#يوميات_مُكافِحه
:الووو...
:سلام عليكم
:ابوي كيفك .. طمني عن اختي كيفها
:بخير الحمد لله طلعت من المستشفى اسي
:دااك كان شنو
:دي مضاعفات الكيماوي اسي بخير هاك اتكلم معاها
:الوو اختي 😍😍
:اخوي انا تعبتا زهجتا عايزه ارجع بينكم
:اااااا حترجعي ان شااء الله يااخ كلها كم يوم وترجعي
:ان شااء الله انتا جاي متين ؟
انا اتذكرت الزفت الاسمها جامعه 💔 واقرب اجازه بعد فتره بعيده حبه
:قريب ان شااء الله بس ارجع السودان واشوف الجامعه الحاصل فيها
:عليك الله 😍😍
:اي ان شااء الله (وقلبي واجعني اني بغشها)
***عدت الايام ورجعت السودان واخدتا اسبوع جاني اتصال من مصر
:اخوووي 😍 الجامعه كييف دقيقه قبل كل شي جاي متين
:هههه مالك هاجمتيني كدا .. جاي قريب ان شااء الله لسى ما نزلو التقويم (اقرب اجازه بعد ٣ شهور)
:تمام راجيااك ما تسحب علي 😍
:جاي جاي جهزي لي سرير ههههههه🖤
:حياك لو ما شالتك مصر بيشيلك خالو مافيني حيل اشيلك انا هههه
****كلام كتير والمكالمه انتهت ع كدا
*مر كم شهر وانا بصبر فيها لحد ما جاني اتصال من السعوديه
:الوووو....

#يوميات_مُكافِحه
:الوووو....
:يا هلا
:هلا خالي كيفك
:تمام الحمد لله اخبارك انتا
:بخير الحمد لله
:اها اجازتك قالو قربت مش
:اي قربت ان شااء الله
:زي كم كدا ؟
:بعد اسبوعين ليه
:خلاص جهز نفسك عشان حتمشي مصر لاختك
:جددد 😍😍 قدااام ي اخال
:ونحنا ما حنوريها ماشي متين عشان تكون مفاجأه كدا
:تماام التمام
****الموعد جا اخذت العنوان من خالي و جهزت هديتي و مشيت ع المطار مبسووط للنهايه
وصلت البيت فتحو الباب اختي كانت قااعده في الصاله متنشنه و الجو برد ملفوفه بي بطانيتها وراقده قدام التلفزيون وقفت وبقيت بعاين ليها التفتت علي وما قدرت تستوعب رجعت تعاين للتلفزيون فجأه التفت تاني وقامت جااريه علي وهي بتبكي 😭
:اخووووووي اشتقتا لييك شديييد
:ياااخ ما قدري والله
:نورت مصر كلها والله (وهي بتبكي)
:خليكي من النور والضلام والكهربا انتي بتبكي ليه
:ما عارفه بس اشتقت لييك شدييد
:طيب هندا انا جييت في داعي لعيونك الحلوه تدمع (مسحت دموعها)
*وقعدنا ونسيت انو عمتي كانت معاها وخالي ما سلمت عليهم 😂
***قعدتا جنبها وبقت تحكي وتحكي حسيت انو اي طاقه سلبيه جواها ماتت .. تحكي وتضحك بعد شويه كانت عايزه تقلع الطاقيه اللابساها واتحسست 💔 حست بالعقده كدا .......
يتبع

#يوميات_مُكافِحه
حست بالعقده كدا قمت حاولت استظرف معاها
:ما عايزه تكشفي لينا عن البطيخه الجميله 😍😂
:هههه خلاص انا حقلع الطاقيه
:اي ياااخ انا زاتي سخنتا خلي انتي
:ههههه رايك شنو
:رهييييبه 😂
**بقينا نتونس لحد ما جا موعد النوم خشيت غرفتي جبت هديتها وجيت قبل تخش غرفتها .. مسكتها من كتفها التفتت والدمووع ملت الحته 😂 ..بعد ايام
:هوي بكره انا ماشه العياده بدري امشي نوم
:ي زوله عيادتك دي لو الساعه ٢ بمشي
:عامل فيها نشيط حتمشي تزززهج هناك
:ازهج انا لاكن ما تزهجي انتي
:ههههه مجنون
*صحينا الصبااح وجهزنا ومشينا العياده اتضاربت على حااجاات .. جماال مصر و العياده الكلها اطفال 💔💔 كانسر اهلكهم بطني وجعتني ..
المهم ركبت الدربات وبقينا نتونس كنت شايل معاي لابتوب وحضرنا افلام .. وشايلين معانا فيشار ابيض وزعنا على شفع العياده كلها عملناهو فرحه عييد 😍
بعد ٣ جرعات ..بعد الجرعه ب ٧ ايام قامت المضاعفات
(مضااعفات الكيماوي كعبه ممكن تقتلك ) ورحلتي بعد اسبوع وهي رحلتها قبلي بيومين والمضاعفات عشان تروح اقل شي في ١٠ ايام .. ومحتاجه مبلغ كبير للاتأمين .. ونحنا صرفنا كل الموجود للتذاكر باقي دولارات ومحلات الصرافه ما بتفتح يوم جمعه .. المهم نزلت تحت عايز اشم هوا لقيت .......
يتبع

#يوميات_مُكافِحه
لقيت لي تحت عائله صغير كدا قدام الباب قاعدين حالتهم شويه صعبه كدا ام واب وطفلين صغاار في عمر سنه وسنتين تقريبا المهم وانا ماري من جنبهم سمعت البت بتقول عايز شبس وابوها شغال يغير الموضوع حسيت انو متأزم حبه .. شغال حارس في العماره القاعدين فيها .. قمت مشيت الدكان خميت ليهم شيبس وحلويات و انا راجع لقيت بتاع كنافه شلت للام والاب و عصاير ووديتا ليهم لما اديتا ليهم ياااخ شفففت فررحه في عيون الشفع جمييله شديييد 😍😍😍 وبقو يدعو دعوات حللوه كدا الشافع الصغير شال ليهو شيبس من الكيس مداهو لي 😂🖤 فتحتو ليهو بقى ياكل وحده ويديني وحده 😂🖤 خليتهم وطلعت فوق قبل افتح البب بتاع الشقه سمعت صوت كلام المهم بقيت ما قادر افتح .. وقفت شويه الصوت راح .. فتحت الباب لقيت ....

يتبع...
ومعليش ع الانقطااع وان شااء الله بنزل كل يوم لحد ما تنتهي 🖤كونو بخير

#يوميات_مُكافِحه
لقيت اختي حايمه في البيت المضاعفات راحت 😳😍
:دا شنو دا انتي حايمه مالك
:لييه مالك
:لا انتي مش المضاعفات دي بتقعد ١٠ ايام
:اي لكن ما عارفه كل حاجه راحت الحمد لله 😍
:دقييقه انتي جاااده 😍
:اي والله الحمد لله
:الحمممد لله حقوو نعمل حفله 😂
:هوي بطل استهبالك دا 😂
*المهم مرت الكم يوم ديل وجا وقت سفرها
:ي بت مهمومه كدا مالك انبسطي مش راجعه تشوفي اخوانك
:.....
:هووي بتكلم معاك انا
:انا حمشي اقعد مع اخواني ٧ ايام بالكتير وحجي اقعد هنا براي وانتا حتمشي
:ياااخ ما تقولي كدا ان شااء الله حتنبسطي وانا لو لقيت طريقه بجييك والله وبعدين ع الاقل حتمشي تشوفي اخوانك وما حيبسطووك ان شااء الله
(اخوانها هناك)
كانو بيدوهم هدايا في المدرسه مع تفوقهم وكدا بيدسوها لاختهم
:اختنا جايه الليله ارح نزببببط غرفتها
:خلاص نحنا بننظف وبنرتب وانتا امشي غلف الهدايا وتعال ساعدنا
....يتبع

#يوميات_مُكافِحه
:طيب تمام
(نرجع لمصر )
:اها يا اختي انبسطي ياااه 😍
:انا مبسوووطه بسس
:هوي بدون بسس
:طيب
:اول مره اشوف لي زول مبسوط والدموع ماليه عينو
:اامم ...
:ياااخ لييه البكى ياااخ (قربتها علي💜)عايني انتي امشي وانبسطي واحتمال اجيكي تاني لكن لو نكدتي على نفسك حزعل منك انا
:طيب ي اخوي 💜
(الفجر )
التكسي جا لكن هي حلفت ما تمشي
:ي بت امك وابوكي منتظرينك امشي
:ياااخ ما عايزه و الدموع جاريه
:بدينا نحنسها براحه حبه حبه بدت تقتنع وركبت التكسي
(نرجع لاخوانها)
الجووطه في البيت والقيامه قايمه صحباتها اتلمو في البيت .. واخوانها وامها وابوها مشو ليها المطار
:ماما هنديك اختنا 😍😍 (وجرو علييها بلهفه )
حضنو بعض وبقو يبكو ..
اخوانها الصغار متعودين ينومو في العربيه وقت سفر .. الا المره دي بقو بس بيعاينو ليها لحد ما وصلو ..
دخلو البيت
الام والاب : نورتي خشي بيمينك 😍🖤
*كان اشبه بي عيد ..
الاخوان بقو حايمين وراها عايزين يشوفو رده فعلها لما تشوف غرفتها ..وهي بتلف البيت زي الزول العايز يشتري وتتلفت وتعاين لاخوانها .. وصلت باب الغرفه .......يتبع

#يوميات_مُكافِحه
لقت الغرررفه كللها زييينه واصحابها والهدايا و حاااجات معموله بي ايادي اخوانها الصغار .. حاجات ممزوجه بحب وشوق 😍 .. فجأه جرت على السرير الي متعوده تقعد فيهو وتقضي يومها الطبيعي العادي فيهو و وقعت فيهو وبدت تبكي ..
مافي زول قادر يعمل شي بقو بس بيعاينو ليها التفتت عليهم وبدت تحضن وتبكي .. ودا وهي لسه ما نطقت بكلمه في نص ساعه خشت فيها البيت .. جابو ليها للهدايا و بقو قاعدين جنبها اليووم كلو 😍😍 قضت اسبوعها بين اخوانها واصحابها وكانت مبسووطه فيهو اخر بسطه لحد يوم كدا ضربت لي وهي منهاره وكتئبه ...يتبع...

#يوميات_مُكافِحه
: الووو
:ياا هلا 😍اختي كيفك وصوتك مالو كدا
:انا راجعه يا اخوي وتاني حختفي منهم برضو زي ما اختفيت منهم فتره
:لا لا ان شااء الله المره دي ما بتاخدي فتره طويله كدا زي الفاتت حترجعي طوالي
:ان شااء الله .. طيب اننا جاي تاني ؟
:ان شااء الله بجييك 😍
:اي بس ما تطول انا راجيااك
:ارمي قدام
:ارمي شنو ؟
:ههه ولا شي يا اختي بجيك ان شااء الله
مرت شهور و بقيت شبه منقطع عن العالم جا اتصال فجأه
:الووو
:اهلين امي كيفك ؟
:بخير الحمد لله مالك ما بتسأل ولا بتضرب لينا لا لاختك
:والله يا غاليه نفسيات بس
:عارفه والله كلنا عايشينها الله يصبرنا .. لكن برضو ما تنقطع اختك حالتها بقت كعبه ونفسباتها واقعه الارض 💔
:ياااا ساااتر 💔💔💔 والله يا امي بقيت اخاف ازعلها في شي بالغلط او تزهح من اتصالي
:ما تقول كدا هي راجيه اتصالك اتصل اتونس معاها
:طيب ان شااء الله
ضربت لاختي
:الووو
:حالتك قلت لي جاي 💔
:معليييش والله ما في دي مع الجامعه
:انا زهجاانه وتعبتا و كهرتا اي شي
^انا في اللحظه دي ما عرفت ارد شنو
:بجيك اول ما ااجز
:طيب نشوف
بعد فتره ...

#يوميات_مُكافِحه
:اختي عايزه شي من السودان
: دقييقه قللت شنو 😍😍
:ما قلت شي ههههه
:انتا جاااي 😍😍
:اي ان شااء الله 😍
:ياااخ مبسوووطه شدييد تصصل بالسلامه 😍
:الله يسلمك
لحد ما اصل البيت والبت دي بتضرب مليون مره
خشيت البيت اول زول لاقاني خشم الباب بي حضن 😍قعدتا اتونستا حبه ..قامت خلتتي استريح حبه مسافه الغدا يطلع لقيت نفسي صحيت مع الفطور ..
:صباح الخير ي كسلان
:كسلان شنو انا يومين ما نمت تقول سايق انا هههههه
* العييد قررب وكان اول عيد نكون انا وهي مع بعض 🖤 البت دي كانت في قمه السعاده لدرجه انو نست انو عيدها حيكون مافي جنبها اخواتها الصغار ولا حتى امها وابوها .. كنت اراها تشرق كل يوم واراها تززهر 😍💜
جا يوم العيد الصباح
:هوي ما تلبس جلابيه
:لييه ههه
:يخ محلوه البس اي حاجه تانيه
:طيب بشوف لي بنطلون وقميص زابطات 😍
:😍😍😍
لبسنا جا اتصال من ناس البيت يعيدو علينا هنا الدنيا جااطت لكن قدرنا نمشي الامور زي ما عاوزين 💜
عدينا عيدنا بدون برنامج لكن كان احلا برنامج 😍🖤
رابع العيد مقابله مهمه عند الدكتور
:يا دكتور ممكن نعمل العمليه ؟
:......؟ يتبع

#يوميات_مُكافِحه
:ي دكتور ممكن نعمل العمليه ؟
:امممم هي ممكن لكن نسبه النجاح ٥٠ و كل ما ليها بتقل
:٥٠ 💔
: ويمكن اقل
:طيب بتكلف كم ؟
:١٠ الف دولار غير حق المستشفى
:ي ساااتر
*
:اخوي الدكتور قال شنو
:قال انك تزاصلي حبه كدا وبعد داك نشوف الحاصل
:الله يسهل طيب
:اللهم اميين
*****
بقينا نكابس من جرااح لجرااح .. مافي حل .. حتى الي كان قال لينا ٥٠ فجأه بقى يرفض ..كسرنا الحنك وبقينا في الجرعات ..
(حوار بين نفسي )
اسي انا جامعتي قربت ياربي اعمل شنو ..وهي محتاجه لي طيب واحلها كييف اسي .. وعندنا رحول من البيت الاسبوع دا والمفترض اسافر نهايه الاسبوع دا بالكتيير .. ياااخ انا تعبتا خلاص . الله يعين
* طلعت افتش بيت ولقيت واحد كويس الحمد لله ورحلنا ..
قدرت اوريها انو انا مضطر ارجع واقتنعت
بعد كم شهر من العلاج انكتب ليها اشعاع خلصتوو وكتبو ليهم حبوب .. وساافرت وقعدت بين اخوانها لمده شهر 🖤🖤
وحتبدى المقابلات الشهريه

اليوم يحتفل كل العشااق ببعضهم البعض وانا احتفل بنجمه وهبها الله لي من السماء واخبرني ان احافظ عليها وان احبها كما انه لا حب بعدها .. خُلق لها هذا اليوم ليختلق حبا بداخلنا ليخترق قلوبنا 🖤
#يوميات_مُكافِحه

قيس محجوب✨💜

اشياء فاتنه😍💜🎶
انك تتمشي الصباح قبل الشمس تشرق،شاي الصباح مع الزلابيه واللمه،المطره الفجاءه،اللقاء للمره الاولي،رجفه اليدين،دقه القلب،المشي بليل،لمه الاصحاب،الكتابه،تشاغل شافع في الشارع،تمسك يد بيبي مولود جديد،تكون سبب في ضحكه وفرح زول،تتذكر حاجه
وتبتسم بدون سبب،تصرخ في الشارع، تساعد زول ولو بي حاجه بسيطه،الفته مع الاصحاب،الهدايا المامتوقعه،الكلام البفرح القلب بدون سبب، والرسايل الطويله ،المسلسلات الكوريه😂،جلسه في البحر،السلام،العزله،الرسائل المكتوبه بي خط اليد،ريحه الطين بعد ترشو بي مويه وطعم الطين😂
،ولمن ترضي ربك وتحس بيهو رضيان عليك شعور مابتوصف💜🎶

"
"أنتَ العَون وَ أنتَ المُسْتَعانْ ، لمْلِم شتاتَ
أروَاحنَا يَالله ..💜"

- وَ قَلبِي يَا الله ؟
- " قُلنَا لَا تَخَفْ " 💜

👱:ابوي عايزه 500 جنيه عايزه اجيب مخدرات و قنابل و اندومي💖🌸

👴:اندومي لأ🌝☄

من أكبر التحديات في الحياة " بدايتك في التغيير " :
‏البداية في مصارحة النفس
البداية في اتخاذ قرار جديد
‏البداية في مشروع جديد
البداية في تغيير الوظيفة
‏البداية في تغيير عادة سلبية
البداية في العفو عن إنسان
‏البداية في تغيير الصديق السيء
‏البداية في تغيير برنامج يومي ممل

‏نحتاج إلى جدية وإرادة، وتكرار ممارسة الشيء الجديد، واستحضار فوائده على المدى البعيد؛ لإتقانه والوصول للنتائج المتوقعه🚶‍♀

لما تنتظروا الصلاة رغم التعب والنّعاس احتسبوا الأجر من الله..لما تقوموا الصباح بشق الأنفس وتمسكوا خط طويل وتبدؤوا دوام طويل ومرهق احتسبوا الأجر من الله..لما يكون يومكم رهيب وفجأة يحصل شيء ينكّد صفوه ارضوا واحتسبوا الأجر من الله..حتى لما تسعدوا شخص وتقولوا كلمة حلوة احتسبوا الأجر

كن قويًا ، كجرّاح ينجز عملية دماغ لـ أستاذ كان يخبره بِأنهُ ( فاشل)♥