💙وعليكم السلام
تخصصي نحو وصرف ف كلية اللغة العربية
صراحه مررررا احب تخصصي يمكن م دخلته عن رغبه قويه بس حبيتو لما درست وشفت الناس حلوين اللي يفتحون النفس للعلم والمحاضرات
يعتمد كثير ع الفهم مو الحفظ ودا اكثر شي حبيتو
كثير دكتورات عسل
أرشح :
حنين الشنقيطي >>اول وحده شعبها تقفل شرحها ولا أخلى ف كل المواد ومررررا متعاونه
أريج المولد >>دي بالذات لازم تأخذون معاها صغيره كيوت قريبه للبنات شرحها واضح وتبسط المعلومه وتعطي درجات من قلب وتهبل مو كثير يعرفونها لانها جديده
فوزيه هوساوي دكتورة نحو ممتاززززه وتسرح ع السبوره والدرجات عندها ولا احلا
عزيزه الشنبري ايش أقول وايش اخلي 😭
علياء اللقماني ونبيهه باخشوين وجميله خياط وعبير النفيعي وناديه القرشي

نصيحه استغلوا وقتكم ب اللي يفيدكم ف الجامعه كلها سنوات وتمر بسرعه وتصير احلى ذكرى💪🏻

💜أنا أسماء بهادر تخصصي لغه عربيه والدقيق لغه ونحو وصرف
قسمي يعتمد على الإعراب بس مو بشكل كبير ممكن البدايه بس الباقي توسع بنفس دروس الثانوي والمستويات الاولى بالجامعه المواد اللي بأخدها نحو8 مستويات كل المستويات يكون محثور بكتاب واحد اللي هوا الفيه ابن مالك تطرقي لدراسه مواد اللغه العربيه الأخرى مثل الادب والبلاغه والنقد الادب تقريبًا 8 أدبات أدب سعودي مستويين ادب عباسي مستوين ادب جاهلي ادب في عصر صدر الاسلام
البلاغه ممكن تدرس فيه مستوى والمادة التانيه نقد ادبي والباقي حيكون اعجاز قرآن على مستتوين.

أفضل الدكاترة بالنسبه للنحو فاطمه طاهر فوزيه الهوساوي عبير النفيعي
بالنسبه للعروض ماده تابعه لقسم النحو تأخديه على مستويين افضل الدكاتره فيه حنين الشنقيطي عائشه عسيري
للبلاغه بسمه العنزي إيمان العوفي
بالنسبه للادب فايزة المطرفي بدريه المالكي

محصور**

💗انا تخصصي نحو وصرف وطبعا المنهج حقي حيكون عربي بحكم تخصصي.

اخد النحو والصرف والادب واللغه ألعربيه عامه طبعا يندرج تحت كل دي المواد مواد ثانيه.

كليه اللغه ألعربيه يندرج تحتها
١- النحو والصرف
٢- البلاغه والنقد
٣- الأدب.

شوفي ماحقولك مره سهل صراحه بس تقدري تقولي الي تبا تجيب معدل وتحول تقدر تدخلو لنو سهل حبتين

او عامه كل التخصصات سهله ترا.
والله كثير درسوني دكاتره كويسينن صراحه.
بس راح احاول اقولك الي مرههه كويس.

انصاف الحسني تدرس الادب عامه تجنننن
سحر اشقر برضو تدرس الادب
مريم الصبان - اسماء محمد تجنن للصرف
جوهره الصبيحي ودعاء نباتي قران 
(حمده ومي الجيوري ) اكثر دكتورتين البنات قالو انو نظامهم صعب ومره يدققو وطلعو العكس مرررهه.
اقصد شيماء محمد* للصرف

🧡انا تخصص لغة عربية
نحو وصرف ولغه طبعا فيه بلاغه وادب.
اهم حاجه يعتمد على الفهمم.
كل مافهمتي بتنحجين او اذا انتي مو راعيه فهم حفظ كما احفظي عادي كلها تجي احيانا😂😂.
الدكتورات فيه الزينات وفيه الغير زينات.
دكتوره حنين تجنننن اتعب وانا اقول تجنن وكما فوزيه هوساوي وعبير النفيعي وامواج القرشي.
طيب نصيحتي لك اكيد انتي مستجدهه
مو كل بنت تعرفتي عليها تسمينها صاحبه.
اغلبهم مصلحه.
وبس ذا اللي عندي🤦🏻‍♀️🤦🏻‍♀️.

💞تخصصي عربي نحو وصرف ، المناهج عربيه ،
كمهاره  اكثر حاجه يعتمد القسم الربط والتركيز و الاطلاع ،
مواد عامه + مواد التخصص + ناخذ من الادب والبلاغه واللغه،
الكليه يندرج تحتها تخصصات اللي هي النحو - الادب - البلاغه ،
تجربتي ،، انا دخلتها مو عن حب ورغبه لكن حمدالله التوفيقق من الله وحمدالله المعدل تمام وكله لكن انتظر التوظيف او الماستر ،،

افضل الدكاتره حرسلها لك بعد شوي لاني نسيت بعض الاسامي ؛).
لكن نصيحتي ، اذا تحبين النحو ادخليها وابحري فيه ، وبالعكس القسم جميل اذا حبيتيه وتعمقتي فيه ، لكن من الناحيه الوظيفيه لا يوجد الا اذا معاك شهاده تربوي وذا الغوه من زمان يعني لو تبغيه تدفعين ويمديك تاخذي شهاده عليه لكن ينفعك النحو ناحيه تانيه اللي هو ترجمه بس ضروري لغتين عندك او كذا لغات والله يوفقكم ويسهل لكم يارب.

الدكاتره ، عزه القرني / سهيله تركستاني / معتوقه معطاني / عائشه اللهيبي / مي جبوري / ندى الحارثي/ نداء الحارثي / عبير النفيعي / ريم الجعيد / مريم الصبان / حنين الشنقيطي / نزهه الهذلي / جميله خياط / ندى خياط / بدريه المالكي /.

👩🏻‍🏫 تخصصي لغه عربيه قسم بلاغه.
👩🏻‍🏫 التخصص تحته يندرج بلاغه و نحو و ادب.
👩🏻‍🏫 المواد فيها عامه و فيها تخصص.
👩🏻‍🏫 قسمي يعتمد ع الأفعال و موزوناتها و الشعر و موازنتها.
👩🏻‍🏫 مو اجباري.. بس ناس علمي و دخلوهم علمي.

💛صباح النور حبيبي
تخصصي بلاغة ونقد والمناهج عربي كلها في مقرر اسمه علم اللغة فيه بعض مصطلحات انجليزي.

اكثر حاجة يعتمد عليها قسمي الفهم العميق وقليل من الحفظ
المواد اللي أخذها مواد البلاغة مواد النقد
النحو سبعة مستويات الأدب بجميع العصور
المواد العامة القران والثقافة بأربع مستويات.

يندرج تحت كلية اللغة العربية ثلاث تخصصات
اللغة والنحو والصرف
الأدب العربي
البلاغة والنقد.

أفضل الدكاترة في تخصصي
د . عائشة بارودي
د . عواطف خياط
د . نوف الجعيد
أ . ندى خياط
أ . شكرية العميري
في الأدب
د . ندى الحارثي
د . أحمد سليم
في النحو والصرف
د . عبير النفيعي
أ . مريم الجابري.

النصيحة اللي أعطيها للبنات احضري محاضراتك أول بأول وأكتبي كل شي واتعبي ع نفسك شوي كلها كم سنة وتتخرجي بمعدل ممتاز ويروح التعب وتبقى لذة الانجاز
لاتنتظرين أحد يساعدك أو تفكري راح تلاقي لو فاتك شي لأن هذا الشي نادر وإن حصل الجامعة الأغلب فيها نظام " نفسي يانفسي " حتى الدكتورات قليل ماراح تلاقي منهم تجاوب لو طلبتي شي منهم علشان كذا أحرصي إن امورك ترتيبيها بنفسك ومن بداية السنة تكوني عارفه هدفك وبكذا ماتجي الاختبارات إلا وأنتِ جاهزة مستعدة ،

بالتوفيق للجميع أعوام مليئة بالسعادة والانجاز 👌🏻🕊

💜تخصصي بلاغة ونقد
المناهج عربيه
قسمي يعتمد على الفهم اولاً بعده الحفظ
اخذ مواد الادب بكل عصوره والنحو بكل مستوياته والبلاغه بانواعها
يندرج قسمي تحت كليه اللغه العربيه ومن اقسامها ايضاً النحو والادب
تجربتي في تخصص البلاغه لم يكن عن رغبه كنت علمي بالثنوي ولا اعرف شيء عن العربي نهائياً حبيت البلاغه بالذات لانه سهل جداً يتحدث عن بلاغه القران وبلاغه العرب محوره يدور عن الكلام وفصاحته وذا الشيء مافي اسهل منه اذا انفهم صح ويبحث عن اساليب الجمال والبلاغه في الكلام ، البلاغه ثلاث اقسام الاول هو بيان ومن اسمه يوضح الكلام باكثر من طريقه للفهم يبينه يعني والقسم الثاني هو المعاني وسهل من اسمه والقسم الاخير هو البديع اللي يبحث بجمال الكلام بس ذي اقسامه تندرس مع امثله وبتفصيل.
نصيحتي للي يدرس ذا القسم انه يترك كل الكلام اللي انقال عنه ويجرب بنفسه ويحاول يفهمه وراح يحبه 👌🏻.

بالنسبة لدكتورات ما اقدر اقولك لان فيه الحلوين وفيه الصعبين بس برضو لو جربتو تركزون على المواد بتسهلون انتو نص المشوار بغض النظر عن مين يكون قدامك لان ربي لو اراد لك النجاح راح تتوفقين بالماده لو الدكتوره تكون وش ماتكون .

عندي سر جميل لي ولزمن ولكل من يقرا هالكلام بدايه كل يوم جددي نيتك ( اللهم اني اسالك الاخلاص والقبول في القول والعمل ) وتتوكلين على الله كل صبح وراح يحفظك ربي من كل سوء ويكون يومك اخف واجمل مايكون.

🧡تخصصي بلاغه ونقد
المناهج كلها عربي.
قسمي يعتمد على بعض المواد فهم وحفظ وبعض المواد حفظ بس

تقريبا مواد الادبي بالثانوي بلاغه -نحو ادب زي كدا.

كليتي كلية اللغه العربية
يندرج تحتها اللغه والنحو والصرف وبلاغه ونقد.

تجربتي بالتخصص مو سيئه رغم اني كنت مجبره عالقسم لاكن رضيت فيه مع الايام وطبعا جربت الايام السيئه والايام الحلوه فيه.

ادا تبي اكتب لك الدكتورات اللي بالزاهر او الريع قولي لي لان اللغه العربيه يدرسوا اول سنه بريع ذاخر وباقي السنوات بالزاهر.

نصحيتي اقرأو عن تخصصاتكم خذو فكرة عامه عن الجامعه ومصطلحات الجامعه لا تخافو من الجامعه بالنسبه لي اكثر مرحله دراسيه انبسطت فيها باقي قدامي سنتين بس لو تخرجت ما بنسى ايام الجامعه واي شيء تسمعوه ولا تعرفوا معناه اسألو اسألو اسألو مافي عيب بالسؤال لا تصدقوا كلام وحده اثنين عن الدكاتره صدقوا الاكثر
وتعرفوا وانبسطو لا تخافو من كلام ان صحبات الجامعه صحبات مصلحه بالعكس حتقابلو اصناف الناس وبالنهايه هي مرحله وحتخلص ف انبسطو فيها بكل يوم قد ما تقدرو وبالتوفيق💙