شيعوها لدارها

سمك غدر جرى… .. ياصادق الورى
-----------------** ****---------------
ياصادق العترة الامينه والنبوه .. والامامه… والولايه
ربك العالي جعل منكم القوه .. والزعامه .. والدرايه
بيكم تميز المعنى للاخوه… لأحترامه… والهدايه
الله بيكم شفع ﻻدم وحوه ... وبكلامه ... للبرايه
بيكم حكم ترى…… ياصادق الورى
--------------------*********--------------
للعلم محتاره هاليوم الحقايق… وبمكانه .. وبقدرته
اربعة الالف تتزايد تدافق .. للأمانه .. وبحظرته
كلهم يقولون علمني الصادق… هالديانه ..وبنظرته
الشام ويه الكوفه وللبصرة تترافق .. علمانه .. وبأمرته
علمك بيهم سرى… .. ياصادق الورى
----------------***********--------------
شعنده ابن منصور يطلبكم يشيعه .. عالصادق ..جر كلامه
يدري من طه النبي مأخذ البيعه .. وهالحقايق .. للامامه
من الغدير الله كتب بيهم نطيعه… يامنافق ..شهل ملامه
والله لو نفدي عمرنه ما نبيعه .. وما نضايق .. وبكرامه
حبهم بالدم جرى…… . ياصادق الورى
---------------************-------------
مثل ما بالباب عصروها الزجيه ..والوصي حتار ..بصحابه
اليوم ابن منصور عاداها الرزيه .. وشبو النار .. عالبابه
خمد النار وبجه بدمعه جريه… نشدوشصار .. وينجابه
كال والله تذكرتها الغاضريه… وصار ما صار ..وبغيابه
زينب بقت مراه……… ياصادق الورى
--------------------**********-----------
والمصاب الاعظم وزاد المصيبه… من جره الدم… وسال دمه
وبقت زينب بالفلا الحرة غريبه… لا ولي وعم… ويجي بهمه
تعذب بذكراهم بالوعه عجيبه .. وصبره مأتم ..على بواليمه
وبقه ينوح اسنين عالعتره النجيبه… وخلص بالسم .. وكضه بسمه
بالسم عمره كضه… .. ياصادق الورى
----------------**********---------------
تمت
ابو احمد الصالحي
24 شوال 1435ه

ما يختلف ياعلي حجينه
هاي الحرب محبس بدينا
علي. .. الميمنه بسمك علي
علي ... والبقيه احسبها الي
علي علي. علي
#######################
المعركه فرسانها خل اتكتر
نازل الضرغام وي سيف الغضنفر
ابن حيدر دخل ليها وشبل حيدر
ما تميز سيف عباس من الاكبر
ذاك النهر ياعلي نجيبه
واليعترض صارمي نصيبه
علي ..لازم انذل الشمر
علي… كتر الي وانت بكتر
علي. علي. علي
####################
وگفوا بصوب الخيم والقامه وحده
تعاهدوا للمعرگه وزند عله زنده
اليوصل خيام النبي گلي شحده
احنه جيش حسين خصمي شنو عنده
هاي الحرب وانا بيها عيدي
يلا علي خلي ايدك بيدي
علي وثنينه بنور الگمر
علي والملتگى عند النهر
علي. علي . علي
######################
گله ياعباس عمي خلني اسمي
ذوله سبعين الأف احسبها يمي
انا ابن فارس بدر عباس عمي
تروج بيه الدنيا لو هلهلت امي
انا الحرب واضع الاساسه
يابكرهم الا اجيبن راسه
علي ساحتي هاي وعلي
علي. والحرب تحله الي
علي. علي. علي
#######################
خيمت والنار شبت والحرب صار
والمعاره موج من دم صارت ابحار
علي بظربات الغظنفر ينصف اشطار
بظهره عباس المشكر وين مادار
يم العذب وجتمع شملهم
للمشرعه نزلوا بعلمهم
علي اشرب الماي العذب
علي .لا عمي انت اول تطب
علي علي علي
######################
جابوا الماي وروا كل اليتامه
الگمر والاكبر علي ردوا بالسلامه
فرحت امه وزهمر الوجه ابتسامه
ياعلامه تقلدك امك ياعلامه
والجائزه باجر اشتريها
اول شهيد وانا اقلده بيها
علي باجر ستعدادك قوي
علي .. معركه الويها لوي
علي. علي. علي
#####################
يوم عاشر اصبحت والدنيا سوده
وما تنازل علي الاكبر عن وعوده
ودع امه ونزل للحومه بصموده
والشهاده مشتريها بفخر زوده

عهد الابى بدمنه وقعينه
بين العده الجسم موذرينه
علي من طحت بويه صحت
علي. بويه من عندك رحت
علي علي علي
#######################
ابو احمد الصالحي

خرست الحومه بعلم صگارها
ماجت وعباس هز فقارها
######################
الزعل يحلاله وابو فاضل زعل
ارتعدت الحومه وعذاب الله نزل
ضهضبت نار المعاره من حمل
گلب يمنتها وعدل بيسارها
#######################
عدل من يشطر بسيفه مايميل
مايثني بظربته انصاف الخليل
اليشك بالگمر هاك اخذ الدليل
من خزرته الحرب شبت نارها
######################
تلوج خلاها وتدور عالطريج
بسيفه ابد ماتبلع الها الحومه ريج
مايميز من عدوه لو صديج
نار تلهب لو لازم بتارها
#######################
انصاف من يشطر يوزنها وزن
غيمت والمعركه مطرت حزن
متضعضع ظربته كلش رزن
كسر خشم المعركه جبارها
#####################
فرت وضاع الامل بالموزمه
تلاطمت بمواجها روس ودمه
وبالوسط عباس شاهر صارمه
يحصد ارگاب الزلم كرارها
###################
تزهق الارواح وتضيق النفوس
المشرعه مو ماي صارت بس رؤوس
الما يعجه برمحه بالحافر يدوس
نادئ وين الگال احنه احرارها
######################
خل ينازلني واليزامط شريف
السيف مايرحم اذا يجابله سيف
والحياة احسبها مرت بيك طيف
البومه تختل من يمر صگارها
#####################
الصگر جنحينه يمدها ولا يخاف
سبع طوفات الكمر بالحومه طاف
ابد بس نسوان زلمه ماكو شاف
نزل وسط المشرعه من دارها
###################
رجع متنومس يفكر بالحسين
الماي مو فد معضله وحتئ تهين
غدر نصبوله وسگط من اليمين
وتبعت اليسره بفعل بغدارها
#####################
مايهمه الماي مادمه بالجود
مبتشر لان سالم بحضنه يعود
سهم صاب الجود وبالراسه العمود
للخيم من طاح اعيونه انظارها
#######################
ابو احمد الصالحي

#القاسم /1440
شباب .. بعمر الورد بيدي ازفنها
شباب .. جلمة اليمه انحرم منها
حنه وزفه ودموع … . باجر اول اشموع
انحرم منها
*******************
يمه ربيتك بديه وحسب ايامك سنين
صح وحيد ونور عيني يمه بس الله المعين
لا تقصر ياعزيزي وخل امك تقر عين
باجر الزهره تنادي هلا بخدام الحسين
لزوم….. هالفرصه هاذي تمحي اذنوبك
لزوم..... بس الحسين يصير محبوبك
شاهد هاي الاجموع .. باجر اول اشموع
انحرم منها
#######################
غايتي وعيوني راحن وسهر الليلي كله راح
باجر اول زفه جاسم يطلع بوجه الصباح
الحسن بالطف عنده ابنه وبٱسمه صار الافتتاح
بين عماته وعمامه زفة الحومه ارتياح
عجيب….. معقوله تروحون و تخلوني
عجيب .. ..اول عرس ماشافته اعيوني
انظر لأمك اتلوع. باجر اول اشموع
انحرم منها
#######################
الامل بيك انت الوحيد لو رحت راح العمر
يمه خليلي الملابس. حتى اشمن بالعطر
امك بيا روح تصبر ويني وين الصبر
من عگب جاسم اوليدي يصير حاديني الشمر
ليش.… .تظلم دنيتي ياضوه الگمره
ليش……الفاگد وحيد شله بعمره
گلبي يبقى موجوع باجر اول اشموع
انحرم منها
#######################
ارد اوصيك بوصيه لوردت تهوى وتطيح
لا تناديني يا يمه خاف اموتن من تصيح
گلي بيا حال اشوفك لو يجيبونك ذبيح
هم تظن امك يغالي من بجيها تستريح

انام….. لا وحق طه وثمرة سنيني
انام… بذكرك خيالي ودمعتي بعيني
وني يبقئ مسموع. باجر اول اشموع
انحرم منها
######################
شفت عمك من تغير گلت ياربي دخيل
تخوصر وايده عالظهره ياخذه الريح ويميل
قدمت بس جاسم ابني اشعر بهذا قليل
ساعه لن جابوك اليه بكل كتر دمك يسيل

وصيح.… . وتمددت يم جاسم اوليدي
وصيح… .. بس هالوحيد راح من ايدي
مخضب اول افروع. باجر اول اشموع
انحرم منها
######################
ابو احمد الصالحي

العليلة 1440هج


كلشي راح. وايست من دنيتي
كلشي راح. يعذابي بوحدتي
كلشي راح والله حيره حيرتي
***********
وي روحتك. راح العمر ظليت انادي يابشر ارحموني
طبع المحب .لو غربوا تذبل اجفونه واني اعمي اعيوني
انا عليله وانتظر جيتكم الي
حلفتك بالقاسم والاكبر علي
ترجعلي من عگبك بالدنيا شلي


هذا حالي والدمع اذى الوجن
هذا حالي. ليلي ما انامه اون
هذا حالي. والله يدري بحالتي
**********
واكفة اباب الامل حسره تاخذني والف حسرة ترد بيه
من غربوا كلشي انتهى وظليت اصفگ خمسه عله الخمسه انا يوميه
ما اعرف اخبارك يالغالي غبت
من عيني لا صدگ معقوله رحت
يوميه من دونك جم موته متت
گلبي يخفگ يراقب اخبارك كثب
گلبي يخفگ رحلوا بلايه سبب
گلبي يخفگ . صرت اطلب مووتتي
#####################
ماسكه خيرة الزهره وفتح القران يوميه يكلمني
بأيةالعشاگ اكرر سورة الصديق يوسف شگد تعلمني
معشوگج تفدينه بعيونج تره
يايوسف محبوبج وبدمج سره
اشوقج ما تبرد دنيا واخره
جرحي شيب ونفتح نار الهب
جرحي شيب وشماته تحط حطب
جرحي شيب انته ردتك غايتي
#######################
حاضره ياريت يمك وعرف اخبارك ترد لو ماترد ليه
تصورتني بعيشه زينه لا وحق امك انا يوميه مسبيه
ما تدري شگد شوگي يالغالي الك
يالحبك كل روحي وكل عقلي ملك
اخبرني يابويه ماني استاهلك
عمري خلص وانتظر يمته ترد
عمري خلص وعيني بعين اللحد
عمري خلص وين هيه منيتي
######################
ابو احمد الصالحي

#العليله1440هج
طلبت بگد غلاتك اذن الي بصلاتك
شكثر يرتاح گلبي وتبرأ اجروحي
لو صوتك سمعته اترد الي روحي
اذن الي بصلاتك
*****************
انت الدين. بويه حسين رايح وين معقوله اكو بالدنيا اعز مني
والمعبود . جرحي يزود. لو متعود.. وانت بكربلا اضل تستمع وني
عندي اعتاب عالاحباب ويه الهاب ادزه والمشاعر تخبرك عني
بالاذان صوتك جان كالمرجان وعيش بجنة الله وبالخلد چني

ياقصة حياتي. بهجرك حن مماتي
عرش الله حزين ويستمع نوحي
لو صوتك سمعته ترد الي روحي
اذن الي بصلاتك.
######################
وحشه البيت مو مليت. من حسيت . رايح يا ضوانا وشايل الگمره
عندي احساس. بالانفاس. ماينقاس جم ورمة افراگ بگلبي جم حسره
دهري يخون وانا شلون صفرة لون مثل امك نحيله من الالم صفره
هذا الباب. ينطي جواب جم امصاب. يحمل جم حطب جم نار مستعره
عذبني بعدهم. مدري شصار عدهم
علايم بينتلي بالحزن توحي
لوصوتك سمعته ترد الي روحي
######################
بالاضعون. من ترحون . اطلب كون من توصل ابد ماريد تنساني
بالالحان فجرك حان والاذان اذانك اريده يصكلي اذاني
ما معقول وانت تگول بالمرسول حي عالشهاده وما اسمعه اني
ظرفي يزيد. مو بالايد وانا بعيد عنكم يابعد دنياي خلاني
سهرانه الليالي .… من بعدك يغالي
ياروحي الحزينه بالالم فوحي
لو صوتك سمعته يرد الي روحي
#######################
يالعلاك. بجنه هناك.. اسمع هاك من بتك عليله والدمع هامل
وعدك وين. بويه حسين. عندي ثنين گلت يرد الي الاكبر وابو فاضل
والمظلوم .. يفرح دوم ..لو ملزوم وي ريح الهوه ادزلي خبر عاجل
انا بخير واهلي بخير جد سير يوصلني بسرعته وللفرح حامل
وعيوني الحزينه. تفرح من يجينه
يافرحه شكبرها وعالخلق لوحي
لو صوتك سمعته ترد الي روحي
#####################
ابو احمد الصالحي

هلال محرم
#بثواب_حسين /1440هج


كفاره لذنوبي خدمتك مولاي
اذا ماادك صدري خلني وزع ماي

خدمة حسين… .. بثواب حسين
#####################
بذنوبي الفضيحه لخدمتك هالجاي
اذا مااقدر الطم خلني اوزع ماي
لا تحرمني لا من هاي لا من هاي
بس هالمره اريدن وكفتك وياي
اروحن وين. بثواب حسين
####################
العنده اذنوب مثلي گلي وين ايروح
اريد اغسل اذنبي باللطم والنوح
والما ينجرح مايحس بالمجروح
لجل حسين فدوه خل تروح الروح
عليه دين. بثواب حسين
#######################
مريض وجيت يم مجلسك عالعاده
ودري الحضر عندك ياخد امراده
اشوف الناس يحضر هو وولاده
جهال اشيوخ عوام وبعد ساده
ودمع بالعين… .. بثواب حسين
#######################
يم منبرك اكعد واكثر بوني
الزهره عليك من الخدام سجلني
وين انطي الوجه لو تبتعد عني
بثواب حسين عايش الي يسئلني
واذا ميتين بثواب حسين
######################

دعيت الله يوفقني عله المأتم
اريدن يوم سابع بالنص محزم
الما يحضر ثوابه شكثر يتألم
ومن غيرة السابع درس نتعلم
گطع جفين. بثواب حسين
#######################
محرم يختلف بيه كلشي يتغير
هنياله السمع وافتهم للمنبر
دروس العشره كلها بأيه تتسطر
حسين القاسم العباس والاكبر
افتهمهم زين. بثواب حسين
#######################
ابو احمد الصالحي

#هلال_محرم1440

ياشهر عاشور اعلنت الحداد
بين اهلاله ولبس ثوب السواد
#####################
اليوم كاسف لونك ودمعك يهل
ياشهر عاشور منك ما نمل
بيك وسينا النبي سيد الرسل
كل سنه ذكرك علينه بحزنه عاد
######################
نسمع القاري وندگ عالصدر
حسيني عمري شلي بخلافه العمر
باجر خيام النبي بيد الشمر
بيده يحرگها ويذرها بالرماد
#####################
اليوم شط العلگمي ينزف دمه
اليوم محزونه وكئيبه فاطمه
اليوم تمطر دمها بركان السمه
الباري يكلب السافل بعاليها راد
######################
اليوم من حسين مكسور الظهر
اليوم ابو فاضل سگط يم النهر
اليوم شبل حسين متگطع وذر
اليوم ناخذ من دمه القاسم امراد
#####################
اليوم طفل حسين مفطوم بسهم
اليوم يم المشرعه طاح العلم
اليوم مسبيه العقيله ويه الحرم
اليوم يتغطرس ع الكوفه زياد
#######################
اهلال شهرك اذى قلب المصطفى
حسين جم نادى على الدنيا العفه
الما شفى بمجلسك. جابيمن شفى
لمجلسك وحده الگلب بالانقياد
#######################
ابو احمد الصالحي

#نزله
#العباس
1440هج

هذا ابو فاضل. عالحرب نازل
######################

من نزل عباس نادته الحره
هالحرب حربك. وانت بيها ادره
وانا بالخيمه. فاطمه الزهره
تجادحت عينه. وزهمرت حمره
وگالها شوفي ودارها ظهره
مايذب فارس. ظل يذب عشره
اتنخت الكافل. هذا ابو فاضل
************
نزل وعيونه تجدح من النار
ارتعدت الحومه. وعلن بيها انذار
اليوم ارد صفين بسيف ذي الفقار
نهزمو لحسين .. كل عده الكفار
دخيلك ادخيلك. ادخيل حامي
هذا عباسك. لو علي الكرار
ابد ميجامل. هذا ابو فاضل
#######################
تمرجحت بيها والحرب شبت
كالجحيم النار. عالعده صبت
من نهر غسلين. مطرت وشربت
والمنايا الهم. وصلت وگربت
هاليوث منين ياعلي طبت
للشجاع امثال بالحرب ظربت
منهو. اليقاتل. هذا ابو فاضل.
#######################
كله عزرائيل.… ياأسد هاشم
انت اتكفى وانا القادم
قسم بالعباس وقسم بالصارم
وحق صبر حسين ما ارد سالم
الا اجيب الماي وانا اله خادم
عهد من امي فاطمه لفاطم
حسين يستاهل هذا ابو فاضل.
######################
طبگت الصوبين. والاسد واگف
مارتعد گلبه. وابد ماخايف
الف ضد واحد. ابد ماشايف
نزل لشاطي. والدمع ذارف
مااذوق الماي قبل اخي حالف
رجع وبجوده. لنهر عايف
للعذب شايل. هذا ابو فاضل.
#####################
غدر نصبوله.… وطاحت اليمنه
مبتسم بالماي… جايبه النه
گطعو اليسره .. ونحنا عمنا
ولنه سهم الشوم .. صوابه فاطمنه
صوب الغربه .. ونگطع ظنه
والخيم طاحت طاح كافلنه

ريته لو واصل. هذا ابو فاضل.
#######################
ابو احمد الصالحي

#المسير_الحسيني
1440هج

من المدينه طلع هودج بت علي
والگمر عباس گلها ادللي
#######################
هاي زينب بت علي حامي الدخيل
والخيليل يگوم ويلبي الخليل
تبسمت زينب لعباس الكفيل
كفو منك يبو فاضل كافلي
#######################
عندي جلمه وياك خويه من الگلب
باجر انت الكافل بوكت الحرب
لا تخلي اختك تروح وي الغرب
خاف بعدك يبن ابويه انولي
######################
ايده بسيف ويكله بشاربي
زينب انتي وانا ابن الطالبي
يخسه يوصل يم خيامي الاجنبي
الا جفيني يخيتي مو الي
####################
ونعم منك يضرغام الزلم
رايتك ستري وسير ويالعلم
وبوجودك ابد ميمسني الالم
يا اعز كل ناسي وانت ضنوتي
#######################
طلعت الحره وخوها ايد بيد
ورايته بيده يهزها شما يريد
والظعن جدامه يتخطى العضيد
وعن يميني وعن يسرتي كل هلي
######################
ثنه رجله وركباها عالظعن
سارت وظعن الحرم خلفه مشن
ولحرم جدهن يويلي ودعن
فاطمة الزهره ولعد گبر النبي
#######################
ابو احمد الصالحي

#ام_البنين_توصي_العباس
1440ه

يالگمر دگيت صدرك بالوعد
لا ترد وحسين ميت لا ترد
#####################
يمه لو رحت وي خوك لكربلا
انت درع الله وامين العايله
ترى زينب بنت علي مدلله
وباجر ظعون الفواطم من تشد
#####################
اسمع وافهم يثمرة روحي زين
انت اصلا من صرت لجل الحسين
عالشريعه انطي لزهره جفين
وفدوه عينك بالسهم خالتنمرد
#######################
المهم يرضى حسين عنا ويقبلك
ولا تقله يااخي لو يسئلك
انت غير حسين بالدنيا شلك
خل تگول الناس هذا افضل ولد
#####################
يمه عينك عالخدر زين انتبه
هاي زينب بت علي لا تشتبه
خلها عني تگول يانعم الربه
ربتك عباس تربات الاسد
######################
يمه تدري للخدر انت الكفيل
وهاي زينب بنت حامي الدخيل
لا تخلي الهودج من الهوه يميل
للكفاله دگلي صدرك مستعد
#####################
لو وصلت المشرعه وشلت العذب
لا تشربه قبل محبوب الگلب
الماي قبل حسين ممنوع الشرب
الجود بيدك شيله وللعايله رد
#####################
نعم يمه ان شاء الله اوفي وياج
وراح خل الناس كل تحجي برباج
دك ثلاث مرات صدره يمه هاج
وعدي هذا والنهر بيه شهد
###################
ابو احمد الصالحي

باجر لو مشينه. وتسير الضعينه
انتظرك تجي . وتسمع كل حجي .جسمه موذرينه
#####################
والله حيره تحيرت ياكافلي
باجر باياحال تصعد بت علي
طلع والعباس يحدي بمحملي
من المدينه ونوخ الهودج الي
باجر لا تجيني… بصبحه تطفي عيني
وعدمن اشتجي .. وتسمع كل حجي جسمه موذرينه
####################
مره وحدي طلعت لاجن ماقبل
ختاض كفالي وعلي كلش زعل
وينه هسه ما نشد عني وسئل
والكفاله تنوصف بسم الكفل
لاجن يافجيعه. ظل الشريعه
من صوته الشجي. وتسمع كل حجي. جسمه موذرينه
#####################
قبل لا يطلع فجركم ياهلي
خلافكم بالدنيه يعيوني شلي
الشمر صار يگلي اصعدي ونزلي
وين جاسم وين عباس وعلي
احضروا للفواطم. جا وين ال هاشم
بيمن ارتجي. وتسمع كل حجي . جسمه موذرينه
##################
احجي سامحني ترى الموقف صعب
گلبي طگ صبره يعين الله الگلب
گبال عيني شفت خويه ينظرب
وهم سمعتو بت علي ويالغرب
جاوين الكفلها .. خل يحضر الها
خل تشبع بجي. وتسمع كل حجي .. جسمه موذرينه
####################
مثل خزي الكوفه ابدا ما شاهدت
ريت وي عباس عله شاطي متت
الناس تتفرج علي تالي صرت
وين بالكوفه الي بيها تأمرت
فاجعتي جبيره … مسبيه الاميره
وبلا هودجي .. وتسمع كل حجي . جسمه موذرينه
#######################
ابو احمد الصالحي

دخلنا الكوفه .………… ابونا انشوفه
لا ... يصد الينه ... اي ... تمنينه
#######################
سبايا … ومحاملنه بلا ساتر
العبايه … شترد ياحيدر الناظر
وين ... تصد لضعونه حيدره
وين ... اميرة علي ميسره
قف ... يحادينه... اي ... تمنينه
#######################
وصلنا ...وقلق گلبي يخوفني
يهلنا ... ابوي اشلون يعرفني
ريت… ابد ماشافت كربلا
ريت... علي زينبكم واصله
گوم... تلكينه… اي… تمنينه
###################
عجيبه ... الكوفه تغيرت كلها
غريبه... زينب وين كافلها
هاي ...الشمس من تطلع تختفي
هاي ...فقط بالكافل تكتفي
جيت... بلا عينه … اي... تمنينه
######################
وحاذر … كفيلي جايبه اجفوفه
يباجر … اطب للكوفه مجتوفه
ليش... عشيرة بلا كافل تطب
ليش... صعب يا فاطمة صعب
ها… . يهالينه. … . اي… تمنينه
#######################
يعيوني… اختك طبت الديوان
يظربوني ...وصيحن ياگمر عدنان
تقبل ... علي بالكوفه انظرب
تقبل ... عگب عباسك انسلب
شگد... ترجينه... اي… تمنينه
######################
ابو احمد الصالحي

#العباس_وزينب_التقو_بالسبي

لوردت تسألني يالغالي شجرالي
اسئل الناگه وتخبرك شنو حالي
صرت محنيه اكثر من الناگه
امتوني تحجيلك اذا نتلاگه
#####################
وين هالغيبه الطويله عشت من بعدك ظلام
خلني ابدي عندي كومه وياك يالغالي كلام
سلمت وعيوني صبن الف مو مره السلام
ياأخوي وياكفيلي ونبض كلبي وياأمام
منين ابدي من الرفسني لوظربني
لو اخذ ترجيتي من اذني وسلبنبي
بگد هوه الله انا الك مشتاگه
امتوني تحجيلك اذا نتلاگه
#######################
ورمت بمتوني طبعه وردت اخبرك من تجي
اسئل الناگه عالحالي ارتوت من عيني بجي
والشماته گبال وجهي شگد تذب بذني حجي
نگودج بذله يزينب روحي لشاطي اشتجي
شگد شتم كفالي جدامي اسمعه
بس يريد يشوف بعويناتي دمعه
روحي لجلك يگمر خفاگه
امتوني تحجيلك اذا نتلاگه
######################
احمد الله انا عدله ما متت يم النهر
لو تشوف حسين حاله ردلي مكسور الظهر
انا وانت روح وحده شلون فرگنه الدهر
شكلي مو نفسه التركته غير اوصافي القهر
تفاجئت لمن يگلي المعذره
ما عرفتج انت زينب ياترى
تغيرت من ايست لفراگه
امتوني تحجيلك اذا نتلاگه
#####################
تألمت والدمعه صبت ونطحن گلبي وفرت
انا ذيج الهاشميه بسرعه هيجي تغيرت
ابن ابوي وما عرفني اذن ياحاله صرت
حيرتي ماكو مثلها وحگ جدي تحيرت
خاف باجر من اطب اديرة هلي
الناس ما تعرفني زينب بت علي
نعم حگها بهالامر صدگه
امتوني تحجيلك اذا نتلاگه
#######################
لاتعتبي خل اگلج خاف ما عندج علم
مثل ما متغيره انتي انا حيلي منهدم
ردت اگوم من الشريعه وافني كل ذيج الزلم
انا مو شيخ العشيرة اشلون اگوم بلا هدم
بيش ألم هدمي اذا مكطوعه جفي
ما اوفي وياج يازينب ش وفي
شوف عيني خويه الك دفاگه
امتوني تحجيلك اذا نتلاگه
#######################
ابو احمد الصالحي

#مشايه1440

فدوه اروحلكم يزوار
فدوه اروحلكم يزوار
___________________

من حسين الك اجمل عباره
غفرنا اذنوبك بهاي الزياره
احفظ عينك ….. وعرف دينك…قرانك حسينك اذن رتله
امشي بحسره وياك الزهره. متعنيه مشايه لعد كربلا
ربي يحفظكم يزوار
فدوه اروحلكم يزوار
__________________
جدد بيعتك للمهدي يوميه
وحجك بزياره الاربعينه
اسعي بقلبك وذكر ربك الحسين طوفه وقبل المصرع
داوي جروحك وغسل روحك من العلگمي من قبل ماترجع
عنده جمعتكم يزوار
فدوه اروحلكم يزوار
___________
مروا بالنجف واخذوله الوالد
حيدر منتظركم كل سنه گاعد
زوره. وحشمه .. وطلب. يمه . حاجاتك مسلجه بديوانه
ياثار. الله. مروتك يلا لكربلا نريدك تمشي ويانه
والعلم بيده يصير زوار
فدوه اروحلكم يزوار
___________________
اجيتو ويه زينب يالتواسوها
مثل ما حفظت الشيعه احفظوها
امشي. بدمعك. ولزم ضلعك ..واسي الحسين بضلعه المكسر
واخذ. الرايه .لراعي.. الثايه .عباس يم العلگمي موذر
هذاي همتكم يزوار
فدوه اروحلكم يزوار
___________________
دخلت الكربلا ومن توصل الحضره
قبل ماتزور سلم صلي عالزهره
وابدي.. بحرگه هاذا .. الملگه ..انت وحبيبك كلشي تصرف
گلبه… وگلبك… انت وربك… ساحة عرش بل ساحته اشرف
بهذا اهنيكم يزوار
فدوه اروحلكم يزوار
____________________
ابو احمد الصالحي

#سجده_وحده
سجده وحده من سجدتي. يارقيه شلون متي
انا وحبيبي من تلاكينه .. من يدي لزمني وگلي مشينه
يارقيه شلون متي
_______________________
محبوبي راح وزادت العله
فرگة الوالد ابد مو سهله
يريت يرجع حتئ اگلله
هذا ظربني وذاك ماخله
وحجيله كلشي صار وي هله
يسئلنه هو واحنه انسئله
ياسفرنا بلايه والي. وراس ابونا برمح عالي
وعمي ابو فاضل جان حادينه… .من يدي لزمني وگلي مشينه
يارقيه شلون متي
____________________
هودت عيني وجنت نعسانه
ولنه حبيبي گاعد ويانه
بهاي الخرابه شجايبه اهنانه
معقوله يندلنه وتعنانه
بس ليش صار هواي ماجانه
ينسانه لاله اشلون ينسانه
شنهو جابه بهل خرابه… ..لا عشيره ولا گرابه
ظليت اكحل عيني بعينه.. من يدي لزمني وگلي مشينه
____________________
اسمع عذابي وفهم اهمومي
بويه شسولف تجرح علومي
شوف التراجي تخرعك ادمومي
تقبل يابويه مشگگه اهدومي
يأمر بسوطه كعدي وگومي
بظربت سايطه عودت نومي
شگد دعيت الله يجيبك… حتى يشكيلك حبيبك
اخذني وياك الشام موزينه… من يدي لزمني وگلي مشينه
يارقيه شلون متي
____________________
بويه افجعتني من شفت راسك
اهننا اعرفت مذبوح عباسك
من جان حي وينه الذي جاسك
احساسي رادت تعرف احساسك
هنياله بويه بنحرك لباسك
عطشانه خل ارتوي من كاسك
خلني احظنك وانت تدري … هذا اخر يوم عمري
ما نفترگ ياروح هادينه. من يدي لزمني وگلي مشينه
يارقيه شلون متي
__________________
ما عيشن بذله وحك حيدر
خليني اموتن بويه عالمنحر
زين العباد سترجع وكبر
عمه نحيها ودمعه يتحدر
مشتاگه خلها تودعه اكثر
عمه شتگولي ماتت الكوثر
لوعوها وعذبوها.… اختي ماتت فوگ ابوها
والجسد عمه انتي التغسلينه… من ايدي لزمني وگلي مشينه
____________________
ابو حمد الصالحي
5/صفر 1440. ذكرى شهادة رقيه ع

#وداع_الامام_الرضا_ع
#لحضة_وداع

هذا الوداع وانتظر جيه
تطلبني يالما تبخل عليه
عنك نيابه حسين ازورنه
ونقل سلامه لضامن الجنه
________________________
ودعتك وكلي امل تقضي الي مطلوبي
بحضرة ضريحك يالرضا تسگط جميع ذنوبي
هاي الرساله اقراها الك تفهم قصد مكتوبي
انفاسك اطبعها بقلب ينبض بأسم محبوبي
دكات گلبي تصيح بس انته
هذا الفراق الما توقعته
بس الام بفراگه والونه
وانقل سلامه لضامن الجنه
_______________________
خطواتي احسبها الك تمشي وره المسبيه
اهديلك نيابه زيارتي مشيي وتعب رجليه
بس كون ارد لزيارتك اخذ العمر هديه
ما اگدر بدونك ترى لاتبتعد عليه
صبري ضئيل وينهدم حالي
لوفاركتني لحضه يالغالي
نورك اذن ما ينشبع منه
وانقل سلامه لضامن الجنه
_______________
شوق البكلبي يالرضا يلهب جروح احزاني
واعدتك امشي لكربلا واعدني اردلك اني
بعدك عليه وشوفتك تدري اشكثر اذاني
نحليت هداني المرض وغير جميع الواني
من هسه شوكي ذاب وتفطر
تدريني بعدك ابد ما اكدر
يالما غبت لحضه ابد عنه
وانقل سلامه لضامن الجنه
___________________
راح اكتب اسمك بالگلب وبقى عليه اتأمل
وكلما احب غيرك شخص يلجمني ومايقبل
من بعد نورك تيهت عميه بدرب ماتندل
عمري بوجودك ماخفت كل صعبه بسمك تسهل
يالغبت عني عاود الرجعه
تدري بحبيبك منحني ضلعه
ياعمر خلص ايست منه
وانقل سلامه لضامن الجنه
_________________
ابو احمد الصالحي

"جمعة طيبة أسال الله العظيم ؛أن يتقبل منكم الطاعات ،،،
وان يسوق اليكم من رزقه وفضله ما يغنيكم ،،،
و ينزل عليكم من بركاته ما يكفيكم ،،،
و يدفع عنكم من نقمه ما يؤذيكم ،،،
و يرزقكم من عافيته ما يشفيكم ،،،
و يبارك لكم في اهلكم واحبابكم و ذويكم ،،،
❤صباح الخيرات والبركات والدعوات المستجابة❤