‼️Telegramdan onlayn kredit beramiz, degan firibgarlarga ishonmang
#firibgar

Telegramda onlayn kredit berishni va’da qiladigan firibgarlar ko‘p. Ular turli sxemalarda ishlaydi. Sodda odamlar esa barchasiga ishonib ketaveradi.

Bugun ana shunaqa firibgarlar tarmog‘i bilan bog‘lanib ko‘rdim. Mahigul Komilova degan nom bilan ishlaydigan bu firibgarlarning quyidagi botlarini topdim:

1) @makhigulkredituz_bot
2) @Makhigulkredit_bot
3) @makhigulcredit_bot
4) @Makhigul_credit_bot
5) @makhigul_kredit_bot

❗️ESLATMA: bular firibgarlarning botlari, ishonib o‘tirmang.

Dastlab ishonarli chiqishi uchun go‘yoki minnatdor mijozlarning videosi va yozishmalarini yuborishadi. Lekin videolar sun’iy inttellekt tomonidan yaratilgan, yozishmalar skrinshotlari ham soxta.

Firibgarlar mendan ism-sharifimni, plastik karta raqamimni va pasport seriyamni so‘rashdi. Savollarga atayin o‘ylab topilgan ism, mavjud bo‘lmagan plastik karta va pasport raqamini yubordim.

Falonchiyev Pistonchi
8600 1234 5678 9999
AV9876543

Birozdan so‘ng ular “kreditingiz tayyor bo‘ldi”, deyishdi. Shundan ham ularning firibgarligini bilsa bo‘ladi, Siz yuboradigan ma’lumotlarni ularga umuman qizig‘i yo‘q, kredit berish niyati ham yo‘q.

Ular menga Markaziy bank nomidan soxta shartnoma yubordi.

❗️Eslab qoling: Markaziy bank fuqarolarga kredit beradigan tashkilot emas!

Kreditni yuborishlari uchun avval 400 ming so‘m xizmat haqi to‘lashimni talab qilishdi. Yana biroz muddat javob bermasangiz, sizga mana bunaqa dag‘dag‘a ham qiladi:

Nega javob bermayapsiz? Siz o‘zingizni judayam xunuk tutyapsiz va meni bank menejeri va bank oldida noqulay ahvolga solyapsiz…

Qachon bizning xizmatlarimizga to‘laysiz va kreditni olasiz?

Firibgarlar dastlabki to‘lov uchun 400 ming so‘mni jismoniy shaxslarning plastik kartalariga qabul qilmoqda. https://uzcredit.com saytida mana shu plastik kartalar raqamlari va egalarining ism-sharifi ko‘rsatilgan.

1) Laylo Abdusalimova
9860 2466 0203 9520
9860 2466 0225 2602
9860 2466 0205 8983
Octobank

2) Karimova Karina
9860 6004 3026 4546
Anorbank

3) Sabina Begmuradova
9860 1766 2153 1670
Ipak Yo’li Bank

Sodda odamlar mana shu kartalarga pul o‘tkazmoqda. Tegishli organlar mana shu karta egalarini topsa, kalavaning uchi chiqib keladi.

Kiberxavfsizlik xizmatlari aslida mana shunaqa onlayn firibgarlarni doimiy monitoring qilib borishi, yangi sxemalarni aniqlashi, ularga mijoz sifatida yozib ko‘rib, jinoyatchilarni topishga harakat qilishi kerak. Eng muhimi, firibgarlik sahifalarini esa bloklash choralarini ko‘rishi kerak.

Qachon ariza bo‘lsagina, keyin harakat qilamiz, deb qo‘l qovushtirib o‘tirish eng noto‘g‘ri ish. Vaholanki, ariza bo‘lsa ham aksariyat hollarda baribir onlayn firibgarlardan jabr chekkan fuqarolarimizga yordam bera olishmayapti, “izini topib bo’lmaydi” deb qutilmoqda.

‼️Iltimos, hurmatli yurtdoshlar! Internetdagi duch kelgan firibgarlarga ishonib ketavermang! Telegramdan kimdir sizga onlayn qarz yoki kredit taklif qilsa, o‘sha odamdan uzoqroq yuring.


👉 @xushnudbek 👈