شائر: باسد ھوت
گشندہ: گپار ھوت

مھپرانی نکاب


گوں تئی بچکندگاں شپ دو پاس ءَ کُتیں
هون ماں  شیشگاں   دل  گلاس ءَ کُتیں

روچ ءِ    دیم ءَ  جتیں   مهپرانی   نِکاب
دهر  رُژنا   تئی   جیگ ءِ    لاس ءَ کُتیں

ترانگے   بَکش اِتیں  تو  من ءَ   من  ترا
گم   شَموشتیں  پَدا    درد  آس ءَ کُتیں

نوش اِتیں  داں سباه  یات ءِ  کَدّه  وتی
سارتیں  آهے جبین ء َ چہ  تاس ءَ کُتیں

سر   بِداتیں    تئی   جیگی ءِ    مهلباں
مارا   ریٹا   تئی   بوه ءُ   باس ءَ  کُتیں

تو  برو  گار بئے  بَلکیں  مهتل بہ بیت
انچیں دَزبندی یے گوں سواس ءَ کُتیں

بے هساب ءَ  جَتیں  پیک  باسد   شپی
دیدگانی    نشہ   بے   کساس ءَ کُتیں

باسد ھوت
@houtbased

شنزے زمین ءَ ایر بئیت جمبر سر ءَ بہ بیت
بچکندگانی پیسلہ اوں پیسر ءَ بہ بیت

اے اِشک چی مزاکے کہ چیر اِنت ماں میتگ ءَ
دو دل کہ گوں وت ءَ اِنت گڑا زاهر ءَ بہ بیت

نودانی نرمیں شنز سمار اِیت تئی مهپراں
بچکندگاں گوں لُنجمیں شپ روشنا بہ بیت

دست ءِ دل ءَ کوپگ ءَ یا کوهیں سینگ ءَ
نوں تو بگوش دوست تئی سر کجا بہ بیت

نو پتّو گپ گپ بہ اَنت شَیر شَیر بنت
نوں باید اِنت کہ شائری ءِ هک اَدا بہ بیت

کیپانی تاس بینگیں لُنٹانی شهدیں تام
هرچے کہ بیت بهشت ءَ اِد ءَ اوں هما بہ بیت

باسد ما سنگتی ءَ پہ جان ءَ فدا کنیں
«هرکس گوں مارا کیت گڑا مئے وڑ ءَ بہ بیت»

باسد هوت
@houtbased

نود شنز اِیت بیگہ ءَ ساچان کنت
دل تئی بچکندگاں اومان کنت

باسد ھوت
@houtbased

بیا کہ توپان کتگ دیدگاں اوپار ءِ زر ءَ
کے بہ سھڑین اِیت تئی باھو ءِ دریائیں دل ءَ
کوہ راھچار اَنت کہ تئی ھلوتے گوشاں بہ کپ اِیت
دمک ءُ دیوالاں تئی بچکندگ ءِ اومان کتگ
بیا ءُ مھرانی بھار ءَ دگہ مانایے بہ دے
نود شنزین منی آسیں زھیرانی سر ءَ
بیا ءُ اُمیت ءِ چراگ ءَ پد ءَ تالان بہ کن
بیا کہ زھیریگ اَنت تئی مھرک ءِ زیبائیں نگاہ
باسد هوت
@houtbased

هال  رستگ  تو  پَمّن  پیداک ئے
درد لوٹ اَنت کہ وتکُشی بہ کن اَنت؛

بیا نو کَولاں وتی مہ دے گوات ءَ
وَئدهاں بِل کہ زندگی بہ کن اَنت

باسد هوت
@houtbased

تئی جتائی ءِ گُمان ءِ ترانگ ءَ کُنٹگ پِر اِنت
تئی زهیرانی دیار ءَ پُلّ هم گیمُرت کنت

اے وڑ ءَ باسد نزاناں بے زُبانیں زندمان
داں کجا مارا وتی همراهی ءَ گوں بُرت کنت

باسد هوت
@houtbased

جام ءِ اَجل
شائر: باسد هوت
گشنده: گپار هوت

جام ءِ اَجل

شپ اِنت تئی یات ءِ دیوان اِنت ءُ ما کیپ ءُ گزل وارتگ
مئے تهناییانی تاس بهت ءَ چہ اَزل وارتگ

پہ مهر ءِ بندیاں هسن ءِ فدائی لشکر ءَ گوں کن
چو ماتیں گُلزمین ءَ مئے دل ءَ سے جاه ءَ تل وارتگ

تئی من میتگ ءِ درچکانی اهد ءِ رامگیں مُرگاں
کہ من چہ کودکیں دستاں تئی، چینچو چگل وارتگ

کجام کِشک اِنت من ءَ را پہ تئی زیبائی ءَ سر کنت
منی بهت ءَ چہ امروز ءِ درهیں پنداں ٹَگل وارتگ

بلوچیں ما، اے گرمیں ریگزار ءَ زند گوازینیں
بلوچیں ما، ءُ اے دمکاں گوں مارا تبد ءُ جل وارتگ

چتو من سِست باں باسد چہ اے کوهاں چہ هنکین ءَ؟
کہ ما پہ آجوئی روچاں وتی جام ءِ اَجل وارتگ

باسد ھوت
@houtbased

مروچی جمبراں سجده کتگ زمین ءِ کدم
مروچی یات تئی زاناں جاگھے گوار اِیت

من وس کُتگ کہ تئی مھر ءِ لزّت ءَ شمُشاں
بلے تئی یات منا ساه ءُ دیدگاں دار اِیت

باسد ھوت
@houtbased

شائر: باسد هوت
گشنده: گپار هوت

واھگانی وتن

دوست بنت تئی زید ءُ کاهچر گَٹ ءُ گَر
دل کَش اَنت  تئی بَند ءُ  باگانی  سَمر

دُشمناناں  ڈیھ  شِنگینتگ  منی
برات ءِ دست ءَ هون تِنگینتگ منی
دل  جبین ءَ  باز  رکّینتگ  منی
زُلم ءِ جُھد ءَ بَھر کُت میتگ منی
مئے دل ءَ سک گران لگِّ اِت اے هبر
دل کَش اَنت  تئی بَند ءُ  باگانی  سَمر

تو  مہ بئے  ایمن  ترا  بازار  بیت،
یا بلوچ ءِ بیر پہ وشّی گار بیت!
همّل ءِ  ماتیں  وتن  گُلزار بیت
هانُلے شَے ءِ  پد ءَ دشتار بیت
واهگ ءِ درچک ءَ نہ گُڈّ اِیت تئی تپر
دل کَش اَنت  تئی بَند ءُ  باگانی  سَمر

وشّیانی سرجمیں سرگوات کیت
مئے بلوچاں مات ءِ هک یات کیت
الّم آں جزماں دل ءَ آ سات کیت
کمبریں بچّے چہ کبر ءَ پاد کیت
تَھل بنت پہ تو اے وشیں درچک ءِ بَر
دل کَش اَنت  تئی بَند ءُ  باگانی  سَمر

راج ءِ واری چون مارا شات بیت؟
ماتی ارسے تئی گم ءِ آیات بیت
سَدّکاں  باسد  وتن  آزات  بیت
مئے بلوچستان پد ءَ مئے مات بیت

تئی بدیں نام ءَ نہ کُٹ اِیت اے سپر
دل کَش انت  تئی بَند ءُ  باگانی سَمر

باسد هوت
@houtbased

راز ءِ گپ ءَ مکن رازداری مہ لوٹ
اے جهان ءِ تب ءَ دردواری مہ لوٹ

دانکہ امروز ءَ انسان ءِ بادشاهی اِنت
نوبت ءِ جمبر ءَ مهرگواری مہ لوٹ

باسد هوت
@houtbased

شائر: باسد هوت
گشنده: اسمائیل هوت

رازے کہ دیم ءَ پَدّر اِنت، دردے کہ دل اوپار کنت
تو یاد کائے سرشپ ءَ، شَھمے  کہ هر اِستار کنت

اے وازمندی مئیگ ءُ تئی، مھر ءِ مدامی کِسّہ اِنت
هُسنے کہ درپش اِیت بیگہ ءَ، چَمّے کہ راه ءَ گار کنت

اُمیت  تئی  واترّگ ءِ،  انچو   گُباراں پوش اِتگ
انچو کہ تھنائیں دل ءَ گوں، چرس کنت سیگار کنت

مُرواردیں مھکانی ءَ مِسکیں مہ شنگین مھپراں
مهر ءِ  ملنگیں شاعر ءَ بِل کہ دمے ساسار کنت

مهرانی پُرّیں سالے ءَ، ما دوست داشتگ دیدگاں
نامھروانی  انگت ءَ، مارا  گوں  پرچا یار کنت

ما   بِھ   نزانتگ  آسَر ءَ  آس ءَ  کپیں  تھنائی ءِ
ما گْوَه نہ کُت تئی کاروان، هلک ءَ چہ لڈّ ءُ بار کنت

دیوانگ ءِ  باسد  وتی  مَهلہ  سر ءَ  گِر  اشکتگ
انسرتگیں  پاساں تئی  نام ءَ گر اِیت کوکار کنت

باسد هوت
@houtbased

من مِهر کِشتگ پہ ترا ءُ کَهر سرچِتگ پہ وت
گناه ءِ دامن ءَ کپ اَنت منی سواب داں کدی؟

باسد هوت
@houtbased

شائر: باسد هوت
گشنده: گپار هوت

سَر نہ بنت ایرَهت زند ءَ داں بهارے زندگ اِنت
کمبر ءِ اوبادگاں چہ شَهسوارے زندگ اِنت

چاکر ءِ کوٹ ءُ کلاتاں داں کدی بندیگ بیت
هانل ءِ زرد ءَ دگہ کول ءُ کرارے زندگ اِنت

شپ کجا جُنز اِیت وتی بام ءُ سهاریں منزل ءَ
مئے دل ءِ بیوانکے ءَ نشتگ ودارے زندگ اِنت

دل تئی روباهی مکراں گوں کدی ایمن نہ بیت
مکران ءِ گریشگاں دانکہ مزارے زندگ اِنت

همل ءِ مرگ ءَ زر ءِ چولانی دل باور نہ کنت
اَچ من ءَ سستگ شُتگ دوریں دیارے زندگ اِنت

هو منی وائے وتن وائے وتن وائے وتن
زندگاں من دانکہ تئی یک هُشکیں دارے زندگ اِنت

شائری باسد منی ارواه ءِ گپ انت سرجم ءَ
من اگاں مُرت آں منی یک رازدارے زندگ اِنت

باسد هوت
@houtbased