"Tərtər işi" haqqında Müdafiə Nazirliyinin rütbəli vəzifəlilərini, Zakir Həsənovu, Nəcməddin Sadıqovu, Elçin Xəlilovu və digərlərini sosial şəbəkələrdə tənqid etdiyi və ittiham etdiyi üçün ehtiyatda olan polkovnik Elnur Məmmədov böhtan atma maddəsi ilə 6 ay müddətinə həbs olunub. Bu "Tərtər işi" haqda danışdığı üçün cəzalanan 4-cü şəxsdir. Qətliamı törədənləri yox, danışanları tuturlar.

İlham Əliyev Praqa görüşlərindən sonra: "Ermənistan tərəfindən xoş məram olarsa, sülh müqaviləsi ilin sonunadək imzalana bilər. Beş prinsiplə bağlı nə erməni tərəfinin, nə də Avropa Şurasının heç bir sualı yoxdur. Mümkün sülh müqaviləsi ilə biz müharibə və düşmənçilik səhifəsini qapadacağıq".

Ərdoğan: "Ermənistan Azərbaycanla hüquqi məsələləri həll etsin və dərhal sülh bağlı müqaviləsini imzalasın. Bunu etdiyiniz anda sərhədləri, qapıları, hava, yol və dəmir yollarımızı açarıq”.

Gecə Praqada imzalanan bəyanata görə:

- Hər iki tərəf bir-birinin ərazi bütövlüyü və suverenliyini tanıdığı 1991-ci il Alma-Ata Bəyannaməsinə sadiqliklərini təsdiqləyiblər.

- Oktyabrın sonunadək sərhəd komissiyalarının növbəti iclası Brüsseldə baş tutacaq.

- Ermənistan Azərbaycanla sərhəddə Aİ-nin mülki missiyasına yardım göstərməyə razılaşıb.

- Məqsədi güvən yaratmaq olan missiya bu ay faəliyyətə başlayacaq və maksimum 2 ay müddətində davam edəcək.

İlham Əliyev "Zəngəzur dəhlizi"nin açılmasını sülh müqaviləsinin bir hissəsi kimi yox, 10 noyabr bəyanatının öhdəliyi kimi qəbul edir. Bu məsələni gələn ayki görüşlərdə müzakirə edəcəklərini deyib. Odur ki, dəhliz məsələsində Paşinyan da, Əliyev də ümidsiz açıqlamalar veriblər.

Bu arada Əliyev, Paşinyanın da dediyi kimi Qarabağın erməni icması ilə əlaqələrin qurulduğunu və davam etdiriləcəyini dünənki görüş zamanı etiraf etdi. Bildirib ki, Azərbaycan vətəndaşı kimi yaşamaq istəyənlər peşman olmayacaqlar. Amma kimsə istəmirsə özləri üçün başqa yaşayış yeri seçə bilərlər.

Erməni mənbələri iddia edirlər ki, sərhəddə atəşkəs yenidən pozulub. Azərbaycan Müdafiə Nazirliyi hələlik bu barədə məlumat yaymayıb.

İlham Əliyev, Paşinyan və MDB-nin digər liderləri qeyri-rəsmi formada Sankt-Peterburqa, Putinin 70 illik doğum günü yubileyini qeyd etmək üçün yollanıblar.

7 il erməni əsirliyində olmuş Şahbaz Quliyev müharibə əlilliyi və pensiyasının verilməsi tələbi ilə Prezident Administrasiyası qarşısına çıxaraq, təkadamlıq aksiya keçirib. Özünü yandırmağa cəhd edərkən polis əməkdaşları onu saxlayaraq, ərazidən uzaqlaşdırıblar.

Müdafiə Nazirliyi Azərbaycan Ordusunun hərbçisi Quliyev Vahid Əlifağa oğlunun bu gün səhər saatlarında kəskin ürək-damar çatışmazlığı nəticəsində vəfat etdiyini bildirib.

Azərbaycanda mal ətinin yenidən bahalaşdığı deyilir. Bakıda ət satan ticarət obyektlərində qiymətlərdəki artımın 1-2 manat təşkil etdiyi bildirilir. Nisbətən şəhər kənarında kilosu minimum 14 manat, mərkəzdəki obyekt və supermarketlərdə isə qiymət 15-16-17 manata çatır.

ADR Partiyası Bakıdakı Rusiya səfirliyi önündə rus sülhməramlılarına qarşı aksiya keçirib. Aksiyada "İşğalçı rus ordusu, Putin rədd ol, "Putin, idi na x..", "Paşol" kimi şüarlar səsləndirilib. Partiya üzvü Hüseyn Məlik "Putin, gedəndə özünlə İlhamı da apar" dediyi üçün polis tərəfindən zorakılıqla saxlanılıb.

Qarabağdakı qondarma rejimin parlamenti ABŞ, Fransa, Rusiya və BMT-nin bütün üzvlərini "Artsax Respublikası"nın müstəqilliyini tanımağa çağırıb. Bildiriblər ki, necə ki, Ukraynanın 4 vilayəti ilhaq edildi, necə ki, Kosova tanınıb, o cür də bizi tanıyın. Bu danışıqlara zərər verəcək.

Separatçılar iddia edirlər ki, Qarabağ ərazisində Azərbaycan əsgərləri onlara məxsus bir at və iribuynuzlu mal-qaralarını oğurlayıblar.

Ukrayna parlamenti hazırda Rusiyanın əlində olan Kuril adalarını Yaponiya ərazisi kimi tanıyıb və Rusiyanın adaları işğal etdiyi bildirib.

İlham Əliyevin də iştirak etdiyi MDB liderləri MDB məkanında 2023-cü ili "Rus Dili İli" elan etdilər. Özü də Azərbaycanda 2023-cü ili atasının adına, "Heydər Əliyev ili" elan etmişdi.

Bu gün Xersonda mülkiləri daşıyan avtobus hücumlar nəticəsində vurularaq partladılıb. Ruslar ukraynları, ukraynlar rusları ittiham edir. 14 nəfər şəxsin öldüyü bildirilir. Ölənlər arasında azərbaycanlılar, Zərdabın Məmmədqasımlı kəndindən 4 nəfərin olduğu deyilir.

Ukraynada müharibənin 227-ci günündə Kerç boğazındakı Krım körpüsü partladılıb. Rusiya onu ilhaqdan sonra tikmişdi. Ən strateji nöqtələrdən biri idi. Bir neçə həftədir ki, oradan keçən yol vasitəsi ilə minlərlə silah-sursat, yanacaq və enerji məhsulları daşınırdı. Müharibənin növbəti dönüş nöqtəsi olacaq. Bu əməliyyatın Ukrayna Təhlükəsizlik Xidmətinin xüsusi əməliyyatı olduğu bildirilir.

Azərbaycan Müdafiə Nazirliyi dünən axşamdan bu gün səhərə qədər sərhəddə atəşkəsin müxtəlif çaplı atıcı silahlardan pozulduğunu bildirib. Məlumatı Ermənistan MN-də təsdiqlədi.