Təəssüf ki, yeni şəhid xəbərləri gəlir. Bu o demək deyil döyüş gedir. Döyüşlər 2 sutkadır dayandırılıb. Sadəcə ərazidə qalan cənazələr vardı, tanınmaz halda olanlar vardı. Onlar müəyyən olunur, ailələrə və yaxınlarına göndərilir. Ona görə də fasilələrlə yeni şəhid xəbərləri yayılır. Bunu aydınlaşdırmaq istədim. Hazırda sərhəddə vəziyyət sakitdir.
Ermənistan rəsmilərinin bugünkü çıxışlarına əsasən demək olar ki, Rusiyadan üz döndərirlər. Bildiriblər ki, Rusiyadan başqa fərqli mənbələrdən silah tədarük edəcəklər. Həmçinin "Atəşkəs ABŞ-ın sayəsində əldə edilib" və "KTMT gözləntilərimizi doğrultmadı" kimi açıqlamalar veriblər
Naxçıvanda Ermənistan Ordusuna məxsus pilotsuz uçuş aparatının zərərsizləşdirildiyi bildirilir.
Azərbaycan Müdadiə Nazirliyi bildirir ki, əsgər Omarov Eşqin Nəsib oğlu silahla davranış qaydalarının kobud şəkildə pozulması nəticəsində vəfat edib. Yəni döyüşlər zamanı şəhid olmadığı deyilir. Azərbaycan Ordusunun Kəlbəcərdə həlak olan əsgəri Eşqin Omarova şəhid statusu veriləcək.
MN: "Azərbaycan Ordusunun daha 2 hərbçisi şəhid olub, şəhidlərin sayı 79-a çatıb".
Vəkil Elçin Sadıqova ev dustaqlığı qərarı verilərək həbsdən buraxıldı. Əvəz Zeynallının xanımı Məlahət Qüsuri iddia edir ki, Elçin Sadıqov Əvəz Zeynallının "üzünə durmağı" müqabilində azadlığa buraxılıb.
MN: "Azərbaycan Ordusunun son döyüşlər zamanı 282 hərbi qulluqçusu yaralanıb, onun 43 nəfəri ilkin tibbi yardımdan sonra ordu sıralarına qayıdıb, 115 nəfərin vəziyyəti kafi, 103 nəfər orta-ağır, 21 nəfərin vəziyyəti isə ağır olaraq qiymətləndirilir. Hadisələr zamanı Azərbaycan tərəfindən 2 mülki şəxs də yaralanıb. Biri evə buraxılıb, digərinin vəziyyəti isə orta-ağır qiymətləndirilir".
Azərbaycan tərəfi bu gün 32 erməni hərbçinin meyitini qarşı tərəfə təhvil verib. Hazırda Ermənistan hərbçilərinə aid digər meyitlərin müayinəsi aparılır və yaxın zamanlarda onların da təhvil veriləcəyi deyilir.
Qırğızıstan və Tacikistan sərhədinin mübahisəli olan bir neçə bölgəsində silahlı toqquşmalar baş verir. Tərəflər ağır silahlardan və döyüş avadanlıqlarından istifadə edirlər. Toqquşmalarda ölənlərin sayı 37-yə çatıb. Yaralı sayı isə 129 nəfərdir. Ölənlər arasında mülki şəxslər də var. Qırğızıstan Tacikistan ilə sərhəd döyüşlərində "Bayraktar"dan istifadə edir. Lokal döyüşlər hələ də davam edir. Artıq bir kənd taciklərin əlinə keçib.
Səfərbərlik və Hərbi Xidmətə Çağırış üzrə Dövlət Xidməti sosial şəbəkələrdə 10 gün ərzində Azərbaycanda səfərbərlik elan olunacağı barədə yayılan məlumatları qəti təkzib etdi və yalan adlandırdı.
ABŞ Konqresinin Nümayəndələr Palatasının spikeri Nensi Pelosi Yeravanda çıxış edir: "Azərbaycanın Ermənistan ərazisinə ölümcül hücumlarını qətiyyətlə pisləyirik. ABŞ hücumun Azərbaycan tərəfindən həyata keçirildiyini təsdiqləyib və Konqres Azərbaycanın təcavüzünü pisləyən qətnamə layihəsi hazırlayıb. Azərbaycanın “Dağlıq Qarabağ”ın mülki əhalisinə qarşı hərəkətləri, tarixi abidələrə qarşı vandalizmi də bizim diqqətimizdədir”.
Rusiyanın Dövlət Dumasının sədri Vyaçeslav Volodin Bakıya səfərə gəlir. Bu arada Nensi Pelosi Yeravanda "Rusiya yoxsa Qərb" tərəfini seçmək məsələsinə eyham vuraraq: “Buna Ermənistan qərar verir, lakin belə bir qərar versə, ABŞ ona hər bir köməyi göstərməyə hazırdır”, - dedi.
Rusiyanın Baş naziri Mixail Mişustinin də Bakıya səfərə gələcəyi bildirilir.
Bunu da qeyd etmək lazımdır ki, rusiyalı rəsmilərin sentyabrda Bakıya səfərləri iyun ayının sonunda planlaşdırılmış səfərlərdir. O ki, qaldı Nensi Pelosinin Yerevana səfərinə, bu səfər də 12 sentyabrdan öncə planlanmışdı, Simonyan çoxdan dəvət etmişdi onu. Sadəcə siyasi konspirologiyalara açıq maraqlı təsadüflərdir.
FRANCE24: "Ermənistanı müdafiə etmək üçün könüllü olaraq düşərgəyə yollananların sayı artır. Yerevanda və qonşu şəhərlərdə sivillərə silahdan istifadə qaydaları, ilkin tibbi yardim təlimləri həyata keçirilir".
Ermənilər hazırda Yerevanın mərkəzində aksiya keçirirlər. Onlar hökumətdən KTMT-dən (ОДКБ) çıxmağı tələb edirlər.
Gürcüstanın Tbilisi və Niderlandın Utrecht şəhərlərində azərbaycanlı gənclər "Biz müharibə istəmirik", "No War" şüarları ilə dinc aksiyalar keçiriblər. Onlar Azərbaycan-Ermənistən sərhəddində baş verənlərə etirazlarını bildirmək və sülh istədiklərini bildirmək üçün toplaşıblar. Hər iki aksiyada da, ayrılıqda 3 nəfər iştirak edib.
Qırğızıstan prezidenti sentyabrın 19-nu Tacikistanla sərhəddəki münaqişə nəticəsində həlak olanlar üçün "Ümummilli Matəm Günü" elan edib. Qeyd edim ki, son baş verən toqquşmalar nəticəsində 46 nəfər qırğız hərbçi həyatını itirib.