【手動轉】 香港人可以為烏克蘭做啲乜？

1. 支持烏克蘭軍隊
烏克蘭嘅人民同軍隊都好有決心守衛國土，作為外國人我哋可以做嘅其中一樣嘢就係捐助一路支持烏克蘭士兵、提供醫療服務嘅各個機構。烏克蘭嘅民眾整理咗一啲可信以及長期同軍方合作嘅組織，包括Come Back Alive、Army SOS等(文末會有連結)。事實上，喺2014年俄羅斯入侵克里米亞期間，烏克蘭本國民眾就大規模捐贈物資俾軍隊同埋義工團，協助應付戰事。

2. 主動認識事態、小心傳播資訊
多加留意戰事消息，多啲留意中文傳媒（端、CUP、NowTV新聞智庫）以及英文傳媒（BBC, NY Times, Guardian）最新報導嘅消息，盡量從多方接收資訊，避免被虛假消息，例如俄軍早前發放嘅移花接木影片、對烏東出現種族滅絕嘅聲稱蒙騙。喺傳播、談及戰事嘅時候，盡量準確描述事件，例如俄羅斯係 #入侵 烏克蘭而唔係 #維和、#進行軍事行動；此刻發生緊嘅亦都係 #戰爭 而唔止係 #危機。可靠嘅消息來源、準確嘅討論，可以幫助我哋了解事實，將道德壓力正確噉施放喺錯誤嘅一方。

3. 作為香港人 學習如何面對強鄰
烏克蘭建立民族自主、脫離蘇聯後喺東西列強中自立嘅歷史，絕對係會令香港人感同身受。當強鄰入侵，好多烏克蘭人不論老弱婦孺都係積極備戰，為國家群策群力。香港人作為旁觀者，雖然唔能夠事事照辦煮碗，但都應該好好學習同熱愛自由嘅人民維護國家安全、堅守領土完整、驅逐外國勢力嘅 #決心，更重要嘅係 #手段。

4. 最低限度 支持烏克蘭經濟
冇人知道戰事嘅規模會去到幾大、又會持續幾耐，對烏克蘭民眾造成幾大傷害。但無論係打仗、醫療定係修復、善後，國內經濟資源都係必不可少。消費支持可以話係香港人最熟悉嘅手段之一，烏克蘭民眾整理咗一啲品牌俾大家去購買，作者亦都同大家推介烏克蘭嘅蜂蜜水果酒廠BERRYLAND，佢哋嘅產品喺香港嘅手工啤黃店都有賣。

作為外國人，就算幾同情都只係杯水車薪，關鍵永遠都係喺本國人民身土不二嘅行動之中，如果唔係烏克蘭人民嘅支持同決心，我哋亦談唔上乜嘢幫忙。希望香港人透過今次經驗一齊練習去幫助同走在自由路上嘅盟友，更加汲取經驗，好好裝備自己、裝備香港。

烏國民眾自發整合：捐獻、新聞、烏克蘭品牌
https://ukrainewar.carrd.co/

烏軍支援機構Come Back Alive Patreon
https://www.patreon.com/savelife_in_ua

《論暴政》作者Timothy Snyder論如何思考烏克蘭戰爭
https://snyder.substack.com/p/how-to-think-about-war-in-ukraine?utm_source=url

烏國民眾喺Twitter發起嘅行動
https://twitter.com/Ukraine/status/1496776124696780802

Credit to: Notes from Underground