#طرابلسيون 🌚😂.

كيف تنظم وقتك من أول السنة ؟!

لو حافظت ع الجدول بنتجح بتفوق باْذن الله 🎓

1- أحضر المحاضرة  ومعاك الكتاب اللي يشرح منه الدكتور ، وهذا مهم جداً . . وهكي بتكون منتبه ويزيد فهمك لموضوع المحاضرة . . يوفر عليك وقت الكتيبة

2- تابع الدكتور في الشيت وحاول تكون مركز معاه في كل كلمة ،، ولو عندك اي اضافة تكتبها في الشيت 

3- المراجعة مهمة في النقطتين اللي فوق انت انجزت نص المهمة نجو للجزء الأهم  ،، توا تبدأ في ترجمت الكلمات اللي مش مفهومة وتقدر تستعين بقاموس  ( أطلس ) . . أو اي ابليكيشن وبعدها تقعمز وتقرا المحاضرة بهدوء وبهكي تكون ثبتت المعلومات بطريقة أولية

4- ما تكتبش كل كلمة يقولها الدكتور لانك مش ح تلحق وهكي تكون مشتت ومش حتركز مع الشرح وتفوت عليك المحاضرة

5- حاول وانت تسجل في المحاضرة تركز مع الدكتور باش لما تروح وتسمع التسجيل تكون عندك فكرة ع المحاضرة

6- ترجم الكلمات غير المفهومة . . وافهم الموضوع ككل . . و ما تحفظش بكل  ،، وتوا نقولك السبب  ؟
لأن الحفظ في أول السنة يكون صعب ،،لانك ح تضيع وقتك ع الفاضي وتحس باليأس وتحس المنهج صعب . .

7- حذاري من تراكم المحاضرات ، وتكديس المناهج لانه أقصر طريق للفشل  . .

بعد أول أسبوعين :

#كيف_نقرا  ؟!

1- استمر ع نفس الطريقة السابقة ، بس تدريجياً ابدأ احفظ الأسهل فالأسهل . .

2- كل واحد و طريقته في القراية ..
الصحيحة للحفظ هي :👇🏻
* افهم أولا . .
* ربي اعطاك 5 حواس لخدمتك حاول تستغلهم كلهم  ( الكلام + السمع + الرؤية + الكتابة ) يزيد تثبيت المعلومة ، وخاصة التسميع بصوت عالي مهم جدا . .

* أكبر غلط تديره انك تحاول تحفظ 100% من أول مرة لأن هذا مستحيل  . . وتحبط نفسك . .
الصح >> افهم 90% >> واحفظ 60 إلى 70 % وحتشوف النتيجة من اول مرة

3- يوم الخميس يكون يوم ترفيهك اطلع ارقد ازرد  مارس هواياتك وغير جوك

4- يوم الجمعة خليه لمراجعة اللي خذيتها كل أسبوع ،، واحفظه كويس . .

5- بعد شهر ، حاول تراجع اللي خذيتو واختبر نفسك بِـ  اسئلة السنوات السابقة

6- ما تخافش من النسيان . . لانه أمر طبيعي حتى لو راجعت ونسيت . . ما تخافش بمجرد ما تشوف ورقة الامتحان ح تحل طوول باْذن الله  . .

#ملاحظات

اللي بنقوله توا نقاط مهمة ننصحك بيهم وربي يوفق الجميع 👍🏻

1- مافيش حاجة اسمها لو فاتك محاضرات حتسقط ! أو انك مش ح تكون من الأوائل !!! كله دوة فاضية و كلام مش واقعي .. ومع هذا الحضور ظروري لو فاتك تقدر تعوض وتكمل

2- مافيش حاجة اسمها لو قريت من برا منهج الكلية م ح تنجح وتجيب الفل مارك ،، لان اللي يبي يفهم وتتوسع آفاق عقله ح يدور ويجتهد 

أما ( #التفوق ) يبي تعب اكثر وجهد اكبر . . وأما الفشل والرسوب مش محتاج الا الكسل والنوم واللامبالاه ،،

[ اعرف انك تقرا في علم جميل ، وممتع للغاية ، كما أن مستقبله المهني من أرقي واسمي التخصصات ]

1-اعرف أن مجال الطبيات مسؤولية أرواح ناس بين يديك تأثم لما تقصر في الأخذ بأسبابه . . خاصة في ظروف اللي تمر بيها بلادنا . . وتوا الوقت اللي تقدم لبلادك احسن ما عندك
ولازم يكون عندك هدف في حياتك ما ترتاحش لين تحققه ،
ويكون في علمك ان المنافسة كبيرة ،، في كل دفعة من 25 إلى 50 طالب يحاولو يحصلو على إمتياز .. يعني الجيد جداً #عادية جداً

2-حافظ ع  أصحاب الخير ، ، اللي يرفعو من همتك ، ويشدو من أزرك ، ويعينوك على دراستك ومشوارك في الحياة وتقبل منهم النصيحة إذا طلبتها ،،

3- باعد عن أصحاب السوء ،،  لأنهم بيشدوك معاهم لفشلهم المحبوب ، ولو خشيت لطريق الفشل تبي وقت باش ترد لطريق النجاح من جديد

4- حاول ان يكون ليك نشاط في الكلية ، مثلاً مهرجانات او مساعدات للطلبة الجدد وحاول تندمج مع دفعتك كونو أسرة #طبية وحدة

دعواتي للجميع بالتوفيق ♥️

✍️ Ahmed Elmtaknsh

أن يختارك الله لدراسة تخصص ما، يعني أنه سُبحانه يرى فيك القدرة عليه.. فلا تستسلم .

صباح الخير ، لمن استقيظ ليجاهد نفسه في عيش يومٍ آخر من هذه الحياة و لمن اراد التوفيق اتمنى لك ولنفسي و لجميع التسيير في كل شيء''

2004 مفروض لما طلعوا من الشهاده الثانوية كتبناهم :

تشهد وزارة التعليم بأن هذا الطالب المغوار الفارس الكاتينة حديد البطل الركن القراندايزر الخارق للطبيعة هزيم الرعد والكاسر للقوانين بأنه ما زال محتفظاً ببعض قواه العقلية وأنهى فترة دراسته بنجاح وسلامة ومبروك التخرج يا تريس🗞️

تهانينا للراسبون في الدور الثاني اتيحت لكم الفرصة 🔥✅

ما المقصود بنظام التكميلي للشهادة الثانوية؟
هو نظام يُسمح فيه لطالب الشهادة الثانوية الذي رسب في ثلاث موادٍ فأقل في الدور الثاني للعام الدراسي 2021 / 2022م من دخول امتحان الدور الأول للعام الدراسي 2022 / 2023م في المواد التي رسب فيها فقط.
#مثال_1
طالب في الشهادة الثانوية القسم العلمي رسب في الدور الثاني للعام الدراسي 2021 / 2022م في مادة الفيزياء، والكيمياء، والرياضيات، يُسمح له بدخول امتحانات الدور الأول للعام الدراسي 2022 / 2023م في هذه المواد فقط، مع احتساب درجة أعمال السنة العام الماضي، فإن لم ينجح في الدور الأول جَازَ دخوله للدور الثاني، فإن لم ينجح يُعيد الدراسة السنة التي تليها في جميع المواد ما لم يستنفد سنوات الرسوب.
#مثال_2
طالب في الشهادة الثانوية القسم الأدبي، رسب في الدور الثاني، للعام الدراسي 2021 / 2022م
في مادة الفلسفة، ومادة الإحصاء، يُسمح له بدخول امتحانات الدور الأول للعام الدراسي 2022 / 2023م في هاتين المادتين فقط، مع احتساب درجة أعمال السنة للعام الماضي، فإن رسب في الدور الأول جاز له دخول للدور الثاني، فإن لم ينجح يعيد الدراسة السنة التي تليها في جميع المواد ما لم يستنفد سنوات الرسوب.
#كذلك من رسب في مادة واحدة.
#تنبيه_مهم:
تحديد التكميلي بثلاث مواد فقط هو ما كان عليه العمل سابقا وهو ما أشرت إليه المادة (23) من لائحة النظم الأساسية لامتحانات مرحلتي التعليم الأساسي والثانوي الصادرة عن اللجنة الشعبية العامة للتعليم سنة 2008م، وهو ما يتوافق مع المادة (51) من اللائحة رقم (1013) الصادرة عن مجلس الوزارء بحكومة الوحدة الوطنية لسنة 2022م.
✍️
رياض النسر