٢- "كم من غَاية بعيدة وأمنيةٍ عزيزة قرّبها الدُّعاء."

٣- ‏إذا لمسكَ اليأس، استشعر هذا الدعاء من قلبك : "اللهُم إني أحاول فلا تترك يدي".

٤- "يعلم ﷲ مرارة انتظارك، وعناء ترقّبك، وقبضة خوفك.. لذلك اطمئن؛ سيفرجها من حيث لاتحتسب."

آللهم صل وسلم على نبينا محمد وعلى آله وصحبه أجمعين

ملحمة گلكامش
إحدى أشهر القصائد و القصص الأدبية واقدمهم بالعالم
تحجي القصيدة سلسلة من الأساطير السومرية المكتوبة بالخط المسماري وتحجي الميثلوجيا بطرق شعرية عن البطل السومري الاسطوري الي اسمة گلكامش (او جلجامش بكيفك عاد) ملك اوروك وتحجي عن مغامراته وهاي القصه جانت من أشهر القصص المحبوبة ببلاد ما بين النهرين (العراق العظيم يعني)

وترجع أهمية المحلمة إلى انها تنقل النا هواية موضوعات مهمة حتى نفهم تاريخ بلاد ما بين النهرين والملوك مثل الصداقه ودور الملك والعداوة وافكارهم عن خلود والموت وعلاقه بيت الرجل والبنية.... الخ
يعني تفصل النا حياة اهل بلاد الرافدين

المهم، جانت الملحمة منقوشة على ١٢ لوح طيني يرجع تاريخهم الى ١٥٠٠ سنه قبل الميلاد
وهيه أقدم من ملحمة الالياذة لهوميروس نفسه، حيث تم اكتشافها على ايد العالم الآشوري هرمز رسام وتم اقتباس القصه بهواية قصص خيالية خاصه الروايات والأفلام وغيرها

القصه تحجي عن جلجامش الملك الوسيم والرياضي الي جان يحكم مدينة اوروك، جانت امه الي الإلهة نينسون وابوه الكاهن الملك لوغال باندا وهذا الشي الي خله كلكامش هجين نص اله ونص بشري

جان كلكامش هائج وحيوي (وكح) وما يكعد راحه وجان قاسي ومتغطرس (يعني شايف نفسه وماخذ خاوة) بنفس الوقت، جان يتحدى كل الولد بالمسابقات الجسدية والقتالية (مثل من تشوف مصارعه على MBC Action وتكعد تجرب على اخوك الصغير) وجان يغلبهم، وجان واحد ابو نسوان حيث يعلن حقه ينام ويه اي عروس قبل عرسها وهذا السلوك المنحرف مال كلكامش ازعج المواطنين لان حرفيا ماخذ خاوه عليهم فجانو يدعون لإله انو إله السماء ان يخلصهم من هذا الملك الارعن.

هنا الآلهة ما جذبت خبر دزت رجل بري اسمه انكيدو حتى يتحدى كلكامش بس بالبداية انكيدو عاش بالبرية والريف بين الحيوانات حيث جان يشبههم وياكل ويشرب ويعيش مثلهم بالبرية، بس الصيادين الي جان يطلعون يصيدون الحيوانات بدوا يضوجون من انيكدو لان جان يحرر الحيوانات الي يصيدوها، فراحوا على كلكامش يشتكون اله، فـ كلكامش اقترح يدز عليه كاهنة معبد شمخات(جانت وحده صاگة) حتى تغوية وتعلمة شلون ياكل مثل الاوادم ويعيش حتى يصير انسان متحضر

وره ما صار متحضر (ادمي براسه خير) راح انكيدو لمدينة اوروك حتى يشوف كلكامش ويتحداه بعد ما عرف شنو جان يسون شعب اوروك، بعدين تدور بين كلكامش وانكيدو معركة طويله بس كلكامش يكمش إنكيدو ويطيح حظ حظة خلاه يتندم هوه اجه وتحداه وفاز كلكامش على إنكيدو بس كلكامش شعر بالاعجاب من شجاعه وقوة انكيدو لان هوه الشخص الوحيد الي اتحده كلكامش، بعدين وره حديث طويل صار كلكامش وانكيدو بيست فرند فور ايفر
جان كلكامش يموت على دياحة ومغامرات

لذا قرر هوه وكلكامش يطلعون سوه، بعدين راحو سوه حتى يتحدون وحش همبابا ( ادري اسمه عبالك نوع همبرغر) الي حطته الإله فوق غابات الأرز (مو تمن) وجان هذا وحش بشع وقبيح الأقصى درجة وجان يمنع اي احد يعبر الغابة.

بخلال الطريق جان كلكامش يشوف كوابيس كل ما ينام بس إنكيدو جان يطمئنه ويكله انتَ زلمة كلف شنو تخاف من حلم، بالنهاية وصل الاثنين للوحش وصارت عركة بيهم ليما كدر كلكامش وانكيدو يقتلون الوحش وقطعوا راسه واخذوها وياهم لمدينة اوروك، هنا الإلهة حيل ضاجت من كلكامش إلا عشتار الي جانت مكرشه عليه وتحبه لذالك نزلت من السمه عليه حتى تغوية وتتزوجة هنا سوه روحه ثقيل ورفض الزواج منها (والله ادري غبي)

هنا عشتار حست بالإهانة والغضب لذا طلبت من انليل ان ينتقم منهم، فـ انليل دز عليهم ثور اسمه ثور السماء المقدس حتى يهاجم إنكيدو وكلكامش بس هذولة كدروا يفوزون على وحش واهنا من قتلو الوحش إنكيدو سوه حركة غبية كلش وهيه شال رجل الثور الميت وشمره على عشتار 😂😂

هاي حركة خلت كل الآلهة متعصبين و غاضبين (يعني إنكيدو حرگ اعصابهم) فقرروا يعاقبوهم
بس ما كدروا يقتلون كلكامش فـ عشتار سوت لعنة على إنكيدو وخلته كلش مريض حتى ضل يمه كلكامش وجان يساعده بس للأسف بعد ١٢ يوم من مرض مات إنكيدو هنا كلكامش حيل انقهر على صديقة العزيز لهذا جمع اهل مدينه كلهم وسوه فاتحة على روح انكيدو صديقة العزيز.

وره موت إنكيدو كلكامش صفن صفنه وحجه ويه نفسه وكال اذا كدروا يقتلون إنكيدو اكيد يكدرون يقتلون اذا هيج لازم اصير خالد ما اموت، لذا قرر انو يروح يدور عن سر الخلود الابدي

طلع كلكامش حتى يبحث عن أوتنابيشتيم (لا تحاول تقراه راح تصير عركة بلسانك) الي هوه الناجي الوحيد من طوفان العظيم (ملاحظة :اكو بعض الأجزاء من ملحمة تتشابه ويه قصة نبي الله نوح عليه سلام) وبنص الرحلة عن بحث عن هذا الرجل طلعتله إلهة آخره اسمها سيدوري وهيه كالت اله انت ما راح تصير خالد رما راح تلكه الرجال بس كلكامش جان راس يابس وما اهتم الها لهذا قررت سيدوري تساعد

وأخيراً بعد بحث طويل لكة كلكامش أوتنابيشتيم بعد رحلة متروسه اخطار ومغامرات وحجة أوتنابيشتيم لكلكامش قصة الطوفان العظيم وشلون كدر هوه ومرته من ينجون من غضب الإله وعرفو سر الأبدية وكله اقبل موتك لان ما تكدر تصير خالد
بس كلكامش كعد يلح عليه ملحه حتى يعرف شنو سر خلود هنا أوتنابيشتيم ضايج منه فكله ان يساعده بشرط أن يفوز بكم تحدي وجان اول تحدي اني يضل كلكامش كاعد لمدة ٧ ايام متواصله وراسا وافق وقرر يكعد من صخره حتى ما ينام بس اول ما كعد يمها نام 😂😂

هنا رجع كلكامش لـ أوتنابيشتيم يطلب منه مساعدة مره آخره بس رفض يساعده، بس مرت أوتنابيشتيم انقهرت على كلكامش وقررت تكله عن مكان سر الخلود الي هوه عباره عن نبته موجوده بالبحر داخل ارض الخلود وهاي النبته اي واحد يأكلها يرجع شاب وما يموت

بعدين كلكامش راح لبحر الخلود وگمز بالبحر وضل يدور لحد ما لكه النبته هنا كلكامش فرح فرح رهيب ومن طلع من نهر قرر انو يسبح بوحده من البحيرات، فعاف كل غراضه على ضفة نهر وفات يسبح

من فات يسبح جتي حية (ثعبان) اخذت النبته وهربت (بعض الترجمات كالت انو الحية اكلت النبته) هنا كلكامش كلش ضاج ونقهر لإنه ضيع سر الخلود الابدي وضل يفكر يكول شنو فايدته كل الي سويته تاليهة خسر سر خلود لذا قرر يرجع لمدينته ومن وصل صفن على سور مدينته وكال شنو فايدة الخلود اذا راح أضل عايش وكل الي احبهم راح يموتون

هنا كلكامش أدرك شغلة مهمة ان الخلود مو خلود الجسم وإنما خلود الاسم فمثلا بناء سور عظيم مثل هذا سور يكدر يخلد سيرته وعرف اخيرا كلكامش ان سر خلود هو أن تظل أعماله وسيرته خالده بين شعبة

و لهذا رجع كلكامش لأوروك وقرر يصير خوش ملك وكام يستخدم قوته الي قبل جانت تأذي الشعب صار يستخدمها حتى يساعدهم وبدو الناس يحبوه وظلت سيرته خالده بين شعبة وظل يحكم لمدة 126 عام حسب قائمة ملوك سومر، وانتهت الملحمة بموت صاحبها...گلكامش