ - ၄၁၇ အရ အရေးပေါ်ကာလကို ကာကွယ်ရေးဦးစီးချုပ်က တစ်နှစ်တိတိ ရယူခွင့်ရှိပါတယ်။
အဲဒီနောက် တိုင်းပြည်မတည်ငြိမ်သေးဘူးလို့ ကာကွယ်ရေးဦးစီးချုပ်က ထပ်တင်ပြရင် ပုဒ်မ ၄၂၅ အရ နောက်ထပ်ခြောက်လနှစ်ကြိမ်သာ အာဏာသိမ်းသက်တမ်း တိုးခွင့်ရှိပါတယ်။
ဒါပေမဲ့ ဗိုလ်ချုပ်မှူးကြီး မင်းအောင်လှိုင်ကတော့ အကြောင်းပြချက်တွေပေးပြီး သက်တမ်းတိုးလာတာ ဒီတစ်ကြိမ်နဲ့ဆို ငါးကြိမ်မြောက်ရှိပါပြီ။
ဒီနေ့တစ်ရက်တည်းမှာပဲ အမျိုးသားညီညွတ်ရေးအစိုးရ (NUG) နဲ့ တိုင်းရင်းသားလက်နက်ကိုင် တော်လှန်ရေးအဖွဲ့တွေကလည်း စစ်အာဏာရှင်စနစ်ချုပ်ငြိမ်းရေးနဲ့ ဖက်ဒရယ်ဒီမိုကရေစီပြည်ထောင်စုတည်ဆောက်ရေးအတွက် ဘုံသဘောထားကို ထုတ်ပြန်ခဲ့ပါတယ်။
မြန်မာစစ်တပ်က နိုင်ငံရေးမှာ ပါဝင်နေမှု အဆုံးသတ်ဖို့၊ ဒီမိုကရေစီနည်းကျ‌ ရွေးကောက်တင်မြှောက်ထားတဲ့ အရပ်သားအစိုးရအောက်မှာ လက်နက်ကိုင်တပ်ဖွဲ့တွေ ထားရှိဖို့၊ ၂၀၀၈ ဖွဲ့စည်းပုံ အခြေခံဥပဒေကို ဖျက်သိမ်းဖို့၊ အားလုံးလက်ခံနိုင်မယ့် ဖက်ဒရယ်နဲ့ ဒီမိုကရေစီစနစ်ကို အခြေခံတဲ့ ဖွဲ့စည်းပုံ အခြေခံဥပဒေ ရေးဆွဲဖို့၊ အဲဒီ အခြေခံဥပဒေနဲ့ ပြည်ထောင်စုအသစ် တည်ဆောက်ဖို့၊ ပဋိပက္ခတွေအတွင်း ကျုးလွန်ခံရသူတွေအတွက် တရားမျှတမှု ရရှိစေဖို့ စတဲ့ နိုင်ငံရေး ဦးတည်ချက် ခြောက်ရပ်ကိုလည်း ဖော်ပြထားပါတယ်။
လုပ်ငန်းစဉ်အနေနဲ့ စစ်ကောင်စီကို စစ်ရေး၊ နိုင်ငံရေးအရ ဖိအားပေးတာ၊ နိုင်ငံရေးဦးတည်ချက် ခြောက်ရပ်ကို လက်ခံလာရင် အာဏာလွှဲပြောင်းဖို့အတွက် ဆွေးနွေးတာ၊ အာဏာသိမ်းမှုကို အဆုံးသတ်ပြီး အသွင်ကူးပြောင်းရေးကာလ အစိုးရဖွဲ့စည်းပြီး နိုင်ငံပြန်လည် တည်ဆောက်တာ စတာတွေကို လုပ်ဆောင်သွားမယ်လို့လည်း ရေးသားထားပါတယ်။
၂၀၀၈ ဖွဲ့စည်းပုံအခြေခံ ဥပဒေအရ အမျိုးသားကာကွယ်ရေးနဲ့ လုံခြုံရေးကောင်စီ (ကာ/လုံ) ကို နိုင်ငံတော်သမ္မတ၊ ဒုတိယသမ္မတ နှစ်ဦး၊ ပြည်သူ့လွှတ်တော် ဥက္ကဋ္ဌ၊ အမျိုးသားလွှတ်တော် ဥက္ကဋ္ဌ၊ ကာကွယ်ရေးဦးစီးချုပ်၊ ဒုတိယကာကွယ်ရေးဦးစီးချုပ်၊ ကာကွယ်ရေးဝန်ကြီး၊ နိုင်ငံခြားရေးဝန်ကြီး၊ ပြည်ထဲရေးဝန်ကြီး၊ နယ်စပ်ရေးရာဝန်ကြီး အပါအဝင် စုစု‌ပေါင်း ၁၁ ဦးနဲ့ ဖွဲ့စည်းထားပါတယ်။
လက်ရှိကာလုံအဖွဲ့ကို စစ်တပ်အာဏာသိမ်းပြီးမှ ခန့်အပ်ထားတဲ့ ယာယီသမ္မတ ဦးမြင့်ဆွေက ဦးဆောင်နေပြီး ဒုသမ္မတ ဦးဟင်နရီဗန်ထီးယူ၊ ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်၊ ဒုတိယကာကွယ်ရေးဦးစီးချုပ် ဒုတိယဗိုလ်ချုပ်မှူးကြီး စိုးဝင်း၊ ပြည်သူ့လွှတ်တော် ဥက္ကဋ္ဌ ဦးတီခွန်မြတ်၊ စစ်ကောင်စီရဲ့ ကာကွယ်ရေး၊ နိုင်ငံခြားရေး၊ ပြည်ထဲရေးနဲ့ နယ်စပ်ရေးရာဝန်ကြီး လေးဦးအပါအဝင် စုစုပေါင်းကိုးဦးနဲ့ ဖွဲ့စည်းထားပါတယ်။
အာဏာသိမ်းပြီးနောက်မှာ သမ္မတဦးဝင်းမြင့် အဖမ်းခံထားရပြီး၊ NLD ပါတီက အမျိုးသားလွှတ်တော် ဥက္ကဋ္ဌ မန်းဝင်းခိုင်သန်းတို့လည်း ကာလုံအဖွဲ့မှာ မပါဝင်တော့ပါဘူး။
နိုင်ငံရေးလေ့လာသူတွေကတော့ စစ်ကောင်စီရဲ့ အခုလို သက်တမ်းထပ်တိုးလိုက်တာကြောင့် နိုင်ငံတစ်ဝန်း တိုက်ပွဲတွေဆက်တိုးလာနိုင်တယ်လို့ သုံးသပ်ကြပါတယ်။
အာဏကာသိမ်းသုံးနှစ်အတွင်းမှာလည်း တစ်နိုင်ငံလုံးရဲ့ မြို့နယ်ပေါင်း ၃၃၀ အနက် ၂၂၁ မြို့နယ်မှာ တိုက်ပွဲတွေဖြစ်ခဲ့တယ်လို့ မြန်မာ့မဟာဗျူဟာနဲ့ မူဝါဒရေးရာလေ့လာရေး အင်စတီကျု (ISP-Myanmar) က အခုဇန်နဝါရီလထဲမှာပဲ ထုတ်ပြန်ထားပါတယ်။

#RFA
#HlaingInfo