اذا نريد نناقش اهم الاسباب الي انطرحت بوسائل التواصل الاجتماعي عن اسباب التحرش الجماعي الي يصير غالبا باحتفالات راس السنة:

⭕️ 1- بالنسبة للتعويل على القانون هذا خيار العاجز, لان حتى بالدول المتقدمة الي سابقينا بسنوات في جانب التبليغ والتحري هم لا تزال تحدث حالات تحرش واغتصاب لان دائما اكو ابتكار لاساليب تراوغ وتخدع الاجهزة الامنية, فكييف بدولتنا..؟ وحتى لو القي القبض عليهم مثلما صار وي بعض المتحرشين بالبصرة هم ما رح يصير رادع للبقية, لا العقوبة رادعة ولا اساليب الكشف والتتبع متمكنة وتخوف, اضافة الى ان التحرش لو حصل فالازمة النفسية الي تتبعه عند الضحية ما رح يحلها اكبر قانون.

⭕️ 2- الكثير من هالشباب الطايشين ماعدهم احترام لنفسهم ولا يهتمون لسمعتهم لان يشعرون بالضياع في مجتمعهم وبلدهم وغالبا لان اوضاعهم المادية والعلمية والدينية سيئة وزواج ماكو ,
اضافة الى انهم ما متربين اصلا, لان اهاليهم غالبا اما فاسدين مثلهم او جاهلين بالتربية الصحيحة وتعليم الاخلاق والدين..
اكو الاسباب (لكن مو مبررات) ادت الى ان يكون الاهالي جهلة وفاشلين بالتربية منها الازمات السياسية والامنية والاقتصادية الي حلت بالبلد من زمن الدكتاتورية الى وقت قريب بحيث الاب والام حايرين شلون يوفرون لجهالهم ابسط مقومات الحياة ويلزكون االعيشة تلزيك وينهم وين التعلم والتعليم..؟!

⭕️ 3- الانفتاح المفاجئ والتحرر من عادات المجتمع الصالحة والتأثر بالغرب ولد الهمجية:
الانفتاح السريع الي صار عالعالم بالعراق بعد سقوط الدكتاتور حصل خلال جيل واحد, مو تدريجي خلال اجيال, بحيث مشاهد العري والفساد والتسليع والاباحية والتحرش والاغتصاب والعلاقات غير الشرعية وكل فضلات العالم صارت موجودة داخل العوائل, مو مثل الغرب حيث حصل الانفتاح بشكل تدريجي على عدة اجيال وتطبعوا تدريجيا على وجود الفساد حولهم, وابتكروا باساليب اكثر "رقياً" لاشباع الشهوات الجنسية الفاسدة من اساليب المجتمعات المتأخرة.!

⭕️ 4- تسليع الاناث الي ديصير بشكل متزايد على وسائل التواصل وعلى مستوى افلام ومسلسلات واعلانات ومواقع اباحية ومؤثرين على مستوى العالم او العراق, هذا سبب مهم لترسيخ فكرة ان الانثى فقط مصدر اثارة جنسية بل هي تستمتع بالتحرش بيها, فهو يتصور ان كل البنات بالشوارع من هذا النوع اللعوب وفاسدة وتفرح باثارة لعاب الشباب بلبسها وخاصة اذا مظهرها ما يوحي بالحياء, واكدتلهم هاي الفكرة الحفلات المختلطة وبلوكرات مواقع التواصل.

⭕️ 5- المفروض عقلا من نعرف اكو خروقات تتكرر كل مرة في نفس السياق لازم نتخذ اجراءات احترازية خاصة بوجود العقل الجمعي الي خله الناس تصفك بساحة الوثبة وشاب معلك عالعمود..!
حتى بالدول الغربية مثلا يحذرون النساء من السير وحيدات في الشوارع المظلمة, وعلى مستوى القانون يصير تواجد امنية ومراقبة كاميرات.. هذا على مستوى الدولة, اما بالنسبة للعوائل منطقيا لازم تتجنب التواجد في هكذا اماكن بسبب احتمالية الخطر, والمغالطات النسوية الليبرالية مال حريتي وحقي ذني نرميهم باقرب سلة نفايات, ندري حقج تطلعين بس الاذى المحتمل الي احتمال يصيرلج شنو الي يعوضه؟ الازمة النفسية الي يسببها التحرش شنو اليعالجها.؟؟ كافي حماقة الانسان طبيعي يتجنب اماكن الخطر وطبيعي يحط باب لبيته رغم اكو قانون ورغم انه ماكو واحد اله الحق بسرقي البيت..!

⭕️ 6- قلة فهم الدين واخلاق الدين واقتصاره على الشكليات, والوقوف بوجه فريضة الامر بالمعروف والنهي عن المنكر هي ابرز المشاكل, لان المجتمع مثل البدن اذا مابي مناعة ذاتية تكافح اي خطأ بسرعة وبشكل مباشر هذا البدن ما رح يسلم ابد, لذلك الله تعالى وضعلنا جهاز حماية بأصل الدين, وخلاها فريضة مثل الصلاة والصيام واحنه ما تخلينه عنه للاسف بسبب الاتكالية على الغير والتأثر بالمغالطات الليبرالية الي ينشروها المنفتحين والنسويات دائما .. اضافة الى ان دور الحكومة سلبي في كثير من الاحيان, مثلا من يكون الفعل الفاسد مباح قانونا رح يواجه الفرد صعوبة في النهي عن المنكر والتصدي للانحراف..