وجع الناس مو للتجارة

واستغلال المريض مرفوض.
اتفاق بعض الأطباء ويا الصيدليات والمختبرات على حساب المواطن ما راح يستمر
#التسعيرة_الدوائية

من منطلق قوله تعالى
﴿وَجَعَلْنَا مِنَ الْمَاءِ كُلَّ شَيْءٍ حَيٍّ﴾

بديت بهذا الملف من النجف قبل أكثر من سنتين، وعرفت أن ما نكدر ننقذ ماي النجف إذا ما ننقذ ماي العراق بأكمله … لأن الماي يجري، وأذاه إذا صار بمكان يوصل لأهلنا بمكان ثاني.
لذلك أمد إيدي لكل مسؤول ومختص:
خلونا نتعاون، مو نتخاون.
نختلف على هواي شغلات…
بس المي اللي يشربه أطفالنا، ما يصير نختلف عليه.

متى كان خريجو المهن الصحية والطبية جزءاً من القرار حتى يتحمّلوا اليوم تبعات فشل الحكومات المتعاقبة؟

القانون يقول: يجب تعيينهم.
فالسؤال اليوم واضح:
من الذي يخالف القانون؟

لذلك رسالتي إلى معالي وزير المالية، وإلى كل من يؤيد توجّه عدم شمولهم بالتعيين:
لا تجعلوا الخريج يدفع ثمن أخطاء لم يكن شريكاً فيها، ولا تخالفوا القانون.

وإذا تبحثون عن حلول… استعجلوا ب

#صندوق_الاستدامة_المهنية_لتعيين_جميع_ذوي_المهن_الصحية_والطبية

مقترح لتأمين مورد مستدام لتعيين جميع ذوي المهن الصحية والطبية.

#ذوي_المهن_الصحية_والطبية

الحمد لله… أول الغيث صوتكم أحبتي. 🤍

ملف إنقاذ مياه العراق ينتقل إلى قبة البرلمان لاتخاذ قرارات عاجلة.

رئيس مجلس النواب يوافق على مقترح النائب غيث الكلابي لعقد جلسة خاصة واستضافة الوزراء والجهات المعنية بملف تلوث المياه.

بدأناها من النجف… واليوم أصبحت قضية العراق.

تسأله : دكتور عزيزي، ليش كتبت هذا العلاج وهو بعده ما مفحوص؟
يگلك : خوش علاج !
زين شلون عرفت خوش علاج وهو ما مفحوص؟!

اي دواء بالسوق وهو مو مفحوص معناها دخل بطريقة غير نظامية وتعرض لسوء خزن وتلف شون تقبل يوصل للمريض ؟

ولا تگلي العلاج ما موجود وشنو ذنب المريض…
خير من الله أكو بدائل نظامية ومفحوصة وفعّالة ومتوفرة وبأسعار ارخص ومابيها ( عمولات كومشنات وسفرات وشبهات !! )

إخواني رسالتي الكم مجتمعنا إذا ساعدتوني بوعيكم راح ننجح أسرع
لا تشتري علاج ما عليه الكود والسعر واضح ، وإذا شفت مخالفة بلّغ عنها .
#لا_تخجل_من_واحد_ميخجل_منك.

ولزملائي بالكوادر الصحية:
هذا ملفي القادم إن شاء الله…
وأتمنى منحتاج نزعل واحد من الثاني.

#التسعيرة_الدوائية
#الوصفة_الطبية_المطبوعة

لجنة الصحة تطالب دولة رئيس الوزراء بعقد اجتماع طارئ لضرورة تعيين ذوي المهن الطبية والصحية حسب قانون التدرج الطبي
وطرح بعض مقترحات الحلول .
المكتب الإعلامي

هذا الي كنت احجي بي !!

وجائنا وعد من السيد رئيس مجلس النواب بدعم هذا الملف ، ودعم من إخوتي السادة النواب ايضا .
وأحتاج صوتكم وياي أهلنا وناسنا … وثقوا بالله ، نمشي بي للنهاية وبما يرضي الله وهذه امانة في رقبتي .
هذا ملف المواطن … ومن يحاول يوقفه لمصلحة خاصة ، هو بنفسه راح يكشف موقفه أمام الناس .
رسالتي لاهلي وناسي من يكون صوتكم وياية صوتنا يصير أقوى .
شكرا للسيد رئيس مجلس النواب المحترم
شكرا للسيد النائب الأول المحترم

وقفتنا مع إخوتنا الخريجين القدامى مستمرة

وإن شاء الله خير وبركة عليكم … وتستاهلون كل خير

شكراً دولة رئيس الوزراء

الحلول واتحدث عن نفسي

* اما عدم التصويت على الموازنة
* ⁠اعتماد الصندوق

غيرها عندي كلام اريد تقروه للاخير ⬇️

إلى إخوتي وأبنائي وزملائي من ذوي المهن الصحية والطبية…

اليوم أحچي وياكم كأخو وزميل قبل لا أكون نائب.

أني بالانتخابات ما چنت أعرفكم ولا أعرف قضيتكم، وما چان بيناتنا وعد ولا مصلحة.
عرفت قضيتكم بعدها… ووقفت وياكم بعدها.

وبشهادة ممثليكم نفسهم من گالوا إلي:
«أنت الوحيد من الفيلد الطبي اللي ما وصلنالك قبل الانتخابات، ومع هذا من عرفت بقضيتنا وقفت ويانا بكل قوة».

وأعتقد الوقفة اللي تجي بعد الانتخابات، ومن دون وعد ولا مصلحة، هي أصدق جواب على كلشي.

انتخيت إلكم لأن هذا واجبي الشرعي والأخلاقي، ومسؤوليتي بلجنة الصحة، ولأنكم إخوتي وزملائي… وأمنيتي أشوفكم تتعينون وأگول: الحمد لله، ساهمت ولو بشي بسيط بفرحتكم وفرحة أهلكم.

وأكو كلمة زحمة حتى أضطر أگولها:
تره أني ما خدعتكم ولا كذبت عليكم.
أني طبيب وجراح، وعندي اسم وعائلة، وتربيت أن كلمة الإنسان وسمعته أغلى من منصب يروح مثل ما إجه.

راجعوا كلامي ومواقفي وياكم من أول يوم، وحتى موقفي يوم التصويت على قرار اللجنة… واحكموا أنتم.

والبارحة ما چنت ناوي أجي، لأن أعرف دوري الحقيقي بالبرلمان، لكن وصلتني أكثر من 2500 رسالة، وبعضها:
«دكتور غيث… ضربونه ونريد فزعتك».

خجلت منكم أني ما أجي…
فجيت رغم أني چنت مريض.
مو منّة، حاشاكم، بس كلمة «نريد فزعتك» ما هانت عليّ.

ولهذا عندي عتب أخ…

أني صارلي سبعة أشهر بالبرلمان، ومشكلتكم عمرها سنوات.
بهالفترة حاولت ، وقدمت حلول ، وطرقت أبواب …
مو كلشي گدرت أحله ، بس ما بعتكم وهم ، ولا وعدتكم بشي أعرف ما أگدر عليه .

ومثل ما أني ما أقبل أحد يظلمكم ، أتمنى منكم هم ما تقبلون الإساءة إليّ بسب او شتم !! ليش وعلى شنو ؟!

عاتبوني ، انتقدوني ، بس مو سب وشتم …

وأگولها من القلب :
ما أريد منكم مصلحة ولا مقابل، وكل اللي أتمناه أشوفكم تتعينون وتفرح بيوتكم.

إذا تريدوني وياكم، أني وياكم… بس راح أبقى أگلكم الحقيقة حتى لو تزعلون ..
وإذا اختلفتوا وياي ، نبقى إخوة ، ومن تحتاجوني تلكوني .

وأتمنى من تخلص هاي القضية ، ما يبقى فضل لأحد على أحد …

يبقى بس الموقف.

أخوكم وزميلكم قبل لا أكون نائبكم
غيث رعد شبع الكلابي

تريد تعرف شنو راح يصير ؟
اسمع شنو كلت
واسمع شيخ عدنان فيحان شنو كال
وشنو راح يتبنى …

قد اثره على المستقبل القريب ماراح يبين لانه دنحجي بقوانين وتشريعات ستحول الى اللجان حسب الاختصاص لاعدادها
هذه راح تكون بناء مستقبل اقتصادي قوي بالعراق ( هذه مقترحات وسيعمل على تطويرها من اللجان المختصة )
#مستمر_مستثمر_وجودي_هنا_اقترح_حلول_لازم_اكو_عقلاء_تاخذ_بيها

(عمي ملف الماي منو يحله ماتشوفلك ملف زغير؟)

بالبداية من كلت: الماي ملوث وغير صالح…
محد صدّگني.
كذّبوني، وأشكال كلام سمّعوني.

ومن راويتهم النتائج… انحرجوا.
بعدين كالوا:
عمي الموضوع جبير، وما راح تگدر تسوي شي.
صار سنين على هذا الحال…
اتركه، وشوفلك ملف صغير.
معاملات، موافقات، ومن هاي الملفات… المهم.

أني ما تركته.

رحت من زاخو بلشت، واستمريت بأخذ العينات وجمع نتائج الفحوصات القديمة والحديثة، وشخّصت المشكلة وأسبابها وآثارها على صحة الناس.

والله والله، ينمرد گلبي…
أعرف شنو دا يصير، وأعرف شنو آثاره على الناس، وما أگدر أسوي شي بسبب بعض الـ… المهم.
أني ما سكتت استمريت

رحت حچيت ويا هواي مختصين، وسافرت لتركيا، وقصدت ناس أصحاب اختصاص، وبقينا نبحث ونسأل إلى أن وصلنا ووضعنا خطة للحل.

أكو ناس شافوها وكالوا:
عمي شبيك؟!
إنت ليش تلح بالموضوع؟
هاي ما تمشي…
أخذها إلك، تكلف هواي ومحد راح يسمعك.

گلت: زين، إذا الكلفة عالية وما عدنا فلوس، خو ممكن نفكر بطريقة ثانية…
النفط مقابل البنى التحتية.

بعدين شفت أني وحدي ما يكفي.
لازم أدخلكم وياي بالقضية.

لذلك بديت أحچي گدامكم، وأشرحلكم شنو الموضوع، حتى من تعرفون الحقيقة تساعدوني بصوتكم.

وفعلاً… هذا اللي صار.

إجا صوت الناس وياي.
وصار صوتي صوت الناس…
وصوتنا صار أقوى.

وكل الآذان سمعتنا، وعرفت دقة معلومتنا ونُبل هدفنا.

صوتنا وصل إخوان.

بعدين قدمت المقترح للمجلس، ويا توصيات تُرفع إلى رئاسة الوزراء.

وهنا صار موقف أريد أذكره للتاريخ…

الشيخ هيبت الحلبوسي والشيخ عدنان فيحان ما قبلوا أن يبقى الموضوع مجرد توصيات.
الشيخ هيبت كال:
من رحت لتركيا، حجيت وياهم بالموضوع، وهذا الملف راح يصير ملف المجلس ونتبناه إلى الأخير.

والشيخ عدنان وعد أن هذا الملف ما راح يعوفه عند حدود التوصيات.

يعني اليوم…
هذا مو ملف غيث وحده.

هذا صار ملف المجلس.
المشروع الوطني لإنقاذ مياه العراق من التلوث.

وراح نستضيف السادة الوزراء المعنيين، وراح تسمعون حلول إن شاء الله.

اللي أريد أگوله من كل هاي السالفة…

أكبر من هاي المشكلة، بعيني ما چانت أكو مشكلة.
وحلها بالنسبة إلي چان يشبه المعجزة.

بس اليوم بديت أؤمن أكثر بشغلة:

إذا تصر، والناس توقف وياك، وتلكه شخصيات وطنية محترمة داخل مؤسسات الدولة تتبنى وياك القضية…
حتى المشكلة اللي يگولولك عنها سنين: «اتركها، ما تنحل»…
تبدي عقدها تنفك وحدة ورا وحدة.

وإن شاء الله نوصل للحل.

#وَما_نَيلُ_المَطالِبِ_بِالتَمَنّي_وَلَكِن_تُؤخَذُ_الدُنيا_غِلابا

#لما_سلكنا_الدرب_كنا_نعلمُ_ان_المتاعب_للمعالي_سلم
ماكو شي مستحيل…
وهاي شوفة عينكم.

مهما كَبُرت أسماؤكم … سأكشفها
ومستعد لتحمّل العواقب .
والسلام .

جماعة الادوية المزيفة
جماعة التعاملات والكومشنات