يوادم مانسيت وجاي اعاني
وبعدهه الضحكه مالتها بذاني
وعلي لو شفت عصفوره وي عصفور
اكولن هاي هيه وهذا اني ؟

اجيتك حِزني بيدي
وشوگي جاباني
ورجعت بفشلتي وحِزني
وحِزن ثاني

ويريدني انسى المضى
والصار وجروحة
الخلص حياته بسجن
تنطيه لوحة رسم
يرسم حبل مشنقة يعدملك اللوحة

ماكو شي يموت الانسان غير الحسرة
اما القهر بجكارة ينحل بدون دراما .

ما تگدر تجازف تنطي مرسال
ثاري جفوفي طلعت مو قويه
بس خلينه هيچي نشوف ونعوف
أحبك من بعيد وهايهيه..

كد كلمة اعوفك حتى نرتاح ؟
واسوء يوم ذاك الـ بي عرفتك
عندك فرصة وحدة وبس خيارين
لو تكسرنه لو تكسر كلمتك .

قشمرتني بـ ها حَبيبي
وبَعد ابوي
ومدري بأَسماء شكثر سَميتني
راح أصدّگ بالحسب نجمات ليل
وما أصدّگ
من گلت حَبيتني .

امس حطيتهن
مرسَال يم مرسَال وعَاينت
لردودك ما استاهلهن !

انا بلاوعي من انطيتك الروح
عقل ما جان عندي
وهسه فزيت ..

غالي عليك
ما ترهم تضل وياي
دورلك رخيص بگدك يماشيك

ليِش اعاتب
انت دليت الحزن
عنوان وجهي
وانت دليت البواچي
دروب خدي
وانه غير السكتة
صاحب للسوالف ياهو عندي

أعلمك ع رمي وانطيك مني سلاح
وأول ماتجرب بيه ترميني؟
اجيتك شارد من الوجع مرني هواي
مارايد تهد بس ردت تحميني
تسلمني بأيديك لغرفة التعذيب ؟
وتوصيهم عليي وين اليأذيني .

مِشتهي بُحضن المگابُر
كُون أنام..
هناك يم حيّدر أون واشكيّله
وريت عِزرائيل يهمِس بذنيّ صَوت!
يگُلي باچر موعِدك تانيلِه.
حتىٰ أبوس ﮼اميّ ، و أگُلها بمِشتهاي..
" الليلة أموت الليلة أخُر ليلة "

أدري تِتخطاني تگدر
انت صاحِب تجرُبة وجيت اعلة
گلبي مفارگ، وعايف حَبيب
وبايع انت هواي گبلي بحِجة
القسمة ونَصيب بيك اريد شلون اربح؟
انه اول تالي بعيونَك غريب !!

لو خانگني بچفوفك ولا خانگني بحچايه
يصغر كُلشي بعيونك أذا تُكبر بالمرايه

سلس ماصير وابقى بكيفك انگاد
وحطب ماصير وانت بعازة النار
چنت زهرة شمس هسه انا صبير
مادير وي شمسك وين تندار
كاتلني العطش بس بالي مرتاح
اشرب بالرمل ماذل للأنهار
وي الگاع طولي ومن تجي الريح
اضل ثابت انا وتهتز الاشجار

انتهت قصتنهَ جانت مو سعيدة !
و غيرك اخذ كلبي الما تريدهَ
أذيتك ماكدرت احجيها للناس
بس مجبور اسولفها بقصيدة
أصعب لحظة من تفارك جفوف
الروحك بيدهَ غيرك لازم ايده .

سولف كول الك واهس تضل وياي
واذا ما الك واهس كول لا تخجل
ما اقبل احبك وانتَ ما مرتاح
وما ارتاح احبك وانتَ ما تقبل
اذا متشدني بيك وبيه اشدك حيل
انحل بالسهل من عندك وتنحل
بكيفك من اجيت وما جبرتك يوم
ما جبرك بكيفك لو ردت ترحل
فكر باليهمك والمهم شتريد
انه كل اليهمني المهم لا تزعل
ما مليت منك اكدر ابقى وياك
بس المشكلة خاف انه راح انمل
ميهمني الدرب صار امشي بيه اسنين
ما اندل جنت بس هسه كمت اندل
وما اكولن خسارة المني راح وياك
وي كلمن تحبة الروح ما تبخل
روحي الحبتك تتحمل ابلياك
وما ينقص صبرها بغيبتك يكمل
مجنون نعم بس تدري روحي شلون
تنجن بالعشك وبلا عشك تعقل
حبيتك صدك والوكت جذبة هواي
بمعركة الدغش انه نزلت اعزل
وتعرفني ولو عندك شكوك هواي
وادري لكل شكوكك صار عنك حل
من شفتك سنابل روحي جت ترويك
ماي ولاتظن تصيرلك منجل
ما اقبل احبك وانتَ مامرتاح
وما ارتاح احبك وانتَ ماتقبل