香港同盟會2.0

的士 VS Uber

1. 聽過IT人講：用戶可分成三大類，第一類是非常熱衷使用新產品，有新嘢就衝去試用；第二類係等到產品開始成熟，好多人都用緊，呢類人就會用；第三類係頑固地永不使用，直至被迫使用。

2. 我屬於第二類。

3. 最需要的士服務的時候，是當上父母的時候。帶着BB車，加上很多嬰兒用品，在香港如此擠迫的城市，乘搭巴士、地鐵等公共交通工具，幾唔方便，特別係繁忙時間。孩子出生後幾年，肯定是我人生搭得最多的士的時候。當時，香港剛引入Uber不久，但我是第二類用戶，沒有想過用。

4. 為甚麼最後會裝Uber呢？因為有太多搭的士的不愉快經驗。

5. 唔知點解，有些司機好似好憎一家大細嘅乘客，可能我哋上落車特別慢，阻住佢哋搵食。試過好幾次，係好幾次，在街上截的士，司機肯定見到我哋，但好似見到鬼咁，踩油走咗。如果你試過抱住個BB拿着BB車，媽媽還要背着一個大背囊，等咗好耐終於見到架的士，佢咁就走咗去，你就能體會我當時嘅憤怒。

6. 最記得有一次，有個司機無端端要收BB車嘅錢。我架BB車係日本牌子摺埋好細嗰隻，一向擺係後座，唔需要放車尾廂。而我搭咁多次，都冇人收過我錢，佢堅持話個價錢牌有寫住「小型行李收費」。OK，幾蚊我豪畀你——你哋個行業代表話：如果幾元影響你嘅生活質素，就唔好搭的士，嗰幾元真係影響我生活質素——畀多咗錢換來更差嘅生活質素，即係「貼錢買難受」。

7. 呢啲嘢，同朋友呻得多，好自然，就有上述第一類嘅朋友，叫我不如試吓Uber。作為第二類用戶，我唔係冇畀機會的士，我冇即刻裝，但經歷越來越多，最後我哋都裝咗Uber。

8. 公道啲講，的士司機係咪冇個好人？唔係，其實也遇過好司機。Uber係咪個個司機都好？最初真係，但後來越來越多人加入，質素有啲參差。但歸納那七八年的經驗(後來生了細仔，所以繼續要搭)：要我數的士嘅難忘不快經歷，一定數到，而且可以追溯到讀大學嘅時候(那時經常在西營盤搭的士返宿舍)，而要數一啲好好嘅難忘經歷，好難，冇乜印象。至於Uber，要數不快經歷，我剩係記得有個司機嗰程車好黑面，同埋有一兩次confirm咗行程突然話唔嚟，最多係咁，而好好嘅體驗，係會記得，講到出嚟。

9. 其實我一直沒有放棄你們的士。除咗用Uber，我也用的士預約App。我發現，用APP預約嘅的士，司機質素普遍係好啲——我要求好低，我唔需要你當我上賓，你提供合理嘅服務和正常嘅態度，我已經OK。而較衰嘅司機，好多時係街上截、車頭一架手機都冇嗰啲(即係冇用預約APP)。而最好服務嘅，一定係預約嘅黃的，這不是偏見，這很容易理解，因為這些人至少有良心，會體恤他人嘅痛苦，不像藍人那麼自私自利。但這類黃的數目較少，要等好耐。

10. 有啲人會笑那些司機車頭有多部手機，但我唔介意，反而覺得佢哋心態上係進步嘅，佢哋唔係上述第三類嘅人：冥頑不靈又要保住自己既得利益仲要全世界遷就佢。

11. 我諷刺你哋，唔係咩網民抹黑，係我人生最需要的士服務嘅階段，有切膚之痛。依家的士業最慘嘅係，有啲人願意接受新事物，接受App預約，甚至加入Uber Taxi，有心去改善服務，但有一班的士業界嘅所謂代表人物，一班Old Seafood，抱殘守缺，成日呻自己搵少咗，剩係識嗌加價，但唔肯接受任何服務改革，唔肯接受市場監察，講埋啲歪理，希望自己變成特權壟斷，趕走優質服務，劣幣驅逐良幣，然後反罵乘客，明明係騙子學人放蛇捉騙子……

12. 有人話的士業係「幾粒老鼠屎」整彎成個行業，我唔係好贊同，如果係咁，點解你哋做咁多嘢都冇人撐？試吓屙篤尿照吓自己！

#的士 #uber

歡迎訂閱Patreon：patreon.com/yipyatchee

79 views10:08