قصة خيال ﴿ اليتيمه ﴾ حقيـقيه 💯-


بارت 26 شاركو القصه مع اصدقائكم

.....يله كوم الضابط يريدك
كعدوني من نومه شفت بيها راحه ماحسيتها من زمان
شفت بيها حياة حلوة خيال يمي
وطفل صغير واهلي
وفرحه يمكن مستحيل تصير بالحقيقه
مادري ليش كل حكاياتي دور بدايرة
ويبقى  الي بالقلب بالقلب
عشت فترة بس  الله صبرني عليها ماجنت اكدر اقابل احد  جانو مانعيني جان بس زوج ا ختي  يشوفني  لان يجبلي فلوس ومجانو يقبلون يصعدوني للقاضي
ويسحبون مني فلوس ويرجعون ليورة
اخوتي مااجوي ولاوصلو بس جان زوج اختي نور
وخيال اول فترة جنت اكدر اخابرها
. بس بعدها تقريبا بااربع اشهر  اختفت واني بخلال هاي الفترة مجنت اكدر اتصل
ولمن راح زوج اختي يشوفها  جانت ماكو بالبيت
وبيت اختها شايلين من البيت
ماموجودين
دخلت بصدمه جديدة ودوامه جديدة
وضجت من هاي طيبتي سلمت لحبيبتي وحبيبتي تبيع بدقيقه
اني صرت مثل السمجه والداير مدايري صارو مثل الحيتان
جنت تعبان والدنيا طالعه من عيني
ونقلوني لقاعه جديدة
اول يوم ودوني  لهاي القاعه
واحد  اتقصدني سجين  وظل يذبلي حجي ظليت اسكت اسكت
لحد منفجرت ومتحملت بعد وكمت كتلته وظليت اضرب  بي وطلعت ضيمي كله  وفقدت بعد بكوة خلصو من يدي
والتمو عليه الحرس وجروني وجنت اباوع عليه مدمه ومشمور بالكاع
اخذوني للضابط
والضابط كام يجاوز ويغلط
على امي الله يرحمها وعلى ابويه وعلى اختي
وظل يغلط  وظليت اكمش بيدي كاانما دامنعها
اخير شي وكف يريد يضربني
وجان اضربه بوكس
وكع بالكاع اخذوني  وجروني جر طبعا
ودوني ‏زنزانه نفراديه كلش صغيرة بحيث مجنت اكدر انام لان متكفي لازم انام اني كاعد ومابيها ضوة غير شباك
صغير لدرجه
يدخل منه خيط من الضوة بس
مااعرف شكد ظليت بهاي الغرفه
وجانو حتى يتعبون اعصابنا  يخلون بوري مال مي
ينقط
جان  من يصير  الليل ويصير هدوء ميبقى بس صوت النقط مال مي من توكع بالكاع ويطلع صوت وبي صدى
جان هذا الصوت يتعب اعصابي جنت دورات اكمش اذاني واسدها
لان احس بعد مابيه اتحمل اكثر
وجنت اسمع صوت المساجين الي يتعذبون
يمكن اني لان جنت انطي فلوس  جانو ميعذبوني
بس من بعد ماضربت الضابط تقصدني وخلاني بعقله
خلوني لفترة طويله كلش وحدي بهاي الغرفه الصغيرة
ومنعو عني الدوة حسيت  على لحظات واموت ومابقى عندي أرادة
كمت اكول لنفسي هاي اوقاتي الاخيرة لان كلبي يوجعني يوم عن يوم اكثر
جنت اعرف انو انام اليوم يجوز مااكعد باجر
الدنيا. ‏ رجعتني للماضي ولكن بطريقه مختلفه قبل كنت اريد اموت ‏بأرادتي  بس هسه لا داحس نفسي داموت بذله ومهانه
واموت بهيج مكان حقير
كنت اختنك كلش طلبت منهم ينطوني قران اقرأ بي
مقبلو
وصلت لمرحله عجزت
كل القوة الي عندي نفذته
لحد مااجى ضابط جان شخص جيد من بين بؤره فاسدة
كان هذا الشخص الوحيد  الي  كان جيد
ساعدني
جان يكلي انت قوي برغم الي انت بي
جان معجب بيه برغم ضعفي
طلعني ونقلتي بقاعه مال ضباط  طبعا بفلوس
هاي القاعه كانت للضباط المترشين لضباط سابقين ‏
دخلت وياهم كان  بالنسبه للاماكن الباقيه
الي خلوني بيها هذا افضل مكان
بهاي الفترة جان اكو محامي يدافع عني
وبهاي القاعه تعرفت على واحد جان دكتور عسكري اسمه فوزي
لمن احجي وياة اكله حرامات هيج انسان مثلك وبهاي العقليه مسجون
حسيت بي صديق دورات من جنت لشتكي واكله احنا
رياجيل وشوف الي ديصير بيننا
جان يكلي ‏بكل ضعف
.....للاسف ماظل رجال صار واحد طوله شبر يكمش بيدة سجينه لومسدس ويطيح رجال شطوله شعرضه بالكاع
صار سعرنه بسعر طلقه
بسعر ربع دينار
ماظل رجال الجبير بينا كام ياكل الصغير والصغير يركض على الضعيف حتى
يثبت لنفسه انو هو فدشي مهم
دنيه رخصت واحنا هم رخصنة  وياها
مابقينا ‏ مثل قبل
وبهاي الفترة
مرو عليه هوايه اشخاص منهم مرتشين وضباط فاسدين وقتله ومنهم ارهابين ومنهم هوايه مظلومين
ومنهم اشخاص اصحاب مبادئ
ومنهم الي مثلي جان يدافعون عن شي ء عن وطن عن فكرة
عن شي مقتنعين بي
بس الي مثلنا صعب يعبر عن الي يريدة
بااي طريقه كانت
وبوسط كل هالحطام الي اني بي
كان حطام قلبي  حطام سوته امراة
زلازل خرب كلشي بحياتي
خيال كلما داقترب منه هو يبتعد عني
خيال الي اتخلت عني واني
واني الحاجة إليها
جنت محتاج انو احس انو بالها يمي تفكيرها ويايه
بس هي متحملت تصبر اكثر من اربع اشهر
وعافت كلشي لان اكيد كالت علويش انتظر
كم سنه علما يطلع وتوكف حياتي علمودة خلي اعيش

اخ من كلبي لويوكف واخلص شمنتظر بعد
كل هالوجع ماخلاك توكف
اليوم واحنا كاعدين بالقاعه
جابو سجين جديد جان طول ماكاعد يباوع عليه
وديحفظ حركاتي
وباوع وين انام
اني جنت انتبه على الكل لان جنت دورات ماانام جنت احس اكو اشخاص هوايه ميحبوني ويريدون ياذوني خفت لاياخذًوني فد يوم  غدر
المهم هذا الشخص
جانت ديتابعني
واليوم اول يوم من بعد مايقارب خمس اشهر ينطوني دوة
واليوم لمن شربت الدوة نمت
وفجأة ماحسيت غير فدوجع بظهري
وسمعت صوت خطوة ابتعدت وصوت جربايه تحركت
نداريت
ماكو احد
بس جان اكو فد دفو جوايه
لمن باوعت شفت اكو دم بالفراش
صحت  بصوت عالي
........دكتور فوزي
..... ها شبيك
اتقرب عليه كلي
...هذا دم بالفراش شبيك كمش ظهري
باوع
.....هاي مضروب بظهرك ‏
حسيت نفسي بديت ادوخ ومااركز على الاصوات
وكمت اباوع بس اضويه
.وحسيت نفسي بغرفه وحاطيلي مغذي
وظليت يوم كامل وبعدين طلعوني ودوني لغرفه وحدي
منا بدا المحامي يشتغل انو حاولو يقتلوني
واني ماعندي شي وهدد انو هو راح يتكلم على شاشات التلفزيون
وبعد معاناه. طويله صعدوني للقاضي واطلع على قضيتي مكان اكوشي ضدي مجرد كلام
وراها بااسبوعين طلعت اخذت براءة.
سنه ونص  من حياتي متنحجي ولاممكن الانسان يستوعبها ويكدر
يذكر تفاصيلها عذاب وظلم وطغيان
واحتقار الانسان لنفسه ‏
ومهانه ومذله سنه ونص اني مشايف خيال وماسمعت بعد عنها اخبار
بهاي السنه ونص كشفت ناس وعرفت حقيقتهم وجانو اقرب الناس الي
واخوتي الي حتى ماااجوي وكالولي شمحتاج
الوحيد الي هو برغم غريب وكف ويايه زوج اختي
اول خطوة الي خارج السجن
وخارج الظلمه وخارج الجو العفن
جان النفس بيها كانما عمر  كامل
زوج اختي استقبلتي
اختي جانت بيتي منظفته ‏البيت  ومسويتلي اكل
واستقبلتني بالهلاهل وطشت الجكليت ‏الأ
شكد جنت راح افرح لو شايف خيال كدامي
فرحتي جانت ناقصه 
....حبيبي زيودي حمدلله على السلامه نورت بيتك
وحضنتني
.....اشكرج نورة
.....حبيبي سودة عليه هاي ليش هلكد ضعفان صاير جلد وعظم
.....اي
......شنو  جنت متاكل
.....لااكل بس شويه
.....سودة بوجهي اوي
.....الحمدلله على كلشي
....الحمدلله انت طلعت
جنت اريد اسئلها عن خيال مشافتها متواصلت وياها
بس خجلت شكللها مرتي عافتني من نسجنت واني كاعد هسه اسئل عليها
جنت تعبان واحس نفسي وسخ لاابعدد الحدود دخلت للحمام وترست البانيو وظليت فوك الساعه يمكن بالحمام
وزينت لحيتي
ولبست ملابس نظيفه
وشلت هدومي مال سجن هي والجنطه وذبيتهن بالسله مال وسخ
ونزلت تغديت ويا بيت اختي وبعدها راحو حتى اني ارتاح
وجنت فعلا محتاج للراحه
نمت يوم كامل بلامااكوم
وثاني يوم قررت ادور على خيال واحاسبها
على كل الي سوته
ويايه وليش هيجي
طلعت للكراج شفت سيارتي مجودرة
شلت الجادر منها
وشغلتها وطلعت حسيت نفسي حتى السياقه ناسيها
اول مكان رحتله بيت اخت خيال شدن
دكيت الباب على البيت الي بصفهم طلعلي ولد شاب
.....السلام وعليكم
.....وعليكم السلام
،....بلازحمه عليك بيت احمد وين راحو
....ليش تسئل حضرتك
.....اني اقاربهم بس جنت مسافر وهسه اجيت وحبيت اشوفهم بس ماموجودين
.....اي صحيح شالو منا صارلهم هوايه
..... متعرف وين راحو
....والله ماااعرف وين راحو
.....اشكرك
...العفو
....مع السلامه
صعدت للسيارة كلت يجوز يم عمتها
رحت لبيت عمتها اول مانزلت شفت بيتها ناس
هوايه وجهال طابه وطالعه
شفت جاهل اشرتله
.....هلو حبيبي اكلك انت شنو اسمك
....محمد
....ها حمودي ابوك موجود بالبيت
.....اي جوة
...روح صيحه
وراح ركض يصيح بابا رجال بالباب
طلع رجال
.....السلام وعليكم
....وعليكم السلام
.....العفو هذا موبيت مرة جبيرة جانت كاعدة بي وحدها
.....وانت منو
....اني جوارينكم هذا بيتي واشرت على البيت
واعرف انو هاي المرة وحدها كاعدة بالبيت
.....اي صحيح بس اني زوج بتها
.....هايعني بتها وانت زوجها كاعدين بالبيت
....اي نعم
.....اني زوج خيال بت اخو المرة الجبيرة الي جانت يمها
.....اي سامع بخيال اهلا وسهلا
....اهلابيك الحجيه موجودة احجي وياها
.....ليش متعرف الحجيه ماتت صارلها شهرين
....الله يرحمها البقيه بحياتكم والله مجنت اعرف
.....حياتك الباقيه
سمعت صوت مرة دكول منو
اشرلها تعاي
اجتي وحدة جان يمكن عمرها بال30سنه اكثر
كللها هذا زوج خيال
....اهلاوسهلا
.....اهلابيج البقيه بحياتج
...حياتك الباقيه
....شلونها خيال من زمان ماشفتها جانت طفله اكيدهسه كبرت هي وينها وياك اريد اشوفها
....لا موويايه بالبيت بس اني اجيت لبيتي هذا واستغربت انو شفت ناس بهذا البيت وحبيت اشوف منو
.....هايعني احنا جوارين اي زين لعد حتى نشوف خيال امانه هالمرة جيبها وياك نشوفها
...ان شاءالله يله مع السلامه
ظليت واكف هاي عمتها ماتت وهي متعرف عنها شي وحتى ماكدرت اكللها مو ويايه
استغفرالله وين راح ادور عليها بعد
اذكرت المكتبه
وصعدت بسرعه للسيارة ورحت
جان الرجال الجبير هستوة ديعزل
....مساء الخير
.....مساء الخير
.....فد سؤال ب

لا زحمه عليك
....اي تفضل
....خيال تعرفها مو جانت تشتغل يمك بعدها تشتغل يمك لوبعد ماشفتها
....والله ياابني مر وقت طويل وهي فجأة بعد ماجتي  للشغل وبعد ماشفتها
.....هااشكرك
...تدلل
وبعد هاي الفرة الطويله رجعت للبيت
وجنت تعبان
ولمن وصلت وكفت سيارة باوعت زين جان صديقي جلال
نزل عليه ركض ويبوسني ويحضني
ودخلنا جوة وظل يسئلني شصار مصار وشنو الي مريت بي
وسوالف بعدين شفته يرد يحجي بس مستحي
....هاشبيك جلال شتريد تحجي
.....والله خجلان منك كلش
...شكو
....طبعا بعد من نسجنت جبت زوجتي واجيت على زوجتك وكتلها اختي شتحتاجين اني مثل اخوج وموجود وانطيتها رقم زوجتي
...اي وبعدين
.....بس اني عرفت هي ماموجودة بالبيت بعد
...اي
....قبل شهر شفتها تشتغل بمحل مال ملابس واستحيت احجي وياها والله يازيدون اني خجلانه منك لان هيج زوجتك محتاجه واني ماوكفت وياها
بس والله خجلت منها
.....وين هذا المحل
.وصفلي المحل وين بالضبط
وكتله
....ولتهتم جلال انت سويت الي عليك
....اني اعرف بيك تعبان راح اعوفك ترتاح
...نتلاكه ان شاءالله
...اكيد نتشاوف كلش مشتاقلك
....الله كريم
.وصلته لحد سيارته وماتحملت ابقى
رحت على نفس المكان الي تشتغل بي  خيال
وكفت سيارتي وكفت سيارة كدامي
ودافتح الباب وانزل وشفت خيال طلعت وشايله طفل صغير كلش
وصعدت بالسيارة ليكدام بصف هذا الرجال ومشت
السيارة
ماعرفت شصار بيه جمدت بمكاني
هاي خيال وهذا واحد صعدت بصفه وبيدها طفل
شنو ازوجت وجابت طفل وهي مرتي
اني داحلم لو هاي حقيقه
داتخيل معقوله اني من نسجنت خيال زوجت وجابت طفل
وشلون هي مرتي ‏
معقوله طلكت مني بلاعلمي
شنو الي ديصير
يتبع ....

قصة خيال ﴿ اليتيمه ﴾ حقيـقيه 💯-


بارت 27 شاركو القصه مع اصدقائكم

من الصدمه ظليت واكف بمكاني حتى مالحكتهم
وشفتهم وين راحو من انتبهت على نفسي
باوعت ردت اشوف السيارة جانت ماكو
ظليت بمكاني وبعدها سقت السيارة
وجنت احس نفسي على الغيم
دامشي جنت مثل الغركان بجروحي رجعت للبيت وكلت باجر اروح للمكان الي تشتغل بي بس من وكت
ماعرفت شلون عبر هذا اليوم ورحت ثاني يوم لــ خيال
وكفت سيارتي ونزلت
ودخلت للمحل وجانت خيال كاعدة ودتكتب مجانت منتبة
عليه تقربت من عدها وصار ظل على ‏ورقتها ‏وحجبت الضوة عنها
رفعت راسها وجان تركف بسرعه وعيونها لمعت
...زيدون
اول ماااصير قريب من يمها احس روحي تتطشر ومحد بعد يلمها
......اي نصدمتي ‏بشوفتي عبالج راح انسجن بعد ماااطلع
.....لالويش متطلع انت ماعندك شي والحمدلله على السلامه
.....شلونج شلون ابنج
.....ابني
....اي لتنكرين وتحاولين تلكين كذبه
.....مجان بنيتي اكذب
....اي زين تعاي طلعي برة داحجي وياج
.....لحظه
راحت على رجال جان يمكن صاحب المحل ورجعتلي مشيت وطلعت برة المحل وكفت بالباب

وماادري ليش ردت احس باامل ولوبسيط وهو انو هذا الطفل يجوز يطلع ابني
جنت داير وجهي واباوع السيارات وسألتها
.....هذا الطفل الي البارحه جنتي شايلته من طلعتي من المحل ابني
.....لا
حسيت بالوجع كام يتفاقم بيه
....لعد ابن منو
....وانت شنو دخلك
...صدك اي مواني نسيت يمكن انتي موموتي واني كمت اتخيل
...مرتك انت طلكتني
.....شنو
....انت ورا مانسجنت بفترة طلكتني بعد ماعندك سلطه عليه
....شلون يعني طلكتج ها ومنوكلج
....اخوك سعد
....شنو
.....اي اخوك ورا مااعتقلوك اجه دك الباب وشوفني ورقه
وكلي زيدون طلكج
وهاي الورقه
وطلعي من البيت
....وانتي صدكتي
.....لا
.....لعد
.....سئلت اختك نور لان جنت اعرف هي اكثر وحدة تثق بيها انت
كتلها زيدون طلكني صدك
كالت اي على الاساس انت كايل اني منا لخمس سنين اكثر ماااطلع ماااريدها ظل تنتظرني
وبوقتها حاولت اوصل الك بس ماكدرت
.....وشنو الي صار بعدين
....مصارشي طلعت من البيت ورحت لبيت اختي
....وبيت اختج ليش شايلين من البيت
.......يمكن اني احد الاسباب
.....اني ماطلكتج وكل الي حجيتي ماصار ولاكلت كلمه عن الطلاك
يعني انتي مرتي ‏شرعا وقانون
....يعني انت مكلت مااريد خيال
....لا
.....يعني اهلك جانو يكذبون
....اي وراح يتحاسبون
.....يعني هسه شنو
....يعني انتي مرتي هسه لازم ترجعين ويايه
..بس ماااكدر
.....هذا الطفل ابنج مو
مومصدكتي انسجن وتروحين تخلفين
صدك انتي ماعندج وفه ولج شكد سويتلج وماجازيتيني بشي شكد تحملتح وسامحتج مصدكتي على كلمه رحتي
،،،،،.
ظلت تباوع عليه ومجاوبتني
.....احجي شنو بس لطلعين صوتي بالشارع ولج شنو ازوجتي احجي فضيني
ولج البارحه الي صعدتي ‏وياة بالسيارة منو ولج احجي لاادفنج هنا
احجي
....انت مالك حق
.....راح اكسر راسج والله
وفجأة بعيد عن كلامي كلتلي
.....بعدك تحبني
....شبيج انتي اني وين داحجي وانتي وين تحجين
....جاوبني
،،انت تحبني لوبطلت ،،،
كنت متردد بلاأجابه مااريد مثل كلما اصير ضعيف كدامها
.....لا
ابتسمت ابتسامه مااعرف ادل على شنو
.....اذن خلص لهنا وخلصت القصة انت عيش وخليني اني هم اعيش
(((سكتت ماكدرت اكللها شلون
يعني اعيش وانتي تمشين بيه شلون اكللها اني خفت على نفسي علمودج .......
شلون اكللها برغم كل الي ،،،،،سوي بس ابقى احبج ‏
وكل مرة اتوعدلج واهدد بس من اشوفج اضعف واتراجع واعذرج،،،،،
شكللها فركاج غربه وكلش بي مامألوف ‏
شكول اني بلياج ماادري شبيه ومااادري شنو الي راح يصير اليه
باوعت وجنت اشوف الي بنيت بي كل هالسنين كام يتهدم
لشوكت اشوفج تجرحيني واني ابريج
ماكدرت احجي وفترت بيه الدنيا
لاكدرت اتراجع ولاكدرت اتقدم بحبي خطوة
شنو هذا العذاب ولشوكت راح يخلص
يمكن فعلا اجى الوكت الي اعوف بي خيال والكي نفسي
اجى الوقت الي ابدي بحياة ثانيه
بس مااتحمل فكرت انو تروح لغيري
مداتحمل اباوعها كدامي وماااكدر اخذها بحضني واشتم عطر امي
بيها واشتم عطر وطن
مثلها مثل تراب العراق شكد نحبه ‏ بس هو يأذينه
....انتي زوجتي لولا احجي
.....لا
.....لعد هذا منو الي جنتي وياة بالسيارة
....ميهمك
.....ميهمني ليش لازم اني مو رجال
....لا بس هذا الشي ميخصك بعد
......انتي غبيه لوتتغابين
....اشكرك
...تدللين
....الطفل منو ابني
..لا
....لعد منين جبتي
كمشتها من يدها
احجي خلصيني
.....معليك
....امشي ويايه اني اشوفج شلون معليه
.....ماااجي
.....امشي لتخلين العالم تلتم علينا
....خلي احجي ويا ابو المحل
.....ماكو داعي اول وتالي بعد متشتغلين
......موبكيفك ادكلي متشتغلين لااشتغل
......اوف اوف خلصيني عد ترة بزعت
ودخلت ودخلت وياها للمحل جانت دتحجي ويا ابو المحل وصحت عليها
....يله
اشرتلي بيدها دقيقه
ابو المحل جان ديكول
......ميصير تطلعين ومنو هذا
.....كتله
.....وانت شعليك
.....احنا لازم نتاكد من اخلاق الي يشتغلون يمنا
.....شنو ‏رأيك هسه اوكع سنونك واخليك شهر تلم بيهن
....جاي تجاوز عليه بمح

لي
.....بعدك مشفت شي
.....تهددني
...اي اهددك فاااحترم نفسك احسلك
وجريت خيال وطلعت وفتحت الباب الي بصف السايق
وصعدتها وصعدت اني وكمت اسوق وماااعرف وين اروح او شنو
....وين توديني
.....بكيفج عيني ست خيال اقترحي عليه واني اوديج
.....لبيت اختي
......اي موالسايق مالتج اني
.....لعد وين توديني للبيت
.....ليش
....اي مرتي غير
......لامومرتك موطلكتني
.....لامطلكتج وكلتلج لتغشمين نفسج
....صدك
....استغفرالله ربي شنو كاعدة داهريني
...لا
.....الطفل ابنج لولا
....وشعليك انت
....هم كلتلي شعليك ولج لعد منو عليه
...الطفل مومنك
.وكفت السيارة ودمي فار
.....خرب بيومج اذا ماحجيتي هسه
ظلت ساكته
....زين خيال خلي اوصل للبيت واعلمج
...متكدر اسويلي شي
....ولج عبالج ناسي الي سويتي قبل لابعدني اذكر
وهاي الدكه الثانيه الج ويايه
ظليت ساكت لحد ماوصلنه للبيت
دخلنا للبيت وهي ماتقبل تدخل بكوة نزلتها من السيارة ودخلتها للبيت
.....دخلي عد جوة لتفضحينا مناقصني فضايح
.....هسه اني مااريدك
....متاكدة
....اي
كمشت يدناتها. ‏
اثنينهن وخليتها وراها ظهرها
وتقربت عليها
وقربت شفتي يمها حسيت بدكات كلبها
وشفت نفسها صار قوي وغمضت عيونها
وبعدين عفتها
ورحت كعدت
.....موكتلج تريديني
.....انت يوم عن يوم دتتغير ومدتظل نفسك زيدون
الي عرفته
....وانتي هم مونفسج هذيج خيال البريئه الصادقه
الي عيونها مابيها خداع
انتي تغيرتي
ماكو شخص يبقى على حاله كلنا نتغير عادي هي هاي الدنيا
.....بعدك اظن انو اني خنتك
.....اي بعدني
.....للاسف
....على شنو
....على حبي الك
....وللاسف انتي متحبيني مثل ماااني احبج الفرق بين حبي وحبج كلش جبير حبي الج مدينتهي بس حبج الي مثل شرب الماي
.....انت متعرف حبي الك شكد لتحكم عليه
.....اعرف الي يستحق اعرفه والي كشفته لحد الان كافي
كافي عرفت الناس الي علااساس هما اهلي وسندي
وعزوتي شلون صارو وشلون كل واحد كام ينهش بيه من صفحه لغايات بنفسهم
صرت لكمه سهله ياهو الي يجي يلوج بيها شويه
وانتي وحدة منهم
مصدكتي سمعتي كلمه طلاك اخذتي بعضج ورحتي ماكلتي يجوز كذب ماكلتي لااني راح اصبر وياة واصبر علمودة مانطيتيني الفرصه انو اغير الصورة الي رسمتها عنج بسرعه بعتي الموضوع ورايحه ومخلفه طفل وكاعدتشتغلين وصعدين ويا واحد بالسيارة
وانتي بعدج على ذمتي
اني راح اتخبل شنو انتي خبلتيني دمرتيني ولج طيرتي عقلي يوميه مسويه بيه سالفه ولج تعبت منج ولج اريد ارتاح منج
اريد وحدة تبرد كلبي اريد وحدة حضنها دافي يحضني وحدة احس بالصدق بعيونها
...عوفني لعد
....بعد كل الي صار والي سويتي تريدني اعوفج بسهوله هيج
بلا ماااحاسبج
وهسه دكوليلي هذا الطفل منو
....مااااكول
.....ولج خيال لجبريني اسوي شي اندم عليه احجي
....ماااحجي
.....ليش
.....هذا شي يخصني
....داكلج كولي هذا الطفل منو ابنج لولا مني لو من غيري احجي
...ماااكول
....لتخليني ارتكب جريمه ولج شنو كاعدة تختبرين صبري
رحت عليها جريتها من يدها وكمشت شعرها
قوي
...وتالي وياج شنو هالعناد ليش دسوين هيج
ظلت ساكته مجاوب
راح تبقين هنا والله ماااخليج اطلعين منا اذا مدكوليلي كلشي واريد اشوف شنو فلم هذا الطفل والرجال الي جنتي وياة بالسيارة
.....ماااحجي
...يايابه ولج بابا تريدين اجلطيني شنو هالعناد
رحت قفلت الباب واخذت المفاتيح مال كل الابواب
وعفتها وصعدت فوك دخلت غسلت وطلعت باوعتها ‏من الدرج الفوك جانت كاعدة
وظلت على هاي الكعدة فوك الساعتين وسمعتها تحجي بالتلفون بس ماعرفت ويامن تحجي
بعدين نزلت جوة
...هاشبيج كاعدة هيج لازم مناويه دكومين شنو لزكتي اجي اساعدج حتى دكومين
....ماااكوم منا لحد متخليني اطلع
....اي براحتج كعدي شعدنه اني بالنسبه الي متفرغلج
بس ها ترة اني عندي شغله صغيرة اروح واجي
ولتفكرين اطلعين من البيت شفتي الابواب كلها صارت حديد
ومقفله يعني لتفكرين اصلا
والسياج كله كهرباء خليتها يعني من تكمشيها تنتلج وتعطب شعرج وتشمرج لراس الشارع
...صدك والله
....روحي جربي اذا تحبين بما انو اني بالبيت يجوز اتلاحكلج شويه
...لامااريد راح اظل كاعدة هنا لحد متروح وتجي وحتى تعوفني
...اي زين واذا تريدين تاكلين اكو اكل بالثلاجه
....ماااريد اكل بلكي اظل جوعانه واموت
...لالتخافين متموتين اني بالسجن جنت شكد اظل بلااكل ومي بس مامتت
....هايعني تريدني اموت
...كلمن يموت بيومه
عفتها ورحت بدلت وطلعت ورحت لبيت اخويه سعد
باوعت جانت اكو هوايه سيارات بيت اخويه وسيارة مال اخويه مؤمن وسيارة مال طه
كلت اي خوش مجموعين
نزلت لابس قاط اسود وقميص ابيض والسبحه بيدي
دخلت جوة جانو الكل كاعدين بالصاله
اول مادخلت اخوتي انصدمو وكام واحد يباوع على الثاني
.....السلام وعليكم مجموعين عند النبي ان شاءالله
كام اخويه سعد عليه ديبوسني دفعته
...مشكور اخويه ماقصرت الناس كاعدين كامو واحد يباوع على الثاني
ديكوم طه سويتله بيدي لتجي كعد
واخويه مؤمن جانت عيونه منا ومنا
كامو الموجودين يكلولي

...حمدلله على السلامه
....الله يسلمكم
.سعد'''' اخويه زيدون شلونك
.....باوعت عليه،،،،
وصعدت يدي ليفوك واشرت
....من الله بخير ومن عبادة بشر
.....الله يجفيك شر بني آدم
.....راح يجفيني خيرهم وشرهم من راح ابدي اصفي حسابي وياهم
صارو بموقف انو الناس كاعدة وهذا الكلام كدامهم
.....احنا هوايه حاولنا يااخويه ورحنا على معارف بس ماطلع بيدنا شي
...خطيه ماقصرتو بس اظاهر يدك راخيه شويه
.،،،،كامو يحاولون يغيرون بالموضوع ،،،،
وصاح طه ،،،جيب لعمك جاي
....لتعب نفسك مااشرب جاي
....سمعت اخويه مؤمن يصيح
...اشو اجاي نافش ريشك علينا
....بعدك مشايف شي
....شنو قصدك
كام وكف
...وكلي ...انت واحد متستحي
....من زمان واني فد واحد ميوكف بعيني شي
فلوس وعندي وكلبي ميت وميرفلي جفن على بشر
والي اريد اخلص منه بلمح البصر اخلص منه
شفت الكاعدين كامو يكومون ويطلعون
واخويه سعد يحجي وياهم ويعتذر ويكللهم
..اخويه زيدون شويه اعصابه تعبانه
....نداريت عليه
....قصدك مخبل لاحبيبي السجن ماااثر عليه
بس يلي حاضرين سمعوني هذوله اخوتي
حرامات بيهم حليب امي واحد احقر من الثاني
واني من اليوم راح اعتبر نفسي ماعندي اخوة
وراح اخذ حقي منهم واريد اشوف رجال يوكف بظهرهم
....شنو هذا الكلام فضحتنا كدام العالم
....بعدني محاجي شي انتظر
العالم كامو يطلعون لان شافو السالفه بدت تكبر.
رحت كعدت وخليت رجلي على الكرسي وطلعت الجكارة مالتي
وباوعت على طه وسعد ومؤمن جانو واكفين
كدامي
....انت تخبلت
....لابعد باقي شويه
....شتريد
.....انت منو كلك تروح على مرتي وجيبلها ورقه مزورة حتى متعرف الورقه مال شنو
ودكللها زيدون طلكج ها
....اني ماسويت شي ماكو هيج موضوع
.....كذاب
لكم سعركم بسعر طلقه
اقسم بلي خلقني الي يفكر منكم يلعب ويايه لعبه قذرة مرة ثانيه لاامحيكم وميهمني اخذ بيكم اعدام ولاعبالكم دكدرون تغدروني اني هسه
بدال الواحد ميه يحموني
وفلوسي من ورث ابويه راح اخذها على داير مليم
والا ارفع عليكم قضايه اكعدكم بالشارع
ورحت جريت طه من هدومه كتله
،،،،،تعال انت برة داحجي وياك
....مؤمن ...وين مودي
........يابه هسه اجي احجي ويا عمي لتخاف
طلعنه بالشارع
....اي سولفلي
.....شنو شسولف
.....ها شلون تريد اذكرك بااي طريقه
.....لاذكرت
.....اي احجي
....عمو خيال ماعدها شي ويايه ولاتعرف بيه جنت بالبيت
....شلون يعني
....يعني من قبل ابويه يعرف بيه جنت معجب بخيال
ولمن خابرك وكلتله انك جاي وهلكد باقي وقت وتوصل
حسب انو اني اذا رحت شكد وانت من راح تجي راح تشوفني اطلع من البيت
وراح تشك بخيال
....شلون دخلت للبيت
....ابويه نطاني مفتاح
...ليش سوة هيج ابوك
.....كال هاي وحدة مامعروف اصلها منين وتريد تقشمرة وتاخذ فلوسه واحتمال تكتله وتنهزم
وكلي اذا سويت هيجي انطيك الي تريدة
....وانت ماصدكت رحت سويت هيجي وانت اكثر واحد تعرف خيال وتعرف الظلم الي جانت عايشته
وانت مجنت اشوفك ابن اخويه اشوفك صديقي واحترمك واقدرك
كلي بله شنو راح يكون حسابك شلون راح احاسبك
.....سامحني عمو والله ضميري ديألمني
بس الشيطان شاطر
...انت وابوك الشياطين الكم يوم لاتستعجل
....عمو سامحني
....لاوالله ماااسامحك

خيال نظلمت واني ظلمتها مع العلم جان عندي شعور من البدايه مابين وبين
مابين انو اني ممصدك هي تسوي هيج شي ومصدك كلامها
ومابين انو ممصدك لان الي شفته جان كله يثبت عليها شي
بس صفنت على اخوتي معقوله وصلنه لهيج مرحله لااخ يسوي هيج باااخو معقوله ماتت الضماير وندفن الاحساس هاي العائله الي تترابط بالحب والاحترام والمودة هاي هيج توصل الامور
وصلنا لمرحله الاخ ميحن على اخو والاب ميحن على ابنه
والابن يشمر ابو بالشارع ويشمر امه
وصلنا لطريق كله وحوش وناس تاكل بناس
وبسبب كل الي ديصير ‏كمنه
نفقد الثقه بكل الاشخاص اي حوالينا ‏
وجوة هوايه نكشفت للاسف جوة الاقنعه اقنعه وكل قناع نشيله نكتشف تحته قناع ابشع ‏
رجعت للبيت وماااعرف شلون راح اصرف وياخيال
اكللها اني ظلمتج والي صار لعبه لواكللها ‏منو هذا الرجال
ومنو هذا الطفل
لو شنو راح يكون موضوعي وياها بس ليش
اني من موجود يمها اصير اعصابً
ومااتحكم بنفسي وبسرعه انفعل وبنفس الوقت
اخاف عليها واحبها
ومااكدر ابعد عنها
من دخلت شفت خيال نايمه بمكانها
نزعت سترتي وخليتها على الكرسي ومشيت على كيفي وكعدت كدامها اباوع عليها
شكلها من نايمه شكد ‏ ‏هادئ شكد‏ ‏بريئ
شكد حلوة
تقربت منها وكمت امشي يدي على شفايفها وخدودها
وعلى يدها بس على كيفي حتى لتحس
وبعدهاوخرت منها وكمت اطلع صوت حتى تكعد وحست عليه وكامت
كعدت وعدلت نفسها
وكامت تباوع بلامتحجي .
....اذا تريدين تنامين صعدي نامي فوك
...مااريد
....براحتج
ورحت اني نمت وماااحس الااكو شي بارد صار على يدي
فتحت عيني جانت خيال نايمه على يدي وشعرها مبلل
خلت عينها بعيني
....انت صاير احلى من قبل
.....شنو تقشمريني ههههه
.....لاوالله بس صدك صاير حلو
....ليش جيتي
....من زمان مشتاقه احضنك ومشتاقه لريحتك احب اسمع دكات كلبك
....انتي وين راحتج خيال
....يمك بحضنك بصوت انفاسك يم عيونك بس انت الي بكلبي جوة انت تغيب عن عيني لكن تبقى جوايه اني صحيح تفرقني عنك الاماكن بس حبي الك يزيد
.... ليش تعذبيني ليش شلعين كلبي تعرفين شكد اتوجع من انتي توكفين ضدي اني مااهتم لااي شي بس الج اهتم
....اني مااوكف ضدك الظروف هي الى واكفه ضدنا
....انتي متحبيني مثل مااني احبج
.....ياريت لوتكدر تشوف شكو بكلبي اني ماتعلمت الحب بس وياك عليك اني فتحت عيني
اني كل ليله ابحث عن صدرك حتى اضم راسي بي واحس نفسي قريبه منك للدرجه الي محديقرقنه
....حبج صمت مااكدر اتكلم عنه يستعصي عليه
بس حبج بي عذابي وقربج احسه في يوم ما راح ينهي حياتي
سحبت يدي من جوة راسها وكمت
وكعدت
....زيدون لتروح ظل يمي اريد اشوف الجنه وياك
انا محتاجه الك
....عشكنه نار مابي جنه
....ليش كلما ا تقرب تبعد ليش انت هلكد صعب
والوصول الك اصعب
....اني ردت تجي وحدة تعوضني الي عشته ولكيتج انتي بس حبنا كام يتحول يوم بعد يوم لكابوس
....ماكوشي راح يصير كابوس صدكني
تعال
ومدت يدها
((((هل سوف تقبليني ومن
نار الحرمان سوف ترحميني
اين اكون رغبتي اذا لم تكوني اين
يكون حبي اذا لم تكوني انتي من احب
في كل مرة اذهب ولكني اعود لنفس المكان
في كل مرة اعود الى ذاك المكان
الذي يفصل مابين الجنه والنار
اين قبلتي الان اين صوتك الرقيق
وانتي بين الاحضان اين
انا في حياتك ومتى
سوف يصفى الزمان والي اين
سوف يأخذنا القدر
يارفيق دربي ياقدري السيء
كن لطيفا معي هذة المرة.

يتبع.....

قصة خيال ﴿ اليتيمه ﴾ حقيـقيه 💯-


بارت 28 شاركو القصه مع اصدقائكم

....متريدني
.....ياريت لواكدر اعوفج بس انتي مثل النار تاليتها  تنطفي واصير اني رماد
....اني يمك
....دائما جنتي يمي بس انتي بعيده عني
دائما جنت احبج وتالي العشك الي بكلبي يشتعل ومحد يطفي
....احبك تحبني
.... ياريت لو اكدر اكلج
....شدكول
....عن الي احسه وياج
...خلينا نحلم
....اني اخاف من الاحلام لان احلامي تنتهي بكابوس
وجع محد يحس بي بس اني
.....اني موكابوس
....انتي خيال مداكدر اجسدة بروح
.....وين راح تصفى يازيدون
....بس الله يدري
.....وتالي. ‏ويا هذا العذاب مراح يخلص
.....خايف عمري يخلص وعذابي بعدة
اني لابيه احبسج واصير اني سجانج ولابيه انسجن بيج
....تعال حبيبي
.....قربج مني ياذيني
.....ليش اني مرتك يعني مابيننا حواجز
.....وهذا الي يخوفني ليش مداكدر احبسج بيه
لواكدر ادخلج لكلبي واخليج تغوصين بي
بس صعب
.....ليش
.....لان كلشي صعب
....هذا ابن منو خيال ريحي كلبي ليش تريدين اظل مثل الطير المحبوس
كوليلي سويتي شي زوجتي شنو الي سويتي
ترة متعرفين شنو العذاب الي بكلبي
...تتصور اكدر ازوج واحد غيرك هم اخلي واحد يكمشني
اني بس الك صحيح اني دورات اسكت وماااحجي هذا مويعني ماعندي احساس بس انت تعرف اني معشت الحياة الي تحلم بيها كل بنيه
عشت من ألم لألم ‏من
انت جنت الشي الوحيد المفرح الي صارلي
وياك وبيتك بس حسيت بلامان
بس والله ماخنتك ولاحتى فكرت اباوع على رجال غيرك
والله عيني متشوف غيرك
واحس الرياجيل كلهم عدم وكلهم غواش
بس انت الصورة الواضحه
صدكني ماسويت شي غلط ولاحتى فكرت
....اوف اوف ياخيال اني تعبان
....تعال لحضني
....مااريد
.....ليش
....اخاف اضوك حلاوته وبعدين انحرم منه
اجتي وتقربت عليه
...اجي اني يمك
.....تعرفين شكد شي موجع انو نمثل انواحنا مرتاحين واحنا ميتين من جوة
....لدير ظهرك الي وكاانك راحل
كلي شنو الي عشته بالسجن جنت اريد اشوفك
واخذ حزنك بيه لان جنت متاكدة انت تاذيت كلش
...... وبرغم هذا عفتيني
......عفتك جسد مو روح
.....كلي شنو الي وجعك ‏الى هذا الحد
....انتي
... زيدون
....اول يوم من نمت بحضنك تذكر شغنيت بالليل
....ليش دذكريني
....نومني بحضنك وغنيلي
......هههه
.... شنو جانت الاغنيه
....متذكرين
....انا ماانسى  شي دكوله
.....يبقى حبنا غلى  حب عمرة من عمر السنين يبقى حبنا اغلى حب معنى للود الثمين  يبقى حبنا كل عمرنا كل تفانينا وصبرنا يبقى حبنا احلى حب طول السنين
... وراح يبقى حبنا

.....منو هذا الطفل
....لاابني ولاابنك
.....صدك تحجين
....اي والله بس هذا سوء طنونك الي خلاك اشك بيه
وردت اشلع كلبك اكثر حتى بعد لتتهمني وجوز من الشك

.....لعد منو هذا الجاهل والرجال الي بالسيارة منو
.....الجاهل ابن جوارين بيت شدن امه خطيه وكعدت ونكسرت رجلها وهي كاعدة وحدها هي زوجها فدتروح للدكتور جابو بمنا والطفل ظل يبجي  اني بقيته يمي
والرجال الي جان بالسيارة ابن خالته  لزوج شدن
....وليش طلعتي من المحل شايلته
.....لان اجيت اكول لصاحب المحل مااكدر اليوم اجي
وجان الطفل ويايه ومن نزلت جنت شايلته ومن صعدت جان بيدي
...وليش لعد ماحجيتي
ها اكلج اوكفي اوكفي كلتي منو وداج للمحل زوج شدن لوابن خالته
...
....ابن خالته
....الله واكبر عليج طلعيني من سالفه تفوتيني بسالفه
لج شلون صعدين وياة
....موهو جان  بالبيت  و
..... و ،،،،،،،،،شنو ولج احجي ليش يجي يمكم بالبيت
.....لا بس هو  جان موجود
كعدت على الكرسي وكمشت راسي
.....ولج هذا موجان خطيبج قبل
....اي
....وجعي
......شبيك كلبت هيج زيدون
....من الله اخذة لزيدون وخلص منج ومن سوالفج
وتالي اني ماااشوف الراحه
....زيدون حبيبي
....لج انتي شنو تتغابين انتي تحبيني لو لا
انتي تكرهبني لولا لج انتي هلكد بريئه لو تددعين البراءة
انتي تمثلين بحبج
لو شنو
ولج اني مليت واني اكول خيال متغلط وابرر
شلون يعني تصعدين بالسيارة ويا خطيبج
السابق شلون يجي يكعد وياج بالبيت
شنو انتي تلعبين عليه مسويتني شخشيخه بيدج
لج تعبت اني 
اي اني اغار اني شك
موبيدي موبيدي افتهمي
....اسفه زيدون بس ماعندي شي وياة والله مجرد وداني لان زوج شدن جان ماعندة سيارة واني خفت ابو الشغل
ميخليني اشتغل بعد
....باجر الصبح اوديج لبيت اختج
....متريدني بعد
تركتها ورحت ونزلت للمطبخ
وكعدت اشرب جاي
وظليت  كاعد ماغمضلي جفن
ماااعرف اني مريض مخبل بيه شي
اني من البدايه تهمتها ويا طه وحلفت ورادت تبررلي
وتحجي ومانطيتها مجال
وبعدين طلعت صدك مثل مكالت
وشكيت بالطفل ابنها
وطلع موابنها بس مال ابن خالته زوج شدن هاي همين اني شكيت هي كالت بنفسها
انو هو جان. بالبيت
وهو وداها للمحل
اوف اني شنو الي داسوي بحياتي راح اظل اخلي الشك ياخذ احلى شي من عندي اني اخاف اخسر خيال
اني داعاقبها لو داعاقب نفسي اني محتاجها ‏ ‏
كمت وصعدت الها فتحت باب الغرفه على كيفي بس هي جانت كاعدة ندارت على الباب وبعدين دارت وجهها

رحت كعدت بصفها دارت وجهة مرة ثانيه كمشت يدها
وخليتها تخلي عيونها بعيني
وابتسمت وبداخلي وجع بس ماااعرف شنو سببه
السبب قربي منها او السبب الشك الي بداخلي
او الشي الي انكسر بيه من زمان ومديصلحه الوكت
....خيال
....ماااجاوبك
.....ههههه بعدج دكولين ماااجاوبك وجاوبين
.....انت هوايه تاذيني واني هيج مااتحمل تريد انت والزمن عليه
....عمري ماجنت ويا الزمن عليج اني الي جان الكل عليه
وعمري مافكرت اضرج اعترف انو اني اغار هوايه اشك
وافكاري تسبقني بس  مافكرت فديوم اسببلج ألم
اني من اول ماشفتج وقريت الحزن المرسوم بعيونج
كلت لازم امسح هذا الحزن لازم اخليها تفرح لازم اقدم كلشي لخاطرها
بس من كثر مااوجعتيني صرت شبه انسان
....مااعرف شكلك بس اني هم انسانه وتعبت ابرر كلشي
وتعبت اقدم تنازلات اني مااريدك اظن انو حبي الك ضعف ولااريدك اصير بحبك الي  ضعيف تعرف ليش حبيتك
لان شفت بيك الي ماشفته بحياتي حبيت قوتك حبيت
شهامتك
حبيت الرجوله الي عندك قبل مكنت افهم شنو يعني الحب حتى من كنت اتبيلي بالكلام انو انت تحبني
مو مجنت احس بيك لااحس بس مجنت اكدر
اجاريك مجنت اكدر اعبر عن الي احسه
جنت احس الكلام واكف بطرف لساني مثل الغصه
لااكدر اكوله ولااكدر اضمه
دورات الي بينا ميخلينه نحس انو اذا نعترف بضعفنا لشخص ما راح يدوسنه
كل لحظه اشوفك بيها تتوجع اني اتوجع بكدك ميت مرة
اذا اكلك ليش حبيتك يحتاج هوايه وقت
اني مااريدك تاذيني لوتعوفني وتعتقني وتاخذ حبك من كلبي وتروح وتتركني جبل من جروح
لو تعيش ويايه بكل احترام وحب
جنت ساكت واني اباوعها تحجي هسه يله حسيت خيال كبرت
هسه يله حسيت انو اني مشاعري ماراحت بلاش
كل الي قدمته اخذته
الورد الي زرعته حصتة
الشوك الي بكلبي شلعته
حسيت فدشي جان كلش ثكيل بكلبي راح
.....تعرفين اني شلون احبج
ضحكت
....اي اعرف تحبني ك وطن
....والاوطان لاتباع بس دورات احس انو لازم اعوفج
....اذا بعدك عني بي راحتك روح وصدكني من راح ترجع راح تلكاني موجودة و واستقبلك
...ليش
....لان الي تحب واحد مثلك مستحيل تحب شخص
ثاني اكو فرق بين الطبيعي والشي الي موطبيعي
وانت شي يفوق الطبيعه
....اويلي اويلي كلبي راح يوكف يولي
....انطيك كلبي
....ولج وين جنتي ضامه هذا الحب
...بكلبي
....اروح فدوة لكلبج
كون انا اغوص بيج وبين ضلوعي اخليج
وحق الخلقج مااخلى بس هوى
الله يطخ بيج وكون من عين
البشر
اداريج وكون الليل
مايطلعله شمس
والكمر يبقى يتغزل بيج
كون الهوى يطخج ويسليج
ومن عيوني قبل عيون البشر
يحرسج  ربي ويحميج
...كلبي
...شبي
.....يدك بسرعه احسه راح يطلع ويوكع بالكاع
....ولج اني رسمتج صورة بعيني كلما اغمض جفني اشوفج
من جنت بالسجن بقوني بالحبس الانفرادي
دورات جنت اسمع صوتج تحاجيني
اكول لنفسي ولك زيدون لاتتخبل هذا
هذا وهم
وجنت هوايه احلم بيج
الحب ياخيال مو كلام الحب شي
نقي ميقدرة ويحسه بس القلب الصافي
القلوب  الي مابيها خدوش ومابيها حقد  واذيه
الحب مو شي بلامعنى
الحب بكل كلمه بي الف معنى
....واني احبك
....واني هم احبج بس امانه الله ياخيال لتعبيني
ولتتصرفين ويايه بشي موزين
لان انتي الوحيدة الي من جرحيني انكسر
لج لاتكسريني. اني مثل النخل
لاتكسرين سعفي
خليني دوم رافع راسي وبيج يزيد الزود بيه
وهسه تعاي
.....ههههه لا
.....وتعبي منو يروحه وجروحي منو يداويها
....اني
واول نفس منا رحنا لدنيا غير الدنيه
رحنا لعالم كله احساس حسيت
القرب موبالجسد حسيت القرب بالروح
وبعدها نامت خيال وللصبح بحضني خفت
اصحى و مااشوفها خفت يطلع كل هذا حلم
وبالتسعه الصبح تلفوني دك باوعت الرقم
جانت اختي مجاوبتها وسويته صامت
جنت احس بالرجه مالته
ومافتحته
ورا ماادري شكد سمعت صوت الباب تندك بقوة
كمت دانزل
وحست خيال كالتلي

.....شكو
....ابقي هنا هسه اجي

يتبع....

قصة خيال ﴿ اليتيمه ﴾ حقيـقيه 💯-


بارت 29 شاركو القصه مع اصدقائكم

....منو
....ابقى هنا هسه اجي
....اوكي
.....لتوصلين يم الشباك
....شكو
....ماكوشي وين البنطرون
....هذاك بالكاع
اخذت البنطرون لبسته ولبست القميص حتى مالحكت  اسد القميص
نزلت رحت على باب الشارع
.....منو
....اني
سمعت صوت اختي نور
.فتحت الباب
...شكو من صباحيات الله
...الحك اخوتك
.....شبيهم
....لك ماتو ماادري عايشين بالمستشفى
....شدتحجين انتي
.....يله امشي دنروح يمعود
.....دقيقه خلي البس واجي
صعدت غيرت قميصي لان جان عليه حمره مال خيال
وجان جسمي يرجف نسيت كل الي سووا بمجرد ماعرفت انو هما بخطر حسيت كلبي راح يوكف من الخوف عليهم
...وين راح تروح زيدون
....اخوتي بالمستشفى راح اروحلهم
.....يا خطيه
......لتفتحين الباب ابد
.....ميخالف
نزلت ركض من الدرج جريت مفتاح سيارتي
وحتى عفت باب البيت مفتوحه
...زيدون تعال ويانه بالسيارة
....روحو كدامي امشو اني الحكم اروح بسيارتي
....ديله
مشيت وراهم وصلت للمستشفى
الدنيا مثبورة ودم بكل مكان وجان اكو حادث مال  سيارة كيه مال نفرات بحيث جان المنظر يمرد الكلب
جهال ونسوان مكشفات بالممر
والرايح والجاي يباوع عليهم
شفت طه
....طه
....عمو اجيت
....وين اخوتي
....جوة
....شبيهم شصار كلي
....... اليوم الصبح واكفين بالباب مال بيت واجتي سيارة عاليه ضربت عليهم طلقات وراحت
.....شنو الي ددكوله منو هذوله
.....مااعرف
وجان يبجي ونور تبجي
وكمت اصيح وين الدكتور  طلع وجان يكول بكل دم بارد
..... واحد منهم مات خسرنه واحد
جريته
....اخوتي شبيهم احجي لك شنو خسرنه واحد منهم
....اخي واحد منهم مات البقيه بحياتكم والثاني حالته حرجه بقه يم رب العالمين
وشفت سديه طلعت وجان نايم عليها مؤمن
مؤمن هو الي مات
ركضت ورا السديه وطه يعيط واختي تخربطت
واني اريد اكمش السديه
....اخويه فدوة ولك دكوم ليش ولك ليش
اخويه كوم مسامحك كوم انت هم سامحني
جانو يجرو من يدي واني اجر بي جانو يمشون والدم مالته ينكط بالكاع
ولك مؤمن
سامحني اخويه سامحني
مااعرف شنو الي جان بيه حسيت نفسي كاعد بالكاع بالممر مال مستشفى وخال راسي بين رجلي
والناس تمر من يمي
مداحس اكو شي يصبرني بعد واني شفت اخويه ميت كدامي
نعصر كلبي  وصحت رد اليه اخويه رد اليه وكلشي يصلح
لتعوفًني ترة تعبت اني يوميه وجع وجرح جديد
كمت اصيح وفقدت وبعد ماحسيت بس بصوت عياطي
واني اصيح
يابه كافي تعبت تعبت وين الرحمه كافي
مو متت مابقى حيل
لكم يلي دتروحون اخذوني وياكم
شو مابيكم واحد اخذني
ولكم  كافي يبس دمعي ودمي
كافي ياربي خلصني موكلبي زرف
يابه وينك يابه فاركت اخويه يابه تعال يابه
وحسيت سعفتي نكسرت
كلبي جان ينزف دم
ياربي ليش ورثت الدمع والقهر ياربي شوكت ترحمني
اذكرت  من قبل جنت اتمرض واختنك  ومااكدر انام وامي تتعب
وتريد تنام ياخذني مؤمن ويشيلني ويظل يفرني وهو هم يفتر ويايه
لحد ماادوخ وانام
اذكرت  لمتنه وكعدت ابويه وامي
اذكرت  من اخويه سعد يتعارك ويايه
بس من يشوفني مريض يروح ركض على امي
يكللها
.... كومي زيدون راح يموت
ذكرت دنيا صافيه
كلهم بدو يروحون مني
اجتي صور اهلي كدامي ومرتي واوس ابني
ابويه ابو كلب الطيب وامي الحنينه واخوتي قبل مايلوثهم الوكت شفت بيهم حبهم الي ودفاعهم عني
ودمعتهم الي توكع قبل دمعتي
شفتهم حنيتهم عليه قبل مايتغيرون عني

مااعرف الي جان ديصير داير مدايري جنت فاصل احس
نفسي بعالم اظلم مااعرف شلون رحت على اخويه سعد
وشفته وشلون كامو يصيحوني منا ومنا وصارت المستشفى هوسه
واسمع صوت اللطم وصوت البجي
العصر صارت الدفنه واني  جنت كاعد عالتراب
ندفن يم امي وابويه وخالتي ومرتي وابني
جانو كلهم يمه
كعدت اسولف وياهم جنت اتمنى حفرة وانام يمهم
باوعت على كبر امي
كتلها
....يمه اني تعبت يمه اريدج اتنفضين التراب منج ودكومين تنوميني بحضنج بلكي كلبي يبرد
بكلي تطفه ناري
بلكي اجر النفس بدون حسرة
يمه الدنيا كلها ضدي ماالحك افرح بشي تعبت ومل التعب مني
يمه كومي جاوبيني يمه

وباوعت كبر ابويه ورحت كعدت عليه مسحته بهدومي
كتله
....شلونك يابه بعدة يصعد السكر والضغط عندك
لو هسه ارتاحيت بعدك دكول انتو بس الي تكسرون ظهري لوهسه ظهرك نعدل

اني زين يابه زين
زين بعدني  اتنفس شكد نطعنت وتعذبت بس ها بعدني عايش
يابه
اشو بطلت تجيني  بالحلم اشو بطلت ماتمر دكلي كافي ارتاح ليش عرفت ماراح الكه الراحه يابه مشتاقلك

الكبور جانت قريباواحد شويه بعيد عن الثاني

ورحت على كبر ابني اوس
...حبيبي اوس مشتاقلك ابني ولك مالحكت افرح بيك
انت غصه بكلبي مدتبرد
كلي طلعلك بعد سنون لولا
مشتاقلي حبيبي اني مشتاقلك مشتاق  لريحت  الورد
الي بيك ‏
باوع هيانها امك يمك
علااقل انتو واحد يم الثاني باوعت لكبر مرتي
...شلونج سامحتيني واني السبب بلي صار  بيكم
سامحتيني لولا
تريدين اسولفلج عني
اني حبيت
حبيت وحدة اسمها خيال شفت كل انواع  الالم بهذا الحب
بس اخاف هي هم تجي تنام يمكم هنا مداتحمل
اني خايف من قربي منها كوليلي اعوفها
اني خايف كوليلي
هم بعد راح احد يجي يمكم
كولولي احجو كمو خلوني اعرف اني راح اجي يمكم لو خيال لومنو
تعبت اني تعبت
كل جرح بيه اكبر من الي قبله
كمت جبت مي وكعدت اغسل الكبور
واني ماغسلتها بمي غسلتها بدموعي
ياالله شكد تعذبت اني شكد شفت وجع
لشوكت راح يتحمل كلبي

يتبع ...

قصة خيال ﴿ اليتيمه ﴾ حقيـقيه 💯-


بارت 30 الاخير. #النهايه.

بوسط لمت اهلي بالكبور  حسيت مومهم   اذا هما كاعدين يمنا لويشوفونا.
المهم يحسوني جنا صغار نخاف من الميت بس  من ‏كبرنا وعرفنه ‏الميتين ميخوفون العايشين هما الي يخوفًون
الميت من يموت
يكولون اظل روحه وياااهله
يجوز روح ابويه وامي ويايه
يجوز الوجع الى نحسه يروح يوم ويجي  يوم ويجوز يختفي بس هم راح يجينا  وجع جديد راح نتعذب من جديد
ويجوز نفرح
بوسط كل  ‏المعاناة الي عشتها ‏ باقي عندي خيط
رفيع من الامل مااعرف هو شنو  او راح ينطيني لدافع لشنو
بس هو امل
من رديت لييت اهلي الي جان يجمعنا الي جان يلمنا  شفت خيالات تمشي حسيت بوجود اهلي
حسيت اجسادهم بعيدة بس ارواحهم بينا
سوينه فاتحه والتهينا ‏ بقهرنا خيال
جانت حاضرة وجانت تشتغل وياهم وتحنن وداري وطيب وتبجي وكاانما هي تعرفهم صارلها اسنين
لاتظنون الدمع ينزل بس على الشخص الي نعرفه خيال
جانت تبجي على دمعي
باوعت ولد مؤمن شلون يبجون وزوجته شلون ساكته والدمع مايندل دربها ‏
اظاهر الدمع عدها خلص
صاحًوني كالولي تعال اختك نور منعرف شبيها
رحت وشفتها كاعدة بنص الغرفه وتملخ بشعرها واباوع يدها كلها شعر
جريت يدها وخليت راسها على صدري
....زيدون ليش كبرنا ليش عافونا وراحو
ليش
....... الله يرحمهم نور هم السابقون ونحن الاحقون
......كون هسه اموت وبالتراب يدفنوني ولك هنا نار نار
اخويه نار ومشتعله بكلبي
.....كافي نور خليهم يرتاحون بكبرهم
سمعتها تنعي
(يمه يالعزيزة كومي من كبرج وعلى كبر ابنج يمه
روحي يمه الليله وحشه كومي يمه نفضي ترابج  يمه وكومي يمه شدي الراس وبدمعج غسلي كلوبنا
وحني علينا يمه يالعزيزة  الليله ورا حساب
والليله يمه الكبر يصير بي الف عتاب
يمه لابينا نجيج ولابينا يمه نشتكيلج
يمه دللول   يمه دللول ياجروحي  نامي )))
....كافي الله يخليج
وجانت دمعتي تنزل سكته شكد جرت عليه ايام بس مجنت اعرف طريق الدمع جنت اكول الرجال
مايبجي عيب
بس هسه دمعي احسه صار مثل النفس اذا مايطلع يخنكني
دورات نكول الزمن كفيل ينسينا والله ينطيني نعمه النسيان بس مستحيل ننسى الي نحبهم
يظلون جرح ميطيب وكل فترة يلجمن

،،،،........ هذا وجع اشخاص فقدناهم
لتسئلون ليش مات اخويه لان الميت ماعندة لسان ويجاوب الطايح رايح ويبقى بس دمه يشربه التراب
اما حبنا
الي عشنا مجان بس حب جان حب وطن ضايع
واقع مر واقع بعيد عن ارض الاحلام
الحب موبس كلمه بين اثنين الحب رابط قوي يجمع شخصين
من نحب وحبنا يرتبط بوطن ويرتبط بجرح
من نبحث بداخلنا عن عمق فرحتنه وعن كبر
سعادتنا الضايعه
قصتنا كااي قصه
كان بيها حزن وكان بيها لحظات من الفرح
وصلنا ‏لقناعة انو لابد نبتعد لان بعض الناس تغير ت القيم والاخلاق عدهم ولان وطننا ماخلفنه   ‏بس الوجع
مولان ‏ ‏تخلينا عن عراقيتنا  لان شهادتنا بالعراق مذبوحه
على كد ماعشنه بوجع على كد مااجتنا
لحظات
تشبه النسمات الباردة
اخذتني من عالم وخلتني بعالم
رجعت الدنيا ‏ لمتنا مثل مافاركتنا.
رجعت الحياة احتضنتنا ‏ مثل ماعذبتنا بعدني احس
انو اني بهذا الحب راح افقد نفسي
بعديراودني الشعور باانو اني بالمستقبل راح يصير شي بس
ماااعرف شنو هو
دائما حتى واني بنص فرحتي احلم
وحلم
‏بدايته حلوة  وبعدها يكون ظلام
واحس بالدمعه واكفه باب عيني

ماتغيرت وبعدني احمل قيم ومقتنع بقضيه
بس قضيتنا ‏ اختلفت والي بينا هما الي د ياذونه
كل يوم يسقط قناع وكل قناع
نكتشف ‏ تحته حقيقه ‏
مزيفه
كل يوم نكتشف انو سعادتنا بعدها ممكتمله
وسطت هالشرود فزيت على صوت كل همسه بي دك بكلبي ابني اوس الي اجى من. وسط العذاب  وكان فرحه النا
....بابا
......اوس تعال بابا يله دروح
.....حبيبي شوكت الطيارة
باوعت بالساعه
......يعني تقريبا بعد ربع ساعه
...تعبت من الانتظار
....يله مابقى شي
تعال،،،،،تعال ،،،،تعال ،،،، حبيبي

تعال بحضن بابا
يأشر بيدة
.....شتريد مي
.....لايمكن جوعان
....هسه اسويله ممه
...لا هو كبر شيسوي بالممه
شاف الممه مد يدة
....هههههه كلشي ولا الحليب
وراح يم امه يشرب حليب
باوعت على هاي اللوحه الي كدامي الي تجمع كل معاني الجمال
الطفل والام 
والخيال الي ملكته
كلشي صار الي  وخيال صارت جزء من داخلي
بس اعتقد رفيق دربي وهو قدري السيء ميكدر يفاركني
بس اكيد رب العالمين مراح يتخلى عني
ولاراح يوكفنه شي 
وراح نظل نستمر بقصتنا لحد نهايه العمر
قصتنا حب وطن وألم وجرح
قصتي مثل  قصه كل عراقي

الكاتبه روجمان #النهايه

رأيكم بالقصه يهمنا دزولنه رايكم القناة👈 @ki0ki


نحبكم هوايه هوايه

انتظرونه بمجموعه قصص #جديده .❤️
-

طبعا اسفه حبايب تأخرت عليكم بس نت جان معندي💔😊

انزل باجر اللغاز وفقرات
اي 😍 لا 😑