"إترُكَ اللّيلَ حيثُ هُو ، وأبَدأ بفَجَرٍ جديدَ حيثُ أنتَ!"💛

#زَكية_عاطِف
.

#أنتِ_أجمَل_مما_تعتَقدِين🧡

مُعظم البنات البعرفهُم واللاقِيتهم في حياتي عموماً بكونوا ما مُنتبهين لجمالهم الخَاص أبداً ، بيقولوا إنو 4% فقَط من النساء في العالَم بشوفوا نفسهُم جمِيلات!
ودي حاجَة بتخلّي الواحد يستغرَب ويتساءل
هل الموضُوع عدم ثِقَة ولا عدم قناعَة!
الحاصِل شنُو!
طيب أقول ليكم أمثِلَة بسيطة عن مواقف حصلَت معاي شخصياً ، من هسي البتعرِف روحها ما تجي تشاكِلنِي..😄

- لاحظتَ ليها كلُ ما تضحك بتغطي خشمها بيدها تلقائياً كدا وكأنها بتدارِي ضحكتهَا ، مع إن ضحكتهَا والله العظيم جميلَة بالجد ، أسنانها ما مرتصفَة كويس بس تحديداً دي الحاجة المخليَة ضحكتها مميَّزة ، ضحكة دافيَة وتحِسها فيها براءة كدا ، فمرَّة بتونَّس معاها وبدون مناسبة قلت ليها يا فلانة إنت ضحكتك دافيَة ، والله انخلعت وخجلَت خجَل :
-شنو؟ ضحكتي أنا؟؟؟
وتعليقها كان :
- طول عمري شايفة ضحكتي ما حلوة لدرجة إني عايزة أعمل تقوِيم والله ، بالنسبة لي كانت محتاجة تقويم لنظرتها تجاه نفسها بس ما أكتر

- كنا قاعدين نتصوَّر ، وكل ما نآخُد صورة بتقول لي (أمسحيها ما حلوة ، لالا هنا وشِّي ما ظابط ، واي دي عيوني فيها صُغار ، لالا دي مبينة وشي مليان آثار...إلخ ) ، مع إن كل صورة أخدناها بالنسبة لي كانت أحلى من القبلهَا وما فيها ولا غلطَة بس بالنسبة ليها كان العكس وكانت بتركِّز علي تفاصيل لو ما قالتها لي أنا حرفياً ما كنتَ حأنتبِه ليها بتاتاً!

- واحدة تانية من معارفِي ، بالنسبة لي هي بنت جميلة بكل ما تعنيه الكلِمة من معنى ، ملامحهَا سباسيفيك وواضحَة ومن بعيد بتبيِّن ، بجد ما شاء الله ، بس هي ما شايفة نفسها جميلة خالِص ، وهي من نوع البنات البيتكرشوا طوالي في الناس السمحين (الناس ديل بنات بجد ما أولاد) ، يعني لو لاقونا بنات سورِيات في الشارع ساي أول كلمة بتقولها : عاد نحنا لينا الله بس😂
ما بتحِب لونها ولا وزنهَا ، مع إن لونها قمحي رويان كدا ودافئ ، ووزنها جداً عادي وصحِي ، بس هي شايفة إنو ما كِفايَة وإنو مفروض لونها يكون أفتَح ووزِنها يكون أسمن من كدا!!!!

🍁إمكن لمن قلت المواقِف دي إتوارد لأذهانكم مواقِف مُشابهَة ، حصلت ليكم وحصلت معاكُم ، اللحظة البتكوني طول الوقِت بتدارِي في حبايَة في وشِّك ماف زول شايفها أصلاً ، الوقت البتعديه وإنتِ بتعملِي cheak لشكلِك في المرايَة وتشيلي وتعلِّمِي على العيوب والثغرات والأخطاء الإنتِ شايفة مفرُوض إنها تتصلَّح!
بنقسى علي نفسنَا شدِيد وبنخُت أحكام ما بتخطُر علي بال الناس عَننا ، لأنهم ببساطَة برضو مشغولين بشكلهُم وبأحكامهم الخاصة عن نظرة الناس ليهُم ، وكل زول مشغول بإنه يكون بيرفِكت وما فاضِي عشان يركِّز مع التانِي في نفس الوقت المفتكر فيه التانِي أنّك مركِّز معاه وهلُم جرَّا!!!
في الحقيقة ماف زول بكون مركّز معاك غير الزول المركّز معاك(إذا وُجِد)😂 ، قصدي يعني معظم الناس ما حيكونوا متذكّرِين إنتِ أمبارح كنتِ لابسة شنو ، وهل طرحتِك دي جيتي بيها قبل يومين ولاّ لا ، وهل الجزمَة الغيَّرتي حزاماتهَا ياها نفس الجزمة ولا دي واحدة تانية...وإلخ!!
فلو جينا للمنطِق فنحن ذاتنا ما بنتذكّر تفاصيل أيِّ زول إلا الناس البكونو في وشنا لفترَات طويلة نِسبياً ، وبالتالِي مش كأنو مُدييِن الموضوع حجِم أكبر من حجمه!

🍁 تقريباً في حياة كل واحدة مِننا نقاط قُوة كتيرة ونقاط ضعف ، بس المشكلة إننا دايماً بنركز علي نقاط الضعف وبنتناسَى نقاط القوة
يعني لو فيكِ صفات حلوة كتير مقابل صِفتين تلاتة إنت شايفاهم غلط ، وين المشكلة؟
هو ربنَا يعنِي كان غالبه يجيبِك 10/10 ، بس أصلاً عمرنا ما بننتبِه للصِفات الظابطَة الفِينا وطول الوقِت مقلقِين من الحاجات الحاسين إننا لو إتحصَّلنَا عليها حنكون جميلين في عيون غيرنَا بس بننسَى إنو نظرتنا لنفسنا ما تشبه أبداً نظرة الناس لينا ، والحاجات الحلوة فِينا ناس كتير ما حيشوفوها حلوة أو بالأحرى عادِيَة ، والحاجات النحن شايفِنها عادية ناس تانية بتعاين ليها بنظرة إنبهَار ، وتفاصيل لا نهائية فينا إعتيادية وما ملحوظة فينَا غيرنا بتُوه فيها توهَان ، وناس كتير بتتمنَّاها
أصل الجمال دا حاجة كل بني آدم ماخِد منها نصيب ، والعِندك ما عند غيرك ، والعِند غيرك ما عِندك ، ومُستحيل تلاقِي حد كامِل ، وفكرَة النقص دي هيَ البتخلينَا نحنَ نحنَ ، وعيوبنَا هيَ البتورِّينا حقيقة مشاعِر الناس تِجاهنا ، منو القريب مننا عشانَا ومنو القرِيب عشان حلاوتنَا وبَس!
لأنُّو طبيعي قلوب الناس ميالَة لحُب الجزء المثالي فينا ، بس قلب المُحِب الصادِق بِحِبنَا كُلنَا ودا الفرِق

🍁 في إعلان لشركَة Dove|دوڤ عام 2013 الهدف من الإعلان كان نشر الثِقة الذاتية بين النساء ، وحقيقي من ألطِف الإعلانات المرّت عليّ في حياتِي ومتأكدة لمَس قلب بنَات كتير

فكرة الإعلان كانت كالآتي :
رسّام جنائي كان شغال في الـFBI -بيرسم المُشتبَه بيهم في أقسام الشرطة من خلال الأوصاف- بيلتقي بعدّة نِساء كلٌ على حِدى -بدون ما يشوفهِن- بيطلب من كل واحدة تتكلَّم عن نفسها وتصِف ملامحها وتفاصيل وشها وعلى كِدا بيرسُمها
في اليوم التاني كل واحدة إترسَمت بتلاقي زول وبتقعُد معاه لفترة بعدها بيدخل الشخص اللي لاقاها دا وبرضو بدون ما يشوف الرسّام بيتكلم عن ملامحها وتفاصيل وشها وعلى كده الرسام بيرسمها للمرة التانية على حسب أوصاف الشخص ده ليها
الرسمتين في النهاية كانوا مختلفات إختلاف توتلي
الرسمة اللي وصفت فيها كل واحدة نفسها كانت باهتة ومهتزّة ومليانة عُقد وعيُوب
والرسمة الوصفوهُم فيها الناس اللاقوهم وإتكلموا عنهم مليانة جمال ، لطافة ، حيوِية...إلخ
الرسام بيوضح لكل أنثى إنو دي اللوحة الساعدتيني إنتِ في رسمها
والتانية زي ما وصفك أحد الأشخاص
وبيسأل كل واحدة بعد يوريها الصورتِين
- والآن أتظنين أنكِ أجمل مما تعتقدين!
والإجابة بالتأكيد كانت (Yes)
وعجبنِي شديد تعليق واحدة منهُم كان قالت :
"We spend a lot of time as women analyzing and trying to fix the things that we aren't quite right and we should just like it"
بمعنَى إنو :
"نقضِي الكثير من الوَقت كنِساء في تحلِيل ومُحاولة لإصلاح الأشياء التي نحن لسنا على حق تماماً بشأنهَا ، في حين أنه يجب فقَط أن نحبهَا/نتقبَّلها"

🍁 فااابس ومن هنا عايزَة أقول ليك :
في المرة الجاية الحتوقفِي فيها قدام المراية حاولِي تشوفي التفاصِيل الحلوة فيك.. الطريق البتضحكي بيها ، ختَة حواجبِك ، لون عيُونِك ، لونِك ، شعرِك بكل حالاته المختلفَة ، وضعية أنفِك ، تركيبَة وشِّك وأبعادُو
لأنو دي إنتِ ، ومفرُوض إنِّك تحبِي إنتِ زي ما إنتِ ، لأنو تقبُّلك لنفسِك أو عدمه رسالة بتوصَل من خلالِك للناس بدون ما تحسِّي
ومن ثَمَ ، إتذكرِي كل التعليقات الإيجابية الإتقالت ليك من قَبل ورسّخيها في ذاتِك لأنو ببساطَة إنتِ أجمَل مما تعتقِدين!
رابِط الإعلان اللَّطيف على يوتيُوب :
https://m.youtube.com/watch?v=litXW91UauE
#مريم_الشيخ🧡

"أكبر خطأ إرتكبته في حياتي، هو إعتقادي أن الأشخاص سيمنحون لي نفس الحب الذي منحتهم إياه .."

#هيث_ليدچر
.

‏" لما تفكر تدخل في علاقة مع زول سواء حُب أو صداقة، أختار شخص ناضج فِكرياً، فاهم إنو المشاكل والجدال حاجه طبيعيه ما معناهو نهاية البينكم، بالعكس مفروض يفضل معاك، وما يطلعك غلطان، ما يطلع سِرَك، ويفهم إنها فترة قلق وكل حاجه حترجع طبيعيه .. أبعدوا عن قليلين النُضج عشان صحتكم النفسية .🌻♥️

- أنا أكتر شخص بلاحظ الحاجات الصغيره والمدسوسه وسط الكلام والتصرفات، بلاحظها لدرجة ممكن تخلي مكانك يتغير عندي 180 درجة من غير ما أخليك تحس .🤷🏻‍♀️♥️

- ماتملأ قلبك إلا بِـ الناس القلوبها مليانة بيك .🌻♥️

-

‏فلولا الحُبُّ ما سكر الفؤادُ

ولا قالوا لقد بانت سعادُ

• • •

إذا وقع الغرامُ على عنيدٍ

فلا بقيَ العنيدُ ولا العناد !❤️🔥

جل الأماني أن نطمئن...🌻♥️

‏"وأنّ الراحة كلّها في التسليم، أن تُسلم أمرك لله وقد قرّ اليقين في قلبك أنّه وإن لم يأتِ ما تُحب فإنّه سيُيسّر لك ما فيه خير لك، فتشعُر حينها أنك تأوي إلى ركنٍ شديد♥️"

"لكنهُمَ وبكلَ
بساطَةَ
بدونَ صوتٍ
خَرجُوا
من بابَ قلبي
هؤلاءَ اللّذينَ
كانوا ذاتَ يومَ
كُل ساكِنيهِ
تركُوا بابِي
مفتوحًا تلطُمهُ
التسَاؤلاتَ
بلا رحمَة
فيصدِرُ صريرًا يُشبهُ
الخيبَة!"

#زَكية_عاطِف
.

‏أن تتوالى على أُمي المسرات..اللهم.

"‏أنا أيضاً لا تُعجبني سيئاتي ولكني كنتُ
فيها على حقيقتي ، *ولم أتلحف* يوماً خيراً
لم أكن من أهله ليظنوا أنني أهلاً له. "✨

هذا المسَاء..
الواحِد فينا أحياناً بيحِس بإنو مُرهَق من كميَة النَّاس الموجُودَة ظاهرِياً وبس في حياتَه بدُون وجُود فعلِي ومحسُوس ، من العلاقات الفضفاضَة أكتَر من اللَّازِم ، ومِن الجُمَل الهُلامِية العايمَة على سطح الأحداث ، والبكرِّرها في أي محادثَة نوعِيَة (تمام والله ، كيف الصحة والأخبار؟ ، بالأكتَر ،...إلخ)
بكون مُحتاج شوية خصُوصِية ، حبَّة إهتمَام هو المَعنِي بيهو وبَس ، كلمات لمن يقراهَا يكون متأكد إنها مكتُوبة عشانه وليه ، سُؤال حقيقي عنه وعن حاله سَاي كدا ما عشان أيَّ سبب ولا عشان أيِّ خدمة مرجُوة! ، رسالَة يوم الجمعَة وآخر اليُوم بدون علامَة الرسائل الجماعيَة المُقيتَة
شوية مِساحَة للشكوَى والإستسلام ، شوية دقايِق يخلع فيها كل أسلِحة دفاعو وقناعاتو وجريِهو وراء الحياة ، لحظَات دافيَة مع ناس تفهمَه يحِس فيها إنو حَيّ وموجُود ، ما عايِش والسلام!
#مريم_الشيخ🌸




●

ستتصالح في النهاية مع كل شيء،، مادام لم يمس قلبك، ما دمت سليم القلب فلا أذى و لاخوف من الأيام و الدنيا ♥..

#Jasmeen_Ali
♥

شكرا بالجد لأي إنسان متحمل سخافة اعذارنا وردودنا الباردة وغيابنا الما بينتهي .. شكرا لأي زول خاتي لينا الف عذر في حين انه متأكد انه ولا عذر واحد ما عندنا .. شكرا للناس المتمسكة بينا على الرغم من حدتنا ومزاجنا السيئ جدا جدا...

‏الأسوأ من أن تصاب بأمر جلل، هو أن تمتنع من الحديث عنه، أو الإشارة إليه، أو التلميح حتى.. ما أثقل حزنًا لا تستطيع بكاءه..💔✨✨✨

قد يبيع الواحد منا العالم كله مقابل شخص شعَر معه أنهُ كافياً.. ✨

‏أعظم ماقيل في الاشتياق: أذن بلال في المدينه يوماً بعد وفاة النبي بأعوام وعندما وصل إلى أشهد أنّ محمدًا رسول الله بكى وضجت المدينه بالبكاء❤اللهم صلي وسلم على نبينا محمد وعلى آله وصحبه أجمعين

" أنا أيضًا أحتاجُ ما يُبهجني ، ما يُعيدُ السلام لروحي ، أحتاجُ أن يُباغت أحدهم شعوري فجأةً ، أن ألقى رسالةً لطيفة ، أن يمر أحدهم فيقولُ وددتُ الإطمئنان أنك بخير ، أن يلقاني أحدهم بحبٍ فيقولُ اشتقتُ لك ، أن يضم أحدهم اسمي بين طيات مُناجاته مع الله ، أن يقول اللهم قلبك...."!♥️🌸.