‏أحبه والله إنه عندي أغلى من بنون ومال
‏لكن الحظ ما ساعد ويادنيا من أنتِ له

‏من الشهد المصفّى قد صفط لي رشفة الفنجال
‏يا ليته عاود الفنجال والا زوّد الكيله

‏لو إنّي ما دريت إنه بشر من لمعة السلسال
‏حلفت إنه ملاكٍ شافته عيني على الزيله

‏فرشت ضلوع صدري في طريقه والهوى قتّال
‏أبيه يدوس ريضان الحشا وتفوح أكاليله

‏عقلني بالفراق وقال لي تحتال قلت احتال
‏من يطيح بغرامك لازم يوقف على حيله

‏وثقت إنه محال ولا وثقت إن المحال محال
‏أطارد نور شمسه لين غابت وانتثر ليله

‏كثر ما كان وسعة بال ليش يصير ضيقة بال؟
‏وكثر ماكنت محتاج الدعاء لكني ادعي له

‏وأنا وشلون ألومه والملامة ترخص الرجال
‏وأنا اللي حاذفٍ قلبي على صفة مضاليله

‏كتاب الرافعي وحي القلم والمسبحة والشال
‏هي اللي باقيه لي يا ترى وش عاد باقي له؟

‏عساه يشوفني عابر سبيل بشاشة الجوال
‏يكفيني لو إنه قاطعٍ عني مراسيله

‏شعوري في فراقه شي لايكتب ولا ينقال
‏لكم عنوان جرحٍ ماقدرت أشرح تفاصيله

-سعود بن مبارك

‏«مثل فرصة العصفور من صدة الفلاح
‏أبي فرصة يلقى بها الخاطر .. سياحة»

عبدالكريم البدراني

في ليلةٍ تفتح من الباب ألف باب
ما فيه عنها لا مناص ولا مفر

في طيّها فرحه ونوبات اكتئاب
تناقضات اجتمعت بلمح البصر

من بعدها يستلهم العقل الصواب
ولولا سنا الشمس اختفى نور القمر

ما عاد يجذبني طيشان الشباب
انا متعدّي ما وراء حدود البشر

أهيم وأكتب لي من الفكرة كتاب
وأنحت معانيها مثل نحت الحجر

من يطرق البيبان يلقى له جواب
وانا جوابي بين خدّيك انحصر

حبيبي امسى القلب يطرد له سراب
يركض وراء طيفك ولا يدرك أثر

طالت طقوس البعد وطقوس الغياب
متقبّل حضورك ولو مالك عذر

من منتصف ليلي يلين البدر غاب
والشمس تشرق والأماني تنحدر

في جيّتك لو كان فيها من العذاب
تعذيبك ليا بان وجهك يندثر

-عُمر

الحِلم خلق عظيم، وأغبط كل من رزقه الله صفة الحِلم، هذي الصفة لوحدها كفيلة بان ترفع من قدر صاحبها، وتجعل منه مأمناً وراحةً لمن حوله.

الحليم يتجاوز الزلّات، ويتّسع لاختلاف الطباع، ويمنح الناس من سعة صدره ما يعجز عنه غيره.

كل شي له حدود، حتى الحِلم نفسه، فـ أحلم الناس قد يبلغ نقطة لا يعود بعدها قادراً على احتمال مثقال شعره.

وكذلك يقول ناصر المنقره

الحليم إلي يغض الطرف عن زلاتك
‏منت قادر تحشمه لا تستهين بحلمه

‏أقصر عنان المكابر وأخفض بهقواتك
‏وأعرف أن ماكل كلمه ردها في كلمه

‏أغنم اللي جاك واللي فاتك أسمه فاتك
‏لا تكب النور وأنت تعرف ويش الظلمه

‏عاد وأنت أبخص في حسناتك وفي سياتك
‏والا أنا صاحبك الأول ما تغير سلمه

الهوس أحياناً يتم تغليفه بالكراهية.

لا تتراجع.. التراجع يقتلك

على الطيب والأمجاد ماهي بمسبوقه
جعلها الولي في كلّ الأحوال سبّاقه

بيت قديم لي

راحت سنيني وانا دايماً تكسي مطار
يوم مستقبل مسافر ويوم أودّعه

اليوم جاء دورهم يودّعوني

ماهو بشرط عباد ربّي ترتضي من ترتضيه
ما انت بوليّ الله على آدم ولا ذريّته

لا تنشغل فالناس يا ابن الناس في ماهي تبيه
كلٍ له اسلوبه وله طبعه وله حريّته

-محمد آل عمره

‏تمسك بالحيا دام الحيا شعبه من الايمان
‏ترى وقتك يحد الذيب ياكل لحم ذرعانه

فاضي او مشغول صلّ على الرسول

‏لاعاد تحرص علي اكثر من اللازم
‏الحرص دايم على الحاجة يضيّعها

- واحد محترم

ممّا تيسّر من يدين المعتمر
اسمك تواتر من كفوفه للسماء

-عُمر

احترامي لك يجي من دافع
المحبّه والغلا والحشمه

العمر ويّاك جدّاً رائع
يرسم بوجه الآوادم بسمه

-عُمر

تستاهل الطيب والتدليل والاحتواء
اللي على كلّ خلق الله طغى سوقها

-عُمر