ሙስና የብልጽግና ፓርቲ ቀይ መስመር በመሆኑ ከፓርቲው ጋር ቅንጅታዊ አሠራር በመዘርጋት ችግሩን መከላከል እንደሚገባ ተገለፀ

***********************

(ፌ.ሥ.ፀ.ሙ.ኮ ታህሳስ 14/2017 ዓ.ም አዲስ አበባ) በደቡብ ኢትዮጵያ ክልል ብልጽግና ፓርቲ ቅ/ጽ/ቤት የአደረጃጀት ዘርፍ ከክልሉ የሥነምግባር እና የፀረ-ሙስና ኮሚሽን ጋር በመቀናጀት ሙስናን ለመከላከል የሚያስችል የምክክር መድረክ በአርባ ምንጭ ከተማ እየተካሄደ መሆኑ ተገልጿል።

በመድረኩ የመክፈቻ ንግግር ያደረጉት የደቡብ ኢትዮጵያ ክልል የሥነምግባር እና የፀረ-ሙስና ኮሚሽን ኮሚሽነር አቶ ሶፎንያስ ደስታ ኮሚሽኑ ሙስናን ለመከላከል የሚያስችሉ ተግባራትን በማከናወን ላይ እንደሚገኝ ጠቅሰዋል።

በሥነምግባር የታነፁ ዜጎችን ማፍራት በተለይ ህፃናት ላይ መስራት፣ አስቸኳይ የመከላከል ስራ በመስራት የህግ ተጠያቂነትን ማረጋገጥ የኮሚሽኑ ቀዳሚ ተግባራት መሆናቸውን ገልፀዋል።

በ2016 በጀት ዓመት ኮሚሽኑ ሙስናን በመከላከል ረገድ በሰራዉ ስራ 181 ሚሊዮን 305 ሺህ 174 ብር ማዳን እንደቻለ ኮሚሽነሩ ገልፀዋል።

በተመሳሳይ መልኩ በደቡብ ኢትዮጵያ ክልል በ2017 የመጀመሪያው ሩብ ዓመት ብቻ በ6 ዞኖች በተደረገ ክትትል ከ327 ሚሊዮን ብር በላይ ማዳን እንደተቻለ ተገልጿል።

በክልሉ የከተማና ገጠር መሬት፣ ግዢና ጨረታ፣ ገቢ፣ ኮንስትራክሽን፣ ልማትና እርዳታ እና የንግድ ስርዓት ከፍተኛ ምዝበራ የሚስተዋልባቸዉ ዘርፎች መሆናቸው ተጠቁሟል።

ሙስና የብልጽግና ፓርቲ ቀይ መስመር በመሆኑ በፓርቲው አስተባባሪነት በየደረጃው የሚገኙ የፓርቲው የአደረጃጀት ዘርፍ አስተባባሪዎች፣ የመሠረታዊ ድርጅት ሰብሳቢዎች የበኩላቸውን ትግል እንዲያደርጉ ተጠይቋል።

በመድረኩ የደቡብ ኢትዮጵያ ክልል ብልጽግና ፓርቲ ቅ/ጽ/ቤት አመራሮች፣ የዞን የአደረጃጀት ዘርፍ ኃላፊዎች፣ የመሠረታዊ ድርጅት ሰብሳቢዎች እና የኮሚሽኑ አመራሮች እየተሳተፉ መሆኑን ከኮሚሽኑ የማህበራዊ ትስስር ገፅ የተገኘው መረጃ ያመላክታል።

ከሙስና የፀዳች እና የበለፀገች ኢትዮጵያን ዕውን እናድርግ!

#NCRS ሞባይል መተግበሪያ

#ለAndroid ስልክ ተጠቃሚዎች
https://play.google.com/store/apps/details

#ለApple or iPhone ስልክ ተጠቃሚዎች
https://apps.apple.com/us/app/ncrs/id6593662319

በሙስና እና በተደራጁ ወንጀሎች ምክንያት ከዓለምዓቀፉ ማህበረሰብ ሰፊ ሀብት እየተመዘበረ መሆኑ ተጠቆመ

************************

(ፌ.ሥ.ፀ.ሙ.ኮ ታህሳስ 14/2017 ዓ.ም አዲስ አበባ) ኢትዮጵያ "በወንጀል የተገኘ ሃብት ማስመለስን ቀጣይነት ላለው ማህበራዊ እና ኢኮኖሚያ ልማት መሳካት" በሚል ርዕስ ከሀምሳ ሀገራት የተውጣጡ እና ከተለያዩ ዓለምዓቀፍ ተቋማት የመጡ ተሳታፊዎችን ያካተተ ዓለምአቀፍ የባለሙያዎች የውይይት መድረክ በአዲስ አበባ ተካሄዷል።

በመድረኩ የተገኙት የፍትህ ሚኒስቴር የጠቅላይ ዐቃቤ ህግ ዘርፍ ሚኒስትር ዴኤታ ክቡር አቶ ተስፋዬ ዳባ በሙስና፣ በኢኮኖሚ እና በተደራጁ ወንጀሎች ምክንያት ከዓለምዓቀፉ ማህበረሰብ ሰፊ ሀብት እየተመዘበረ መሆኑን ጠቅሰዋል።

ከዚህ በፊት ይህን መሰል አደገኛ ወንጀል የሚሰሩ ወንጀለኞች የመዘበሩትን ሀብት ለማስመለስ ተገቢው ትብብር ሳይደረግ በመቅረቱ ወንጀለኞቹ እየተጠናከሩ መምጣታቸውና ወንጀል በመፈጸም ያገኙትን ሀብት ለሽብር ወንጀል መፈጸሚያ ሲያውሉት በመስተዋሉ ዓለምዓቀፉ ማህበረሰብ ተገቢ የሆነ ዓለምዓቀፋዊ ምላሽ ለመስጠት እንዲያስብ ያስቻሉ አጋጣሚዎች መኖራቸውን አንስተዋል፡፡

ሚኒስትር ዴኤታው እንደገለጹት የኢትዮጵያ መንግስትም በወንጀል የተገኘ ሃብትን ለማስመለስ ቁርጠኛ መሆኑን የሚያረጋግጥ ህግ አዘጋጅቶ በሥራ ላይ ለማዋል የህዝብ ተወካዮች ምክር ቤት በውይይት ላይ መሆኑን አንስተዋል።

በዚህም የፍትህ ሚኒስቴር ተገቢውን ህግ ከማርቀቅ ባለፈ እራሱን የቻለ የሃብት ምርመራና ማስመለስ ዳይሬክቶሬት ጀነራል አቋቁሞ ወደስራ ከገባ በኋላ ጥሩ ሊባል የሚችል ውጤት ማሳየቱን ጠቅሰዋል፡፡

በቀጣይም የኢትዮጵያ መንግስት በወንጀል የተገኘ ሀብትን ለማስመለስ ከሌሎች ሀገራትና ዓለምዓቀፍ ተቋማት ጋር ተገቢውን የህግ ትብብር ስራ የሚሰራ መሆኑን ተናግረዋል፡፡

በመድረኩም ሀገራት በዓለም-ዓቀፍ የሀብት ማስመለስ ሂደት የሚያስመልሱትን ሀብት ለማህበራዊ እና ኢኮኖሚያዊ ልማት መሳካት የሚያውሉበት ሁኔታዎች ላይ ጥናታዊ ጽሁፎች ቀርበው ውይይት ተደርጓል።

ኢትዮጵያን በተመለከተ በወንጀል የተገኘ ሀብትን ከሀገር ውስጥም ሆነ ውጭ ሀገራት ለማስመለስ የሚያስችል ህግ በፍትህ ሚኒስቴር ተዘጋጅቶ ለህዝብ ተወካዮች ምክር ቤት እንደቀረበ እና ህጉም መሰረታዊ የሚባል ለውጥን ሊያመጣ የሚችል ይዘት እንዳለው ተጠቅሶ ቀርቧል፡፡

ሕጉ ምንጩ ያልታወቀ ሀብትን በተመለከተ ማንኛውም ሰው ተጠያቂ የሚሆንበትን አሰራር ይዞ መምጣቱ እንደጥሩ አቋም መወሰዱ ተጠቅሶ ከተሳታፊዎችም አስተያየት ተስጥቷል፡፡

በሌላ በኩል የፍትህ ሚኒስቴር የወንጀል ክስ በተለያየ ምክንያት ሲቋረጥ ሀብት በድርድር የሚመለስበትን ሁኔታ የሚገዛ አሰራር ቀርጾ ወደስራ ከገባ በኋላ በዚህ አሰራር ምክንያት የወንጀል ክስና ምርመራቸው በተለያየ ምክንያት ከተቋረጠ የህገወጥ የሀዋላ ዝውውር መዛግብት ብር 200,000,000.00 (ሁለት መቶ ሚሊዮን) ለማስመለስ ስምምነት ተደርጎ እስካሁን ብር 73,000,000.00 (ሰባ ሶስት ሚሊዮን) ያስመለሰ ስለመሆኑ እንዲሁም ለብሔራዊ ባንክ ገቢ መረግ ከነበረበት የውጭ ምንዛሪ ውስጥ እስካሁን USD 8,000,000.00 (ስምንት ሚሊዮን) የአሜሪካን ዶላር ለማስመለስ ስምምነት ተደርጎ USD 3,677,107.99 (ሶስት ሚሊዮን ስድስት መቶ ሰባ ሰባት ሺህ አንድ መቶ ሰባት) የአሜሪካን ዶላር የተመለሰ መሆኑ እንደተሞክሮ ቀርቧል፡፡

ውይይቱ ለሶስት ቀናት የተካሄደ ሲሆን፥ በወንጀል የተገኘ የሀብት ማስመለስ እና የሚመለሰውን ሐብት ለኢኮኖሚያዊና ማህበራዊ ልማት ውጤታማ በሆነ መልኩ ስለሚውልበት ሁኔታ የተለያዩ ጥናታዊ ጽሁፎች በተለያዩ ሀገራት ባለሞያዎች ቀርቦ ውይይት መደረጉን ከፍትህ ሚኒስቴር የማህበራዊ ትስስር ገፅ የተገኘው መረጃ ያመለክታል፡፡

ከሙስና የፀዳች እና የበለፀገች ኢትዮጵያን ዕውን እናድርግ!

#NCRS ሞባይል መተግበሪያ

#ለAndroid ስልክ ተጠቃሚዎች
https://play.google.com/store/apps/details

#ለApple or iPhone ስልክ ተጠቃሚዎች
https://apps.apple.com/us/app/ncrs/id6593662319

ለልማት በሚል ገንዘብ ሰብስበው ለግል ጥቅም ያዋሉ በእስራትና በገንዘብ ተቀጡ

************************

(ፌ.ሥ.ፀ.ሙ.ኮ ታህሳስ 14/2017 ዓ.ም አዲስ አበባ) በሸገር ከተማ አስተዳደር ለልማት በሚል ከማህበረሰቡ ከ3 ሚሊየን ብር በላይ በመሰብሰብ ለግል ጥቅም በማዋል የተከሰሱ በጽኑ እስራትና በገንዘብ እንዲቀጡ የኦሮሚያ ክልል ሸገር ከተማ ከፍተኛ ፍርድ ቤት 1ኛ ወንጀል ችሎት ወሰነ።

የኦሮሚያ ክልል ፍትህ ቢሮ የሸገር ከተማ ቅርጫፍ ጽህፈት ቤት ዐቃቤ ሕግ 1ኛ በሸገር ከተማ በሱሉልታ ክፍለ ከተማ የወሰርቢ ወረዳ አስተዳዳሪ ወይዘሮ ሲፈሌቴ ከበደ፣ 2ኛ የወረዳው የፋይናን ጽህፈት ቤት ኃላፊ አሸብር ኦልጅራ፣ 3ኛ የማዘጋጃ ቤት ኃላፊ ጉታ ኤጀሬ እና የወረዳው የገቢዎች ቢሮ ኃላፊ ገመቹ ማሞ የተባሉ አመራሮች ላይ በ1996 ዓ.ም የወጣውን የወንጀል ህግ አንቀጽ 32 ንዑስ ቁጥር 1 ሀ እና የሙስና ወንጀሎችን ለመደንገግ የወጣውን አዋጅ ቁጥር 881/2007 አንቀጽ 9 ንዑስ ቁጥር 1 እና 2 ስር የተመላከተውን ድንጋጌ ጠቅሶ ክስ አቅርቦባቸው ነበር።

በዚህ ባቀረበው ክስ ዝርዝር ላይ እንደተመላከተው ተከሳሾቹ ከሸገር ከተማ አስተዳደርም ሆነ ከክፍለ ከተማው ፍቃድ ሳይሰጣቸው በ2016 ዓ.ም በሱሉልታ ክፍለ ከተማ ወሰርቢ ወረዳ ከተለያዩ ባለሃብቶች እና ከሌሎች የማህበረሰቡ ክፍል ለልማት በሚል በህገ ወጥ መንገድ በራሳቸው ስም በከፈቱት የባንክ ሂሳብ 3 ሚሊየን 80 ሺህ ብር ሰብስበው ገንዘቡን ከባንክ አውጥተው ለግል ጥቅማቸው ማዋላቸውን ጠቅሶ ዝርዝር ክስ አቅርባባቸው ነበር፡፡

በዚህ መልኩ የቀረበባቸው ክስ ዝርዝርን 2ኛ እና 3ኛ ተከሳሾች በቁጥጥር ስር ውለው ፍርድ ቤት ቀርበው የክስ ዝርዝሩ እንዲደርሳቸውና ክሱን በንባብ እንዲሰሙ ተደርጎ የወንጀል ድርጊቱን አለመፈጸማቸውን ጠቅሰው የዕምነት ክህደት ቃል በመስጠታቸው ዐቃቤ ሕግ የሰው ምስክር ቃልና የሰነድ ማስረጃን አቅርቧል፡፡

ፍርድ ቤቱ ተከሳሾቹ በተከሰሱበት ድንጋጌ ስር እንዲከላከሉ በሰጠው ብይን የዐቃቤ ሕግ ማስረጃን በተገቢው መከላከል ባለመቻላቸው ባሳለፍነው ሳምንት የጥፋተኝነት ውሳኔ አስተላልፎባቸዋል።

ቀደም ሲል ሸሽታ ሳትያዝ የቀረችው የወረዳው አስተዳዳሪ ነበረች የተባለችው ሲፈሌቴ ከበደ በቁጥጥር ስር ውላ ችሎት ቀርባ የነበረ ሲሆን÷ ከሳሽ ዐቃቤ ሕግ ለጊዜው በቁጥጥር ስር እስክትውል በፍርድ ቤቱ የተቋረጠው የተከሳሿ ጉዳይ ተነጥሎ እንዲቀጥል በችሎት ጠይቆተለዋጭ ቀጠሮ ተሰጥቷል።

ከዚህም በኋላ ፍርድ ቤቱ የጥፋተኝነት ፍርድ ያስተላለፈባቸውን 2ኛ እና 3ኛ ተከሳሾች ያቀረቡትን የቅጣት አስተያየት በመያዝ እያንዳንዳቸውን በ5 ዓመት ከ6 ወራት ጽኑ እስራትና በ5 ሺህ ብር የገንዘብ መቀጮ እንዲቀጡ መወሰኑን ኤፍቢሲ ዘግቧል።

ከሙስና የፀዳች እና የበለፀገች ኢትዮጵያን ዕውን እናድርግ!

#NCRS ሞባይል መተግበሪያ

#ለAndroid ስልክ ተጠቃሚዎች
https://play.google.com/store/apps/details

#ለApple or iPhone ስልክ ተጠቃሚዎች
https://apps.apple.com/us/app/ncrs/id6593662319

የፍርድ ውሳኔን በመሻር ታራሚ እንዲፈታ ትዕዛዝ የሰጡ ዳኞች በእስራት ተቀጡ

****

(የፌ.ሥ.ፀ.ሙ.ኮ ታህሳስ 14/2017 ዓ.ም አዲስ አበባ) የጠቅላይ ፍርድ ቤትና የሰበር ሰሚ ችሎት ውሳኔን በመሻር ከስልጣናቸው ውጪ ታራሚ እንዲፈታ ትዕዛዝ የሰጡ ዳኞች በ1 ዓመት እስራት እንዲቀጡ የጋምቤላ ከተማ አካባቢው ከፍተኛ ፍ/ቤት ወንጀል ችሎት ወሰነ።

ተከሳሾቹ 1ኛ የአኘዋሃ ዞን ከፍተኛ ፍርድ ቤት ም/ፕሬዳንትና ዳኛ አቡላ ሚዶ፣ 2ኛ ተከሳሽ የከፍተኛ ፍርድ ቤቱ ዳኛ አገቱ ኤጋላ፣ 3ኛ ተከሳሽ የዞኑ ማረሚያ ቤት የደህንነትና መሠረታዊ ፍላጎት ምክትል አዛዥ ኢንስፔክተር ኡስማን አቶዋሉ ናቸው።

የጋምቤላ ክልል ፍትህ ቢሮ ዐቃቤ ሕግ በአንደኛው ክስ ዝርዝር ላይ በ1ኛ እና በ2ኛ ተከሳሽ ላይ ብቻ የሙስና ወንጀሎችን ለመደንገግ የወጣው አዋጅ ቁጥር 881/2007 አንቀጽ 9 ንዑስ ቁጥር (1) ሀ ስር የተመለከተውን ድንጋጌ መተላለፋቸውን ጠቅሶ በስልጣን ያለአግባብ መገልገል የሚል ሙስና ወንጀል ክስ አቅርቦባቸዋል።

በዚህ በቀረበ ክስ ላይ እንደተመላከተው 1ኛ እና 2ኛ ተከሳሾች የአኝዋሃ ብሔረሰብ ዞን ከፍተኛ ፍርድ ቤት ዳኛ ሆነው በሚሰሩበት ወቅት አበኪዬው ኡጃሃ የተባለ ግለሰብ በተከሰሰበት አደንዛዥ ዕፅ ማዘዋወር ወንጀል በጋምቤላ ከተማ ከፍተኛ ፍርድ ፈጣን ችሎት የተጣለበትን የ7 ዓመት ፅኑ እስራት ተከሳሹ አግባብ አለመሆኑን ጠቅሶ ለክልሉ ጠቅላይ ፍርድ ቤትና ለሰበር ሰሚ ችሎት ይግባኝ የጠየቀ መሆኑ በክስ ዝርዝር ላይ ተጠቅሷል።

ይግባኙን የተመለከተው የክልሉ ጠቅላይ ፍርድ ቤትም ሆነ የሰበር ሰሚ ችሎት እስራቱ ተሻሽሎ ከ7 ዓመት ወደ 5 ዓመት በማውረድ በእስራት እንዲቀጣ በመወሰን እና እስራቱን ከጋምቤላ ከተማ ማረሚያ ቤት ወደ አኝዋሃ ዞን ማረሚያ ቤት ተዛውሮ እንዲፈፅም ይፈቀድለታል።

ከዚህ በኋላ ታራሚው "በጋምቤላ ከተማ ከፍተኛ ፍ/ቤትም ሆነ በጠቅላይ ፍርድ ቤት የተወሰነብኝ ቅጣት የቤተሰብ አስተዳዳሪ መሆኔን ግምት ውስጥ ያላስገባ ስለሆነ እንደገና እንዲታይልኝ " በሚል በነሐሴ 21 ቀን 2016 ዓ.ም ለአኝዋሃ ዞን ከፍተኛ ፍ/ቤት ጽፎ ያቀረበውን የማመልከቻ አቤቱታ በመቀበል ከስልጣናቸው ውጪ በመዝገብ ቁጥር 04065 አቤቱታው በቀረበበት በዛው ዕለት በዋለው ችሎት ተከሳሾቹ የጠቅላይ ፍርድ ቤትንም ሆነ የሰበር ሰሚ ችሎት ውሳኔን በመሻር ታራሚው የተወሰነበትን ገንዘብ ለመንግስት የከፈለ ስለሆነ ከእስር እንዲፈታ የሚል ውሳኔ በመወሰን ትዕዛዝ በመስጠት ታራሚው ከማረሚያ እንዲፈታ ማድረጋቸው ተጠቅሶ የጠቅላይ ፍ/ቤትን የመጨረሻ ውሳኔ የመሻርም ሆነ ጉዳዩን እንደገና የማየት ስልጣን ሳይኖራቸው የፈፀሙት ተግባር በመሆኑ በስልጣን ያለአግባብ መገልገል ሙስና ወንጀል ተከሰዋል፡፡

ሁለተኛው ክስ ደግሞ በ3ኛ ተከሳሽ ላይ ብቻ የቀረበ ሲሆን ይኸውም የሙስና ወንጀሎችን ለመደንገግ በወጣው አዋጅ ቁጥር 881/2007 አንቀጽ 10 ስር የተመለከተውን ድንጋጌ በመተላለፍ 3ኛ ተከሳሽ የአኝዋሃ ዞን ማረሚያ ቤት ም/አዛዥ ሆኖ በሚሰራበት ወቅት በ1ኛ ክስ ላን የተጠቀሰውን ክስ ጉዳይ ማስፈፀሚያ ከታራሚው ባለቤት የተላከ ገንዘብ ብር 60 ሺህ ብር በኢትዮጵያ ንግድ ባንክ አበቦ ቅርንጫፍ በስሙ በተከፈተ ሂሳብ ወጪ በማድረግ ለ2ኛ ተከሳሽ መስጠቱ ተጠቅሶ ጉቦ ማቀበል ሙስና ወንጀል ተከሷል፡፡

ከሳሽ ዐቃቤ ሕግ ከክስ ዝርዝሩ ጋር የሰውና የሰነድ የማስረጃ ዝርዝር አያይዞ በማቅረቡ ተከሳሾቹ የቀረበባቸው ክስ ከደረሳቸው በኋላ የወንጀል ድርጊቱን መፈጸማቸው አምነው ቃላቸውን መስጠታቸውን ተከትሎ የጥፋተኝነት ፍርድ ተላልፎባቸዋል።

ከዚህም በኋላ ፍርድ ቤቱ የግራ ቀኝ የቅጣት አስተያየት መርምሮና ተከሳሾቹ አምነው ቃላቸውን መስጠታቸውን ከግምት በማስገባትና ያቀረቡትን የቅጣት አስተያየት በመያዝ እያንዳንዳቸውን በአንድ ዓመት እስራትና በ3 ሺህ ብር የገንዘብ መቀጮ እንዲቀጡ መወሰኑን ኤፍቢሲ ዘግቧል።

ከሙስና የፀዳች እና የበለፀገች ኢትዮጵያን ዕውን እናድርግ!

#NCRS ሞባይል መተግበሪያ

#ለAndroid ስልክ ተጠቃሚዎች
https://play.google.com/store/apps/details

#ለApple or iPhone ስልክ ተጠቃሚዎች
https://apps.apple.com/us/app/ncrs/id6593662319