የጉምሩክ ኮሚሽን ሙስናን ለመከላከል እና ለመቆጣጠር ባለድርሻ አካላትን ያሳተፈ የፀረ-ሙስና ትግል እያደረገ መሆኑ ተገለጸ

***********************

(የፌ.ሥ.ፀ.ሙ.ኮ ጥር 8/2017 ዓ.ም አዲስ አበባ) ሙስናን ለመግታት ታማኝነትን ማጎልበት በሚል መሪ ቃል በዓለም ጉምሩኮች ድርጅት (WCO) አስተባባሪነት የተዘጋጀ ሙስናን ለመከላከል እና ለመቆጣጠር የሚያስችል የውይይት መድረክ በአዲስ አበባ ተካሂዷል፡፡

የጉምሩክ ኮሚሽን የህግ ተገዥነት ዘርፍ ምክትል ኮሚሽነር አዝዘው ጫኔ፣ ሙስና የአንድ ተቋም ሀገር ብቻ ችግር ሳይሆን ዓለም አቀፋዊ ይዘት ያለው መሆኑን ጠቅሰው፣ ልማትን የሚጎትት፣ የሀገርን እና ተቋማትን ህልውና አደጋ ላይ የሚጥል በመሆኑ ሁሉም ዜጋ ሊጠየፈው እንደሚገባ ገልጸዋል፡፡

የጉምሩክ ኮሚሽን ሙስናን ለመከላከል እና ለመቆጣጠር ባለድርሻ አካላትን ያሳተፈ የፀረ-ሙስና ትግል እያደረገ መሆኑንም አስረድተዋል፡፡

ተከታታይ ጥናቶችን በማድረግ፣ የሙስና አዝማሚያዎችን በመለየት እና የስጋት ስራ አመራር ስርዓትን በመዘርጋት ብሎም የአሰራር ግልጽነትን በማስፈን ሙስናን ለመከላከል እየተሰራ ነው ብለዋል፡፡

በውይይት መድረኩ የጉምሩክ ኮሚሽን ሙስና እና ብልሹ አሰራርን ለመከላከል እና ለመቆጣጠር እያደረገ ያለው ጥረት በተመለከተ በዓለም የጉምሩኮች ድርጅት የተጠና የዳሰሳ ጥናት ቀርቦ ውይይት መደረጉን ከጉምሩክ ኮሚሽን የማህበራዊ ትስስር ገፅ የተገኘው መረጃ ያመለክታል፡፡

በመድረኩ የጉምሩክ ኮሚሽን የህግ ተገዥነት ዘርፍ ምክትል ኮሚሽነር አዝዘው ጫኔ፣ የፌደራል የሥነምግባር እና የፀረ-ሙስና ኮሚሽን ምክትል ኮሚሽነር አቶ እሸቴ አስፋው፣ የፌደራል ፖሊስ ኮሚሽን አመራሮች እና ሌሎች ባለድርሻ አካላት ተገኝተዋል፡፡

ከሙስና የፀዳች እና የበለፀገች ኢትዮጵያን ዕውን እናድርግ!

#NCRS ሞባይል መተግበሪያ

#ለAndroid ስልክ ተጠቃሚዎች
https://play.google.com/store/apps/details

#ለApple or iPhone ስልክ ተጠቃሚዎች
https://apps.apple.com/us/app/ncrs/id6593662319

ከአሰራር ውጪ የ16 ሰራተኞች ቅጥር እንዲፈጸም ያደረገው በእስራትና በገንዘብ ተቀጣ

*******

(የፌ.ሥ.ፀ.ሙ.ኮ ጥር 8/2017 ዓ.ም አዲስ አበባ) የኦሮሚያ ክልል ምዕራብ ሸዋ ዞን ከፍተኛ ፍርድ ቤት ወንጀል ችሎት በጥቅም በመመሳጠር ከአሰራር ውጪ የ16 ሰራተኞች ቅጥር እንዲፈጸም ያደረገው ተከሳሽ በ14 ዓመት እስራትና በገንዘብ እንዲቀጣ ወሰነ።

የዞኑ ዐቃቤ ሕግ ፈይሳ ዱደማ የሙስና ወንጀሎችን ለመደንገግ የወጣውን አዋጅ ቁጥር 881/2007 አንቀጽ 9 ንዑስ ቁጥር 2 ስር የተመላከተውን ድንጋጌ መተላለፉን ጠቅሶ ተደራራቢ ክስ አቅርቦበት ነበር።

በዚህም ተከሳሹ ፈይሳ ዱደማ በ2015 ዓ.ም በምዕራብ ሸዋ ዞን ጤና መምሪያ የሰው ሃብት ልማት አስተዳደር ኃላፊ ሆኖ ሲሰራ በተለያዩ ጤና ጣቢያዎች ለሚመደቡ ሰራተኞች በወጣ የቅጥር ማስታወቂያ መሰረት መስፈርቱን የሚያሟሉ ሰራተኞች እያሉ ተከሳሹ ከሌሎች ሶስት ግብረዓበሮቹ ጋር በጥቅም በመመሳጠርና ስልጣኑን ያለአግባብ በመጠቀም የማይመለከታቸውን ማለትም መስፈርቱን የማያሟሉ 16 ግለሰቦች የስራ ቅጥር እንዲፈጸምላቸው እና እንዲመደቡ በማድረግ ያልተገባ 732 ሺህ 823 ብር የደመወዝ ክፍያ እንዲፈጽምና በተመሳሳይ በመንግስት ላይ ጉዳት እንዲደርስ ማድረጉ ተጠቅሶ ተደራራቢ ክሶች ቀርበውበት ነበር።

ተከሳሹ ችሎት ቀርቦ ክሱ ከደረሰው በኋላ የወንጀል ድርጊቱን አለመፈጸሙን ጠቅሶ ክዶ በመከራከሩ ዐቃቤ ሕግ የሰውና የሰነድ ማስረጃ አቅርቦበታል።

ፍርድ ቤቱም የቀረበውን ማስረጃ መርምሮ በክሱ ላይ የተጠቀሰው የወንጀል ድርጊት መፈጸሙን ጠቅሶ ተከሳሹ እንዲከላከል ብይን ሰጥቷል።

በዚህም ተከሳሹ ተከላከል በተባለበት ድንጋጌ ስር የዐቃቤ ሕግ ማስረጃን ማስተባበል ባለመቻሉ የጥፋተኝነት ፍርድ ተላልፎበታል።

ፍርድ ቤቱ የግራ ቀኝ የቅጣት አስተያየት መርምሮ ተከሳሹን በ14 ዓመት ጽኑ እስራትና በ10 ሺህ ብር የገንዘብ መቀጮ እንዲቀጣ ወስኗል።

በተጨማሪም ተከሳሹ ቀደም ሲል በተፈቀደለት የ25 ሺህ ብር የዋስትና መብት መነሻ የዋስትና ግዴታውን አክብሮ ፍርድ ቤት ሳይቀርብ በመቅረቱ ምክንያት ተጨማሪ የ280 ሺህ ብር የገንዘብ መቀጮ እንዲቀጣ ተወስኗል።

ፍርድ ቤቱ የኦሮሚያ ፖሊስ ተከሳሹን በቁጥጥር ስር አውሎ ለማረሚያ ቤት እንዲያስረክብና የተወሰነበትን የእስራት ውሳኔ እንዲያስፈጽም ትዕዛዝ መስጠቱን ኤፍኤምሲ ዘግቧል።

ይህ በእንዲህ እያለ የዞኑ ዐቃቤ ሕግ ከዞኑ የሲቪል ሰርቪስና የሰው ኃብት ቢሮ ጋር በመሆን በህገ-ወጥ መንገድ የስራ ቅጥር የተፈጸመላቸው 16 ሰራተኞች ከስራ እንዲታገዱ በማድረግ የተከሳሹ ግብረ አበሮች ናቸው በተባሉ ሶስት ግለሰቦች ላይ በፍርድ ቤቱ ክስ ማቅረብ መቻሉን ለማወቅ ተችሏል።

ከሙስና የፀዳች እና የበለፀገች ኢትዮጵያን ዕውን እናድርግ!

#NCRS ሞባይል መተግበሪያ

#ለAndroid ስልክ ተጠቃሚዎች
https://play.google.com/store/apps/details

#ለApple or iPhone ስልክ ተጠቃሚዎች
https://apps.apple.com/us/app/ncrs/id6593662319

በድሬዳዋ ከተማ በሕገ ወጥ ተከማችቶ የተገኘ ከ12 ሺህ ሊትር በላይ ቤንዚን ከሰባት ተጠርጣሪዎች ጋር ተያዘ

*******

(የፌ.ሥ.ፀ.ሙ.ኮ ጥር 8/2017 ዓ.ም አዲስ አበባ) በድሬደዋ ከተማ አስተዳደር በሕገ ወጥ መንገድ በቤት ውስጥ የተከማቸ ከ12 ሺህ ሊትር በላይ ቤንዚን ከሰባት ተጠርጣሪዎች ጋር መያዙን የአስተዳደሩ የንግድ፣ ኢንዱስትሪና ኢንቨስትመንት ቢሮ አስታወቀ።

ቢሮው ሕገ ወጥ የነዳጅ ግብይት በሚፈፅሙ ማደያዎች ላይ ጥብቅና አስተማሪ እርምጃ የመውሰዱን አጠናክሮ እንደሚቀጥል ገልጿል።

የድሬደዋ ንግድ ኢንዱስትሪና ኢንቨስትመንት ቢሮ የነዳጅ ዋጋ ማሻሻያውን ተከትሎ በከተማው እየተካሄደ የሚገኘውን የነዳጅ አቅርቦትና ግብይት የተመለከተ መግለጫ ለመገናኛ ብዙሃን ሰጥቷል።

በቢሮው የንግድ ፅህፈት ቤት ኃላፊ አቶ አሚኖ ጠሃ እንደተናገሩት፤ በከተማዋ የሚገኙ ማደያዎች በተሻሻለው የነዳጅ ዋጋ መሠረት ነዳጅን በፍትሃዊነት ለተጠቃሚው እንዲያቀርቡ ክትትልና ቁጥጥር እየተደረገ ይገኛል።

ነገር ግን አንዳንድ ማደያዎች መንግስት በከፍተኛ ድጎማ የሚያመጣውን ነዳጅ በሕገ ወጥ መንገድ እያሰራጩ መሆኑ ተደርሶበታል ብለዋል።

ችግሩን ለመከላከል እና ነዳጅን በፍትሃዊነት ለታለመለት አላማ ለማዋል የፀጥታና የፍትህ አካላት የተካተቱበት ግብረሃይል ተቋቁሞ የተቀናጀ ክትትል እያደረገ ይገኛል ብለዋል።

በዚሁ መሰረተ በተደረገ ክትትል እና ህብረተሰቡ በሰጠው ጥቆማ በህገ ወጥ መንገድ በቤት ውስጥ ተከማችቶ የተገኘ ከ12 ሺህ 700 ሊትር ቤንዚን መያዙን ተናግረዋል።

ቤንዚኑን በመኖሪያ ቤታቸው የደበቁ እና በህገ ወጥ ተግባራት ላይ ተሰማርተዋል የተባሉ ሰባት ተጠርጣሪዎች በቁጥጥር ስር ውለው ጉዳያቸው በህግ እየታየ መሆኑንም ተናግረዋል።

ነዳጅን በበርሜል በህገ ወጥ መንገድ ሲሸጡ የተደረሰባቸው ሁለት የነዳጅ ማደያዎች ሀላፊዎች በህግ ቁጥጥር ስር እንዲውሉ ማድረጉን ገልጸዋል።

በእነዚህ አካላት ላይ አስተማሪ እርምጃ የሚወሰድባቸው መሆኑን ጠቅሰው ሌሎቹም ማደያዎች ከመሰል ህገ ወጥ ተግባር ራሳቸውን እንዲጠብቁ አሳስበዋል።

በህገ ወጥ ተግባራት ላይ በተሰማሩ ማደያዎች ላይ የሚወሰደው እርምጃ ተጠናክሮ እንደሚቀጥል መግለፃቸውን ኢዜአ ዘግቧል።

ከሙስና የፀዳች እና የበለፀገች ኢትዮጵያን ዕውን እናድርግ!

#NCRS ሞባይል መተግበሪያ

#ለAndroid ስልክ ተጠቃሚዎች
https://play.google.com/store/apps/details

#ለApple or iPhone ስልክ ተጠቃሚዎች
https://apps.apple.com/us/app/ncrs/id6593662319

የ36 የመንግስት ሠራተኞች ወርሃዊ ደሞዝ በራሱ የባንክ አካዉንት እንዲገባለት ያደረገዉ የፋይናንስ ሠራተኛ በእስራት ተቀጣ

*******

(የፌ.ሥ.ፀ.ሙ.ኮ ጥር 8/2017 ዓ.ም አዲስ አበባ) በምስራቅ ሀረርጌ ዞን ግራዋ ወረዳ ዉስጥ በሀሰተኛ ሰነድ የ36 የመንግስት ሠራተኞች የወር ደሞዝ በራሱ የባንክ አካዉንት እንዲገባ ያደረገዉ የፋይናንስ ሠራተኛ በእስራት መቀጣቱን የምስራቅ ሀረርጌ ዞን አቃቤ ህግ ፅህፈት ቤት ገልጿል።

የፅህፈት ቤቱ መግለጫ እንደሚያሳየዉ ተከሳሽ አሊዬ ኡመር የግራዋ ወረዳ የፋይናንስ ፅህፈት ቤት የመንግስት ሠራተኞች የክፍያ አስተዳደር ባለሙያ ነዉ።

ተከሳሹ ያልተገባ ጥቅምን ለማግኘት ሲል የ36 የመንግስት ሠራተኞችን የአንድ ወር ደሞዝ 5 መቶ 29 ሺህ 639 ብር በራሱ አካዉንት ማስገባቱ በተደረገዉ የኦዲት ምርመራ ሊረጋገጥ ችሏል ተብሏል።

ተከሳሹ የካቲት 30/2016 ዓ.ም ለሠራተኞቹ የተዘጋጀዉን የደሞዝ ፔሮል መክፈያ ቅፅን ካፀደቀ በኃላ የኢትዮጵያ ንግድ ባንክ ግራዋ ቅርንጫፍ በመሄድ የወንጀል ድርጊቱን መፈፀሙ ተረጋግጧል።

ከሀምሌ 1/2014 ዓ.ም ጀምሮ እስከ የካቲት 30/2016 ዓ.ም ድረስ በተደረገዉ የኦዲት ግኝት የተነሳ ወንጀሉ ሊጋለጥ እንደቻለ ተገልጿል።

የምስራቅ ሀረርጌ ዞን አቃቤ ህግ ፅህፈት ቤት የሙስና ወንጀሎችን ለመከላከል የወጣዉን አዋጅ ቁጥር 881/2007 አንቀፅ 23 በመጥቀስ ክስ መስርቷል።

ክሱን ሲከታተል የቆየዉ የምስራቅ ሀረርጌ ዞን ከፍተኛ ፍርድ ቤት ተከሳሹን ጥፋተኛ በማለት በ4 አመት ከ6 ወር እስራትና በ7 ሺህ ብር መቀጮ እንዲቀጣ የወሰነበት መሆኑን የምስራቅ ሀረርጌ ዞን አቃቤ ህግ ፅህፈት ቤት ገልጿል፡፡

ከሙስና የፀዳች እና የበለፀገች ኢትዮጵያን ዕውን እናድርግ!

#NCRS ሞባይል መተግበሪያ

#ለAndroid ስልክ ተጠቃሚዎች
https://play.google.com/store/apps/details

#ለApple or iPhone ስልክ ተጠቃሚዎች
https://apps.apple.com/us/app/ncrs/id6593662319

ጉቦ ሲቀበሉ እጅ ከፍንጅ የተያዙ 4 ባለሙያዎች በፖሊስ ቁጥጥር ስር ዋሉ

*******

(የፌ.ሥ.ፀ.ሙ.ኮ ጥር 8/2017 ዓ.ም አዲስ አበባ) በዛሬው ዕለት በፖሊስ ተጠርጥረው በቁጥጥር ስር የዋሉት 3 ባለሙያዎች የአዲስ ከተማ ክፍለ ከተማ አነስተኛ ግብር ከፋዮች የደረሰኝ ቁጥጥር ባለሙያዎች ናቸው።

የቅርንጫፍ ፅ/ቤቱ ዋና ስራ አስኪያጅ ወ/ሮ ሙሉ ኃይለሚካሄል እንደገለፁት በቁጥጥር ስር የዋሉት 3 የደረሰኝ ቁጥጥር ባለሙያዎች በወረዳ 7 አውቶቡስ ተራ አካባቢ ከቶፕ ውሃ ሽያጭ ባለሙያ በደረሰኝ ቁጥጥር 5 ሺህ ብር ጉቦ መቀበላቸው በአካባቢው ድርጊቱን ሲታዘቡ የነበሩ ሰዎች ባደረሰው ጥቆማ ነው።

ፖሊስ ከግለሰቦቹ በደረሰው ጥቆማ መሰረትም ከቁጥጥር ባለሙያዎቹ አስተባባሪ ቦርሳ በፍተሻ የተቀበሉት 5 ሺህ ብር በማግኘቱ በቁጥጥር ስር እንዲውሉ አድርጓል ብለዋል ።

በአሁኑ ወቅትም ተጠርጣሪዎቹ በፖሊስ ቁጥጥር ስር ውለው ጉዳያቸው እየተጣራ መሆኑ ለማወቅ ተችሏል።

በተመሳሳይ የመርካቶ ቁጥር 1 መካከለኛ ግብር ከፋዮች ቅርንጫፍ ፅ/ቤት የታክስ ኦዲተር የሆነ ግለሰብ የ150 ሺህ ብር ጎቦ በመቀበሉ በቁጥጥር ስር ውሏል።

ተጠርጣሪው ግለሰብ በቁጥጥር ስር ሊውል የቻለው የፌዴራል ወንጀል ምርመራ በደረሰው ጥቆማ መሰረት በተደረገ ክትትል ሲሆን፣ ግብር ከፋዩ ለመንግስት መክፈል ያለበትን ግብር ለመቀነስ በመስማማት ከጠየቀው 150 ሺህ ብር 100 ሺህ ብሩ በቼክ መቀበሉም ተረጋግጧል።

ይሁንና ቀሪው 50 ሺህ ብር በጥሬ ገንዘብ ሲቀበል እጅ ከፍንጅ ተይዞ በአሁኑ ወቅት ጉዳዩ በህግ እየታየ መሆኑን ከአዲስ አበባ ገቢዎች ቢሮ የተገኘው መረጃ ያመለክታል።

ከሙስና የፀዳች እና የበለፀገች ኢትዮጵያን ዕውን እናድርግ!

#NCRS ሞባይል መተግበሪያ

#ለAndroid ስልክ ተጠቃሚዎች
https://play.google.com/store/apps/details

#ለApple or iPhone ስልክ ተጠቃሚዎች
https://apps.apple.com/us/app/ncrs/id6593662319

በክልሉ ከ372 ሚሊዮን ብር በላይ የተመዘበረ የህዝብ ሀብት ማስመለስ ተችሏል - ኮሚሽኑ

*******

(የፌ.ሥ.ፀ.ሙ.ኮ ጥር 9/2017 ዓ.ም አዲስ አበባ) በደቡብ ኢትዮጵያ ክልል 372 ሚሊዮን ብር በላይ የተመዘበረ የመንግስት እና የህዝብ ሀብት ማስመለስ መቻሉን የክልሉ የሥነምግባር እና የፀረ-ሙስና ኮሚሽን አስታወቀ።

የኮሚሽኑ ኮሚሽነር ሶፎንያስ ደስታ እንደገለጹት በበጀት ዓመቱ ስድስት ወራት 36 የሙስና ጥቆማዎች ለተቋሙ ደርሰዋል።

በደረሰው ጥቆማ መሰረት 6 ሚሊዮን 908 ሺህ 789 ብር እዲሁም 8 የመንግስት ቤቶች፣ 1 ሀሰተኛ የይዞታ ማረጋገጫ እና ሌሎች የመንግስትና የህዝብ ሀብት በቅድመ መከላከል ስራ ማዳን መቻሉን ጠቁመዋል።

ኮሚሽኑ በ6 ወራት ባከናወነው የብልሹ አሰራር እና የፀረ-ሙስና ትግል ከ17 ሺህ ካሬ በላይ የከተማ መሬት፣ 30 ሄክታር የገጠር እርሻ ይዞታ እና ሌሎች የመንግስትና የህዝብ ሀብት ወደ መንግስት ካዝና እንዲመለሱ ማድረጉን አመልክተዋል።

በአጠቃላይ በግማሽ ዓመቱ 372 ሚሊዮን 945 ሺህ 11 ብር የተመዘበረ የመንግስትና የህዝብ ሀብት ማስመለስ ተችሏል ነው ያሉት ኮሚሽነሩ።

በተያያዘም በግማሽ ዓመቱ የ10 ሺህ አመራሮችና የመንግስት ሰራተኞች ሀብት ለመመዝገብ ታቅዶ የ11 ሺህ 03 አመራሮችና የመንግስት ሰራተኞች ሀብት መመዝገብ መቻሉንም ጠቁመዋል።

የፀረ-ሙስና ትግሉ የሁሉንም ዜጎች ርብርብ የሚጠይቅ ነው ያሉት ኮሚሽነር ሶፎንያስ፥ ሁሉም የክልሉ ነዋሪዎች አጠራጣሪ ነገር ሲገጥማቸው የተቋሙን ጥቆማ የመቀበያ አማራጮች በመጠቀም ግዴታቸውን እንዲወጡ ማሳሰባቸውን ኢዜአ ዘግቧል።

ከሙስና የፀዳች እና የበለፀገች ኢትዮጵያን እውን እናድርግ!

#NCRS ሞባይል መተግበሪያ

#ለAndroid ስልክ ተጠቃሚዎች
https://play.google.com/store/apps/details

#ለApple or iPhone ስልክ ተጠቃሚዎች
https://apps.apple.com/us/app/ncrs/id6593662319