شحچيلك على البيه
چن جوه الجثث
خاتل ويمي اعداي
والجثث حرگوهن عليه
گوه تشاهدت ووصلت لرجلي النار
من دم الجثث طفيت رجليّه !

تره الكتمان يوصل حده مرات !
بس مشكلة شتحجي ؟
المايكدر يسولف يبجي يرتاح

وخلص مشتهاة النفس
لا ماريد جيتك يلچنت بغياب مأذيها
يبس عرج المودة وموكدة الجانون
رد مايك بعد ياماي يرويها ؟
تزور المكبرة وتعلكلي عود بخور..
تقرأ الفاتحة والروحي تهديها
ما ابريك ذمة لا وحك حسين
تضل مشكولة ذمتك ماني باريها ..

جانت صعبه بس هاي النهايات
جرحك بيها كد حب البدايات
واكثر شغله تكسر كلب الانسان
من يتقبل بضحكه الخسارات

بعدين فهمت السكتة موضوع
وسكوتك ع الرسايل هم رسالة

ما ينكتب هذا الشِعور اليذبح
من تكتشف هذا الطريق المو صح
والرجعة صَعبة وما تكمل تگدر
واليوگف بنص الدَرب يتدمر
ومن ترجع ومَكسور لمن تِرجع
ومن تذكر السَويته روحك تطلع
والغلط مِنك والمسامح منك
وكلماتك التكتبهن يهدنك
وما تبچي يم احد ومحد عندك
بكل المواقف أنتَ باچي لوَحدك

فُقدت السيطرَة وبالگوة جاي أصبُر
وأول مَرة أحِس بنفسِي ضگت المُر
صُفنت لنَفسي
هذا التَعب يخلص ويّن ؟
شوكِت أتعَب وأحس هذا التَعب مثمُر!
" الوجَع هدنِي "
الجسِم من كُل مَكان يصيّح
خلصت طاقتي وتَعبان ماأنكُر
يوميّه بحَياتي أنصدِم بالأحداث
انهدَم حيلي وبَعد مابيّه حيل أحزِر
مَاچنت أدري .. الظرُوف تغيّر الإنسان
مَصدوم شگثر يا آني مِتغيّر

تغيـرت
لو أمنت ماتنسي عندي
تذكرني من تَختنك لو شدة وتعدي
مو گد فرگتك چنت
اتذكرك والدِمع يلزم سره بخدي
والليل أحسه وجع من عندك ويبدي
بكُلشي اتفقنا سوه ليش احترك وحدي ؟

لحَد آخر نفس مستمَر ما اگطع
إذا انضرب طلقهَ براسي وانزف حيل
يطلعَ دمي بس الشعر ما يطلعَ .

راح أصبر بدونك وأرهم بلياك وأذبح رمش عيني الجان يبجيلك وأتحمل عذابك والبعد والشّوك وما حط صورتك كدّامي وأشكيلك ما أكلّك نسيتك بس جرح بالرّوح يكسر واهسي وما يقبل أمشيلك عيني الشّالتك كلتلها أشيلج راح كالت شيلني وما قبلت تشيلك وجرحي ألفاك صدره وما يريد خيّاط واكف جنُّه واحد جاي يدعيلك بس مجبور أدفنك يا عشك يا شوك بعيوني الحزن يقرونه اليواسون والفوك الحزن لو تدري شاحجيلك شمّات الأجو وأسوني ثالث يوم حيل ويّاك كالو مدري شدّ حيلك

ولك بس انته ردت يومه گبل يومي .

بَعد ما گال اني السبب بجروحة
شفت روحي حَمامة بعشهـا مذبوحة
و إذا ع النَدم تحچي شلون بين هيچ
طلع و بگاع صَبخة شلون الـ ملوحة
انا بنُص الحَرب چيّ مِنطي كَلمة وياك
نمت ويَ الجثث بعيون مَفتوحة !
نمت ويَ الجثث ما خفت و إهتزيت
خفت منّ گتلي كلمن يلتهي بروحة
انهَ الـ يسألني شلونك ، أگُلـة بخير
و آنه دموع عيني هستوها ممسوحة
انه چيّ ما عشت دور الطفولة و حَاب
عشت من بيتنا لحد بيته مَرجوحة .