والله وصلنا لمرحلة انو ماف حاجة فارقه...
*بقينا ما منتظرين اهتمام من زول... ولا حتى نسأل من زول... عادي ممكن نعلق الرسائل وكأننا عارفين المحتوى... لا بنتابع حالات الناس لا بنهتم بتفكيرهم... وصلنا لمرحلة اننا نحب نختفي ما عشان نعرف قيمتنا لا ابدآ لانو القيمه بتثبت بالمواقف ، بنختفي عشان نريح نفسنا من كمية الكذب والنفاق المجتمعي... نبعد من النقاشات لاننا متأكدين من النهاية ونكتفي بالتخطي... عااادي جدا نقول معليش وغلطانين مع اننا ما معليش وم غلطانين لكن بس عشان ننهي بداية مشكله سخيفه... وعادي نتحمل الضغوطات بكل رواق وصمت لانو ماف الزول الممكن يسندنا... نحافظ ع خصوصياتنا لانو اذا نحن ما قدرنا عليها اكيد غيرنا ما ح يقدر... عااادي نرد بتمام وعافيه وخير ووو مع انو جوانا متهشش لانو جد ملينا من المجاملات والتعاطف الظاهري... عادي ممكن نكون ع الحااافه لكن م منتظرين اليد الممكن تسحبنا ، بنسحب نفسنا بنفسنا ونواااصل... عادي ممكن نسمع مدح لكن م يأثر فينا لانو المشاعر بردت ووصلت لمرحلة التبلد العاطفي...
*بالرغم من كل فبتلقانا بسيطين لدرجة ممكن نبتسم اذا شفنا زول مبتسم مع اننا ما بنعرفو ... وتنزل دمعتنا ع موقف بسيط
*المرحله دي ممكن نسميها مرحلة الاكتفاء بالنفس !!!!!
#فاديه

بطبعي اتولدت زول مختلف في كل حاجه،طريقة تفكيري ... قراراتي ... مسؤولياتي ... نمط حياتي ... نبرة صوتي ... ملامح وشي ... مشيتي وكلامي السريع المتقطع مرات ... إحساسي ومشاعري... تنازلاتي... رغباتي طموحاتي...
* حتى لمن يدخل زول حياتي بغض النظر عن نوع العلاقه فبجد بعاملو معامله خاصه وبوفر ليو كل معايير الاهتمام ... ح ادقق في كل التفاصيل وح اركز في كل كلمه وممكن احفظها حفظ... بالمختصر ح احتويو
*طالما انو انتو اتخلقتو مختلفين بداية من بصمة الأصبع فمعناه حافظو ع ميزاتكم
#فاديه

كمية مشاكل وضغوطات تخلينا نوصل لمرحلة الإدراك... انو والله نحن اي بنحب ومتعلقين وكلو, لكن متأكدين انو ما ح نكون مبسوطين اذا رجعنا... لانو الحاجه الجوانا خلاص فترت وزهجت وملت من كترت البرود والنقاشات... نفسنا عندها حق علينا بلاش نظلمها لانو لكل حاجه كعبه مقابلها حاجه حلوه ومفرحه فانت اذا غلطت في اختياراتك ما معناه انو خلاص توقف... وااااصل ع ثقه انو ربنا ح يتلطف بيك ويعوضك ... انت إنسان من حقو يعيش مرتاح ومبسوط
#فاديه

كانت اولوياتي عباره عنك... ودعائي بإسمك ...وحديثي مع الناس عباره عن سيرتك... تفكيري يتمحور حولك... تنازلات وظلم مشاعر واهمال لم تجعلني اغض النظر عن وجودك في حياتي... وانت ماذا قدمت لي ؟!
#فاديه

والله انو نحن بالجد ناس غريبين... زول يهملنا ويثبت لينا انو وجودنا في حياتو عادي جدا ورغم كدا متعلقين بيو.... وزول تاني يثبت لينا انو وجودنا ااااهم حاجه ويوفر لينا الاهتمام والحب والتضحية ورغم كدا ما ح نفكر فيو خالص
* *
#الحب اكبر من انو نحن نظلم نفسنا بيدنا تحت مسمى الحب ،،، الحب علاقه مقدسه طاهره عظيمه ما نشوها بأسماء مستعاره
#فاديه

إحساس إنك لقيت الزول اللي انت تحلم بيو ومن جوووه قلبك انك عايذو شريك يكمل معاك حياتك... كل تفكيرك يكون عنو هو بس... تشغيلاتكم وضحكتك طالعه من قلبك لانو طيب وهدفو يسعدك... في الاول ح تكون مبسوط وتكون منتظر منو كلمه بس عشان تقول ليو ايوا وانا كمان لكن لمن تحكم عقلك ح توقف في حدود انت ختيتها لنفسك... ح تقعد مع نفسك وتفتح جروح جوا قلبك تمنعك انك تتورط في علاقه جديده حتى لو كانت مختلفه... لانو الكسر لسه بدري عليو عشان يهييل... ح تقرر انك تتعامل عادي وانو هو بالنسبه ليك زيو زي اي زول ما ح تتصرف اي تصرف يثبت ليو انك عايذو... ح تضغط ع نفسك كتيييير لانك خايف انو الحصل يتعاد وتكون مشاعرك هي الضحيه... مع انو انت متأكد انك محتاج لزول يحبك ويخليك اولوياتو ويهتم بيك ويحافظ عليك وينظم ليك حياتك ويحفزك لتحقيق طموحاتك... بس القرارات تمنع الرغبات
#فاديه

#ثم ماذا ؟!
ثم انك أصبحت غريب بعد القرب

#فاديه

#في زمن :-
*كان يجلس ويفكر بها لم يطاوعه قلبه ع البعد... كتب اليها رسالة تختصر في سؤاله :(كيف حالك بعد فراقنا يا وتيني)؟!؟!

*من جانب اخر كانت هي تبكي شوقا له... وصلتها رسالته ... رغم بساطة سؤاله لكن أربكها جدا... كتبت اليه :-
(وبعد :-ثم انك لاتفارقني لحظه يا نبضي... أراك في كل الوجوه وأبحث عنك في طرقات القلب يا منزلي الأمن ... أراك في وجه الماره يا اتجاهي الوحيد...في ابتسامة العاشقين يا عشقي ...في نظرة ابي التي محتواها انا بقربك يا طفلتي ، اتذكر عندما تناديني بطفلتي وانا انزعج من سماع هذه الكلمه لانني كنت اظن نفسي بعمر أكبر ... في براءة الاطفال فانت طفلي المدلل... في الثانيه ونصفها التي تنتظر النصف المكمل يا نصفي... في دعاء امي لي بالسعادة لانك سعادتي... في كلمات أختي عن زوجها ، لطالما كنت انت زوجي المستقبلي ... في حروف اخي عن طموحه وهدفه فلقد كنت انت هدفي ... أتذكر يا نبضي عطرك المفضل ؟!! اتعبني لوجدته في إحدى المحلات واسرعت باخذه واصبح ملازما لي في كل الملابس ليجعلني اشعر بقربك... وهل تذكر تلك الأغنية التي كانت احب اليك مني ولا ادري ما السبب؟! أصبحت صديقتها لانها كانت تنعم بحبك واخذ وقت واهمية منك اكثر ما يجب توفيره لي ، اليوم اداوم على سماعها واتمعن كلماتها لاني وجدت السبب وهو اسمي في الدقيقه الثالثه ، والثانيه السابعه ... أتذكر يا نبضي ذلك المكان الذي كان يحكي عن قصتنا ، كل يوم اجلس بقربه ظنا مني ان أراك ... كنت تعلم بمدى هيامي بأكل الايسكريم وإستمتاعي بالاضاءه ،، رغم اختلافنا لكنك كنت ترافقني لترى ابتسامتي بهذه الاشياء البسيطه ،، بعد فراقنا أصبحت وحيدة ولم يخطر ع بالي ان افعلها بمفردي وتركتها ...وعندما اخبرك بانتهاء علاقه تجمع بين اثنين أسألك ذلك السؤال الذي يحمل حزن وقلق هل ستتركني ؟! اجابتك بالنفي ووعدك لي بأنك معي لاخر العمر معللآ اجابتك بعدم وجود انثى مثلي ، كانت تريحني كلماتك لكن حدث ما كنت اخافه... بعد فراقنا أصبحت ع خصام مع النوم والأكل والعلاقات الاجتماعية فكيف افعلها وانت الذي كنت دافعي وقوتي ونفسي... اجل لم أخبرك بعد بانني انسى كثيرا ولا أكترث بما يطلبونه مني لان بالي معك وقلبي انت مالكه فكيف استطيع التركيز يا نبضي... بعد فراقنا أصبح الليل صديقي لأنه يسمع صوت كسر قلبي وانهمار ادمعي ، اما ذلك الحائط فكان يشهد جميع انهياراتي طوال الليل... عند الصباح اصبح صوت العصافير يزعجني لانه شهد معي كافة مكالماتك الصباحية... يااااا نبضي لو كان فراقنا لمصلحتي كما انت تقول فأنا بكامل قواي العقلية ارفض هذه المصلحة التي جعلتني محطمه وغريبة حتى عن نفسي ، فهل انت تعفيني عنها ؟!!!
كيف لي ان اخبرك بانك انتزعت مني أوكسجيني وابدلت مشاعري الجميلة ببرود اهلكني للحد المفرط... اي قانون يحكم ع حب بالإعدام !!!!
دمعي نزلته ...وصوتك اختفى ...وسعادتي تلاشت... وأملي انتهى... وقلبي تحطم
ايكفيك هذا ؟!
يا نبضي قل لي بأسماء الجليل اتجعلني اسقط الى القاع من هذه الحافه ام انك تسحب يدي وتعيدني الى الحياة التي سلبتها مني ؟!!!؟
***
#ثم الغت إرسال هذه الرساله واكتفت بهذا الرد :(انا بخير)
وانهارت مجددا💔
#فاديه

هكذا هو الامل ... يوما ما سوف تمطر ع قلوبنا السعاده المنتظره
#فاديه

لك انتي:-
برغم من كل همومك لكن انتي تستاهلي الفرح... كل مشاكلك ما تفكري فيها لانو اي مشكله بتحصل لخيييير واكيد مع الزمن ح تتأكدي من الحته دي... في بداية كل مشكله ح تكوني متضايقه شديد وح تحسي انو خلاص دي النهايه لكن شوفي اقول ليك حاجه ، المشكله لو ما اثرت ع مستقبلك لمدة 5 سنه ماااا تشغلي بالك بيها خالص... اطلعي من جو الحزن اللي انتي داخله فيو لانو ما يشبهك... انتي حاجه حلوه وقلبك نضيف ما تضيعي نفسك بيدك... في عمرك دا انتي واعيه وعارفه تعملي شنو ونظرتك للمستقبل كيف... عظمي نفسك وحاولي بقدر الامكان تكوني متصالحه مع ذاتك لانو راحتك انتي تبدا من راحة بالك... انتي اقوى من انو يكسرك موقف... اقوى من نظره سلبيه او كلمة محطمه تتقال ليك من اقرب الناس ليك... اقوى من الظروووف...احتفظي بإبتسامتك 💚
#فاديه

ربما احدهم ينتظر منك كلمه الاااان تصبره ع متاعبه وظروفه
#فاديه

سنمضي من قلوبهم وكأننا لم نمكث قط
#فاديه

قد نعشق التفاصيل الصغيرة كنزول اول قطرات المطر في بداية الخريف
#فاديه

رُبما نتبع اوهام ولا ندري الي أين تأخذنا نهاية الطريق لكن حتماً هي حقيقة
#فاديه

قد نجد انفسنا بين الأسطر داخل كتاب ضخم عنوانه "يروق لي "
#فاديه

تلك الطموحات التي نرسمها على ورق بسيط تنتظر منا الدافعيه والمثابرة لوصول تلك القمه التي طالما حلمنا بها
#فاديه

بنضغط ع نفسنا عشان نحافظ ع زول معييين
اذا غلط او لا ,, نحنا نعتذر ما عشان م بنحس لا ابدا
نعتذر عشان خاطر قلبو الابيض وانو نحنا متأكدين انو قدر شنو هو حنين من جوه

#نعتذر عشان البينا ما حيوقف بسبب خلاف بسيط
#نعتذر عشان ننهي الخلاف مهما كان حجمو
#نعتذر لاننا عارفين انو ممكن المشكله تتفاخم بدون اعتذار

بس كمان في مننا اللي #يعتذر عشان هو المتضرر اكتر اذا زولو بعد عنو 💔
لانو في بعدو ما ح يكون في طعم لحاجه وما ح يكون في مزاج عشان يتعامل مع غيرو بطريقه ظريفه
تلقاهو طووول اليوم #مكسور و#مهموم 💔
والاكعب من كدا تلقى مشاعرو مبعثره مااا قادر يتحكم في نفسو
ممكن ينفعل من اتفه سبب عشان يثبت لنفسو انو في سبب خلاو يكون مكسور
وهو بينو وبين نفسو #عاااارف السبب شنو
بس يحاول يخبي نفسو عشان م يظهر ضعفو
#الاعتذار عمرووو ما كان ضعف , بقدر ما هو سبب يحافظ لينا ع علاقاتنا ❤️
#فاديه

مع انهم قريبن من بعض لكن بعيدين بسبب الظروف... ومع انهم صامتين لكن جواهم كلام كتييير عايذين يقولو لبعض... بس اي واحد فيهم ما عارف يقول شنو ويبدا كيف وفي اي موضوع مفروض يتكلم... يلا دي اغلب علاقاتنا بتكون كدا مليانه حواجز مع اننا كنا متعلقين ببعض شديييد لكن بتتعامل كالغرباء ...شعور موجع بالجد
#فاديه