越洋專訪︱世界巡唱香港站被消失 多年紅館夢碎 黃明志心痛香港變陌生：嗰度嘅歌手以前唱嗰啲歌，而家係唔敢唱，我覺得好好笑

《娛壹》YouTube有足本訪問片睇：https://youtu.be/-8gTBTNCdBU

紅館不只是香港歌手的夢，敢言敢唱的大馬歌手 #黃明志，都有一個紅館夢；然而，黃明志的多年紅館夢，跟玻璃心一樣，碎了一地！

黃明志早前在台北舉行記者會，宣佈《 #黃明志大飛機世界巡迴演唱會 》將由台灣出發，前往全球共16個城市：包括家鄉馬來西亞、台北、澳門、大阪、巴黎、倫敦、多倫多等地開騷，可惜卻沒有香港站，他感到很抱歉及遺憾，因為記者會前幾天，才收到通知申請 #紅館 的演出不成功。

黃明志在台北接受《娛壹》專訪，曾於九展舉行兩次演唱會的他，在紅館開個唱是多年的夢想，「我希望去到紅館，因為一個夢想，想完成一個夢想。」黃明志希望有人可以幫他，助他可踏上紅館舞台。

自小看 #港產片 及聽 #廣東歌 成長，對香港有份情意結，「香港」是他心目中的夢想國，可惜，他發現如今已今非昔比，「我覺得唔公平，因為仲未到50年，香港對我嚟講係一個最自由、可以創作嘅地方。我係睇香港嘅電視劇或者電影，尤其係電影同埋音樂，呢兩件事我自細睇到大，係香港人教我哋點樣做音樂、點樣拍電影，身為華人，我聽到嗰啲歌同埋睇 #黃秋生 嘅電影，我哋係咁樣長大。」

看到香港現今的狀況，黃明志充滿問號，「而家我大咗，可以咁樣去做音樂、拍電影，但係我去到嗰度，人哋話呢個唔做得，呢個唔唱得，呢個歌詞唔寫得，呢啲係咩嘢嚟㗎？我唔明白，我唔明點解係咁樣嘅。尤其係嗰度嘅歌手以前唱嗰啲歌，而家係唔敢唱，呢個唔唱得，好似有啲好好笑，我覺得好好笑，好搞笑呢件事。」
香港，曾經是黃明志最嚮往的地方，當 #海闊天空 不再闊，夢想國變得陌生，令他感到很心痛，「因為好似咩嘢都無咗，我期待嘅一樣嘢，我大咗，但嗰啲嘢無咗，係咁嘅感受。」

黃明志敢言不畏，不只香港，對某些其他地方來說，有一定的「危險性」，他笑說：「尤其係 #馬來西亞 ，我自己嘅國家，就係好有難度，之前我喺馬來西亞做咗個萬人演唱會，等咗9年先做得到！而家計起應該係2010年，本身做一場，但當時畀嗰啲極端份子抗議、報警做唔成，我等咗好多年，先至喺2019年做到，所以嗰一場係一場我好難忘、好似紅館咁大嘅演唱會。」

今次的世界巡唱，黃明志會在家鄉三處地方吉隆坡、亞庇、檳城舉行，雖然成功申請到演出，但卻有很多掣肘，「歌詞呀、表演內容仲要畀佢哋睇先，仲要approve。」他最擔心的，是approve過後作出的修改，可能會失去了黃明志的味道，「我就係驚呢啲嘢，我哋而家換咗政府嘛，一個政府佢哋啱啱開始未到一年，但佢哋感覺好似係自由啲嘅，不過仲未肯定，free唔free睇我演唱會就會知。」

問黃明志有沒有想合作的香港歌手或藝人，他說有很多，卻有所顧慮，「我驚佢哋唔敢！最期待最想合作嘅當然係 #四大天王 ，或者係 #古惑仔 ！古惑仔喺電影金像獎一齊唱歌，但可能而家唔係好適合，因為我覺得佢哋會驚。」

最後，黃明志強調自己很失望，「我係artist嚟㗎嘛，藝術就係咩嘢都講得、咩嘢都唱得，因為藝術係代表生活、社會，係反映社會發生嘅事，電影及音樂都係，所以唔應該係有咩嘢限制，如果有嘅話就唔係藝術！」

#娛壹
採訪撰文攝錄：肥A
攝影：凍檸茶