لا تعتقدوا و تجزموا ان تربيتكم الآن للأطفال يوافق عليها ابناءكم (كُلها) بعد سنوات طويلة
مهما اعتقدتي انك وصلتي للقمة بتعلم جميع طرق التربوية الناجحة إلا أنه سيأتي تعارض في المستقبل و هذا عادي لأن زماننا غير زمانهم ✅

في مجتمعنا تنعدم تقريبًا "ثقافة تنمية المواهب للأطفال " لماذا في رأيكم ؟ 🤔

متى ابدأ في توعية ابني حول موضوع التحرش ؟ 🤔..:

١- في العام الاول : نقولولو عيب يشوفك في كل مرة تبدليلو و كوني حريصة انه كي تبدليلو مايكون قدامكم حتى واحد

٢ - من ثلاث سنوات إلى خمس : يكون الطفل تعلم جيدًا انه عيب يشوفوه مايحبش اصلاً يبانو مناطقه مهما تعددت الظروف

٣ - عند وصوله للسنة الاولى او الروضة : يعني يخرج عن نظرك و يبعد عليك في فترة الدراسة ، تبداي توّعيه انه هناك اشخاص ممكن رايحين يحاولوا يشدّوه " امي حبيبي كاين ناس ممكن يحاوالو يشدوك هنا و هنا و هنا و هذا الشئ خطأ و ماتسكتش عليه و ارواحي قولي ولا قول للأستاذة إذا كنت المدرسة يك ؟"

- اكيد مع تعليمهم الاماكن المحظورة عن طريق قصص او مقاطع صغيرة ✅

لا يغرّك طفلك :
إذا يضرب الأطفال الآخرين فهو ليس قيادي

- لتصحيح المفاهيم الخاطئة ✅

صفات المربي القدوة :

‏صادق في أقواله وأفعاله
‏صادق فيما يريد
‏أمين و ملهم ومحفز
‏يجد لكل مشكلة حل
‏محاور جيد ومتفهم
‏يركز على الإيجابيات

صعوبات الرياضيات عمبالكم غير لي مايعرفش يحسب ؟ 🤔:


بل كاين بزاف انواع ارواحو نشوفو شوية منهم : ⬇️⬇️⬇️

١- لي يلقى صعوبة في الاحتفاظ بالنتائج العمليات الحسابية مثلاً :
6+7=16 / 2•5= 10 | 63\7=9
هو مام يحفظ جدول الضرب ولا العملية الحسابية بصح نهار تسقسيه مايعرفش النتيجة ..
لواش يلجأ ؟
يلجأ انه يحسب بصباعتيه ولا يدير دوائر ولا خشبيات ( حسب الموقف) بش يلقى النتيجة

٢- كاين صعوبات اكتساب المهارات الحسابية البسيطة هادو رايحين يلقاو صعوبة في مواجهة العمليات رغم انه يفهمو هاديك المسألة مثلاً:
مدينالو مسألة يعرف وش يدير فيها بصح كي يروح يطبقو يغلط في نتائج بشكل متكرر

٣- كاين لي عندو صعوبة في مفهوم الأعداد هذا مايعرفش بعد بشكل متسلسل مثلا:
مايعرفش بلي ١ يجي موراه ٢ امبعد ٣ امبعد ٤

٤- صعوبات العد هذا في الاصل يتعلم الطفل العد في مرحلة ما قبل المدرسة مثلاً : يحسب الخشيبات مرة وحدة لكل خشيبة، و يعرف ان الخشبية الأخيرة هي عدد جميع الخشيبات لي حسبهم و انه كي نحسبو ماشي شرط الترتيب
لكن لي عندهم هاد الصعوبة مايعرفوش هاد المفاهيم للأسف

٥- كاين لي عندهم ضعف لغوي كي تشرحلو خطوات المسألة ولا عملية حسابية مايفهمكش لغويًا مايعرفش لغة الرياضيات اصلاً ( ميعرفش وش هي الزائد و الناقص و لا رتب تصاعديًا او تنازليًا ..الخ )
مثلا تمدلو عملية حسابية فيها الزائد و الناقص و تقولو اولاً لازم نحسبو المجموع امبعد نقصو من المجموع عدد فُلاني ، هو مايفهمكش اصلاً وش راك تهدر.

في منشور آخر نكمل الباقي بإذن الله ❤️

لكل زوج وزوجة: (اجعل أيامك بيضاء مع شريك حياتك من خلال إحسانك إليه،تحسبا ليوم أسود بسبب إساءتك إليه).

بالأحرى : ماتفرغيش رصيدك و انت اصلاً ماكيش تعمريه ، لأنه يجي يوم الرصيد يفرغ و يبقى دون جدوى ✅

و عليكم السلام و رحمة الله و بركاته

حسب مافهمت نقدر نجمع المعطيات التالية :
- انت أختهم الكبيرة
- واحد فيهم راه قريب من سن المراهقة (يعني هذا بالذات يحتاج تعامل غير عن غيره )
- اظن انهم مفششين من قبل والديك (خاصة الاب )
___

قبل مانحاولو اضافة عادات جديدة:
اولا: لازم نديرو اتفاقية مع المسؤولين في المنزل يعني نهدرو مع داركم "شوفو والله الاطفال راهم قباحو ولازملهم ضبط و صرامة في أمور و شوية نظام باصك رجعو هكذا و هكذا و هكذا ، و لوكان نبقاو هك رايحة قباحتهم تزيد ..

ثانيًا : لازم نشوفو اسباب هاد الشي ، ممكن يكون فشوش زايد ممكن تكون اتكالية
مثلاً تمارينهم في الويكاند كامل ماداروهش (باصك في راسو ضامن انه اخته يوم السبت مساءًا ديرهولهم ) يقول بلي خلاص نخليهم يوم السبت و إذا رفضت الاخت انها دير معاهم التمارين يتدخل الوالدين في ارغامها ..
هنا لازم نمشو بسياسة الضبط تع ايدا جيتني يوم السبت نقولك انه يوم السبت أنا مشغولة
ردولي الكلام = نفاشيهم و مانتكلمش معاهم و نفهمهم علاه
يرمو دوزان فالارض= أنا مانرفدهمش ولو بقاو يوم كامل فوق الارض ، مارفدهمش هنا يعاقب انه نحيلو عفسة يحبها مثلاً الخروج حتى يطم أدواته
اي لكل سلوك سلبي يقابله تقويم ذلك السلوك ( بالصرامة و المداومة ..)

الطفل يُعاند و يقباح لأنه لقى الاولياء يلبون احتياجاته رغم عناده و قباحته ،

لهذا بما انك حسب ما فهمت انتِ من المسؤولين عليه يجب عليك اولاً تفاهم مع والديك على طريقة الجديدة لتقويم السلوك .. اما باش نتي تحاولين تقويم سلوك امبعد الاولياء يجو يديرو عكسه هنا للأسف ماكيش حاتلاقي نتيجة

اما المراهق تع ١٣ سنة: هذا يجب مصاحبته و ليس امره لأنه يشوف راه مستقل ( من الجيد الحوار معه ، والله يا فلان اليوم راني عيانة و مانزيدش نطم أدواتك فضلاً طم أدواتك علابالي بلي تقدر …الخ) ✅✅✅✅

- رابط الصراحة :

http://mariahadada.sarhne.com

في اي تشخيص للاضطراب لازم نشوفو ٣ امور :

١- الأعراض : كل اضطراب لازم تكون عندو مجموعة من الأعراض إذا كانت اقل من العدد اللازم فلا نستطيع الجزم بالاضطراب ✅

٢- المدة : هناك مدة معينة يجب متابعة إذا كان الطفل يمرّ بتلك الأعراض ، إذا كان اقل من المدة المعينة فلا نستطيع الجزم بالاضطراب✅

٣- العمر ، كل اضطراب له عمر معين للتأكد منه ، إذا ظهر قبل العمر فلا نستطيع الجزم بالاضطراب ✅

لهذا واحد مايخلعكم إلا بهاد ثلاث أمور ملاحظات البعيدين عن الاختصاص لا تسمن و لا تُغني من جوع ✅✅✅

كأب أو أم، عليك أن تؤسس أسرة لا يرغب أفرادها الهرب منها!
‏قد يكون هذا بحد ذاته أعظم انجازات حياتك.✅