سلام عليكم خدام الحُسين ع
سيتم نشر قصائد محرم 1443 هـ يوم الأحد القادم والإثنين ان شاء الله تعالى
وفقكم الله جميعاً

محرررم 1443 هـ قصيدة تهيئة المجلس (الليلة الأولى)

السلامُ الأرض الحسين
عاللي شالت أجمل اثنين

الكربله أبعث سلامي ابهالمسية
الفاطمي شافته ويه الفاطمية
لومه ابو اليمه أبد چا ماكو هيه
الله سواها لجل إبن الزچية

السلامُ اعليها مرتين
عاللي شالت أجمل اثنين
__________________
السلامُ اعله البچت ذيچ الضهيرة
عاللي طاح ولملموا جسمة ابحصيرة
عاللي إلها طبت وچانت أميرة
ومنها طلعت ياوسف مسبية اسيرة

زينب العاشت بالونين
عاللي شالت أجمل اثنين
__________________
السلامُ اعله اللي شالت ذيچ الدموم
وبيها ظل طايح وحيد اعليها چم يوم
عاللي حضنته بلا حماي واهدوم
كربلة واتسمة بيها اهناك مظلوم

السلامُ اعله البقى وين
عاللي شالت أجمل اثنين
_________________
السلامُ اعله اللي شالت ذاك الاحساس
عالنهر مطروح بس جثة بلا راس
عاللي شالت عالشريعة أحلى عباس
عالذي بچفوفة من الگاع ينباس

السلامُ الأحلى چفين
عاللي شالت أجمل اثنين

حيدر الحلفي

محرررم 1443 هـ
قصيدة السلامُ الأرض الحسين
حيدر الحلفي

محررررم 1443 هـ ما تگضي اجروحك

ما تگضي اجروحك مولاي .. جرحك دوم
ماميت چن إمن اسنين .. چن اليوم
كل عام .. توگع يم زينب
كل عام .. مايك ما تشرب
جرحك دوم

اجروحك تعود ابكل سنه يا للعجب
ماينتهن كل العمر مثل الذهب
ابضهرية العاشر يصيحون انسلب
إبن الزچية ويمه ماي وما شرب

وانصيح ابصوت .. ويلي اعله الطايح مذبوح
وانصيح ابصوت .. منهو اليمه اهناك ايروح
وانصيح ابصوت .. زينب گعدت يمه اتنوح

واليوم انحس طفك صار .. يالمحبوب
ونسمع زينب راحت ليك .. اتدور ثوب
واتطيح .. يمك بس تنحب
كل عام .. مايك ما تشرب
جرحك دوم
________________________
كل عام نحرك ينگطع بيد الشمر
وخيول عشرة تطحن ابذاكى الضهر
واضلوع كل عام ابدليلك تنكسر
والخيمة اختك يرجع اوحيد المهر

كل عام اتضيع .. منك يحسين ابنيات
كل عام اتضيع .. من ابنيتك ترچيات
كل عام اتضيع .. ارقية او وسط الهيمة اتبات

چنه الطف بينه احنه ايصير .. يا مولاي
وانحس لطفالك يحسين .. اتدور ماي
والروح .. عطشانة وتلهب
كل عام ..مايك ما تشرب
جرحك دوم
________________________
كل عام ابو فاضل يجيك اتودعه
عالشاطي اخيك بالطفوف اتضيعه
ضهرك يرد هم ينكسر عالمشرعة
واتدور ازنود او چفوف امكطعة

اتودع العباس .. اوداع الما بي ملگه اردود
اتودع العباس .. اچفوفة اتقبلهن واتعود
اتودع العباس .. مجبور وگلبك ممرود

كل عام اوداع العباس .. يلچم بيك
من تشتاگ العطره اهواي .. اتشم ايديك
إمن النوح .. عالكافل تتعب
كل عام .. مايك ماتشرب
جرحك دوم
________________________
زينب تجيك ابليلة الحادي تلم
جسمك يبو اليمة وعطر منك تشم
لا راس تلگى الحره لا ظلت هدم
كل عام زينب عالثرى اتلم الجسم

فوگ التربان .. امگطع ياوسفة وعريان
فوگ التربان .. اتراب او دم جسمك مليان
فوگ التربان .. نايم واتحسك عطشان

كل عام انحس بيها اتروح .. يم عباس
زينب واتگله ابلياك .. شاب الراس
والراس .. من بعدك شيب
كل عام .. مايك ما تشرب
جرحك دوم
_______________________
اباب المخيم كل سنه اتودع الطفل
إبنك عله اچفوفك نشوفه منچتل
كل عام بچفوف اختك انشاهد حبل
كل عام نسمع صعدت اختك عالهزل

طبت ديوان .. إختك صاحت كل الناس
طبت ديوان .. يم ايزيد اخت العباس
طبت ديوان .. بس ما هبطت زينب راس

وياها ايطب راسك ذاك .. يم ايزيد
بس الراس اويه اختك راح .. ابلايه اعضيد
ياحيف .. من زينب تنسب
كل عام .. مايك ما تشرب
جرحك دوم

حيدر الحلفي

محرررم 1443 هـ
قصيدة ما تگضي اجروحك
حيدر الحلفي

محرررم 1443 هـ قصيدة تهيئة المجلس ( ليلة 2 محرم )

السلامُ اعله الخدمناه
عالنموت ونحيه وياه

السلامُ اعله النحبه اعله النخدمة
عاللي ماينشف أبد فد يوم دمه
عالذي عطره ابمجالسنة نشمه
إحسين وانگله نحبك أحلى كلمة

السلامُ اعله البچيناه
عالنموت ونحيه وياه
_______________________
جية امحرم يبو اليمة انتظرنة
نشكر الله الخدمتة طول عمرنة
بس الك نلطم ترى انورم صدرنة
دگة الزنجيل ينطرها ضهرنة

السلامُ اعله الهويناه
عالنموت ونحيه وياه
_______________________
خدمتك مثل العسل مولاي عدنه
بيها يرتاح الگلب وينضف چبدنة
عام عده وما نسينة لا بعدنة
سيدي عاشور أغلى من ولدنة

السلامُ اعله الفديناه
عالنموت ونحيه وياه
______________________
حضرينة الموكب احنه والمنابر
ابدينة من اول محرم بالشعائر
هذا خادم هذا لاطم هذا شاعر
هذا رادودك قره بحله الحناجر

السلامُ اعله القريناه
عالنموت ونحيه وياه

حيدر الحلفي

محرررررم 1443 هـ
السلامُ اعله الخدمناه
حيدر الحلفي

محررررم 1443 هـ

يجرحي . الماله ضمد مو مثل الجروح
يعشگي . الما ينتهي يا أحلى مذبوح
قريتة وماشفت طفك . لچن دوم اشعر ابنزفك
يا أحلى مذبوح

عايش ابگلبي مثل أنفاسي واكثر
يادموعي اعليك شو ريحتها عنبر
كل سنة ابعاشور هاي اجروحي تكبر
باني الك بالروح يامحبوبي منبر
امصيبتك تكبر واشوف الدنيا تصغر
يالجمال الدنيا نقطة ابوجه الاكبر

يالاكبر . شفتة جرح بعيونك اثگيل
عله ابنك . إنته ترب لو روحك اتهيل
امسحت دم ابنك ابچفك . لچن دوم اشعر ابنزفك
يا أحلى مذبوح
________________________
اشما كبر عمري تزيد اجروحي لجلك
الدنيا ادورها وابد ماشوف مثلك
أتعب ويحسين أصرخ وين احصلك
واگعد ابچي ادموع طول الليل اهلك
ضامي ليش وماي شو محد يصبلك
ليش نايم عالترب محد يگلك

واصيحن . وسفة طحت وسفة عالتراب
حبيبي . الكلبة ترف نايم بله اثياب
طحت يم الذي ايعرفك . لچن دوم اشعر ابنزفك
يا أحلى مذبوح
________________________
ماشفت طفك لچن رحت وقريتة
مقتلك واجروح بيه اشگد لگيتة
احفظتة ضهراً عن قلب لا مانسيتة
اشما ردت أقراه بالأكبر بديتة
للرضيع إمن اوصل ولمن خذيتة
تطلب الماي وسهم جالك رأيتة

أباوع . لبني إذا مني طلب ماي
أصبلة . بيدي واصب دمعتها عيناي
جروحك كثرة شيوصفك . لچن دوم اشعر ابنزفك
يا أحلى مذبوح
______________________
آه يا طيحة القاسم تعبتك
طاح گلبك من شفت رملة إجتك
أرد احني اوليدي صاحت عذبتك
حتى لو ميت تحني صبعة ردتك
زينب إمن الخيمة تركض شاهدتك
شايل القاسم إجيت انته او إجتك

يجاسم . راح العرس راح الفرح راح
تشمة . ويبني صحت نام ابقى مرتاح
رحت ياجاسم الحتفك . لچن دوم اشعر ابنزفك
يا أحلى مذبوح
________________________
عذبك عباس من طاح اعله ضهره
آه يحساس الأخوه واگع ينضره
طحت فوگه وقبلت يحسين صدره
امسحت دمه اللي جمد إنته اعله ثغرة
عاينت چفين وازنود اعله نهره
عالنهر ذبيت حسره شلون حسره

أخيك . راح وصفيت ابلا أخو اوحيد
حسافة . يبن النبي ماعندك اعضيد
فگد عباسك ايكلفك . لچن دوم اشعر ابنزفك
يا أحلى مذبوح
________________________
كل ال امصايب أبد مو مثلك انته
إنته حر السيف جوه اشموس ضگته
سهمك الفك الگلب جرحه حملتة
الماي يمك سيدي بس ماشربتة
الخنجر الفت صدرك ابإيدك شلعتة
الهسة تلسع بيك والله اعرف جمرتة

مصابك . ماينوصف يالجرحك اغميج
جروحك . ابعاشر بدت يحسيني عالريج
ولا من أحد ايرأفك . لچن دوم اشعر ابنزفك
يا أحلى مذبوح

حيدر الحلفي

محررررم 1443 هـ
قصيدة يجرحي الماله ضمد
حيدر الحلفي

محررررم 1443 هـ ( عمري لطم )

عمري لطم . وانحب واظم . حزني الحزن مولاي
عايش جرح . طفلة وذبح . بين الخيم والماي
عدنه البچي اشمحلاه .ابعاشورك اي والله
بين الخيم والماي

طعم البچي صح يختلف . بس ابمحرم ينكشف . وانحب مذاقة ونأتلف . كلنه اعله حب إحسين
نتوحد ابحبنه الصدگ . ابلطم الصدر لمن ندگ . يستاهل إحسين العشگ . مره وبعد مرتين

بس العشگ يحلالة . الحبه ابصدگ هنيالة . العايش حزن طف كربلة هيعونة
البالطف تعلقت روحه . المن كربلاء اجروحه
هنيالة كلمن يعمي ليه اعيونة

نستشعره . طفك ترى . ابكل لحظة من عاشور
نرسم خيم . بيهن حرم . شالن صبع مبتور
الخنصر فلا ننساه . ابعاشورك اي والله
بين الخيم والماي
_______________________
لطم الصدر لجلك حله . حبيتك ابگد كربلة . يالصدرك اجروح امتله . عيشني طفك يوم
خليني اخدمك كل وكت . يالدمعتي اعليك اذرفت . من زغري واعليك اللطمت . خليني اخدمك دوم

عيشني يوم العاشر . راويني ذاك الحافر . أرد انحب اعليك او أزيد اجروحي
راويني بالطف خيمة . عيشني جرح ايتيمة . مره ارد اون لجلك واعذب روحي

ابطفك أحس . باچر وامس . ماينسي فد يوم
يحله الحزن . لجلك واون . يالمنذبح مظلوم
جرحك إذا شفناه . ابعاشورك اي والله
بين الخيم والماي
_______________________
يومية جرحك ينولد . بينة او أبد مانبتعد . عنك ولانقبل نسد . باب الحزن مولاي
خالقنة بس لمحرمك . ربنه ونعشگه مأتمك . يذبحنة طاري امخيمك . ويذبحنة طاري الماي

اتعذبنة حيل اطفوفك . لمن شلت يچفوفك . چف الگمر يم النهر هد حيلك
اشگد تبچي ظلت زينب . من شافتك تتعذب . تبچي اعله عباس وبعد تبچيلك

جرحك كبر . يم النهر . من فارگت لعضيد
ونيت اله . ابنص كربله . ادموعك بعد شتفيد
منعوفك انته اوياه . ابعاشورك اي والله
بين الخيم والماي
_______________________
انوزع ثوابك كل وكت . من امي آنه اتعلمت . خادم إلك أفخر صرت . بين الأهل والناس
حظرت الك منبر خشب . الشاعر يبو اليمه كتب . والملا تدري اشما تعب . صوته نشوف احساس

تحله اشكثر لقراية . لو بيها شلنة الراية . وانادي بس يابو الفضل مر بينة
انصبنة العزة وانتاني . يحظرنة واحد ثاني . وية الزچية انريدك اتصد لينة

ها يالبدر . مر يمنه مر . لو حتى ماكو اچفوف
شوف الخدم . شوف العلم . ارفعناه على لچتوف
انحس الگمر شفناه . ابعاشورك اي والله
بين الخيم والماي
________________________
ماينسي ذاكى الضهر . واحترگت الخيمة اشكثر . وزينب بقت بس تنتظر . اتعود الها يم لخيام
ماننسه عالتل اصرخت . جاوبني يحسين وبچت . منك يمولاي ايست . من شاهدت لسهام

شافت چثيرة اسهامك . ولافي الشمر گدامك . شافته گاعد الصدر حز راسك
صاحت يخي حاچيني . ترجف أحس ايديني
بعدك عدل لو خلصت أنفاسك

شفته انگطع . وفوگ انرفع . راسك عله لرماح
مترد الي . ضاعوا هلي . يالغالي كلشي راح
ما ننسه ذيچ الآه . ابعاشورك اي والله
بين الخيم والماي

حيدر الحلفي

محررررم 1443 هـ
قصيدة عمري لطم
حيدر الحلفي

محرررم 1443 هـ قصيدة تهيئة المجلس (ليلة العليلة )

السلامُ عالتون دوم
عالعليلة التبچي كل يوم

السلامُ عالذي خلاها ابوها
عالعليلة الكل اهلها فارگوها
عاللي ما غمضت جفنها وسهروها
اوحيدة ظلت بالغرب كلهم جفوها

عاللي شبعت دمعة واهموم
عالعليلة التبچي كل يوم
_______________________
السلامُ اعله البچت ذيچ الليالي
لا أخو صاحت ولا والد بقالي
بعد ابو اليمة صفه كل بيتي خالي
اتيتمت من زغري ماظل عندي غالي

اتنادي ليش الغالي ميدوم
عالعليلة التبچي كل يوم
________________________
السلامُ عاللي فارگها دواها
إحسين ابوها اتوقعت يمكن نساها
ظلمة دار العز بقت مارد ضواها
لا أبو ولا أخ ولا عمها الإجاها

ياگلبها الباقي مهضوم
عالعليلة التبچي كل يوم
________________________
ميتة صارت روحها وعيشتها صعبة
تذكر الوالد مع الماي التشربة
كل صباح وكل مسه تگعد تندبة
بويه وينك غربة بعدك عمري غربة

اتشم عطرهم بس بالهدوم
عالعليلة التبچي كل يوم

حيدر الحلفي

محرررم 1443 هـ
السلامُ عالتون دوم
حيدر الحلفي

محرررررم 1443 هـ فاطمة العليلة

لا تردولي .. وغالي منكم راح كلكم عندي غاليين
لا تردولي .. ابلا رقية وما يجي وياكم إحسين
إذا ما رد الي وشفتة . طفل غافي ابحظن إختة
لا تردولي . لا تردولي

لاتردولي يناسي وغالي منكم راح
مالي حيل افگدلي غالي واگضي عمري انياح
ما أريد انحب عليكم گلبي ما مرتاح
لا تلچموني يأهلي وتكسرولي اجناح

غالي .. ماردت من عمري أخسر
غالي .. بعد ابوي ابگلبي لاكبر
غالي .. ابروحي جرح افراگه كبر
غالي

خايفة اهواية .. مانرد نگعد سوية وكت الغروب
خايفة اهواية .. هالضعن مابعد اشوفة ابهاي الدروب
الضعن لو هسه ودعتة . طفل غافي ابحظن إختة
لا تردولي . لا تردولي
______________________
لو مشيتوا عني كلكم كون الي اتردون
كلكم اعزاز اعله گلبي فدوه لتموتون
أنحب اعليكم ليالي أدري ما ترضون
ما أريد افگدلي غالي منكم ازغيرون

بالي .. عالطفل وارقية صاير
بالي .. ينشده لو رحتوا باچر
بالي .. بالرضيع هواية حاير
بالي

ما أريد اسمع .. بالمدينة الناعي ينعة عنكم اهواي
ما أريد اسمع .. ماتوا اخوانچ عطاشة ويمهم الماي
أون عالماي اذا ضگتة . طفل غافي ابحظن إختة
لا تردولي . لا تردولي
______________________
خايفة مابعد ابويه ايدگ علية الباب
ومنه مايرجعلي يمكن بس دمه واثياب
لا ترديلي يعمه ابلا أعز لاحباب
خايفه اتگليلي جسمة ظل عله لتراب

دونة .. والدي لتردي عمه
دونة .. لاترجعي وابقي يمه
دونة .. ابموتي احس لو ما أشمه
دونة

لاتگليلي .. عفت ابوچ اعله الوطية ابلايه أنفاس
لاتگليلي .. بس قميص انطوني ليه اهناكى والراس
صدگ لو راسك احضنتة . طفل غافي ابحظن إختة
لا تردولي . لا تردولي
________________________
لاتردولي ورقية ما ترد اردود
إحسيني لو مارد الية إختي لا متعود
خايفة اتموت اويه ابويه والجروح اتزود
ما أريد أللبس عليها اثيابي هاي السود

چانت .. احنينة حيل اختي الزغيرة
چانت .. يمي تگعد عالحصيرة
چانت .. تغفة بحضاني الضهيرة
چانت

گلبي لاچمني .. لو يموت إحسين باچر إختچ اتموت
گلبي لاچمني .. ايگلي تشبگ راس ابوها چنها بسكوت
إذا والدها شبگتة . طفل غافي ابحظن إختة
لا تردولي . لا تردولي
________________________
إلمن اتردولي يهلي وما يرد عباس
ابلايه عمي ايرد ضعنكم صعبة ياهالناس
اتعودت آنه اعله چفة كل وكت ينباس
ياحلاتة من يسولف عمي كله احساس

خوفي .. ما بعد أنظر چفوفة
خوفي .. عمي بس هالمره اشوفة
خوفي .. زينب اتردلي او تعوفة
خوفي

ابلايه ابو فاضل .. لاتردولي وگمرنة ماهو موجود
ابلايه ابو فاضل .. ما يظل ماي ابخيمكم لايظل جود
يعود اتمنة رايدتة . طفل غافي ابحظن إختة
لا تردولي . لا تردولي
_______________________
لو إلية مارجعتوا يهلي يعني ادريت
افگدتوا چم غالي اعله گلبي ابكربلة حسيت
راح اظل ارسم صوركم إعله باب البيت
اعليهن اكتب فارگوني وبس انه ضليت

راحوا .. أهلي أكتبها اعله داري
راحوا .. الچانوا اضواي ابنهاري
راحوا .. وماتوا ابحر الضهاري
راحوا

أنتظر طيفي .. بلكي اشوفنكم سوية يهلي وارتاح
أنتظر طيفي .. بلكي عبدالله أسمعة اشتاگ الية وصاح
اشبدية ابسرعة فارگته . طفل غافي ابحظن إخته
لا تردولي . لا تردولي

حيدر الحلفي

محررررم 1444 هـ
لاتردولي
حيدر الحلفي

محررررم 1443 هـ العليلة ع

كلما أحلم ترجعلي . مهرك ما موجود
كلما أحلم ماتعطش . أنظر خالي الجود
وعذبني طيف ارقية . بيه اجروح او ترچية
وما ظن ليه اتعود . ما ظن ليه اتعود

غمضت العيون اليوم واطيوفكم مرت حزن
مرات اشوفك يحسين تذكرني واگليبك يحن
مرات اشوفنك جاي بس مهرك ابعيد او يون
بس مره شفتك فرحان گاعد تهز مهد الإبن

كلما گول اتعاودلي . أحلم بيك اتگول
الزينب باچر بالحومة . ايسحگن جسمي اخيول
هذا الحلم يومية . بيه اجروح او ترچية
وما ظن ليه اتعود . ما ظن ليه اتعود
______________________
اصعدت المهر بالآحلام شفتك انه وحيل افرحت
يمكن گلت راح ايعود محبوبي وادموعي امسحت
لن لحظة شفتك مطروح واهنا يالحسين ايست
شفت المهر يمك طاح يابو رقية من طحت

واسمع زينب تندهلك . رد ياخويه إحسين
إرجع حرگوا خيمتنة . طايح تصرخ وين
لخيامي رد اشوية . بيه اجروح او ترچية
وما ظن ليه اتعود . ما ظن ليه اتعود
________________________
شفتك أبد مو عطشان بس جودك ابلا ماي اصد
واتحيرت بويه اهواي بيمن رويت انته الچبد
طفكم أشوفن بي شوك ومرات اشوفن بي ورد
بحلامي نسماتك صيف وساعات نسماتك برد

ابيا طيف اصدگ بويه . اتحير گلبي اهواي
ما أدري عايش ميت . ما أدري لو جاي
گلت المابي كل جيه . بيه اجروح او ترچية
وما ظن ليه اتعود . وما ظن ليه اتعود
______________________
عذبتني بويه الأحلام واقع يصيرن خايفة
مره احلمت بالعباس بالخيمة لن لحظة اختفة
عالشاطي اشوفنة اطريح والجود كدامة انچفه
ويم النهر عمتي اتروح گدام عمي امچتفة

محتارة اصدگ وانحب . خانگني الإحساس
معقولة تنطگ زينب . وما ينهض عباس
والسوط اشعر بيدية . بيه اجروح او ترچية
وما ظن ليه اتعود . ما ظن ليه اتعود
______________________
عذبتني لرقية اطيوف بالحومة بويه اتدورك
شافت صبع فوگ الگاع حسيته يمكن خنصرك
بالصحره تركض واتصيح وينك يبويه اتنطرك
ترچيتي جروا يحسين إرجعلي بويه اشأخرك

كل ساع احلم برقية . اتنام وتصحه اتنوح
اتگل الزينب شاهدتة . بالطيف ابلا روح
شفت الوالد مر بية . بيه اجروح او ترچية
وما ظن ليه اتعود . وما ظن ليه اتعود
_____________________
مرت ليالي يحسين لا طيف منكم لا خبر
وعافني لاحلام السود يابويه واگليبي انتظر
لن وبعد بويه ايام زينب شفتها ابلا گمر
عالناگة وارماح اطوال وياها بدروب السفر

رجعن ناديت ابگلبي . زينب والعمات
لن بالطيف آنه انظرهن . راحن مسبيات
شفت الراحت مسبية . بيه اجروح او ترچية
وما ظن ليه اتعود . ما ظن ليه اتعود

حيدر الحلفي

محرررررم 1443 هـ
كلما أحلم ترجعلي
حيدر الحلفي

محرررم 1443 هـ قصيدة تهيئة المجلس ( ام البنين ع )

السلامُ الأم البنين
عاللي باست نحر الحسين

السلامُ اعله النطت أربع ولدها
لاجل الحسين وبقت تبچي ابلدها
منهو ليحبه أبو السجاد گدها
وفتة وامقصرة تشعر بعدها

السلامُ اعله البقت وين
عاللي باست نحر الحسين
______________________
مامشت وياه وافراگه لچمها
ريحتة كل يوم تشتمها ابهدمها
سبحتة خلاها عدها ومن تشمها
اتصيح آ يغيابك الروحي هدمها

افراگه عيش بيها جرحين
عاللي باست نحر الحسين
___________________
وصت العباس لا تترك عضيدك
وكون گبله يولدي اتقدم وريدك
خلي زينب دوم ياضي عيني بيدك
الماي من اتطلبة كون ايصير عيدك

وفه ابنها وضحى چفين
عاللي باست نحر الحسين
___________________
جعفر وياعون صاحت يالحبايب
لاتقصرون اعله اخوكم يالأطايب
يمى عبدالله أريدك بالنوايب
ماتقصر يبني طيح اعله الترايب

أربعتهم وفوا الدين
عاللي باست نحر الحسين

حيدر الحلفي

محرررم 1443 هـ
السلامُ الأم البنين
حيدر الحلفي