دعاء اليوم الرابع من شهر رمضان 🌙

اَللهُم قَوني فيه عَلى اِقامةِ اَمركَ ،
و َاَذِقني فيه حَلاوة ذكرك َ، وَاوزعني
فيه لأداءِ شُكركَ بِكَرمِكَ ، وَاحفظني
فيه بِحفظك وَسَترِك َ، يااَبصَر النّاظِرين َ.

أشْهَدُ أنَّكَ تَرَى مَكَانِي و تَسْمَعُ نِدَائِي
‏فَالسَّلامُ عَلَيْكَ فِي أيِّ بُقَاعِ الأرْضِ تَكُون 💚💚.

التوبة للّٰه وليست للناس، حتى وان ذكّروك بكل معاصيك السابقة لا تتراجع بتوبتك، لا احد سينفعك في قبرك غير الله
( كتابة الموضوع عن طلب احد المشتركين)

#التوبة
من تنوي تتوب دير بالك تتوب خوفاً من كلام الناس او خجلاً من نظراتهم، هاي مو توبة هذا رياء، والرياء من اخطر انواع الذنوب اللي يرتكبها المؤمن، زدت الطين بلة
خلص انت توب وخليها خالصة لله عز وجل، لا غير، (توبة نصوح) فكر بالتوبة دائماً وابتعد عن الاماكن او المجالس اللي ممكن ترجعك خطوات ليوره وتقلل من عزمك واشتغل علا خوما بس تفكر🙂 كل يوم التزم بالواجبات اكثر وزيد كم شغلاية مستحبة حتى تصير قوي 💪

نقطة مهمة: #لا_تهتم_لكلام_الناس
مهما گالوا وحچوا عليك لا تهتم، انت عبد عندك ذنوب واخطاء نادم عليهن وتريد تصلح ما بينك وما بين ربك شلك علاقة بالناس شگالوا وشحچوا ياهو مالتي بيهم عسى ما مدري شيحچون، اهتم بس للي ينصحك نصيحة مفيدة وصحيحة

حتى لو چانت عليك ذنوب هائلة سارع بالتوبة ولا تيأس، الله ؏ـزّ وجَل يغفر ويتوب عاللي يتوب ويندم بصدق نية ويبدل سيئاته حسنات ويرفعه درجات
كما ورد في الروايات ان الله تعالى يغفر للي يتوب بصدق نية حتى لو چان بآخر ساعة او لحظات من حياته
فاللي يگلك انت مسوي كذا وكذا گله ترا رب العالمين يغفرلي لو مسويهن الف مرة، كلامه لا تهتمله لأنه نابع من غير ايمان ولا علم ولا معرفة وبيه استهزاء لرب العالمين، شنو الله ميكدر يغفرلي ذنوبي ويمسحها من سجل اعمالي؟ حاشاه
مثــال علا هاي الفئة:
انت من تريد تسأل علا موضوع بفد مجال، اياً كان، مو تروح تسأل الناس اللي عندها علم وتعرف بي وتاخذ برأيهم؟ خو ما تروح لواحد مو يم مجالك شمدري هو !؟ و اذا واحد حچالك عن شي هو مو متخصص بي فغالباً ما تاخذ بحچيه لانه مو موثوق وممكن يكون غير صحيح وخاطئ.

فانت لا تهتم للي يحچيلك من يمه ولا تتبعه من ينهاك ويحاول يقلل منك ويستهزء بيك لان هو مو فاهم بالدين ولا مطّلع، "مو مجاله فميفهم بي"
و الناس التعرف بمجال الدين تگلك الله حيغفرلك لو چنت مسوي ذنوب الدنيا كلها ..، خلص بعد لا تتأثر بكلام الناس

#التوبة و #الاعتراف_بالذنب والرجوع لله هي الطريق الصحيح ، مثلا اليوم اذا چنت طالع مشوار علا فد طريق واكتشفت أنه خطأ ومحفوف بالمخاطر وعواقبه تخوف والنهاية بي ابد مو زينة، مو تحاول تغير مسارك وتغير الطريق؟ مو راح تتجه للطريق المضمون حتى تضمن سلامتك؟
كذلك احنه لازم نعرف ان الطريق اللي بيه معاصي وذنوب وعدم رضا الله هو طريق خطر يودينه بداهية، فلازم نحذر و نغير المسار باسرع وقت ونتجه للسير بطريق الله واهل البيت حتى نضمن سلامتنه دنيا واخرة .


وبالأخــــير :
التوبة هي فرصة يعطيها الله للعباد المذنبين لكي يصححوا اخطاءهم ويزكوا انفسهم من الذنوب والمعاصي، يجب عليهم ان ينتهزوا هذه الفرصة ولا يتأثروا باستهزاء وكلمات ضعفاء القلوب والمعرفة
مهما كان العبد بعيد عن الله وغير ملتزم يجب ان لا ييأس ويتوب ويثق برحمة الله التي وسعــــت كـــل شـيء .