አሳብ

ስለ ማሰብ ላለማሰብ
ማሰብ ባያስፈልግ
ምንኛ ደግ ነበር አሳብ ተሰንጥቆ
አሳብ እስቲጠግግ

'ካሳብ አሳብ በልጦ
'ላሳብ አሳብ ቆርጦ
አሳብ 'ካሳብ መርጦ
የሚታሰብ አሳብ..?

...ሰበብ!
ላለማሰብ:

ሰበብ... ላለመንቃት
ሳይጀምሩ ማሰብ..
ሰበብ ማበጃጀት
እፍፍፍ...
እውነት: ይሁን ቅዠት!
ቅዠት 'ያሳብ ጉዞ
አሳብ ተያይዞ
ካሳብ ላይ ተመዝዞ
አሳብ ተጎዝጉዞ
በሰበብ ሀዲድ ላይ
እየተጓተቱ
አሳቦች በረቱ

'ላሳብ የሚታሰብ
የአሳብ ዥጉድጉዶሽ
አሳብ ያዝ ለቀቅ
የነገር አባርሮሽ
አሳብ 'ካሳብ ሲሸሽ
ሲፋተግ ሲተሻሽ

ወዴት ልሽሽ?

ይኼም ሌላ አሳብ...
እዚህ ሸብ
እዚያ ሸብ
አሳብ ማሰባሰብ
አሳብ 'ባሳብ መክበብ
አሳብ 'ባሳብ ማጥበብ
ማሳመር መቀንበብ
...ጥበብ!
ጉራማይሌ ንባብ
ባለ ቀለም ምናብ
ድምፅ አልባ ንትርክ
የሽቅድድም ታሪክ
በምናብ ብራና
ቀድሞ የሚተረክ

እንደ ሰማይ ስንጥቅ
ብሩህ ብርቅርቅታ
አድማስ የሚያዳርስ የቀለም ጠብታ
ብትንትን እያለ
አሳብ 'ካሳብ ላቀ
አሳብ 'ላሳብ ፍሞ
አሳብ ተቃጠለ

ባላስብ ምናለ?
ይኼም ሌላ አሳብ...

(የጌታነህ ልጅ)
#poeticsaturdaya #gitemsitem

አንድ ሰሞን


በህይወት ሰሌዳ ደስታና መከራ ተፃፈ
ሁሉም አንድ ሰሞን ሁኖብን አለፈ

ሁሉም አንድ ሰሞን
በደስታ መሽሞንሞን
ፌሽታ ላይ አቁሞን
አንዱ ሰሞን ሊያልፍ
በስሜት ሲያንሳፍፍ
ህላዌን ሲያስቀዝፍ
ደሞ ላንዱ ሰሞን ምንዱባን ሲወዝፍ

መከራን ስንረሳ በሀዘን ልንቀጣ
የአንድ ሰሞን ችግር ከቤታችን መጣ

ጥለቱ አደፈ
ኩታችን ጣለን
የዚህ ሰሞን ነገር ሀዘን አስጠለለን
ማቅ እየለበሰን
ሙሾ እያወረድን
ደረት እያስመታን መከራ ላይ ጥሎን
አፈር አስበትኖ
በመቀጣት እንባ አይናችንን ኩሎን
አንዱ ሰሞን ሲያልፍ ለሌላው እየታጨን
ለደስታ እስክስታ ለሀዘን ጠጉር እየነጨን
እኛ እንደሆን አለን

በህይወት ሰሌዳ ደስታና መከራ ተፃፈ
ሁሉም አንድ ሰሞን ሁኖብን አለፈ

የአንድ ሰሞን ትከሻ እስክስታ እንዳልወረደ
በዚህ ሰሞን ዝሎ ደረት ሙሾ አወረደ
እልል ይል የነበረ
አፋችን በፌሽታ
በሰሞን ተቀየረ
በዋይ ዋይ እሪታ

አንዱ ሰሞን ሲያልፍ ለሌላ እየታጨን
ለደስታ እስክስታ ለሀዘን ጠጉር እየነጨን
እኛ እንደሆን አለን

©️ዳጊፋ

#poeticsaturdaya #gitemsitem