هاي الروحه ابد مامنهه جيه
شبكتك ياعلي بثنين اديه
علي صدرك جواني// طحت بويه بمكاني
*********
كدام النهر والناس _ تشابكنه وبجينه هواي
فريت الخيم كلهه _ علي وما حصلتلك ماي
العطش بايك معانيك _ طولك محني اشوفك جاي
الشمس ماترحم العطشان _ علي وبالهيمه ماكو افياي

سواد اعيونك ابيض صاير شلون
العطش اول مصيبه يعمي العيون
علي مصابك عماني // طحت بويه بمكاني
*********
يالمدلي اعله راسي الشيب _ اودعك كوه مو بيدي
شمرت اعمامتي اعله الكاع _ رحت من عندي يوليدي
يأابني بفركتك حسيت _ وحيد وفاكد اعظيدي
درت وجهك واون ظليت _ علي يالشوفتك عيدي

خشب يابس علي صاير لسانك
اموتن لو شفت فارغ مكانك
حرت حيره بزماني // طحت بويه بمكاني
*********
ثكيل اوداع المدلل _ الابو دلاله يتفطر
برجلك رايح اعله الموت _ دخيلك ياعلي الاكبر
من مهرك ملت للكاع _ تميل وانه اميل اكثر
بديت تنازع وعطشان _ اعوفك بويه مااكدر

عليك من المهر روحي اشمرتهه
شفت اعمامتك واركض شلتهه
متت كبلك عساني // طحت بويه بمكاني
*********
شحيحه الغيره هالايام _ واول غيرتك تنعد
يالمعطش دليلي اعليك _ اريد ابطولك اتمدد
أشد بجروحك التنزف _ العطش يجروحه ماتنشد
ابيض شعري صار اليوم _ الكون بعيني صار اسود

بحظني للخيم يوليدي اشيلك
تموت امك إذا تدري برحيلك
يبو حلو المعاني // طحت بويه بمكاني
*********
مرورت فركتك بالريج _ فراكك بين ابلوني
إذا كالو علي وينه _ شجاوب لو يسألوني
بدمع كمت اللتفت كل ساع _ مبينه الوحشه بعيوني
كلتلك انته والعباس _ اموتن من تعوفوني

علي انته الطحت لو انه طايح
خذت روحي تره من كتلي رايح
المهر خالي اجاني // طحت بويه بمكاني
*********
تمت ____ علاء الزيدي

تشهدلج الشريعه _بأاربع مناحر
لو مثلج التخلف _ لو تبقه عاجر
سويتي المستحيل ** ظحيتي بالكفيل
******
بخارطت افكارج الحب _ بس لبو اليمه حلاال
الوفه يفتخر بااسمج _ لان صرتيله مثال
الظعن من راد يمشي _ صحتي أبو فاضل تعال
كل لخوتك امي كالت _ بكربله ماعدنه خال

الله عله المواقف _ يعظم وفيه
من كلتي فدوه ولدي _ لولد الزجيه
وبكربله الدليل ** ظحيتي بالكفيل
******
انتي يالبدويه عندج _ الهه قدسيه الخيام
حارس العباس الهن _ الليل كله ما ينام
ولدي كلتي حيل اتعبو _ المهم يرتاح الامام
واليبيض وجهي رايد _ يدلي بعيونه السهام

يوفيلي بالااريده _ الراضع حليبي
اتسابقو اربعتكم _ لخدمة حبيبي
اربع خدم قليل ** ظحيتي بالكفيل
******
الدنيه تشهدلج يحره _ لكربله وديتي أسوود
الاربعه ماتو عطاشه _ حته الشايله جود
ليش عنهم ماسالتي _ ولا سالتي اعله الزنود
بس عله واحد سؤالج _ حسين كلولي يعود

بس هوه شاغل بالج _ تنتظره عينج
شفتج ولا بجيتي _ دمعه البنينج
ماكو الج مثيل ** ظحيتي بالكفيل
******
نخبصت الدنيه اعله ولدج _ وانتي ما رفيتي عين
كلتي ولدي همه وامهم _ فدوه لتراب الحسين
بالشمس يخلص نهارج _ وليلج يخلص حنين
هوه اليفارك حبيبه _ حته بحلامه حزين

والظحت ابزرهه _ اكبر وفيه
تسبيحج بسبحتج _ يا ابو رقيه
ياخلكج الطويل ** ظحيتي بالكفيل
******
قماش خيمت أبو اليمه _ يغار من عنده الحرير
حسين كالوله بمكانك _ عنده تطلع مايصير
والشمس نرفض تلوحك _ خدم احنه وانته امير
هوسو بالرايه ولدج _ وجابو الشاطي اسير

كلتي إذا اجوني _ ماارضه عنهم
ما قصرت نشامه _ طاهر لبنهم
صاح الوفه دخيل ** ظحيتي بالكفيل
******
مثلج النسوان كلهه _ تمنت تخلف زلم
الج من ينجاب طاري _ تصيح كلهه والنعم
مو مهم كلتي بنيني _ عندي الحسين المهم
حسين من يرجع اليه _ عود يله ابتسم

والترجم الخويه _ عباس اعرفه
وصيته عالشريعه _ خل ينطي جفه
خله النهر سبيل ** ظحيتي بالكفيل
******
تمت ____ علاء الزيدي

خل تعذرني مو كايل// عاذرتك يبو فاضل
وكفاتك اهواي ___ يمرخص الماي
*********
بعد بيه حجي وارد اكعد وياك _ حنين هواي اعرفك
يالكايدني جفك صارله سنين _ من يلكالي جفك
جفك بنالي خيمتي _ بس هوه يمسح دمعتي
تالي انكطع ياحسرتي _ اتمنه ابوسه من الكاه
لو بيدي اجيك من العصر _ بس ليلي تانيته ستر
لا تعتذر انه اعتذر _ ما قصرت لا والله

سيرت بكلب حاير// وكبلي مسير الحافر
كبلي طلع جاي ___ يمرخص الماي
*********
حكه ينكسر يا ظهر الحسين _ مشيب راسه راجع
جفوف منيلك ياهو التلكاك _ اعله وجهك خويه واكع
مالت اخوك اعمامته _ وسكينه تركض لاكته
عنك بجه من سألته _ عطشانه سألت عطشان
شو راجعلنه بلا اخو _ بويه الكسر ظهرك منو
ومتشمت بطولك عدو _ مشيب رجعت وتعبان

ساكت والحجي بعينه // طاح الواعد سكينه
ضل يبجي وياي ___ يمرخص الماي
*********
ونينك يابوفاضل هز الخيام _ شلع كلبي ونينك
تدري السهم مايستاهل ارموش _ ليش انطيته عينك
احتركت يعباس الخيم _ ياحيلي مو حيلي انهدم
ماتكعد تجر السهم _ دمك يبس فوك العين
بصدرك شفت واكف رمح _ وبيك الجرح فوك الجرح
بس امشي عنك تنذبح _ يذبحوني رايح مرتين

امشي لو اضل يمك _ باجر محد ايلمك
منك ردت راي ___ يمرخص الماي
*********
رجعت بذكرياتي بذيج الايام _ شكد مرتاح بالي
عتبت بيتنه بزودك يعباس _ ما شافت خيالي
يالنايم بشمس الضهر _ كاتب على جفوفك نذر
ذني بثواب ام الخدر _ مشكوره منك عباس
توادعنه بالخيمه ورحت _ بروحك ابد مافكرت
لا تعتذر ما قصرت _ يالخوتك رفعت راس

شايل احله حنيه // تسمي الخيمه علويه
يالطولك افياي ___ يمرخص الماي
*********
كلبي اعله الشريعه محمل اعتاب _ شعدهه وي اخوتي
عزيز بصف عزيز امن العطش مات_اعرفتهه تريدموتي
اسمع يسبع الكنطره _ الدنيه وكفت ضد مره
صار الما جنت اتصوره _ ويالمشرعه عندي اعتاب
وجهك مسحته بشيلتي _ جنت انته تمسح دمعتي
يمك كعدت بغربتي _ وعالراس اهل كمت اتراب

يخويه سولف مروتك// مااسمع بعد صوتك
تعذبني دنياي ___ يمرخص الماي
*********
تمت ____ علاء الزيدي

افرزنكم بالاسامي وبالصور
اليبجي دمعه الله يهديله نهر
ليلة السابع تخص ابني الكمر
عباس ____ عباس
*********
شكو واحد من صلب حامي الحميه
ينحسب يا ناس من ولد الزجيه
بكسر ظلعي ودمعتي احظر عزيه
ابوصله خظره لافه اجفوفه الشفيه

ابو فاضل ابني ماكو كل فرق
وخل يكون بعلمك الدمعه رزق
ظلعي مرتين اعله عباس انكسر
عباس ____ عباس
*********
ابني أبو فاضل منوه الما يعرفه
بيش اجازي المنطي عينه ومنطي جفه
الليله من دون الليالي عندي كلفه
بلا كمر يعني الخيام الليله تصفه

للشريعه زينب اشودت عتب
لان هيه بالهجر جانت سبب
شحال زينب بله من جاهه الخبر
عباس ____ عباس
*********
قصه شاهدهه الوفه مابين الاخوان
الميت بصف النهر بس هوه عطشان
لخته ماوصلت جربته مستحي جان
انه عالعباس انوح وحيلي خلصان

كبل أبو اليمه فلا ظاك العذب
الخوه إذا موهيج ابد ماتنحسب
حكه الحسين اعله اخو محني الظهر
عباس ____ عباس
*********
عيني حمره والكلب فز ابونينه
وأبو فاضل بالسهم مصيوبه عينه
بالمجالس كاعده وكلش حزينه
يخدام الليله صعبه اتمر علينه

عله كافل زينب ابجو يالخدم
مات حيلي بعينه من شفت السهم
وفوك هذا كصته صابوهه بحجر
عباس ____ عباس
*********
ليلة السابع ارجع لازم الدين
اكو وحده تصيح اسمع يمه يحسين
وانه يا عباس اصيح بدمعت العين
استقبلو الليله ابدمعكم ام البنين

استقبلوهه الخلفت لحسين اخو
معتبره والنعم من عدهه وكفو
يالوفه الشايلته ماشاله بشر
عباس ____ عباس
*********
اليبجي وياي الدمع هاي المسيه
نهر بسمه ينكتب مني هديه
الجاي متوكل عله الله وجاي اليه
ما اعوفه لو دنت منه المنيه

كاتبه بيدي الاسامي بالسجل
الف هنيال المانسو ابل الفضل
يشكر العباس كل واحد حظر
عباس ____ عباس
*********
تمت ____ علاء الزيدي

لازم ظهري وبطولي دمعتي
طحت والكومتني زينب اختي
تعال تريدك ام عون // ما ضل للخيم لون
**********
خطوه خطوه اشاهدت حد ما وصلتك
ليش عايفني صحت خويه اعله بختك
من الجروح البيك صدك ماعرفتك
شلون سولف ياجبل صارت وكعتك

صارت بيضه من شفتك لحيتي
احسب لو رحت داسو ثنيتي
كوه مفتش العيون // ما ضل للخيم لون
**********
حيره اشيلك لو اغطيك ابعباتي
وياك ماتت يابو فاظل ذكرياتي
جنت خيمه اعله الخيم لمدلاتي
وجانن يركضن يلاكنك بناتي

هسه حيرتي مامنهه حيره
وجهي اعله الخيم كل ساع اديره
اعوفك وارجع شلون // ما ضل للخيم لون
**********
بخيمتك كعدت تتانيك العقيله
تكلي اخيك غيبته صارت طويله
شي اكيد من العطش مجوي دليله
يا ابو فاضل طيحتك كلش ثكيله

حجي تشمر تره هواي الشماته
مات من العطش كافل خواته
كفيل الحره يدرون // ما ضل للخيم لون
**********
غصن شجره ونكسر ياخويه ظهري
ياابو فاضل دمعي كام بطولي يجري
بفركتك مثل الكطن لو شفت شعري
شصار بيه من رحت بس الله يدري

كوه تحملت اسمع ونينك
خفت من السهم يشلعهه عينك
الشماته خل يشمتون// ما ضل للخيم لون
**********
صارلي ساعه يخويه فوكك افتر
وين شمرو جفك الايمن والايسر
راح شوفي وبلكت الله بيهن اعثر
ياهو اربيه اعله ايدي شو تطشر

اعتبرتك ابني وبعيني اشوفك
الله ايعثر الكطعو جفوفك
الكاهن صحت كون // ما ضل للخيم لون
**********
رايح ارجع للخيم بس بالي يمك
هاي اخر شمه ياعباس اشمك
الخوه بس عندك صدك تجري ويه دمك
أخ طاري الماي يلجمني ويلجمك

حابس دمعتك سهمك عرفته
عباس وعلي ظهري كسرته
سويه نرد يتانون // ما ضل للخيم لون
**********
تمت ____ علاء الزيدي

خاتم سليمان بيميني // وعالماي زينب تنتخيني
انه عباس ___ انه عباس
******
الحاجه التكلفيني بيهه _ تعتبر مكظيه
والنهر كتله وسمعني _ تريدك العلويه
عرش بلقيس بثواني _ جابه ابن برخيه
الماي اصيحله ويجيني _ وانه ابن بدويه
الماي اصيحله ويجيني // وعالماي زينب تنتخيني
انه عباس ___ انه عباس
******
انه كشاخ المواقف _ وانتي كعدي وشوفي
الماي لخيامج اجيبه _ لو اكطع جفوفي
بخيمتج جم ذكرى كاتب _ بيهه ماي حروفي
كلت للجربه ترستج _ عالمخيم طوفي
خليهه تتكطع اديني // وعالماي زينب تنتخيني
انه عباس ___ انه عباس
******
انه سكاي العطاشه _ بكربله يسموني
الماي اسهل منه ماكو _ صار من عيوني
زلم تردم زلم ضلت _ فنهم يلاكوني
انه سبع الدنيه كلهه _ وكلهم يعرفوني
وين المكابل يجيني // وعالماي زينب تنتخيني
انه عباس ___ انه عباس
******
ترفرف الرايه اعله متني _ بواهس تعنيته
الماي بجفوفي غرفته _ استنكفت بديته
يلوح شفتي كتله تحلم _ والله ما خليته
ماشرب عباس منك _ كبل المربيته
مستحه عركت جبيني// وعالماي زينب تنتخيني
انه عباس ___ انه عباس
******
هدهد العباس سيفي _ وعالركب وديته
وخاتم أسليمان بيدي _ جفي طلع صيته
حرزي اسم حسين الاعظم _ عالكلب خطيته
وانه الج دكيت صدري _ وشاربي كضيته
الج زينب انطي عيني // وعالماي زينب تنتخيني
انه عباس ___ انه عباس
******
تمت ____ علاء الزيدي

زغير الخيم مات // والله حرامات
اشكد ندهته وماكعد
المن اللولي جا بعد
********
بخيمه عشنه اثنينه عيشه سعيده
حته لو مذبوح الي جيبوه اريده
كاطع اكماطه الطفل ومطلع ايده
شنهو ذنبه بالسهم ذبحو وريده
نحره حجه وياي// يمكن طلب ماي
نومته مذبوح بمهد
المن اللولي جا بعد
********
حسين لفه بالهدم لخيامه راجع
روحه فاظت صاح مالحك ينازع
مات عبدالله بعد هلي المدامع
بركبته الترفه السهم لاحظته طالع
بهذا الوكت جان // يلعب بالاحظان
بدموعي ناغيت الولد
المن اللولي جا بعد
********
حرمله شاف الطفل لمعت ركبته
صاح اشهدولي بسهم انه ذبحته
حسين كاعد بالشمس تجري دمعته
الماي مثلي ياعبد هم ما شربته
ظل حرمله يكول // ذبحو الدللول
ازغر طفل عدنه نفكد
المن اللولي جا بعد
*********
العمره ماكمل سنه تعبني جرحه
عله خدوده الدم يبس وشلون امسحه
تره اليعطش بشربت اميه تفرحه
مو اليعطش حرمله بسهمه يذبحه
صدر الطفل حار // من العطش صار
كلبي كبل كلبه نمرد
المن اللولي جا بعد
********
امن ايد الحسين الولد ليد العقيله
كلبي ماينطيني ابد بحظيني اشيله
لو مخليته صحت يم العليله
طفل الخيام العطش فطر دليله
مذبوح الخيام // بدمه غفه ونام
عبدالله ياطير السعد
المن اللولي جا بعد
********
تمت ____ علاء الزيدي

ياهو الغمض اعيونك// من رادو يذبحونك
شلون انته ترتاح ___ بعينك رمل طاح
********
توني طفيت المخيم _ وبلكي كلت ارتاح يمك
رمح البصدرك طردني _ حسين ما خلاني اشمك
يالتراب مغطي نحرك _ ارد امسحه وخاف الجمك
طشروك عناد بيه _ حته اتعب من المك

كالو ابقي متحظره// شويه ونرجع انطشره
شامت الي صاح ___ بعينك رمل طاح
********
ولا شريف بكلبه رحمه _ ماي ياخذلك يشربك
بالشمس باقي تنازع _ وحافر ايدوس اعله كلبك
للخيم زاحف مسافه _ من التعب تيهته دربك
مطرت أحجار اعله راسك _ بذمته كلمن يضربك

قصدهم بس يعذبونك// عدل بعدك يسحكونك
الحافر اجه وراح ___ بعينك رمل طاح
********
بالشمس نومك يخويه _ تدري مو نوم العوافي
من الرمل خدك تجرح _ وانته ميت مدري غافي
بروحي ماادري من اجيتك _و الجمر ساحكته حافي
الخيل ماتتعب شفتهه _ ومحد ايكللهه كافي

بخدك يبسن ادموعك // ترسن كربله اظلوعك
مكسور الجناح ___ بعينك رمل طاح
********
خالي مهرك من رجعلي _ عالي ونك جنت اسمعه
كتله راعيك تمدد _ عالرمل سولفلي وضعه
كلي واحد جر قميصه _ يسحك برجله اعله ضلعه
اواحد ابخنجر اجاله _ عفته هسه يكص بصبعه

انطمت بالرمل عينه// ينازع عفت ابو سكينه
حته المهر ناح ___ بعينك رمل طاح
********
خيمه خيمه ارماد صارن _ وانه كلبي اعليك حاير
جسمك الما منه باقي _ فوكه تل أحجار صاير
حسين ياكشخت خواتك _ فرهدوك بيوم عاشر
بيش اغطيك امن اروحن _ للسبي ياخويه باجر

غريب انته يسمونك// واهلك مايشيعونك
غارك بالجراح ___ بعينك رمل طاح
********
تمت ____ علاء الزيدي

(((((شور ليلة العاشر)))))
واكفات __حايرات
ماي الابوهن رايدات
********
طلعن عفيفات الخيم _ واستقبلن خالي المهر
سألنه خيالك وكع _ هز راسه والهن يعتذر
عطشان ناده ياخلك _ فوك العطش شمس الظهر
كل ساعه ويسمعن ظلع _ من صدر ابوهن ينكسر
صافنات ____ صافنات
كسرت ظلع ماسامعات
********
بين الخيم يتراكضن _ موقفهن يفطر الكلب
من الجيش كلش يستحن _ يطلبن لبوهن مي شرب
النايم عله وسادة رمل _ الخيمة بناته يرد صعب
حاول يكوم وماكدر _ وتتمضحك اكباله الغرب
حافيات ___ حافيات
لا كعدن ولا رايحات
********
ينازع بده بحر الشمس _ سبعين الف مارحمته
رغم العطش رغم التعب _ خيل اعوجيه داسته
ماتن بناته من البجي _ صعبت عليهن حالته
شال ايده لسكينه وبجه _ ارجع دخيلك صاحته
باجيات ___باجيات
كلهن اهم شي سالمات
********
شمرو عله حسين الحجر _ والدم عله عيونه جره
ويتبادلون اعله الطعن _ عشره بعد عشره سره
واحد يجر ابمحبسه _ كالوله لا كص خنصره
نرعبن بناته وغمضن _ يردون كطعت منحره
صايحات ___ صايحات
مغمي عليهن طايحات
********
لزينب اجن يتصارخن _ وكبالهن كلشي وظح
كل الخيم هسه بخطر _ ياعمه والدنه انذبح
مو جنه ذاك اعله الرمح _ ياعمه ابونه هوه صح
سكنه ورقيه تشابكن _ كلب اليتيمات انجرح
ضالات ___ ظالات
ينزلون راسه متانيات
********
تمت ____ علاء الزيدي

هذا انته يحسين // جا خنصرك وين
شيبك حجه _ جفني بجه _ ياابو علي مسلبينك
********
ماصدكت مامعقول _ هذا انته عالترب
بجسمك الملم ضليت _ يالتارس الدرب
مالحكت امسحهه الدموع
صدرك لكيته ناقص اضلوع
حيرني جفك خويه يحسين
صوب الخيم شو بعد مرفوع
فدوه احجي وياي // يمكن ردت ماي
يجوي الجمر . حر الظهر _ كل هذا ومعطشينك
********
بالهيمه افتر باليل _ ماحصلت خبر
خنصر ادور مكطوع _ من جفك انبتر
جسمك لكيته تارس الكاع
الخنصر يخويه ومحبسك ضاع
فوك الرمل يالباقي عريان
لو بيدي أعيد اوياك الوداع
انه اختك ام عون // يمغمض العيون
اصبع بعد . وين انوخذ _ بلا خنصر مخلينك
*******
فوك الالف بيك جروح _ طولك صبح جرح
من الكفه صعبه هواي _ يالضامي تنذبح
وجهك اليه ردته يندار
بس فاجئتني فوكك احجار
شوج ورمل جرحهه الخدود
وشيبك تحنه بدمك الحار
شكد ركزت بيك// بيمن اداويك
بكصتك أثر. رمي الحجر _ يالبل حجر رامينك
*******
بيمن اغطيك حسين _ وصله الك ردت
مذبوح ضامي ومسلوب _ جم مره جا متت
ذاكه قميصك لبسته الناس
يحركون رادو كلب عباس
كبال الكمر كامو يضحكون
منه سلبنه اعمامت الراس
ماتفزع نشوف// ماعندك اجفوف
ذاك الكمر . شابع قهر _ وشكد حجي مسمعينك
*******
سهم الكلب شو مكسور _ بالحافر انسحك
حته النفس هم مسلوب _ وبصدرك اختنك
الخيل الاجنك كلش اثكال
ظلعك ترف وبسرعه ينشال
فوك الحوافر دمك احجول
مطشر لكيتك منك شظال
الحد مااجه الليل // ماتعبن الخيل
فوكك مشن. ماهودن _ ياخويه الله متعبينك
*******
تمت ____ علاء الزيدي

صبرك ايعذرك_جم جرح عمرك _ يالغريب
اليمشي يعثر _ شيبه يكثر
********
مانشف خدك دخيلك _ يلجم اعيونك مغيبك
انته من كد المصايب _ اكثر امن الغيم شيبك
تكتلك الحركه اعله جدك يمه من تروح
تلكه عبدالله اعله صدره بالسهم مذبوح
يعلم الله ياابو صالح شكد تشيل جروح

مانشف خدك _ عايش الوحدك _ ماتنام
الدمعه احمر _ شيبه يكثر
********
يابوصالح فاكد اهلك _ عالبجي محد يلومك
بالصحاري حافي تمشي _ وبالشموس تخلصه يومك
من الشمس ماتحمي وجهك ما تخلي اللثام
شيبت حتى العمامه كله من الشام
يا حنين تواسي عمتك بالخرابه تنام

كلمت صمتك _ رايح العمتك _ بالشموس
اليسكن البر _ شيبه يكثر
********
حتى صبرك ظل يعذرك _ جروحك الما الهه طيبه
تعرفن بيك المصايب _ عليك ماتعتب مصيبه
من ثكل هاي المصايب حدبت معذور
مثل الحسين اعله أخيه ظهرك المكسور
حزنك اتجدد يمهدي من اجه عاشور

جفنك الذابل _ يم ابو فاضل _ يسيل
اليبجي مظطر _ شيبه يكثر
********
اليغيب وياه عذره _ لازم نقدر ظروفه
هلالك الما بين النه _ يمته يالمهدي نشوفه
دم أبو اليمه يغايب يجري بعده وحار
سحكت الخيل اعله صدره بصدره شنهي الصار
سيدي المغرب يخنكك ندري تطلب ثار

جدك تعذب _ جدك تسلب _ بالطفوف
الينطي منحر_ شيبه يكثر
********
ياابو صالح بالمجالس _ احنه نتشرف تجينه
الخاطر المسبيه اظهر _ بغيبتك والله انسبينه
انته ايامك محرم وللمجالس جاي
تختنك خنكت سبايه من تشوف الماي
وزع اجروحك علينه عندك انته اهواي

تعبن روحك _ سيدي جروحك _ ماتطيب
التانه يظهر _ شيبه يكثر
********
تمت ____ علاء الزيدي

بويه جنت اماشيك
كلبي خايف اعليك
بروحك ما اوصيك _ بويه انه علي
اوكف لا تجي وياي
خايف تتعب اهواي _ بويه انه علي
*********
بويه انسه العطش _ بويه رد للخيم
لو طحت لا تجي _ لا يلوحك سهم
بوجهي كلي اشفت _ بسرعه دمعك جره
شفافي بيهن جرح _ اشفافك امفطره
ودعني واشتمني واشتمك واروح
من اوكع من مهري ماريدك تنوح
بويه شكد اهم بيك
الوحدك راح اخليك
اسف من ابجيك _ بويه انه علي
يماي بعازت الماي
خايف تتعب اهواي _ بويه انه علي
*********
جنت تركض ركض _ لو شفتني انجرح
شتنوصف حالتك _ لو شفتني انذبح
ما اتعبك ردت _ بيه اعرفك تحس
بصدري حار النفس _ بويه يجوي الشمس
لا تهتم لعيونك اتوذر صحت
لا تركض بالهيمه لو تسمع متت
بصدري من يطعنون
انته غمض العيون
كلي بحالك شلون _ بويه انه علي
تبقه رايح وجاي
خايف تتعب اهواي _ بويه انه علي
*********
علي الأكبر صحت _ انزل من المهر
تعطل ابروحتك _ ظهري لا ينكسر
انه ريجي يبس _ وانته ريجك خشن
خلي نبجي سوه _ بويه حظن بحظن
ادركني ماصيحك لو ظاع النفس
خافنك تشبكني وتسحكك فرس
بصدري خل يسحكون
اسكت وانه ممنون
سالم انته بس كون _ بويه انه علي
اوداعك زيد اضماي
خايف تتعب اهواي _ بويه انه علي
*********
تعدل اعمامتي _ ومالت اعمامتك
انه يمك عدل _ وشيبت لحيتك
شلون بيك الظهر _ صدري من ينهشم
توكع اعمامتك _ وانته بيه تلم
بشيباتك تجمعني ويوليدي صحت
شما توكف ماتوكف كد ما دنكت
رمشك شيب ابساع
ابنك تارس الكاع
منيدك اكبرك ضاع _ بويه انه علي
ارجع عندي الك راي
خايف تتعب اهواي _ بويه انه علي
*********
جنه نمشي سوه _ ابو مصاحب ابن
تنجرح انجرح _ تندفن اندفن
بالي يمك يضل _ عكب موتي بعد
عالخيم تلتفت _ لا اخو لا ولد
تتمددت وي طولي وتبوس النحر
من ترجع لخيامك ماعندك ظهر
ترجع للخيم راح
وايدك فوك الاصفاح
كتلك لا تجي ارتاح _ بويه انه علي
شايل همك بهاي
خايف تتعب اهواي _ بويه انه علي
*********
خل اشمك نفس _ وانته نسمت صبح
هسه شابك علي _ شويه تشبح رمح
فكر ابطيحتك _ جروح بيك شكثر
عله صدرك وسف _ راح يكعد شمر
ذباحك بالخنجر راح ايعلعلك
تعذرني من اتوذر ماافزع الك
بالي بويه مشغول
اول تالي مكتول
راح تسحكك خيول _ بويه انه علي
ونتك بويه بهداي
خايف تتعب اهواي _ بويه انه علي
*********
تمت ____ علاء الزيدي

باليل_ زينب تعاي وانتي لميني
باليل _ مطشر يخويه راح تلكيني
تعرفيني خويه راح بالكوه
تجيبج عليه ريحت الخوه
خويه _____ خويه
*********
يزينب ارد اوصيج _ بمكاني راح ادليج
رمح بضلوعي اخليلج علامه
عليه من تدورين _ اريدج ما تتعبين
اخيج عالرمل صاير منامه
اكومن مابعد حيل _ اصبري الجيت الليل
تعاي ودوري بالكاع _ اخيج دفنته الخيل

تلكين _ الحافر يزينب ماخذ اظلوعي
تلكين _ يجرن سويه دمي ودموعي
اتيهين اخيج هذا مو هوه
تجيبج عليه ريحت الخوه
خويه _____ خويه
*********
احذري من تطلعين _ يزينب لا تعثرين
شماته الكاع متروسه يخيتي
دليلج جفي مرفوع _ خنصر منه مكطوع
هينه جروحي اموتن لو وكعتي
الياخذ محبس الايد _ يشمر خنصري بعيد
نقص اصبع تحسبين _ ومصايب كلبج تزيد

تحسبين _ تسعت أصابع بيدي مو عشره
تحسبين _ جم مره اخيج ينكسر ظهره
فوك الرمال وظهري يتجوه
تجيبج عليه ريحت الخوه
خويه _____ خويه
*********
يخيتي الليل إذا صار _ تعاي وشيلي الحجار
ادور عالهوه لصدري خنكني
اذا شفتيني متعوب _ بجبيني ركزي مصيوب
ما كفاهم الحافر سحكني
ثكيله تصير الانفاس _ وتطيح اعمامته الراس
تصيح الناس اذبحوه _ بعد ما عنده عباس

عباس _ الحجار اخيك غمض اعيونه
عباس _ الماعنده اخو بالطف يذبحونه
خلافك يخويه الدنيه ماتسوه
تجيبج عليه ريحت الخوه
خويه _____ خويه
*********
اريد ارجع للخيام _ بس كظني السهام
يزينب سهم المثلث ذبحني
طلع من ظهري أحس بيه _ اعله هونج لا تجريه
اكوم واوكع اكبالج جرحني
شهكت بكلبي من طاح _ ثلث من عنده أحس راح
صاحو طاح الحسين _ لتخلونه يرتاح
احاه _ مابين اديه طاح كلبي
احاه _ عن الخيام شبعده دربي
السهم بدليلي زينب شسوه
تجيبج عليه ريحت الخوه
خويه _____ خويه
*********
اموت وانه عطشان _ واضل بلايه دفان
وقميصي اكبالج الشامت يلبسه
بهيمه رايح انعاف _ وتضيع بوجهي الاوصاف
ونحري يالرمل رايح يترسه
دخيلج غمضي العيون _ إذا بيه يذبحون
برمحهم راسي ينشال _ يموتونج يريدون

عطشان _ ذباحي خويه بصدري يتربع
عطشان _ يسمعني اصيح بنحري ظل يكطع
ظليت انازع خويه واتلوه
تجيبج عليه ريحت الخوه
خويه _____ خويه
*********
تمت ____ علاء الزيدي

زينب تسألين _ شبي ظهرك حسين
تعبني عباس _ لا ايد لا عين
مشيب رجعت و تعبان
خلصت حيل او خوان
*******
ادركني من صاح _ كلت الاخو راح
ومشيب وصلته
فليت الانكاب _ وأمسح بالتراب
عن وجهه مسحته
من مهره اخيي اعله الوجه واكع
يزينب من كفه راسه السهم طالع
تجيته اعله صدري من بده ينازع
منك شوف كتله خويه ما شابع

حاجاني بهداي _ كوه اسمع الصوت
ارجع للخيام _ لا زينب تموت
حكي من اجيلج كبران
خلصت حيل او خوان
*******
شحجيلج ام عون _ شلته من المتون
بس طحنه سويه
مديت اله الايد _ بس كلي شتفيد
كطعو خويه اديه
اخلي بحظني راسه ويرجع يوخره
من مديت اديه خنكته العبره
اثاري مكطعات اليمنه واليسره
جف عباس هظمني الشامت ايشمره

شامت الي صاح _ كلي اسمع وشوف
شوبله يحسين _ تعرف هالجفوف
ونشمرن اعله التربان
خلصت حيل او خوان
*******
متخوصر اندار _ خلاني محتار
زينب امشي واعثر
ظاع الاخو ظاع _ بي ترسو الكاع
فوكه بدمعي افتر
تساليني اعله اخيج زينب شلونه
عافو كاع الله وسحكو امتونه
كل ساعه برمح كامو يطعنونه
شكد حاول يكوم وما يخلونه

حافر يوديه _ وحافر يرده
اتوقع الخيل _ ماخذته خده
جوده اعله صدره وعطشان
خلصت حيل او خوان
*******
روحيله باليل _ من تتعب الخيل
وحظري خويه صبرج
حته تعرفين _ شبي ظهر الحسين
مثلي يحني ظهرج
أصعب ليله هاي بعمرج الليله
فكرج ينشده لمن تروحيله
تشيب ويه راسج رايح الشيله
اعله حطته يبقه مايتطشر ادعيله

بس اوكع اتروح _ منتظره هالناس
مااظن تلحكين _ خويه اعله عباس
تكليلي شيبك كثران
خلصت حيل او خوان
*******
كل ساع أجر آه _ وتمدد اوياه
واشتمه بلحيته
كتله اتعب اهواي _ لو ما تجي وياي
يالظهري حنيته
من راسه جرح ياخويه لجدامه
اوكف ووكع يشوفوني كدامي
من راسي طاحت حته العمامه
راح وادري ماتتعوض ايامه

دم الاخو هاذ _ تشوفينه بيدي
فوك النهر راح _ ظهري وعظيدي
ظهري عدل زينب جان
خلصت حيل او خوان
*******
مات الاخو مات _ وفراكه حسرات
خل نبجي سويه
ما جني ارتاح _ طول الخيم راح
طولي ماله جيه
عن حر الشمس غطيته بالرايه
طولي اعله النهر ماجبته ويايه
غمض عينه وكلي بااخر احجايه
سلملي اعله اخيتي زينب اهوايه

شتفيد الدموع _ مايرجع الراح
مات الاخو مات _ وأيدي اعله الصفاح
متشمته بيه العدوان
خلصت حيل او خوان
*******
تمت ____ علاء الزيدي