ومن درت وجهك
درت وجهي ومشيت
وردت اكلك وين رايح بس استحيت
وقاومت كدام عينك
بس وراك حتى بالشارع بجيت
وخل اكلك خاف ماعندك خبر
راد يوكف كلبي بس ربك ستر
مامصدك عبرت هسه انا زين
والله لو مو الله ماطول شهر

عندك غيري
بس غيرك فلا عندي
ليغرك الناس الاضحك وياهم
انه بوكت الحزن وحدي
ومن يبدي الوجع يشبه كلام الناس
وشيخلص كلام الناس من يبدي ...

بگصايب يا حلم
شديت روحك خيط
خيطك من يمر
دخان ما گطعه

؛ اخاف عليك تتبده شعر مالمتك ماشه.

انه ردتك ثلج وتطفي هل النار
صرت جمرة وتزيد النار بيه

وجودك جان يعنيلي
‏وخسرت هواي
‏لحد ماصرت متهمني
‏انه الجنت ادور شوفة عيونك
‏وجنت من عدها تحرمني

ديربالك لا ترد مجروحلي
انت والتحبة فدوة تروحلي
ديربالك لا ترد
باجر ترا يلوحك برد
وانا مادفيك مامسموحلي

والدنيا ضاكت والنفس باقي اعلى كد الحسرة
فرحان داويت الغصن ثاري المرض بالشجرة
مرت سنين من العطش مو شفتي روحي اتفطرت
ومتاني حبكم گطرة !

صار سنين اطگ حجار بحجار
واول ما شعلت النار مطرت

وعاونتك علي
من شفت عذرك خاب
قنعت النفس گلتلها يتغير !!
لا كصرك طول
لا فاض بيك الطيب
لا شمسك علت والراكد تبخر
لا مدك وصل والعين شافت نور
لا كسرك جبر
لا لغزك تفسر ..

ضل كلبي بأمل ترجع والاكيك
وكلت خله بأمل ما احجي خله
محضرلك لحن ما سامعة العود
مثل الريح تعزف على الكذلة
وطلع كل الرسمتة اوهام بأوهام
ارسم عالظلام بقلم كحلة !

ومن كتلك اموت بدون ماشوفك
چنت جذاب
لا خلف الله على الجية
التحطلي صواب
منا وانتهت والباب يوسع باب .

اخذني بكلشي ما ابيعك
اخذني من التعب يمك
جكارة بجفك اشعلني
اموت بسد اصابيعك
اخذني وياك من عندي
اخذني لأي حلم ارتاح
مو شرط بحلم وردي

واحطك وين من تنعد الاسماء ؟
وانت بوسط بيتك مالك مكان
وتكميلة عدد مو راس حطوك
نقص بالقافلة وجابوك
بطران !

تلهث أيامي وعُمر تَركض وراك
والدقايق غربه واللحظه قطار
دير وجهك مايهم بجروحي خير
واضحه حجاياتي وحروفي نهار
وياي طبعك يشبة أوضاع العراق
خير للغربه وعلى أهله يصير نار .

- عَلي رشِم