ዜጎች መልካም ሥነምግባርን እንዲላበሱ ማስተማር ከመገናኛ ብዙኃን ይጠበቃል

************************

(የፌ.ሥ.ፀ.ሙ.ኮ መጋቢት 9/2017 ዓ.ም አዲስ አበባ) የአማራ ክልል የሥነምግባር እና የፀረ-ሙስና ኮሚሽን የሚዲያ ተቋማት ከሥነምግባር ግንባታ እና ሙስና መከላከል አንጻር ያላቸውን ሚና የተመለከተ ውይይት አድርጓል።

በውይይቱ ላይ የሚዲያ ተቋማት ባለሙያዎች እና የዘርፉ መሪዎች ተሳትፈዋል።

በመድረኩ ላይ መልዕክት ያስተላለፉት የአማራ ክልል ኮሙኒኬሽን ቢሮ ኀላፊ መንገሻ ፈንታው (ዶ.ር) "ሙስና እንደ ሀገር የያዝነውን ሁሉን አቀፍ ለውጥ ወደ ኋላ የሚጎትት ብልሹ ተግባር መኾኑን በመገንዘብ በጋራ መታገል ይገባል" ብለዋል።

ሌብነት የሀገርን እድገት እና የሕዝብን ጥቅም ወደ ኋላ ለመጎትት በጥቂት አጥፊ እጆች የሚፈጸም የሥነምግባር ብልሽት ስለመኾኑም ተናግረዋል። ይህንን ተግባር በማረም በኩል የመገናኛ ብዙኃን ሚና ከፍተኛ ስለመኾኑም ጠቁመዋል።

አሚኮን ጨምሮ ሁሉም የመገናኛ ብዙኃን ተቋማት እና ባለሙያዎች የሕዝብ አገልግሎት ተቋማትን አሠራር መፈተሽ እና ማጋለጥ እንዳለባቸውም አሳስበዋል።

በተለይም ጠንካራ የምርመራ ጋዜጠኝነት ሥራን መሥራት እንደሚገባ ተናግረዋል።

የመንግሥት መሪዎች ሥልጣን እና ተጠያቂነትን ጎን ለጎን የያዙ ናቸው፣ ኀላፊነታቸውን እንዴት እየተወጡ እንደኾነ ለሕዝብ ማሳወቅ እና ያጎደሉት ነገር ሲኖርም ለተጠያቂነት አጋልጦ መስጠት ይገባል ብለዋል።

በሥነምግባራቸው፣ በሀገር ወዳድነታቸው እና በታማኝነታቸው ታዋቂ እና ሞዴል የኾኑ ሰዎችን ተሞክሮ በሚዲያ በማቅረብ መጭውን ትውልድ በምግባር ማነጽ እንደሚገባም አሳስበዋል።

በውይይቱ ላይ የተገኙት የአሚኮ ዋና ሥራ አሥፈጻሚ ሙሉቀን ሰጥየ በበኩላቸው ሙስናን በጋራ ቆሞ ከመከላከል አኳያ በርካታ ክፍተቶች መኖራቸውን ጠቁመዋል።

የአፈር ማዳበሪያን እንደ አብነት ያነሱት አቶ ሙሉቀን፣ ይህንን የሕዝብ ህልውና የኾነ ሀብት መስረቅ "ከእናት ጡት እንደመስረቅ" መቁጠር እንዴት አቃተን ሲሉ ጠይቀዋል።

የብልሹ አሠራር እና የሌብነትን ተግባር በጋራ በመቆም መታገል ለነገ የማይባል ሥራ መኾኑንም አንስተዋል።

አሚኮ በሁሉም ሚዲየሞቹ በመጠቀም በሥነምግባር የታነጸ ትውልድ የመፍጠር ኀላፊነቱን እንደሚወጣም ገልጸዋል።

አሚኮ በምርመራ ጋዜጠኝነት እና የተለያዩ ፕሮግራሞቹን በመጠቀም ብልሹ አሠራሮችን የማጋለጥ ሥራውን አጠናክሮ እንደሚቀጥልም ተናግረዋል።

የአማራ ክልል የሥነምግባር እና የፀረ-ሙስና ኮሚሽን ምክትል ኮሚሽነር ማሩ ቸኮል ሙስና እና ብልሹ አሠራርን ከመቅረፍ አንጻር የመገናኛ ብዙኃን ተጽዕኖ ከፍተኛ ነው ብለዋል።

በተለይም ሌብነትን እና ብልሹ አሠራርን የሚጠየፍ ትውልድ ከመገንባት አኳያ የመገናኛ ብዙኃን ባለሙያዎች በትጋት ሊሠሩ እንደሚገባ አሳስበዋል።

መገናኛ ብዙኃን መልካም እሴቶችን እና ባሕርያትን ማራመድ፣ ሥነምግባር የጎደላቸውን ድርጊቶች እና አመለካከቶች ደግሞ እንዳይስፋፋ መታገል አለባቸው ነው ያሉት።

የትምህርት ተቋማት፣ የሃይማኖት ተቋማት፣ የሲቪል ማኅበረሰብ እና የመሳሰሉት ተቋማት መልካም ሥነምግባርን ለተተኪው ትውልድ ለማስረጽ የሚያደርጉትን አስተምህሮ በሚዲያ ሥራ ማገዝ እንደሚገባም ምክትል ኮሚሽነሩ አስገንዝበዋል።

አቶ ማሩ እንዳሉት የተቋማትን ተግባራት፣ በጀት እና የውሳኔ አሰጣጥ ሂደቶችን በመከታተል እና ለሕዝብ ሪፖርት በማቅረብ የሕዝብ ሀብት በአግባቡ ጥቅም ላይ ስለመዋሉ መከታተልም ከመገናኛ ብዙኃን ይጠበቃል።

መልካም ሥነምግባር ለሀገር እድገት ያለውን ፋይዳ ገልጦ ማሳየት እና ዜጎች መልካም ሥነምግባርን እንዲላበሱ መምከር እና ማስተማርም ከመገናኛ ብዙኃን ባለሙያዎች ይጠበቃል ብለዋል።

ሙስናን በማጋለጥ ወንጀለኞችን ተጠያቂ ሊያደርግ የሚችል የምርመራ ጋዜጠኝነት ሥራ መከናወን እንዳለበትም ምክትል ኮሚሽነሩ አሳስበዋል።

የውይይቱ ተሳታፊ የመገናኛ ብዙኃን ባለሙያዎችም ሙስናን የሚጠየፍ ትውልድ በመፍጠሩ ረገድ የበኩላቸውን ሚና እንደሚጫወቱ ማረጋገጣቸውን አሚኮ ዘግቧል።

ሙስና እና ብልሹ አሠራርን ለመታገል በሚከናወኑ የሚዲያ ሥራዎች ላይ የክልሉ የሥነምግባር እና የፀረ-ሙስና ኮሚሽን አስፈላጊውን ትብብር ማድረግ እንዳለበትም ባለሙያዎች ገልጸዋል።

ተጨባጭ ጥፋት በተገኘባቸው ሰዎች ላይም የተጠያቂነት አሠራርን ማስፈን እንደሚገባ የመገናኛ ብዙኃን ባለሙያዎች አሳስበዋል።

ከሙስና የፀዳች እና የበለፀገች ኢትዮጵያን ዕውን እናድርግ!

#NCRS ሞባይል መተግበሪያ

#ለAndroid ስልክ ተጠቃሚዎች
https://play.google.com/store/apps/details

#ለApple or iPhone ስልክ ተጠቃሚዎች
https://apps.apple.com/us/app/ncrs/id6593662319

አገልግሎቱ በ22 አመራርና ሰራተኞች ላይ የጽሁፍ ማስጠንቀቂያና የደሞዝ ቅጣት እርምጃ ወስጃለው አለ

********

(የፌ.ሥ.ፀ.ሙ.ኮ መጋቢት 9/2017 ዓ.ም አዲስ አበባ) ተቋሙ በ2017 በጀት ዓመት ሰባት ወራት ውስጥ ብልሹ አስራርን ለማስወገድ ባከናወናቸው ተግባራት በ22 አመራርና ሰራተኞች ላይ አስተዳደራዊ እርምጃ መውሰዱን አስታወቋል፡፡

እርምጃው የተወሰደው ከደንበኞች የቀረቡ ጥቆማዎችን መሰረት በማድረግ እና አስፈላጊው ማጣሪያ ተደርጎ መሆኑን በኢትዮጵያ ኤሌክትሪክ አገልግሎት የኮሚኒኬሽን ሥራ አስፈጻሚ የሆኑት አቶ መላኩ ታዬ ለኢትዮ ኤፍ ኤም ተናግረዋል፡፡

እርምጃ ከተወሰደባቸው አመራር እና ሰራተኞች መካከል 3ቱ የፅሁፍ ማስጠንቀቂያ እና 19ኙ የደመወዝ ቅጣት የተቀጡ መሆናቸውን ስራ አስፈፃሚው ገልፀዋል፡፡

የኢትዮጵያ ኤሌክትሪክ አገልግሎት የብልሹ አሰራር እና የሙስና ጥቆማ መስጫ ዲጂታል የሞባይል መተግበሪያ ስራ ላይ ማዋሉ የሚታወስ ነው፡፡

ከሙስና የፀዳች እና የበለፀገች ኢትዮጵያን ዕውን እናድርግ!

#NCRS ሞባይል መተግበሪያ

#ለAndroid ስልክ ተጠቃሚዎች
https://play.google.com/store/apps/details

#ለApple or iPhone ስልክ ተጠቃሚዎች
https://apps.apple.com/us/app/ncrs/id6593662319

ሙስናን እና የመልካም አስተዳደር ብልሹነትን ለመቅረፍ በትኩረት መስራት እንደሚገባ ተገለጸ

******

(የፌ.ሥ.ፀ.ሙ.ኮ መጋቢት 10/2017 ዓ.ም አዲስ አበባ) በቤኒሻንጉል ጉሙዝ ክልል ሙስናን እና የመልካም አስተዳደር ብልሹነት ለመቅረፍ በትኩረት መስራት እንደሚገባ አቶ ዑሱማን አህመድ ገልፀዋል።

የክልሉ ብልጽግና ፓርቲ ቅርንጫፍ ጽ/ቤት የፖለቲካና አቅም ግንባታ ዘርፍ ኃላፊ አቶ ዑሱማን አህመድ የመልካም አስተዳደር ችግሮችንና የብልሹ አሰራር ክፍታቶችን ለማረም የሚያስችል የመወያያ ሰነድ አቅርበው ውይይት ተካሄዶበታል።

የመልካም አስተዳደር ችግሮችንና ሙስናን በመቅረፍ በሀገር ዕድገት ላይ የሚያሳድረውን ተጽዕኖ ለመግታት በትኩረት መስራት እንደሚገባ አቶ ዑሱማን አህመድ አስገንዝበዋል።

በክልሉ የብልጽግና ፓርቲ ቅርንጫፍ ጽ/ቤት ኃላፊ አቶ ኢሳቅ አብዱልቃድር በበኩላቸው በአሁኑ ወቅት መልኩን እያቀያየረ ህዝቡን እያማረረ ያለውን የኑሮ ውድነትና ዋጋ ግሽበት ጫናዎች ላይ ትኩረት በማድረግ በህገወጦች ላይ የተጠናከረ አስተዳደራዊ እርምጃ መውሰድ እንደሚገባ ተናግረዋል።

አቶ ኢሳቅ አክለውም ኮሚቴው በሕገ-ወጥ የከተማና ገጠር መሬት ወራራ፣ በየቦታው ህገ-ወጥ ኬላዎች እንዲነሱ እና ችግሮችን ለማስቀረት ትኩረት አድርጎ እንዲሰራ ማሳሰባቸውን ከኮሚሽኑ የተገኘው መረጃ ያመላክታል።

ኮሚቴው ለሚመለከታቸው አካላት የግንዛቤ ፈጠራና ስልጠና ከመስጠት ባለፈ በሁሉም የህዝብ እሮሮ የሚታዩ ችግሮችን በማጤንና በማስተካከል ለህብተሰቡ ተጠቃሚነት መስራት እንደሚገባ ተናግረዋል።

ከሙስና የፀዳች እና የበለፀገች ኢትዮጵያን ዕውን እናድርግ!

#NCRS ሞባይል መተግበሪያ

#ለAndroid ስልክ ተጠቃሚዎች
https://play.google.com/store/apps/details

#ለApple or iPhone ስልክ ተጠቃሚዎች
https://apps.apple.com/us/app/ncrs/id6593662319