كيفية غسيل الدماغ

أول بداية خل نعرف شنو هو غسيل الدماغ ؟
غسيل الدماغ هو تقنية نفسية بالعادة يستعملوهه العصابات او المؤسسات أو حتى الدولة نفسهه على فرد أو مجموعة من الأفراد الغرض من هاي التقنية هو تغيير نمط تفكير افراد معيين.

حتى اذا ملاحظين بوقت داعش دائماً نسمع انو اكو افراد مدنيين تم غسيل دماغهم حتى يصيرون مع التنظيم الارهابي.

طبعاً الي تتم علي هاي العملية النفسية مراح يلاحظهه بسهولة ولا بشكل مباشر وانما يتم التلاعب على الافراد بشكل نفسي غير ملحوظ.

مع الملاحظة على انه أي انسان بهل دنيا ممكن غسيل دماغه بل ويمكن تطبيق ذلك على مجتمع كامل!
و روبرت جاي هو من اوائل من وضع مصطلح غسيل الدماغ وهو ادق من فسرهه على حسب موقع ميدان.

عموماً المصطلح نفسه كلش بي تفاصيل بس احنه حنعتمد على شرح روبرت جاي والي عنده هواية مقولات اشهرهه ( ان المغسول يهاجم باحساسه لينتهي بتغيير افكاره ومعتقداته )

ويلخصلنياهه روبرت بعدة كلمات والي هي (جو تام من العزلة ، تحطيم والاعتداء على الهوية والشعور بالاثم والخيانة).

يتبع….

حسب روبرت جاي هاي العملية تمت على جنود امريكان بحرب الڤيتنام.

المرحلة الأولى لغسل الدماغ والي سمالنياهه "تحطيم الذات"

والي تتم من خلال العمليات الآتية:
١.الاعتداء على الهوية.
٢. الذنب.
٣.خيانة الذات.
٤.نقطة الانهيار.

تعالوا نشرح ذولة شلون يتمون…
بالبداية مهما كانت هوية الافراد الي يتم الهجوم عليهم سواء جنود او رجال او او…يتم انتزاع هويتهم منهم يعني الي يسوي غسيل عليك يجي يگولك (انت مو رجل، انت مو جندي ، انت مو متدين ، انت مو….الخ) حسب الهدف وهل عملية تتم من خلال اسابيع او شهور حدما المقابل بالفعل يفقد هويته وتقل صلابة معتقداته حدما تتحطم.
و وراهه (الذنب) يتم من خلال تحسسيك بالذنب بشكل مو طبيعي وخلال اساليب عدة واي خطيئة صغيرة او چبيرة يسويهه الضحية يتم محاسبته عليهه وتهويلهه وتحسيسه بالذنب بل اكو بعض الاساليب مال تعذيب جسدي لاي خطأ يرتكبه الضحية.

و وراهه تجينه (خيانة الذات) والي هنا الضحية بعد خلص يعترف انو هو انسان سيء ويفقد هويته بشكل كامل وسط انهياره وهنا تجي الخطوة الأخيرة من المرحلة الأولى (نقطة الانهيار) وهنا الضحية راح يحس بضياع وانو كل شي چان يعتقده وكل افكاره چانت خطأ في خطأ ويشعر بوحدة تامة ويگوم يدور على نفسه انو هو منو وليش هو هنا وسط انهيار عصبي (اختلال نفسي).

يتبع..

المرحلة الثانية والي تتمثل بعملية سماهه (امكانية الخلاص)

باثناء الانهيار العصبي الي يتم بالضحية راح تقدم الجهة المختصة بغسل الدماغ بعض اللطف والاهتمام البسيط للضحية وهو الشي المفاجىء للضحية والي يُشعر الضحية بالراحة والرخاء وكأن المقابل خلى ينجو من وسط انهياراته او بالاحرى انقذ حياته، لان طول هل فترة چان بوسط انهيار وخذلان وفقدان للذات واجى اللطف والاهتمام على غفلة!

وراح يقدمون مطبقين الغسيل للضحية امكانيات تخلي الضحية يخفف الالم النفسي الي هو عايش بي.
وهنا يجي دور المرحلة الثالثة والي هي (إعادة بناء الذات) والي من خلالهه راح يخلون الضحية يعيد ترتيب افكاره وهو بدوره راح يتخلى بشكل تام عن كل معتقداته وافكاره القديمة وراح يمشي وره الجهة الي سوت بي هيچ وهنا هو وي نفسه يفكر انو چان على خطأ و راح ينطوا راحة وامتنان تام وهذا الشي من خلال اتباعه الهم وراح يحسسوا انو هذا هو الصواب الچان لازم يسوي….وهنا تكتمل عملية الغسل.

بالختام

طبعاً هاي طريقة وحدة للغسيل من بين كثير من الطرق الاخرى
لكن كل الطرق اللخ نگدر نقارنهه بهاي الطريقة الفوگ.

وممكن هل شي يفسر هواية شغلات وبالذات التحولات الدينية لبعض المجاميع بشكل مفاجىء.


من خلال قراءة المراحل ممكن نعيد التفكير بأنه هل ممكن بانه احنه تم غسيل دماغنه بشكل يفقدنه هويتنه ؟

او يمكن تفسير الي تعرضوا للاستدراج بمراهقتهم من خلال شخص ظل يتلاعب بافكارهم من خلال هل خطوات وبالذات هاي الجماعات تستهدف المراهقين ع سوشل ميديا وتعلقهم بيهم سواء ذكور او اناث وتخليهم يسوون شي غير عن مبادء اهلهم او حتى مبادئهم ..وبهيچ من يتم الاستدارج يخطفوهم و يبيعون اعضائهم او تتم التجارة بيهم او هواية شغلات لخ لا اخلاقية يسووهه.

لا تسل يا لائمـــاً عــن شج رأس العاشقيـــن
أصدرت فتواهُ زينبْ مذ رأت رأس الحسين

.

يجب علينا أن نفهم أن الحسين عليه السلام كان ولا زال فكرة عبقرية من أفكار هذه الدنيا ، فكرة تضحية ، إباء ، تحرر من قيود هذا الزمن ..
من لم يفهم الحسين لن يفهم معنى الحرية ..