⚡️ Umidjon Ergashev — ⚽️OKMK FK futbolchisi ✅

Yangi mavsum oldidan jamoa oldiga qo‘yilgan vazifalarni muvaffaqiyatli amalga oshirish, shuningdek, tarkib sifatini oshirish maqsadida OKMK professional futbol klubi qishki transfer oynasi doirasida ilk rasmiy transferini amalga oshirganini ma’lum qiladi.

Umidjon Ergashev darvozabon sifatida yuqori reaksiya tezligi, o‘yinni o‘qish qobiliyati va zarbalarga qarshi barqaror harakatlari bilan ajralib turadi. U bungacha «Navbahor» va «Nasaf» klublari safida, shuningdek, O‘zbekiston o‘smirlar hamda Olimpiya terma jamoalari tarkibida ham faoliyat olib borgan.

Yangi golkiperimiz klub miqyosida umumiy hisobda 83 ta uchrashuvda maydonga tushib, shundan 28 tasida darvozasini daxlsiz saqlab qolgan. Shuningdek, Umidjon Ergashev O‘zbekiston U-18 (5), U-19 (5), U-21 (3) va U-23 (8) terma jamoalari safida ham o‘zining ishonchli va barqaror o‘yini bilan bir nechta bahslarda samarali ishtirok etgan.

OKMK FK murabbiylar shtabi Umidjon Ergashevning reflekslari, pozitsion o‘yini va birga-bir vaziyatlardagi sovuqqonligini yuqori baholaydi. Klub yangi golkiperimizga OKMK FK safida muvaffaqiyatli o‘yinlar tilaydi.

⚽️OKMK FK ahil oilasiga xush kelibsan, Umidjon!

🕊Telegram | 📱Instagram | 📺YouTube

⚡️Hazratjon Tursunqulov — ⚽️OKMK FK futbolchisi ✅

Yangi mavsum oldidan OKMK FK klubning sport siyosati doirasida asosiy jamoa tarkibini shakllantirish bo‘yicha izchil va tizimli ishlarni amalga oshirmoqda. Ushbu jarayonda yosh, mahalliy hamda klubning uzoq muddatli rivojlanish strategiyasiga mos futbolchilarni jalb etishga alohida e’tibor qaratilmoqda.

Shuningdek, «konchilar» safini tark etgan futbolchilar o‘rnini klubning rivojlanish falsafasi, tanlangan o‘yin modeli va institutsional maqsadlariga mos ijrochilar bilan to‘ldirish asosida muvozanatli transfer siyosati izchil olib borilmoqda.

Mazkur transfer siyosati doirasida qishki transfer oynasidagi navbatdagi transfer amalga oshirildi. Yarim himoyachi Hazratjon Tursunqulov OKMK FK safini to‘ldirdi. Futbolchi bilan ikki yillik shartnoma imzolandi va u yangi mavsumdan boshlab «konchilar» sharafini himoya qiladi.

Ma’lumot uchun, 26 yoshli tayanch yarim himoyachi bunga qadar «Oq-tepa», «Metallurg», «Dinamo» hamda «Xorazm» klublarida toʻp surgan. U professional faoliyati davomida 117 ta uchrashuvda maydonga tushib, 15 ta gol va 6 ta golli uzatma muallifiga aylangan.

OKMK FK rahbariyati, yangi futbolchimizning jamoaga qo'shadigan salohiyati va yuqori darajadagi professional mahorati orqali klubimizning g'alabalari va muvaffaqiyatlarini yanada mustahkamlashga, shuningdek, uning kelajakdagi o'yinlarda jamoa o'yiniga qo'shadigan hissasi klub muvaffaqiyatlarini yanada yuksaltirishiga ishonch bildiradi.

⚽️🤝 OKMK FK ahil oilasiga xush kelibsan, Hazratjon Tursunqulov!

🕊Telegram | 📱Instagram | 📺YouTube

⚡️Behruz Asqarov — ⚽️OKMK FK futbolchisi ✅

OKMK professional futbol klubi Osiyo chempioni bilan shartnoma imzoladi. Qishki transfer oynasi doirasida klubimiz O‘zbekiston yoshlar va olimpiya terma jamoalari a’zosi, 2023-yilgi U-20 Osiyo kubogi chempioni bo‘lgan 22 yoshli markaziy yarim himoyachi Behruz Asqarovni o‘z safiga qo‘shib oldi.

Behruz Asqarov professional faoliyati davomida Toshkentning «Paxtakor» hamda Qozog‘istonning «Turon» klublari safida to‘p surib, turli chempionat va xalqaro musobaqalarda muhim tajriba to‘plagan. Markaziy yarim himoyachi sifatida u maydon markazida ishonchli va barqaror harakatlari, o‘yinni tashkil etishdagi faolligi, shuningdek, hujum va himoya o‘rtasidagi muvozanatni samarali ta’minlay olishi bilan ajralib turadi. Shu kunga qadar futbolchi klub miqyosida 55 ta uchrashuvda maydonga tushib, 2 ta gol hamda 3 ta golli uzatma muallifiga aylangan.

Shuningdek, futbolchi O‘zbekiston U-19 (6 ta o‘yin), U-20 (16 ta o‘yin) va U-23 (12 ta o‘yin) terma jamoalari safida munosib ishtirok etib, barqaror va ishonchli o‘yini bilan mutaxassislar hamda muxlislar e’tiborini qozongan. Behruz Asqarov 2023-yilda o‘tkazilgan U-20 Osiyo kubogida terma jamoamiz tarkibida chempionlikni qo‘lga kiritgan. Yangi mavsumdan boshlab olmaliqliklar sharafini himoya qiladigan iste’dodli futbolchi Behruz Asqarov bilan OKMK FK o'rtasida bir yillik shartnoma imzolandi.

OKMK FK jamoasi Behruz Asqarovga yangi bosqichdagi faoliyatida ulkan zafarlar va omad tilaydi! Ishonamizki, u o‘z iste'dodi va gollari bilan jamoamiz g'alabalariga katta hissa qo‘shadi va muxlislarimizni xushnud etadi.

🕊Telegram | 📱Instagram | 📺YouTube