Qizlar, iltimos, turmush oʻrtoq tanlayotganda faqat yurak urishiga, tashqi chiroyga yoki dunyo havasiga uchib ketmanglar. Hayot bu bir kunlik his-tuygʻu emas, bu qaror sizning butun taqdiringizni, kelajagingizni, farzandlaringizni tarbiyasini belgilaydi. Shu sababli har bir qadamni oʻylab, duo qilib, Allohga tavakkul qilib qoʻyinglar. Avvalo istixora qilinglar. Allohdan soʻranglar: “Robbim, agar bu inson men uchun xayrli boʻlsa, uni menga yaqin qil; agar xayrsiz boʻlsa, uzoqlashtir va qalbimni tinch qil.” Shunda Alloh sizni eng toʻgʻri yoʻlga boshlaydi.

Unutmanglar, turmush faqat muhabbat va tashqi chiroy bilan barpo boʻlmaydi. Eng muhimi Allohdan qoʻrqadigan erkak bilan yashashdir. Chunki Allohdan qoʻrqadigan erkak xotiniga yomon soʻz aytishdan ham uyaladi, unga zulm qilishdan, hiyonat qilishdan qoʻrqadi U biladiki, har bir amali uchun Alloh oldida javob beradi. Ammo Allohdan qoʻrqmaydigan ilmsiz erkak boshqacha boʻladi. U nafsiga qul, dunyoga berilib yashaydi. Bunday erkak koʻp hollarda hiyonat qiladi, ayolini qadrlamaydi, oʻzining xatolarini tan olmaydi, his qilmaydi. Uning yonida sizning yuragingiz tinch boʻlmaydi, hatto hashamat ichida yashasangiz ham ruhiy boʻshliq his qilasiz. Chunki Allohdan qoʻrqmaydigan erkak, insondan ham uyalmaydi.

Shuning uchun, qizlar, dugonam tegyapti men ham tegishim kerak degan oʻy bilan aslo qaror qabul qilmanglar yani biror sabab bilan. Har bir insonning baxti uchun yozilgan vaqti, joyi va jufti bor. Faqat sabr qilinglar, yaxshi niyat qilinglar, va har kuni duo qilinglar. “Ey Allohim, menga iymonli, sadoqatli, mehrli, meni qadrlaydigan, Allohdan qoʻrqadigan erkak nasib et. Chunki haqiqiy baxt sizni sevadigan erkakda emas, sizni Alloh uchun qadrlaydigan erkakda.