#من_رسائلكم
يعطيكون الف عافية يارب ع كلشي عم تقدمو وعند رب العالمين مابضيع شي كلو بميزان حسناتكون يارب . ❤️ هلق انا كنت بدي اسئلكون اني وضعي برياضيات والفيزيا حزين كتير للأسف😔 وانا عم تابع بمعهد بس مشكلتي اني ماعم اقدر ادرب يعني انا بحتاج حدا انو يفهمني التمرين يعلمني طريقة اني حل لانو كل مااجي حل بخربط وهاد شي عادي بعرف بس انو بنزعج احيانا ومن شغلة تانية انا يعني بحس عندي تقصير بل فصل الاول هوي مو بحس عندي والله 😁 وقلت خلص بتركو ع جنب وبلش فصل تاني وانا معهدي ماعملولنا امتحان فصل اول ولا هلق بلفصل التاني قبل يومين خبرونا انو في امتحان وعنجد هيك خربطونا كتير يعني ضعت انا الصراحة اذا بدرس الفصل الاول رح قصر بفصل التاني وبعدين انا سلمت اموري رب العالمين وحاشاه ان يخيب املنا 🌸وشغلة تانية اني كل ما أجي ادرس بقول خلص رح ركز وبلش جد لك بكون مستمتعة بحس حدا عم يقلي اشياء سلبية اني مارح لحق راح الوقت لسا في مراجعة مواد ومدري شو من هل الحكي اي بروح الوقت وانا مو دارسة غير كم فقرة اي والله تعبت من هل الحالة شو اعمل انصحوني الله يوفقكون ويجزيكون الخير يارب 🌸
#الرد
الله يعافيكي ، واجبنا عم نقدمه اتجاه اي طالب وإن شاء الله نكون عم نفيدكم🌸🤲
بالنسبة لمادة الرياضيات مادة فهمية بحت ، لازم دائما تدربي على التمارين وتعرفي كل خطوة كيف اجت ، المهم تكوني عارفة كيف وصلتي للجواب الصحيح .
بس تعرفي طرق الحل مارح تواجهي صعوبة ، ما دائما رح تعرفي تحلي التمرين من اول مرة أحيانا بتحلي مرتين وتلاتة لتوصلي للجواب الصح ، وطبعا هي المشكلة بتنحل بس تطبقي الحلول متل ماقلتلك بالتدريب .
في حال واجهتي صعوبة فيكي تشوفي الأستاذ عبد العزيز الشملان والأستاذ فارس جقل
وإن شاء الله بتكون مشكلتك محلولة بس تتابعي معن.
بالنسبة لمادة الفيزياء لا تدرسي شي خارجي لان مسائل الكتاب كافية للفحص النهائي لان بتجي نفسها او مع تغيير الأرقام .
لهيك بتحفظي النظري مع فهم المسائل وإن شاء الله بتجيبي ال ٤٠٠ .
وفي الأستاذ أنس أحمد في حال مافهمتي شي تابعين.
بالنسبة للتراكم أول شغلة تعمليها هيي دراسة مقرر الفصل التاني وما تهملي شي منه وفي حال زاد وقت من يومك ادرسي من التراكم ، ماشي لشهر الانقطاع بتلحقي وزيادة.
بالنسبة للأفكار السلبية لازم تشيليها من بالك بشكل نهائي ، وتحطي مكانها الأفكار الإيجابية وأنك بتقدري تلحقي وما في شي مستحيل.
والوقت الباقي كافي للتفوق لهيك لا تخافي.
بالتوفيق الدائم🖤
دعواتك
@futuredoctorbacalorea
#Ahmad_Adam

#من_رسائلكم
يعطيكن العافية
انا بكالوريا ٢٠٢٢ وفي عندي تقصير ببعض مواد متل الوطنية والعربي والعلوم اما رياضيات وفيزيا وكيميا وانليزي ماشي مع الاستاذة بس حاسة حالي ضايعة وماني عم احق اعمل اي شي وبشرد كتير وانا عم ادرس ولما ادرس ما بأنجز شي مع انو بكون قاعدة ع الدراسة خمس او ست ساعات تقريباً
وعم فكر انسحب بس الصراحة مترددة مشان بابا وماما وماني عرفانة شو اعمل
بدي الحللل مشاان الله
واذا بلشت من اليوم بلحقق؟
دعواااتكم💚
#الرد

الله يعافيكي🌸
بالنسبة للوقت الباقي كافي وزيادة لا تخافي ، كافي لحتى تتفوقي كمان وتجيبي علامات تامة بإذن الله .
بالنسبة لمشكلة الشرود حاولي تعملي جو للدراسة، لا تفكري بأي شي تاني.
ادرسي نص ساعة وارتاحي خمس دقايق
هيك بترجع الطاقة على الدراسة أكتر من اول .
بالنسبة للانسحاب هي الفكرة عمليلها حذف بشكل نهائي ولا تفكري فيها
فكري انك بتلحقي ورح تكوني الأولى بإذن الله
الوقت الباقي كافي لأعلى العلامات
بالتوفيق 🌸🌸
دعواتكم🤲
@futuredoctorbacalorea
#Ahmad_Taleb

#من_رسائلكم
مرحبا،عم أدرسها أدبي حرة ،تركت المدرسة من سنتين تقريبا،وتزوجت انا كنت كتير شاطرة، وقررت انو بدي كفي،واذا نجحت اذا الله راد،بدي حقوق وبلشت كتير منيح بس هلئ عم حس انو خلص الوقت عم يمرق وأكيد رح ارسب او مارح جيب المعدل يلي بدي ياه ،مكتئبة وخايفي، في كتير مواد مقصرة فيا اكيد مارح لحق بهالوقت الباقي،لأن يادوب مخلصا فصل الأول واللغات مودارسي شي منن، وكل مابنظم برنامج أمشي علي ، برجع ع نفس الروتين، بضل فكر انو انسحب هاي السنة وقدم السنة الجاي،أسفي طولت 😐💜
#الرد
أهلا وسهلا فيكي🌸🖤
وشكرا لمشاركتك🌸
إن شاء الله بتوصلي لحلمك وبتصيري أعظم حقوقية بالتاريخ🤲🤲
الخوف و التوتر لازم ننساه ، ونفكر بالمستقبل الجميل بعد البكالوريا😍
الوقت الباقي من بس بتلحقي فيه بتقدري تجيبي المعدل التام .
بس شوية تنظيم وقت وهمة أكبر بتوصلي لهدفك.
شو رأيك أنه في طلاب بتبلش بعدين وعم تجيب مجموع عالي !!!!
عم يقدروا يحققوا هدفن ويوصلوا وانتي كمان رح توصلي لهدفك بإذن الله
بالنسبة للغات في نوطة البسيط للاستاذ مؤيد حمدان انكليزي اذا بتدرسيها بتضمني تامة
وفي ملفات لغة فرنسية نزلتن على قناة بناة المستقبل كتير مفيدين فيهن ترجمة للنصوص مع شرح مفصل للقواعد .
شوفيهن وإن شاء الله بتستفادي
فكرة الانسحاب لا تفكري فيها أبدا ، فكري انك بتلحقي وبس .
بالتوفيق الدائم🌸🖤
دعواتك
@futuredoctorbacalorea
#Ahmad_Adam

#من_رسائلكم
مرحبا اول شي شكراً كتير ع الدعم والطاقة الإيجابية يلي بتعطونا ياها بكل رسالة انا طالبة بكالوريا علمي علي كتير ضغط وتراكم بس عندي مشكلة انو كلشي بحفظو ينساه مثل العلوم🥺🥺 درس المغلفات والعاريات عدتو اكتر من مرة وآخر شي بالمذاكرة نسيت شغلات وخربطت بالتنين وأحيانا بصير معي إحباط من ورا هالشي وبحس حالي عم بدرس من أول السنة ع الفاضي وفكر انو انا ما قد العلمي مع اني بحب العلمي كتير
#الرد
أهلا وسهلا🌸🖤
واجبنا صديقتي😊
بالنسبة للنسيان أمر طبيعي عند كل الطلاب نتيجة كثافة المعلومات والضغط اليومي....
وهي بعض الحلول يلي بتقدر تساعدك:
🍀 دراسة المواد الحفظية في الصباح الباكر فقد أثبتت الدراسات أن الدراسة في الصباح أفضل بثلاث مرات من الدراسة ليلا
🍀 بعد حفظ كل درس اجعل أحد أفراد عائلتك يسمّع لك ما حفظت.
🍀 حل أوراق عمل لكل درس بعد الانتهاء من حفظه.
🍀 ربط المعلومات بأشياء من الواقع .
🍀 تكرار المعلومة كل أسبوع لثبيتها لفترة الامتحان.
ومادة العلوم بالذات بدها فهم وإعادة كتير.
صديقتي النجاح بدو تعب كتير وإن شاء الله بس توصلي لهدفك رح تنسي كل تعبك.
بس توكلي على الله ولا تخافي .
بالتوفيق الدائم🤲🤲
دعواتك🌸🤲
@futuredoctorbacalorea
#Ahmad_Adam

#من_رسائلكم
هلق انا بكلوريا اعادة علمي
مخلصه كلشي وماعندي مشكله باي شي
بس بدي اعرف كيف بدي قسم لمواد بحيث بيخلص معي ع شهر 4
لان بدي عيدو كذا مره كيف فيني قسم المواد
#الرد
أهلا وسهلا صديقتنا 🌸🖤
ممتاز ممتاز جدا👏👏👏
بما انك مخلصة منهاجك هاد مؤشر ايجابي كتير منيح.
لا كتير تفكري وتقولي لازم عيد اكتر من مرة❌❌
المهم تدرسي بتركيز وتثبتي المعلومة للامتحان وما تنسيها وتحلي نماذج ودورات لتتمكني أكتر....
انا برأيي خلصي المنهاج هلق مرة
وبشهر 4 مرة
وبشهر5 دورات و نماذج
وبإذن الله علامات تامة🤲🤲
بالتوفيق صديقتنا🌸🌸🖤
@futuredoctorbacalorea
#Ahmad_Adam

#من_رسائلكم
يعطيكن العافية 💙..
معلش تساعدوني..
هلق انا من الطلاب الشاطرين وطموحي الطب بس الي فترة دراستي صايرة كتير ضعيفة يعني حتى وصلت أنو دروسي لخصوصي معد درست شي منن
وجبت للمدرسة تقرير طبي قلت بغيب مشان ادرس لأنو مدرستي صايرة كتير سيئة حتى كمان غبت ومادرست يعني ما استفدت شي.. 💔
والملل و النعس والخوف عم يسيطرو عليي لدرجة كبيرة وغير هيك كل ما شافني حدا بقلي شكلك شكل دكتورة هاد الشي كتير بحفزني.. بس متوترة كتير انو ما اقدر حقق حلمي لآني ماني شايفه غيرو قدامي..
آسفه ع الإطالة بس عنجد أني بحاجة لمساعدتكن وشكراا كتير.. 🤍
#الرد
اهلا
اقرأي الرسائل الي داخل الروابط وان شاء الله رح تستفادي🌸
#النصيحة_الثالثة❤️✍

مشكلة الخوف و التوتر 😧👇

▪︎https://t.me/DoseofoptimismforBacalorea/2242

▪︎https://t.me/DoseofoptimismforBacalorea/2243

▪︎https://t.me/DoseofoptimismforBacalorea/2244

▪︎https://t.me/DoseofoptimismforBacalorea/2245
@futuredoctorbacalorea
#Saja

#من_رسائلكم
السلام عليكم
أنا من لما نزل برنامج الإمتحانات وحاسة بداخلي خوف من الامتحان وحاسة كل ماإجا خوف زيادة عبدفعني لأدرس مرت علي ظروف صعبة وللآن وضع دراستي مو تمام هلء السؤال لإيمت لازم خلص المنهاج وكم مرة لازم ينعاد وشو الطريقة المنيحة لدراسة الفلسفة والوطنية والعربي بحيث سكرن وماأنساهن وكمان عندي حلم بعرف هالطموح قليل بس خايفة ماأوصله
#الرد
وعليكم السلام
بالعكس لازم برنامج الامتحان يعطيكي دافع لحتى تكملي بقوة وشغف اكتر يعني مو كل ما شفتي البرنامج تخافي وتتوتري لا بالعكس
نظمي وقتك وحطي برنامج دراسي ، لسا معك وقت ٣ شهور وهالوقت ابدا مو قليل واذا كان عندك إرادة وإصرار بتخلصي المنهاج أكتر من مرة

مشان المواد هدول مواد حفظية يعني قبل ما تبلشي بالدراسة الفعلية اقرأي الدرس اكتر من مرة ع الحاضر وافهميه بعدين احفظي وبتلاقيه صار سهل عليكي
ومشان الإعادة للمنهاج مو مهم كم مرة ولا اكتر من مرة المهم تقرأيه بتركيز ودقة

واقرأي هالنصائح بفيدوكي🌸
#النصيحة_الثالثة❤️✍

مشكلة الخوف و التوتر 😧👇

▪︎https://t.me/DoseofoptimismforBacalorea/2242

▪︎https://t.me/DoseofoptimismforBacalorea/2243

▪︎https://t.me/DoseofoptimismforBacalorea/2244

▪︎https://t.me/DoseofoptimismforBacalorea/2245
@futuredoctorbacalorea
#Saja

طلاب البكلوريا الأحباء
في هذه الفترة من السنة أسمع عادة تصريحات من قبيل ( مثلاً : كنت بظن أني رح أجمع فوق ٢٢٠ .. بس هلق صرت بعرف أنو تحت ٢٠٠ )
من الآخر هذا التفكير مضحك و طفولي
الأمور تتغير .. تتغير نحو الأفضل بشكل لا يمكنك تخيله
و تتغير نحو الأسوأ أيضاً بشكل لا يمكنك تخيله ..
تغير دراستك بالاتجاهين سيؤدي إلى تغير النتيجة بالاتجاهين ..
يجب أن تختلف .. أن تتغير .. أن تستمر بالمحاولة ببساطة . كن شرساً و صبوراً .
النتيجة و الراحة ليست الآن .
أتمنى لكم كل التوفيق و العزيمة و الإرادة القوية .
#Ahmad_Adam
#بناة_المستقبل_نحو_الحلم
@doseofoptimismforbacalorea
@futuredoctorbacalorea

#من_رسائلكم
اول شي شكراً عالنصايح يلي عم تقدموها والله يجزيكن الخير ❤️.
مبدئياً عندي مشاكل بدراستي ومابعرف كيف حلّا مع أنو جرّبت كذا طريقة!.
مشكلة النسيان، خاصة بمادة العلوم والوطنية، العلوم عم ادرسوا ووقت بروح عالمذاكرة بنسى كلشي!، كل المعلومات بتختفي حتى الوطنية نفس الشي.
والشرود وقت بكون عم ادرس بترك الدراسة وبقعد بتخيل وقت النتائج 😂، أو شي أحداث صارت معي باليوم، ومشكلة الملل وخاصة بمادة العربي، مع انو العربي أكتر مادة بحبا بس بقعد ربع ساعة عليا بعدين برجع بقوم ووقت برجع بغيّر المادة...
مع العلم حاطة قدامي عشرين ورقة تحفيز بس مابعرف بحس أديش ما درست عم انسى، ولسا الشي يلي بزيد الوضع سوء هنن طلاب الصف بمدرستي؛ دائماً بنشروا طاقة سلبية وهاد الشي بشكل لا إرادي بوترني وباثر علي، بخليني حس دوماً اني مقصرة!، والله مابعرف اذا فهمتوا مشكلتي 😂 بس بتمنى تساعدوني ولو بنصيحة وحدة وشكراً مرة تانية ❤️.
#الرد
أهلا وسهلا صديقتنا🌸🖤
وشكرا لمشاركتك🌸
بالنسبة للنسيان أمر طبيعي عند اي طالب لهيك لا تتوتري .....
العلوم والوطنية مادتين حفظيات وفهم بنفس الوقت ...
وبدن إعادة كتير ، حاولي تدرسي المادتين الصبح بكير لأن نسبة التركيز أكبر بكتير من دراسة الليل
وخلي حدا يسمعلك بعد ما تخلصي حفظ لان احتمال يكون ثغرات ما منتبهة الها اضافةً لحل أوراق عمل لكل مادة والتكرار ثم التكرار لحتى تتثبت المعلومة للفحص
وكل أسبوع عيدي يلي بتدرسيه مشان ما تنسي
بالنسبة لشرودك وتفكيرك بوقت النتائج وانك ناجحة من الأوائل خليه يكون محفز الك لحتى توصلي لحلمك .
وأفضل حل كان مفيد الي وماعد شردت هوي ادرس نص ساعه مع استراحة خمس دقائق ....
هيك بصير عندي طاقة ومابمل ولا بشرد.
بالنسبة لمادة العربي
خصصي وقت الها متل اي مادة ولا تنسي أنو عليها 400 علامة
والعلامة الوحدة بتفرق بمستقبلك لهيك أوعى تهملي المادة...
ولا تردي على كلام رفقاتك السلبي لان مابدن ياكي تكوني أفضل منن.....
وإن شاء الله توصلي لهدفك
بالتوفيق🌸🖤
@futuredoctorbacalorea
#Ahmad_Adam

#من_رسائلكم
سؤال هلق انا كم مرة بلحق عيد المنهاج
وكمان كل يلي حويلي عم يحبطوني
خابيفة بكرا بس ماجبت علامة منيحة الكل يقلي بتستاهلي ومادرستي ومن هالحكي كتيير خايفة وكمان عم نام وقت زيادة
#الرد
العبرة مو بعدد المرات صدقيني
كل ما درستي بدقة وتركيز كل ما كنتي بغنى عن الإعادة اكتر من مرة
اساسا إعادة المنهاج أكتر من مرة بتساعدك بتثبيت المعلومات فقط فأنتي ليش تتعبي حالك وتضلي تفكري لا خلص ادرسي بدقة وتركيز وشغف وايمت ما تخلصي خلصي واذا ضل في وقت للاعادة بكون منيح وبتعيدي فيه

الناس الي حواليكي هنن ناس ما عندهن لا شغلة ولا عملة بالحياة غير يستقلو بالي عندو حلم لان هنن ما عندهن هدف وما عندهن حلم لهيك اختاروكي انتي لحتى تكوني هدفهم ويحبطوكي وما توصلي للي بدك ياه لهيك نصيحة طنشي ولا تسمعي الهم واتركيهم يحكو شو ما بدهم لان بالنهاية انتي بتعرفي حالك وبتعرفي إمكانياتك وقدراتك وشو ممكن تعملي مشان حلمك ، كوني قوية وصاحبة مبدأ والك شخصية مشان تثبتي لهالناس انك بتقدري ووصلتي رغماً عن كل شي عم يحكوه، كوني قوية لان مكانة عظيمة بهالمجتمع 😌💪🏻
@futuredoctorbacalorea
#Saja

#من_رسائلكم
مرحبا 🤍

أنا لما كنت حادي عشر خلصت الكيميا والعلوم وبالصيف خلصت الرياضيات والفيزيا والعربي ومن اسبوع خلصت الانكليزي ومسمعا الفيزيا والرياضيات والعربي كتيرررر ومليت منن
بس العلوم والانكليزي مو مسمعتن
وعندي تراكم شوي بآخر كم درس
الكل عم يقلي انو اللي بيعمل هيك ما بيجيب علامات
و الصراحة أنا الشهرين الماضيين ما كنت ادرس بس حطيت برنامج وبلشت مراجعة من الخميس الماضي
وهلا رفقاتي عم يقلولي ما بلش مراجعة لحتى سمّع
انصحوني شو اعمل؟ بترك البرنامج ولا بكفي😢
مع العلم انو برنامجي بعيد فيه المنهاج مرتين (لاني بنسا كتير) وفيه ٢٠ يوم للتسميع
#الرد
اهلا
تمام امورك يعني ما باقيلك شي من المنهاج كلو خالص😌💪🏻
خليكي واثقة بحالك لأن انتي أدرى من رفقاتك وكل العالم بجهودك وبدراستك
خليكي ماشية هيك تمام التمام ولا تسمعي حكي حدا لان ما حدا بهمو مصلحتك وخصوصا بهي المرحلة بتلاقي الأنانية بقلوب كتير ناس والشاطر الي بدو ينظر عليكي بتعرفي ليش ؟ لان ما حدا بهمو ان نجحتي او لا وان كنتي من الأوائل او لأ ما حدا بهمو انتي الشاطر الو بدو يكون احسن منك وبهي قلة قليلة لتلاقي صديق عنجد بهمو تكوني انسانة ناجحة ، توكلي ع الله وقولي يارب وخليكي مستمرة ولا تسمحي لهيك ناس توقف بطريقك 💯
@futuredoctorbacalorea
#Saja

#من_رسائلكم
السلام عليكم
هلق انا بكلوريا حرة وعم اعمل دورة
بالدورة قصرو الأساتذة كثير معنا وراح وقتنا فيها ع الفاضي
ولسا مادرست ولامادة
الكل عم يقلي لاتقدمي مستحيل تلحقي ولو نجحتي مجموع مش منيح
وبدي نصيحة كمل ولا وقف
#الرد
برأيي كملي ولا توقفي
لسا معك وقت ٣ شهور واذا كان عندك حلم وإرادة وشغف بتقدري تعملي المستحيل بهالثلاث شهور
انتي لا تفكري بالوقت الي ضل ولا تفكري بالوقت الي راح فكري بالشي الي ممكن تعمليه خلال الوقت الي ضل لأنك بتقدري تعملي المستحيل والي طلعو وصاروا جامعات وحققوا أحلامهن مو احسن منك بس هنن ما استسلموا ولا سمعوا لحكي الناس بس توكلو على رب العالمين وتعبوا وكانت النتيجة متل ما بدهم وأحسن ، وانتي كمان بتقدري تعملي نفس الشي وأفضل 🌸
@futuredoctorbacalorea
#Saja

#من_رسائلكم
مرحبا ❤️
يعطيكن العافية والله يجزيكن الخير على مساعدتكن النا ❤️
اولاً عندي مشكلة وهي عدم تنظيم الوقت!، انا بداوم عالمدرسة من ٧ لل١ ونص ولبين ما اصل عالبيت لل٢، بس مشكلتي ما ببلش دراسة لل٦ وأحياناً ٧ اذا عندي انسة عم عاني من التعب والخمول لذلك عم نام، وبرجع بنام بال١١ وبرجع بفيق بال٧، يعني دراستي عم تكون بس أربع ساعات خلال ٢٤ ساعة !، والمشكلة ما عم احسن نام بعد ال١١ لانو عم كون نعسانة وتركيزي معدوم، المشكلة باختصار"ما عم اعرف نظم وقتي" فيكن تساعدوني؟، ونتيجة هي المشكلة عم صير علي ضغط وبالتالي وقت عم اعمل مذاكرات عم روح قدّما وانا مالي ملحقة، يعني مثلاً اذا بكرة عندي علوم أربع دروس بروح دارسة درسين بس مع انو اول السنة كنت روح عالمذاكرات وكون عايدتا مرتين، ونفس الكمية ما اختلف شي غير انو دراستي قلّت!..
وهلأ بعد ما شفت برنامج الفحص توترت بزيادة وخايفة، مالي خايفة انو ما لحق، خايفة من قصة ادائي وقت الامتحان، يعني التوتر عم خاف يأثر علي وعلى دراستي ومستقبلي.
كتير حكيت بعتذر بس مشكلتي ما عم لاقيلا حل مع الاسف فلو تساعدوني ولو بشي صغير شكراً الكن ❤️❤️.
#الرد
أهلا وسهلا 🌸
وإياكم يارب ..
أولا ... تذكري هاد وضع معظم الطلاب .. نفسك عم يداوموا ع المدارس بس عم يلحقوا شو السبب ؟؟؟
السبب عم ينتظم وقتن اكتر .. وهالشي بدو تعب اكتر .. يعني كطالبة بكالوريا صح النوم ضروري ومابتقدري تركزي بدون ماتنامي .. بس كمان عندك التزامات يعني بتنامي ١١ وتفيقي ٧ كم ساعة عم تنامي ؟؟؟ ٨ ساعات وهالشي مابيتناسب مع الضغط يلي انتي فيه حاليا وخصوصا أنو قرب الفحص .. لهيك الافضل كل ماقدرتي نامي بكير وتعيري ٦ ساعات ... ودائما بيقولو كل ساعة قبل ال ١٢ بالليل عن ساعتين نوم ... فإذا نمتي ١٠ او ١١ وفقتي ٤ او ٥ و(ويفضل تنامي بكير متل ماحكينا) دراسة هي الساعتين الصبح رح تقلب عندك الموازين بشكل رهيب ... بدك تقليلي صعب فيق معناها مارح تنحل المشكلة وتذكري نحنا مابقى هل الفترة القصيرة وبعدين نرتاح إن شاء الله ...
بنجي كمان بفترة النهار ... رجعتي من المدرسة الساعة ٢ .. ريحي شوي وبعد الاكل شوي تنامي نص ساعة ... مو معقول للساعة ٧ لنبدأ
لازم ٤ ونص أو ٥ على الاقل ... بدك تقليلي صعب ومستحيل ... تذكري نحنا بفترة قصيرة ونخلص .. وغيرك ماعم يريح خالص لهيك لازم كل يوم تزيد دراستك ...معلش خلينا نتعب 🌸 بعدين بننسى التعب إن شاء الله ... وحتى لو بدأتي من ال ٤ فيك تاخدي استراحات وأكيد لازم تاخدي فواصل شي طبيعي ..
كنت تدرسي ٤ ساعات وهيك دبرنا ساعتين الصبح وساعتين المسا صاروا ٨ 🙂 بتعمري فيهن بلد شفتي كيف عم يروح الوقت أو شفتي كيف النيردات عم يشتغلوا بهي الطريقة بنظموا اليوم أكتر
وفي شغلة لازم نبهك عليها أنو العبرة مو بعدد الساعات عقد مو مو مهم التركيز بالدراسة أثناء الساعات ... في طلاب بتقلك نحنا بندرس ١٢ ساعة باليوم ... بس أغلبيتن بيقضوا هل ١٢ ساعة مرة حكي مرة ع الموبايل مرة اتصال وهيك دراستن كلها مابتطلع ٦ ساعات وبتلاقي طلاب مابيدرس غير ٦ ساعات بس بتركيز عالي وبيطلع منها بنتائج ممتازة 💯 ...

قرب الفحص وتوترتي وخفتي .. والمفروض هل الخوف بيدفعك لتجدهدي أكتر وتتعبي أكتر ... مو ليثبط معنوياتك ونشاطك ... لهيك مابدنا أعذار لشي أبدا

خايفة من شغلك بالفحص ...لاتستبقي الاحداث ... لحد الآن ماشفنا طالب تعب ع مادة وماعرف يحل شي ...ممكن تنسي سؤال سؤالين بالبداية وطالما دارستيهن بعد شوي رح تتذكري كلشي إن شاء الله ..
مافي تعب بيروح ع الفاضي ..
المطلوب منك بس حاليا أنك تدرسي وتبذلي أقصى ماعندك من طاقة وكل ماقرب الفحص بندرس أكتر إن شاء الله ..
بالتوفيق يارب 🌸 .
@futuredoctorbacalorea
#Ahmad_suliman

#من_رسائلكم
مرحبا هلأ انا معيدة يعني ما عندي مدرسة
بس ما عرفاني شو اعمل بلش دراسة من اول الكتاب ام من الفصل الثاني إذا بدي حط برنامج والله محتارة
والمعاهد الي عم داومها فصل ثاني شو تنصحوني اعمل مشان لحق المنهاج كمان كيف بدي لحق ادرس شكلين
#الرد
أهلا وسهلا 🌸
بدك تشدي الهمة وتضاعفي جهودك بما أنك مراكمة على حالك
أفضل طريقة إن شاء الله أنك تمشي مع المعهد كل درس بدرسو ... وكل ماخلصتي الدروس يلي اخدتيها بالمعهد ترجعي برجوع لورا هيك أفضل لأنو اذا بلشتي من الاول وتركتي دراسة المعهد رح تتعقد المشكلة وتصير أكبر والتراكم يصير أصعب .. وبما أنك معيدة إن شاء الله مابتتعبي كتير بالدروس حتى لو مانك حافظتيهن قبل يعني مجرد قراءة رح يفرق معك الوضع ويكون أسهل بإذن الله .. المهم لاترحمي حالك بالدراسة بقى عندك هل الفترة القصيرة لازم تحاربي فيها بكل ما عندك من قوة
عندك بس هل ٣ شهور لازم تحاربي فيهن وتكافحي حتى تطلعي بالنتيجة المطلوبة إن شاء الله . إذا لزمك شي اسألي كمان
بالتوفيق يارب 🌸
@futuredoctorbacalorea
#Ahmad_suliman

#من_رسائلكم
السلام عليكم
بدي احكي مشكلتي انو هية انا مسجلة بمعهد من الشهر الخامس وبلشت دراسة وكنت من الاوائل بالمعهد بس صار معي ظرف بالشهر التاسع خلاني ما ادرس منيح يعني ٣ او ٤ شهور تراكموا علي وانا حلمي صيدلة وكتير يأست انو راح كتير من الوقت وماعاد لحق الكسر الي علي وراح حلمي مني.. اساتذي واهلي ضلوا يشجعوني انتو بتقددري تشدي حالك هالكم شهر وتجمعي فوق ال٢٠٠ بس مابعرف ضايعة وبحط الكتاب قدامي بمل كتير وبنعس صار عندي خمول بالدراسة وكل مابفكر انو راحت الصيدلة بقول ليش لادرس هيك هيك مجموعي مارح يكون عالي وصار عندي ادمان ع مواقع التواصل الاجتماعي شو اعمل😥
#الرد
وعليكم السلام ورحمة الله وبركاته
حالياً لازم تنسي كل شي صار وتفكري بس بمستقبلك و هدفك (الصيدلة).
ناس بتقلك رح تلحقي وناس بتقلك مارح تلحقي ، وأنتي ضعتي من كثرة الكلام، باقي للفحص 3 أشهر و 10 ايام أذا بتدرسي منيح و بتضاعفي جهودك بتوصلي لهدفك ، الوقت الباقي قادرة تعملي فيه المستحيل. بس توكلي على الله .
بالنسبة لمشكلة الملل لا تدرسي لفترات طويلة ، تدرسي نص ساعه وارتاحي 5 دقايق ، هيك ما بتملي وبضل تركيزك قوي ع الدراسة.
مشكلة النعس لازم تعودي جسمك على النوم لمدة 7 ساعات وفي حال نعستي أنتي وعم تدرسي لا تنامي لا تنامي مشان جسمك يتأقلم عالوضع
بس اول أسبوع بتعاني وبعدين لأ.
بالنسبة لمشكلة الجوال ، احذفي كل مواقع التواصل الاجتماعي يلي مو لازمة وخلي الموبايل مع اهلك ولا تاخديه إلا للدراسة .
بالتوفيق يارب🌸
@futuredoctorbacalorea
#Ahmad_Adam

#من_رسائلكم
مرحبا❤️
لو سمحتوا انا عندي مشكلة انو كل رفقاتي عم يسببولي إحباط وماببتمنولي الخير ودايما لما جيب علامات منيحة وادرس بيتعاملوا معي بطريقة كتير بشعة وهالشي اثر عليي بشكل سلبي
#الرد
اهلا
هاد النوع من الرفقة ابعدي عنو لان ما عندهن قصة إلا يحبطوكي ويقللو من همتك وبضلو يحكو نحن مو دارسين وما عم ندرس وما رح نلحق ومدري شو ومن هالقصص ووقت تطلع النتائج بتلاقيهم ناجحين وبجدارة 🙂
لهيك ما بحبو يشوفوكي احسن منهن وما بريدولك الخير والنجاح فمشان هيك انتي لازم تبعدي عن كل هالنوع من الناس لان صدقيني ما حدا بردلك الخير وتكوني أحسن حدا بالعالم غير أهلك 💙
اقرأي الي داخل الروابط وخليكي قوية وشدي همتك وعزماتك لأنك بتقدري 😌
https://t.me/doseofoptimismforbacalorea/1362
https://t.me/doseofoptimismforbacalorea/4680
@futuredoctorbacalorea
#Saja

#من_رسائلكم
مرحبا انا طالبة بكالورية علمي أول مرة عم قدم السنة الماضية كنت رح قدم صار معي ظروف ما قدرت قدم و انا مقصرة كتير بكل المواد حرفيااااو حاليا اخدت كل دورات و الأساتذة عم يقولوا رح نخلصلك المنهاج بأذن الله بس بشهر الخامس ...خايفة شهر واحد ما يكفي لحتى راجع كلشي و انا هاي سنتي الأخيرة اذا ما نجحت مارح اقدر قدم سنة تانية و انا حلمي صيدلة خايفة كتير ما لحق ع المنهاج اكتر المواد الي خايفة منها رياضيات الكتابي التاني خلصتوا بس الكتاب الأول اخدا بس الوحدة الاولى منها رجاء من دون عاطفة رح اقدر لحق لأن كلما بدي اجي بدرس بقول لحالي مستحيل خلص و رح أرسب كتير محطمةة نفسيااااا 😣😣و مشكلة نووووم رح تقتلنييي مليت و انا عم حاول اخلص منها و ما عم يزبط رجاء ساعدوني 😭😖🥺
#الرد
اهلاا
شوفي قصة بتلحقي أو لأ لسا في معك ٣ شهور
اذا بتضلي حاطة ببالك انك رح ترسبي وما بتلحقي وبتضلك على نفسيتك هي شي طبيعي ما حتلقي وانتي عايشة بهالدوامة
اما اذا حابة تحققي حلمك وعندك إرادة وإصرار وعزيمة فبأكدلك انك رح تلحقي خلال هالثلاث شهور انو تعيدي المنهاج مرتين بس القصة انو ما تضلي تستني الأساتذة يخلصولك انتي دوري وادرسي لحالك شوفي اساتذة ع النت واحضري الهم وهيك لبينما يخلصولك الاساتذة بكون عندك فكرة مسبقة عن الأبحاث وبصير سهل عليكي الدراسة
انتي بتقدري ورح توصلي بس لا تضلي واقفة ، لازم تتحركي حتى توصلي وتحققي يلي ببالك لازم تتعبي وتسابقي الزمن وتأكدي الشخص الي بحط ببالو قصة وبصمم عليها رح تهون عليه كل الصعوبات وطول الطريق قد ما كان طويل👍🏻

#النصيحة_الرابعة ❤️✍

حول:مشكلة النوم😴

▪︎https://t.me/doseofoptimismforbacalorea/3206

▪︎https://t.me/doseofoptimismforbacalorea/3207

▪︎https://t.me/doseofoptimismforbacalorea/3208
@futuredoctorbacalorea
#Saja

#من_رسائلكم
انا طالبة بكالوريا علمي بس بدي طريقة سكر فيها الانكليزي والفرنسي
واذا فيني او لا وبلحق او لا
واذا في حدا عم يعطي قواعد ممكن اسم استاذ
#الرد
#النصيحة_التاسعة✍🏻

حول : اللغة الإنكليزية ✨

♡
https://t.me/doseofoptimismforbacalorea/4270

♡https://t.me/doseofoptimismforbacalorea/4271

♡https://t.me/doseofoptimismforbacalorea/4272

♡https://t.me/doseofoptimismforbacalorea/4273

♡https://t.me/doseofoptimismforbacalorea/4274
#النصيحة_الثانية_عشرة❤️✍

مادة الفرنسي :
إليكم النصائح : 👇🏻

▪︎https://t.me/doseofoptimismforbacalorea/6077

▪︎https://t.me/doseofoptimismforbacalorea/6078
@futuredoctorbacalorea
#Asmaa