◼️ ဒီပဲယင်းမြို့ သိမ်းတိုက်ပွဲမှာ (PDF) တွေ နိုင်တာလား ရှုံးတာလား

ပြည်သူ့ကာကွယ်‌ရေးတပ်ဖွဲ့ (PDF) တွေဘက်ကနေ ဒီပဲယင်းမြို့က စစ်​ကောင်စီတပ်စခန်းတွေကို သြဂုတ်လ ၁၆ ရက်နေ့က စတင်ပြီး အပြင်းအထန်ထိုးစစ်ဆင်တိုက်ခိုက်ခဲ့တယ်။ သြဂုတ်လ ၁၈ ရက်နေ့မနက်ပိုင်းမှာ တမြို့လုံးကို သိမ်းပိုက်ထိန်းချုပ်နိုင်ကြောင်း မြေပြင်စစ်ရေးသတင်းရင်းမြစ်တွေက တဆင့် သိလိုက်ရတယ်။

သိပ်မကြာဘူး၊ သြဂုတ်လ ၁၈ ရက်နေ့ ညပိုင်းကျတော့ စစ်အုပ်စုက လေကြောင်းကနေ အပြင်း အထန် ထိုးစစ်ဆင်နေသလို၊ အင်အားအလုံးအရင်းဖြည့်တင်းလာလို့ တော်လှန်ရေးတပ်တွေ နောက်ဆုတ်ပေးလိုက်ရတယ်လို့ သိရတယ်။ ဒါဆိုရင် တော်လှန်ရေးတပ်တွေ ဒီပဲယင်းမြို့သိမ်းတာ တန်လို့လား၊ နိုင်တာလား၊ ရှုံးတာလား မေးစရာရှိပါတယ်။

ပထမဆုံး ဒီပဲယင်းမြို့သိမ်းတိုက်ပွဲ ဖော်ဆောင်ခဲ့တဲ့ အခြေအနေကိုပြန်ကြည့်ရင် ရွှေဘိုခရိုင် အောက်ကနေ ရွှေဘို ပကဖ၊ ဒီပဲယင်း ပကဖနဲ့ တော်လှန်ရေး ပူးပေါင်းတပ်တွေပါဝင်တာတွေ့ရတယ်။ အညာဒေသမှာ တော်လှန်ရေးတပ်တွေ အချင်းချင်း မတည့်ဘူးလို့ သွေးခွဲနေခဲ့တဲ့ စစ်ကောင်စီတပ်အပေါ် အညာဟာ ဘုံရန်သူကို အတူတကွတိုက်တယ်ဆိုတဲ့ အချက်ကို မြင်သာစေတယ်။ သိရသလောက်ဆိုရင် ဒီပဲယင်းမှာ တိုက်တဲ့ အဖွဲ့ကတိုက်နေသလို၊ ရေဦးဘက်က အင်အား ၁၀၀ ပါ စစ်ကူလာတဲ့ စစ်ကောင်စီစစ်ကြောင်းကို ကြားဖြတ်တိုက်တဲ့ အဖွဲ့က တိုက်နေကြတယ်လို့သိရတယ်။ ဒါဟာ စုဖွဲ့မှုအားကောင်းလာတာကို မြင်သာစေတဲ့အချက်နဲ့ အောင်မြင်မှုပါ။

ဒုတိယအချက်က ဒီပဲယင်းမြို့သိမ်းတိုက်ပွဲမှာ စစ်ကောင်စီတပ်က သူ့လက်အောက်ခံ ပျူတွေ၊ Non CDM ဝန်ထမ်းတွေကို လှည့်မကြည့်ပဲ ထွက်ပြေးသွားတယ်လို့ သိရတယ်။ ပျူ ၂ ယောက်၊ Non CDM ထွေအုပ်အပါအဝင် အခြားဝန်ထမ်း ၄၁ ယောက်၊ Non CDM မိသားစုဝင် ၈၀ နဲ့ စစ်ကောင်စီရဲ့ အုပ်ချုပ်မှု အချက်အလတ်တွေအကုန် PDF က ထိန်းသိမ်းလိုက်နိုင်တယ်။ ဒါကလည်း အောင်မြင်မှုတခုပါပဲ။ ဘာလို့လဲဆိုတော့ ဒီပဲယင်းမြို့မှာ စစ်ကောင်စီရဲ့ အုပ်ချုပ်ရေး ယန္တယားကို ဖျက်ဆီးနိုင်တာကြောင့်ဖြစ်တယ်။

အခုဆိုရင် စစ်အုပ်စုက ရေဦး ဘက်ကနေ စစ်ကူမပေးနိုင်တော့ Mi-17 ရဟတ်ယာဥ်နဲ့ လူတင်လာတယ်။ Mi-35 က ဘေးကနေ ပတ်ချာလည် လိုက်ပစ်ပေးတယ်။ ဒီလိုနည်းနဲ့ ဒီပဲယင်းမြို့ထဲက စစ်ကောင်စီရဲ့ ရုံးဌာနတွေဖြစ်ခဲ့တဲ့ ရဲစခန်း၊ ထွေအုပ်ရုံး၊ စစ်ကောင်စီအခြေစိုက် နေရာတွေကို တပ်စွဲလာကြတယ်လို့သိရတယ်။ ဒီနေရာမှာ မြို့သိမ်းတိုက်ပွဲစကတည်းက ရဲစခန်း အပါအဝင် ဌာန အတော်များများကို တော်လှန်ရေးအင်အားစုက ဖျက်ဆီးလိုက်တဲ့အပြင်၊ အုပ်ချုပ်မှုဆိုင်ရာ စာရွက်စာတမ်းတွေ၊ Non CDM ဝန်ထမ်းတွေမရှိတဲ့ စစ်ကောင်စီအနေနဲ့ ဘယ်လိုမှ အုပ်ချုပ်လို့ မရတဲ့ အခြေအနေ ဖြစ်တယ်။

တတိယ မြင်သာစေတဲ့အချက်က စစ်အုပ်စုရဲ့ တပ်အင်အားအခြေအနေပါ။ လက်ရှိ စစ်ကောင်စီဟာ ကချင်၊ရှမ်းမြောက်၊ကရင်၊ရခိုင်၊ မန္တလေးတိုင်းအပါအဝင် နေရာအနှံ့အပြားမှာ စစ်ရင်ဆိုင်နေရတာအားလုံးအသိပါ။ ခုလိုအခြေအနေမှာ ဒီပဲယင်းမှာ မြို့သိမ်းတိုက်ပွဲ ဖော်ဆောင်တယ်ဆိုပါတော့၊ စစ်တပ်က အခြားသော မြို့ရွာတွေကနေ အင်အားအဆမတန်ထုတ်နှုတ်ပြီး တော်လှန်ရေးတပ်တွေကို လာတိုက်ရတဲ့ အတွက် စစ်ကောင်စီတပ်သားတွေရဲ့ စစ်ပန်းလာတဲ့အခြေအနေကို မြင်သာစေပါတယ်။ ဒါဟာ လက်ရှိ စစ်ကောင်စီတပ် ရင်ဆိုင်နေရတဲ့ အခြေအနေတွေလို့ ဆိုနိုင်ပါတယ်။

လက်ရှိလည်း တော်လှန်ရေးအင်အားစုတွေဘက်ကနေ အလံဖြူပြ လက်နက်ချ စစ်ကောင်စီ လက်အောက်ခံ ၁၂၀ ကျော်၊ စစ်လက်နက်ပစ္စည်းများ၊ ခဲယမ်းအများအပြားကို သိမ်းဆည်းရမိခဲ့ပါတယ်။ ဆိုတော့ ဒီပဲယင်းမြို့က စစ်တပ် စခန်းတွေကို လုပ်ချင်သလိုလုပ်ပြီး ပြန်ဆုတ်လာတဲ့အခြေအနေကို အောင်မြင်မှု အစပျိုးတယ်လို့ ပြောချင်ပါတယ်။

တခုတော့ရှိတာပေါ့၊ တိုက်ပွဲဖြစ်ပွါးရာနေရာတိုင်းက ပြည်သူလူထုတွေအနေနဲ့က စစ်ဘေးရှောင်ရတာမျိုးတော့ရှိတယ်။ ဒါကလည်း တော်လှန်ရေးတပ်တွေလာမတိုက်ခင်ကတည်းက စစ်အုပ်စုက ကျေးရွာတွေမှာ လေကြောင်းဗုံးကျဲ၊ အမြောက် လက်နက်ကြီးတွေနဲ့ ရွာထဲပစ်၊ ဒေသခံတွေကို ပစ်ခတ်ဖမ်းဆီးနေတာက ရှိနေမြဲ ဖြစ်တယ်။ ဒါပေမယ့် စစ်အုပ်စုအတွက် အညာဒေသက စစ်ကိုင်း၊ မကွေး ကို ထိန်းချုပ်ဖို့ လုံးဝမလွယ်ကူတော့တဲ့ အခြေအနေဖြစ်တယ်။ မကြာခင်လည်း လက်လွှတ်ခဲ့ရတဲ့နေရာတွေကို အရှိန်ပြင်းပြင်း ထိုးစစ်ကြီးတွေဝင်ဆောင့်ဖို့ ရှိနေပါတယ်။

အခုဆိုရင် ဒီပဲယင်းမြို့နဲ့ စပ်ဆက်နေတဲ့ ရေဦး နဲ့ ဘုတလင်မြို့ကိုလည်း​တော်လှန်​ရေးတပ်များက ၈၀ ရာခိုင်နှုန်း ခန့်ထိန်းချုပ်ထားနိုင့်ပြီဖြစ်​ကြောင်း သိရသလို၊ စစ်ကိုင်းတိုင်းအတွင်း အင်းတော်နဲ့ ပင်လည်ဘူးမြို့ကိုလည်း ပြည်သူ့ကာကွယ်ရေးတပ်ဖွဲ့များက မြို့သိမ်းတိုက်ပွဲ ဆင်နွှဲနေတာဖြစ်တယ်။ ဆိုတော့ ကာကွယ်ရေးဝန်ကြီး ဦးရည်မွန်ပြောသလို အညာဒေသစစ်ရေးအရှိန်မြင့်မှုတွေဟာ အောင်မြင်မှု အစပျိုးနေပြီလို့ဆိုနိုင်သလို၊ စစ်အုပ်စုရဲ့ ရှုံးနိမ့်လာမှုတွေကို မြင်သာစေကြောင်း သုံးသပ်တင်ပြလိုက်ရပါတယ်။

Video©အညာသားတို့ တိုက်ပွဲခေါ်သံ - တေးရေး တေးဆို = ဆန်းမင်း

#BBM
#မောင်ဝိ-wiper
#ဒီပဲယင်း
#KyimyindaingNetworks