❗မိုးသည်းထန်စွာ ရွာသွန်းတာကြောင့် မြေနိမ့်ပိုင်း နေထိုင်သူတွေ စစ်ရှောင်ပြည်သူတွေနဲ့ မြစ်ကမ်းပါးအနီး နေထိုင်သူတွေ ဂရုစိုက်နေထိုင်ကြဖို့ သတိပေး❗

မိုးသည်းထန်စွာ ရွာသွန်းတာကြောင့် မြစ်ရေကြီးတာ၊ မြို့ပြဒေသတွေမှာ လျှပ်တစ်ပြက် ရေကြီးတာနဲ့ မြေပြိုကမ်းပါးတာ‌တွေ ဖြစ်နိုင်တာမို့ မြေနိမ့်ပိုင်း ရေဝင်နိုင်တဲ့နေရာမှာ နေထိုင်သူတွေ၊ စစ်ရှောင်ပြည်သူတွေနဲ့ မြစ်ကမ်းပါးအနီး နေထိုင်သူတွေ ဂရုစိုက်နေထိုင်ကြဖို့ အမျိုးသားညီညွတ်ရေးအစိုးရ၊ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနက သတိပေး ထုတ်ပြန်ထားပါတယ်။

ကပ္ပလီပင်လယ်မြောက်ပိုင်း၊ ဘင်္ဂလားပင်လယ်အော်မြောက်ပိုင်း၊ ယင်းနဲ့ ဆက်စပ်လျက်ရှိတဲ့ ဘင်္ဂလားပင်လယ်အော်အလယ်ပိုင်းတို့မှာ တိမ်အသင့်အတင့်မှ တိမ်ထူထပ်နေပြီး မုတ်သုံလေ အား ကောင်းရာမှ အားအလွန်ကောင်းနေပါတယ်။

ဇူလိုင်လ ၄ ရက်နေ့ကနေ လာမယ့် ၃ ရက်အတွင်း မြန်မာနိုင်ငံနေရာအနှံ့အပြား မိုးရွာသွန်းနိုင်ပြီး ကချင်ပြည်နယ်၊ မွန်ပြည်နယ်၊ ပဲခူးတိုင်း၊ တနင်္သာရီတိုင်းနဲ့ ကရင်ပြည်နယ်တွေမှာ နေရာစိပ်စိပ် မိုးထစ်ချုန်းရွာနိုင်ပြီး ရှမ်းပြည်နယ်၊ ရခိုင်ပြည်နယ်၊ ရန်ကုန်တိုင်းနဲ့ မန္တလေးတိုင်းတွေမှာ နေရာကွက်ပြီး မိုးကြီးနိုင်ပါတယ်။

ဒါကြောင့် ပြည်သူတွေ အနေနဲ့ မိုးလေဝသ ခန့်မှန်းချက်တွေကို သတိပြုကာ ရေကြောင့် ပျက်စီးနိုင်တဲ့ ပစ္စည်းတွေကို ကြိုတင်ရွှေ့ပြောင်းထားတာ၊ လိုအပ်ပါက ယာယီနေရာရွှေ့ပြောင်းနေထိုင်တာတွေ ပြုလုပ်ကြဖို့ ဝန်ကြီးဌာနက ထုတ်ပြန် အသိပေးထားပါတယ်။

#4C_TruthNews