جام ءِ اَجل
شائر: باسد هوت
گشنده: گپار هوت

جام ءِ اَجل

شپ اِنت تئی یات ءِ دیوان اِنت ءُ ما کیپ ءُ گزل وارتگ
مئے تهناییانی تاس بهت ءَ چہ اَزل وارتگ

پہ مهر ءِ بندیاں هسن ءِ فدائی لشکر ءَ گوں کن
چو ماتیں گُلزمین ءَ مئے دل ءَ سے جاه ءَ تل وارتگ

تئی من میتگ ءِ درچکانی اهد ءِ رامگیں مُرگاں
کہ من چہ کودکیں دستاں تئی، چینچو چگل وارتگ

کجام کِشک اِنت من ءَ را پہ تئی زیبائی ءَ سر کنت
منی بهت ءَ چہ امروز ءِ درهیں پنداں ٹَگل وارتگ

بلوچیں ما، اے گرمیں ریگزار ءَ زند گوازینیں
بلوچیں ما، ءُ اے دمکاں گوں مارا تبد ءُ جل وارتگ

چتو من سِست باں باسد چہ اے کوهاں چہ هنکین ءَ؟
کہ ما پہ آجوئی روچاں وتی جام ءِ اَجل وارتگ

باسد ھوت
@houtbased

مروچی جمبراں سجده کتگ زمین ءِ کدم
مروچی یات تئی زاناں جاگھے گوار اِیت

من وس کُتگ کہ تئی مھر ءِ لزّت ءَ شمُشاں
بلے تئی یات منا ساه ءُ دیدگاں دار اِیت

باسد ھوت
@houtbased

شائر: باسد هوت
گشنده: گپار هوت

واھگانی وتن

دوست بنت تئی زید ءُ کاهچر گَٹ ءُ گَر
دل کَش اَنت  تئی بَند ءُ  باگانی  سَمر

دُشمناناں  ڈیھ  شِنگینتگ  منی
برات ءِ دست ءَ هون تِنگینتگ منی
دل  جبین ءَ  باز  رکّینتگ  منی
زُلم ءِ جُھد ءَ بَھر کُت میتگ منی
مئے دل ءَ سک گران لگِّ اِت اے هبر
دل کَش اَنت  تئی بَند ءُ  باگانی  سَمر

تو  مہ بئے  ایمن  ترا  بازار  بیت،
یا بلوچ ءِ بیر پہ وشّی گار بیت!
همّل ءِ  ماتیں  وتن  گُلزار بیت
هانُلے شَے ءِ  پد ءَ دشتار بیت
واهگ ءِ درچک ءَ نہ گُڈّ اِیت تئی تپر
دل کَش اَنت  تئی بَند ءُ  باگانی  سَمر

وشّیانی سرجمیں سرگوات کیت
مئے بلوچاں مات ءِ هک یات کیت
الّم آں جزماں دل ءَ آ سات کیت
کمبریں بچّے چہ کبر ءَ پاد کیت
تَھل بنت پہ تو اے وشیں درچک ءِ بَر
دل کَش اَنت  تئی بَند ءُ  باگانی  سَمر

راج ءِ واری چون مارا شات بیت؟
ماتی ارسے تئی گم ءِ آیات بیت
سَدّکاں  باسد  وتن  آزات  بیت
مئے بلوچستان پد ءَ مئے مات بیت

تئی بدیں نام ءَ نہ کُٹ اِیت اے سپر
دل کَش انت  تئی بَند ءُ  باگانی سَمر

باسد هوت
@houtbased

راز ءِ گپ ءَ مکن رازداری مہ لوٹ
اے جهان ءِ تب ءَ دردواری مہ لوٹ

دانکہ امروز ءَ انسان ءِ بادشاهی اِنت
نوبت ءِ جمبر ءَ مهرگواری مہ لوٹ

باسد هوت
@houtbased

شائر: باسد هوت
گشنده: اسمائیل هوت

رازے کہ دیم ءَ پَدّر اِنت، دردے کہ دل اوپار کنت
تو یاد کائے سرشپ ءَ، شَھمے  کہ هر اِستار کنت

اے وازمندی مئیگ ءُ تئی، مھر ءِ مدامی کِسّہ اِنت
هُسنے کہ درپش اِیت بیگہ ءَ، چَمّے کہ راه ءَ گار کنت

اُمیت  تئی  واترّگ ءِ،  انچو   گُباراں پوش اِتگ
انچو کہ تھنائیں دل ءَ گوں، چرس کنت سیگار کنت

مُرواردیں مھکانی ءَ مِسکیں مہ شنگین مھپراں
مهر ءِ  ملنگیں شاعر ءَ بِل کہ دمے ساسار کنت

مهرانی پُرّیں سالے ءَ، ما دوست داشتگ دیدگاں
نامھروانی  انگت ءَ، مارا  گوں  پرچا یار کنت

ما   بِھ   نزانتگ  آسَر ءَ  آس ءَ  کپیں  تھنائی ءِ
ما گْوَه نہ کُت تئی کاروان، هلک ءَ چہ لڈّ ءُ بار کنت

دیوانگ ءِ  باسد  وتی  مَهلہ  سر ءَ  گِر  اشکتگ
انسرتگیں  پاساں تئی  نام ءَ گر اِیت کوکار کنت

باسد هوت
@houtbased

من مِهر کِشتگ پہ ترا ءُ کَهر سرچِتگ پہ وت
گناه ءِ دامن ءَ کپ اَنت منی سواب داں کدی؟

باسد هوت
@houtbased

شائر: باسد هوت
گشنده: گپار هوت

سَر نہ بنت ایرَهت زند ءَ داں بهارے زندگ اِنت
کمبر ءِ اوبادگاں چہ شَهسوارے زندگ اِنت

چاکر ءِ کوٹ ءُ کلاتاں داں کدی بندیگ بیت
هانل ءِ زرد ءَ دگہ کول ءُ کرارے زندگ اِنت

شپ کجا جُنز اِیت وتی بام ءُ سهاریں منزل ءَ
مئے دل ءِ بیوانکے ءَ نشتگ ودارے زندگ اِنت

دل تئی روباهی مکراں گوں کدی ایمن نہ بیت
مکران ءِ گریشگاں دانکہ مزارے زندگ اِنت

همل ءِ مرگ ءَ زر ءِ چولانی دل باور نہ کنت
اَچ من ءَ سستگ شُتگ دوریں دیارے زندگ اِنت

هو منی وائے وتن وائے وتن وائے وتن
زندگاں من دانکہ تئی یک هُشکیں دارے زندگ اِنت

شائری باسد منی ارواه ءِ گپ انت سرجم ءَ
من اگاں مُرت آں منی یک رازدارے زندگ اِنت

باسد هوت
@houtbased

دمانـے بنــــد کــں وتـــــی دیـــدگانـــــی پریات ءَ
دل ءَ چـــــہ کش زهیـــــرانــــــی کُچلیـــں یات ءَ

دو ترمــپ ارس وتـــی تَـــرّیــــں دیدگاں پِر دئے
شپ ءَ بہ سوچ ءُ شپ ءِ کسّهاں بہ دئے گوات ءَ
____

یک لحظه ارام کن فریاد بی صدای چشمانت را
بیــــرون بریــز خاطرات تلخ گذشته را از قلبت

با دو قطره اشک چشم های خیست را بپوشان
شب را رها کن و داستان شب را به باد بسپار

باسد هوت
@houtbased

دور چـــــہ اے جهــــــان ءِ بدواهــاں
دیــــم ءَ سِتــــرے لگوش بیــــا پَمّـاں

هرکس ءَ هرچے دوست بیت بہ بیت
مئے دل ءِ هست ءُ نیست تئـی چمّاں
___

دور از چشم بدخواهان این دنیا
نقابی به چهره بزن و بسویم بیا

هرکس هرچه را دوست دارد دوست بدارد
تمام دار و ندار قلب من چشمهای تو است

باسد هوت
@houtbased

هانُلے بستگ پدا گوں مَکر ءِ مُهریں سانکلاں
شَیهے ءِ دیوانگے ءَ دست مان اِنت چاکر ءِ

باسد هوت
@houtbased

کجام اوسـت ءِ لالچ ءَ چہ دوستــاں شمُشتگ ئے
گوں دژمناں هورتگ ئے، گوں رستراں سلہ کُتگ؟

اے  گُنگدامیــں  دلوتانی  تو بُگش گنہ چی اِنت
کہ  آزمان ءِ  جمبراں  سِتم گوں جنگل ءَ کُتگ؟..

باسد هوت
@houtbased

جهان ءِ گُنـگی ءَ مانـا بکنت شپ
من ءَ تئی زلپ ءِ زندان ءَ بکنت شپ

کجا من درد ءِ پاهار ءَ بہ توساں؟
اگاں روچے من ءَ تهنا بکنت شپ

باسد هوت
@houtbased

زندگی روچے وڑے مارا دَج اِیت
کے گُش اِیت کہ ڈنگ جَنْتیں مار بس؟

باسد هوت
@houtbased

من گام گام ءَ تئی شوهاز ءَ پہ ترس جنزاناں منزلے ءَ
تو انچو بیمناکیں جنگلے ئے، من شپ تهاریں مسافرے آں

باسد هوت
@houtbased

درد ءِ آیـاتـاں نبیـس ایـت کِسّهــاں وانــــی گــم ءِ
شـائــــــر ءَ آبـــــاد کُـرتــگ دل گَیــابــانــــی گــم ءِ

گوں من ءَ چوں کنت باریں تئی زلیخائیں نسیب
بادشا مهــــر ءِ بیاں مــــن یـا کــہ زندانــی گــم ءِ
_

آیه های درد را می سراید داستان غم را بیان می کند
شاعر بیابان دلش را به آبادی بدل کرده است

بخت زلیخائی تو نمیدانم با من چکار خواهد کرد
پادشاه عشق خواهم شد یا که زندانی غم ها

باسد هوت
@houtbased

مـا وتـارا جنگلــے ءَ دور زندانـــی کتگ
چہ من ءَ بیزار دنیا چہ من ءَ بیزار دل

باسد هوت

@houtbased